ڈاکٹر نسیم احمد نسیم
7011548240
………………………………
آج ہم قیاس اور موہوم امکانات کی دُنیا میں سانسیں لے رہے ہیں۔ آج ہمارے پاس دُنیا بھر کی اطلاعات اور معلومات یکجا ہیں۔ مگر اس کے باوجود ہم حقیقی زندگی اور اس کے عملی تجربات سے بیگانہ ہوتے جارہے ہیں۔ اب ہمارا تعلق زندہ رشتوں سے کم اور مادّیت سے زیادہ استوار ہوگیا ہے، نیز اب ہم اس کے بغیر زندہ بھی رہنے کا تصوّر نہیں کرسکتے۔ میری دانست میں یہ صرف صارفیت ہی نہیں بلکہ سامراجیت بھی ہے اور عالمگیریّت بھی۔ آج دُنیا کا جغرافیائی، تہذیبی اور اخلاقی نقشہ عالمگیریّت کے مقاصد اور اہداف کے حصول کے تقاضوں کے مطابق ترتیب پارہا ہے۔ عہد ِحاضر میں عالمگیریّت کا نمایاں مظہر سائنس اور ٹیکنالوجی کا اندھا دھند بڑھتا ہوا رُجحان ہے۔ یہاں اس اَمر سے انکار نہیں کیا جاسکتا کہ سائنس اور ٹیکنالوجی کے ذریعے آج ہمیں بہت سی ایسی سہولتیں حاصل ہیں جن کا نصف صدی قبل ہم تصوّر بھی نہیں کرسکتے تھے۔ مگر یہ نکتہ بھی روزِ روشن کی طرح عیاں ہے کہ ان ترقیات کے منفی اثرات کے سبب آج انسانی زندگی تنہائی، بیگانگی اور بے حسی کا مجسمہ بنتی جارہی ہے۔ آج ماہرینِ نفسیات تذبذب اور تشویس کا شکار ہیں کہ پہلے انسان کسی حادثے کے وقوع پذیر ہوجانے پر پریشان ہوجاتا تھا،اس کے اندر کا
جذبۂ ترحم اچانک جاگ اُٹھتا تھا اور وہ فوراً متاثرین کی مدد کے لیے دوڑ پڑتا تھا، مگر اب حالات یکسر تبدیل ہوچکے ہیں، اب یا تو لوگ سب کچھ دیکھتے ہوئے آگے بڑھ جاتے ہیں یا اگر ان کے پاس کچھ وقت ہوا تو وہ رُک کر حادثے کی تصویر اور ویڈیو بنانے لگتے ہیں۔
جدید دُنیا میں ہزاروں میل کے فاصلے سمٹ کر ایک چھوٹے سے اسکرین پر آچکے ہیں۔ آج انگلیوں کے پوروں سے دنیائیں بدل رہی ہیں۔ لیکن اتنی بڑی ترقیات کے باوجود انسان حد درجہ تنزلی کا شکار ہے۔ نیز ایسی تنزلی انسانی تاریخ میں کہیں نظر نہیں آتی۔ یعنی انسانی تاریخ نے ہزاروں برسوں میں تہذیب و تمدّن کا جو سفر طے کیا تھا اب وہ معکوس سمت پر رواں دواں ہے۔ گلوبلائزیشن کے بطن سے نکلی صارفیت نے ہمیں جکڑ کر اژدھے کے منہ تک پہنچادیا ہے۔ پُرانی بنیادیں ہل رہی ہیں اور کب یہ پوری طرح زمین بوس ہوجائیں ، اس کی کوئی ضمانت نہیں۔ دنیا کی ترقی یافتہ قومیں صارفیت کو فروغ دے کر دنیا کو اپنے لیے صرف بازار ہی نہیں بنارہی ہیں بلکہ اس کے سہارے سامراجیت کی بازیافت کی بھی سعیِ مسلسل کررہی ہیں۔ آج اس ناگفتہ بہ صورت حال سے پوری دنیا متاثر ہورہی ہے۔ کچھ ممالک میں ان بدلے ہوئے حالات پر فکر مندی کا اظہار بھی کیا جارہا ہے۔لیکن نتیجہ ابھی صفر سے آگے نہیں بڑھا ہے. اب سوال یہ اُٹھتا ہے کہ ان حالات میں ہمارا اَدب کہاں ہے، کیا کررہا ہے؟ نیز یہ کہ ہمارا موجودہ اَدب عہد موجود میں مربوط اور متعلق بھی ہے کہ نہیں؟ یہ بھی سوال کیا جاسکتا ہے کہ موجودہ صورتحال کی حقیقی عکاسی اور ترجمانی میں یہ کامیاب بھی ہے کہ نہیں؟ کچھ اور سوالات ہیں۔ کیا آج کا ادیب فرد اور سماج کے روایتی رشتہ اور تعلق سے آگاہ ہے؟ کیا وہ اپنے اطراف وجوانب کے تمام مسئلوں کی فہم رکھتا ہے؟ کیا وہ اپنی تہذیب اور ثقافت کے تحفظ اور اس کی بقا کے لیے پُرخلوص اور فعال ہے؟ میری دانست میں یہ سارے سوالات جواب کے شدید طلبگار ہیں۔ ہر عہد کے ادب کو چند سوالوں کا سامنا ہوتا ہے، جو اُس عہد کے تناظر اور سیاق و سباق میں کھڑے ہوتے ہیں۔ اب یہاں یہ استفسار لازمی ہے کہ کیا آج کے ہمارے موجودہ اَدیب ان سوالوں کا سامنا
تسلی بخش طور پر کررہے ہیں؟ اس سوال کا جواب اگر ہم اپنی موجودہ ادبی اور تخلیقی سرگرمیوں کا مطالعہ کرتے ہوئے دینا چاہیں تو بلاتامل کہہ سکتے ہیں کہ بہت تو نہیں، لیکن آج ہمارے کچھ ادبا کے یہاں نئے عہد اور اس کی باریکیوں کا گہرا ادراک ہے۔ و ہ عصری آگہی سے باخبر ہیں ۔ہندوپاک کے بعض سینئر اور معاصر ادبا ، شعرا اور ناقدین دنیا کی سمت و رفتار کی بابت حد درجہ محتاط بھی ہیں اور باخبر بھی۔ یہاں مثال کے طور پر سرسری ہی سہی اُردو فکشن کو پیش کیا جاسکتا ہے۔
انتظار حسین کی کہانی ’’کلیلہ و دِمنہ‘‘ نیر مسعود کی ’’اوجھل‘‘ ، اقبال مجید کی ’’آگ کے پاس بیٹھی عورت‘‘، رشید امجد کی ’’ایک مرحوم کی یاد میں‘‘، سیّد محمد اشرف کی ’’آخری سواریاں‘‘، شموئل احمد کی ’’عنکبوت‘‘، طارق چھتاری کی ’’بندوق‘‘ وغیرہ جیسی متعدد کہانیاں اور ناول پیش کیے جاسکتے ہیں۔ جو نہ صرف نئی سامراجیت کا پول کھولتے ہیں بلکہ اس قبیل کے فن پارے گلوبلائزیشن کے اثرات کو ہمارے تہذیبی وجود کے تناظر میں اجاگر کرنے میں ممد و معاون بھی ثابت ہوتے ہیں۔ یہاں اس بات کی توضیح بھی ضروری ہے کہ اَدب بار برداری کا ذریعہ نہیں ہوتا کہ اس کی پشت پر سب کچھ لاد دیا جائے۔ مگر یہ بھی سچ ہے کہ اَدب انسانی اذہان ، معاشرتی رسم و رواج اور تہذیبی مظاہر کا کردار ادا کرتا ہے۔ سیاسی اور فلاحی اداروں کے برعکس ادب کا عمل داخلی اور دیرپا ہوتا ہے۔ ادب کا معاملہ براہِ راست طور پر اپنے قاری کے باطنی احساس اور فطری جہات سے ہوتا ہے، اور ادیب اپنے عہد اور اس کے شعور و احساس کو اپنی نوعیت کے دائرے میں ایک جمالیاتی رویے کے عمل سے اس طرح گزارتا ہے کہ اس کا سانچہ بھی بدلے اور رُوحِ عصر بھی بول اُٹھے۔
جہاں تک ادب کی سماجیاتی تاریخ اور اس کی تنقید کی بات ہے تو ہمارے یہاں کچھ ایسے دانش ور، مفکر اور نقاد نظر آتے ہیں، جنہوں نے بیسویں اور اکیسویں صدی میں اپنی تحریروں کے ذریعے نئے عہد کے مزاج، اس کے تقاضے اور اس کے مثبت منفی اثرات کو نشان زد کیا ہے۔ اس ضمن میں احتشام حسین، آلِ احمد سرور، شمس الرحمن فاروقی، گوپی چند نارنگ، شمیم حنفی، ابوالکلام قاسمی، علی احمد فاطمی، ناصر عباس نیّر، رؤف پاریکھ، اشفاق احمد ورک، شافع قدوائی اور دیگر کئی اصحاب کی تحریریں سماجی و تہذیبی تجزیے اور ثقافتی و سیاسی حالات اور اَدب و سماج کے باہمی ارتباط و انضباط کو سمجھنے میں مدد کرتے ہیں۔
موجودہ عہد میں جہاں تک ہماری شاعری کا تعلق ہے تو یہ بلا تردّد کہا جاسکتا ہے کہ ہمارے یہاں تخلیق کی جا رہی بہت سی غزلیں، نظمیں اور دیگر شعری صنفیں بسیط اور معنی خیز حقائق سے حتی الامکان روشناس کرارہی ہیں۔ غزل کے مقابلے میں چونکہ نظم کا پیمانہ بڑا ہے۔ اس لیے موجودہ عہد کی افہام و تفہیم میں نظم بہت ہی کارآمد ثابت ہورہی ہے۔ غزلوں کے بھی بہت سے اشعار نئے عہد کا اصل چہرہ پیش کرنے میں کامیاب ہیں۔ اس لیے کہا جاسکتا ہے کہ آج ہمارا شعری منظرنامہ پہلے سے زیادہ وسیع ہوا ہے۔ ناصر کاظمی، عرفان صدیقی، احمد مشتاق، افتخار عارف، مظفر حنفی، شہریار، لطف الرحمن، اسعد بدایونی اور فرحت احساس کے علاوہ نئے شعرا میں درجن بھر سے زیادہ ہندوپاک کے ایسے فنکارہیں جن کے اشعار ہمیں اپنے انفرادی اور اجتماعی وجود، تہذیبی سالمیت اور ثقافتی بوقلمونی سے متعارف کرانے میں مصروف ہیں۔ اس لیے اگر ہم اتمامِ حجت کے طور پر یہ کہیں کہ اس گلوبلائزیشن کے غلغلے کے دوران ہمارا ادب بیدار ہے اور ہمیں عہد موجود کا ادراک کرانے میں کامیاب ہے، تو یہ کچھ بیجا نہ ہوگا۔
(اگر زحمت نہ ہو تو ادبی میراث کے یوٹیوب چینل کو ضرور سبسکرائب کریں https://www.youtube.com/@adbimiras710/videos
(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)
| ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔ |
