اردو کا پہلا عوامی اور ترقی پسند شاعر نظیر اکبر آبادی(غالب نامہ کے حوالے سے) - ڈاکٹر نوشاد منظر

ہندوستانی تہذیب وثقافت، امن واتحاد اور جمہوری وراثت کے علمبردار نظیر اکبر آبادی کسی رسمی تعارف کے محتاج نہیں۔ وہ فارسی، عربی کے علاوہ ہندی، پنجابی اور سنسکرت زبان سے گہری واقفیت رکھتے تھے۔ عوام اور ان کے مسائل سے آگاہ بھی تھے، انہوں نے ان مسائل کا اظہار اپنے ٹھیٹ زبان میں کیا۔ حالانکہ اشرافیہ کے ایک طبقے کو نظیر کا یہ انداز اور ان کے موضوعات پسند نہیں آئے، یہی وجہ ہے کہ نظیراکبرآبادی کی فطری شاعری کا اعتراف نہیں کیا گیا اور اس کی وجہ یہ بتائی گئی کہ نظیر نے بنیادی طور پر زندگی کے عام حقائق سے سروکار رکھا اور ان حقائق کو پیش کرنے میں کسی طرح کی پیچیدہ بیانی سے بھی اپنی شاعری کو بچانے کی کوشش کی۔ نظیراکبرآبادی کی شاعری پر کلیم الدین احمد نے ایک ایسے وقت میں توجہ دی اور ان کی شاعرانہ اہمیت کا اعتراف کیا جب ان کی طرف سنجیدگی کے ساتھ کسی نے توجہ نہیں دی تھی۔کلیم الدین احمد نے نظیرکی شاعری پر گفتگو کرتے ہوئے لکھا تھا کہ نظیر اردو شاعری کے آسمان پر تنہاستارے کی طرح درخشاں ہے۔ حالانکہ شمس الرحمن فاروقی نے اپنے مضمون ’’نظیر کے شعری کائنات میں‘‘ نظیر کے تعلق سے اچھی رائے نہیں دی ہے ۔ اس طرح ہم دیکھتے ہیں کہ دور جدید کی یہ انتہائی دو صورتیں سامنے آئیں جو ایک دوسرے کے متضاد تھیں۔ حالانکہ کلیم الدین احمد اور شمس الرحمن فاروقی دونوں ہی ہیئتی نقاد ہیں۔

نظیر اکبر آبادی کی شاعری پر ان کے ناقدین کے یہاں انتہاپسندی پائی جاتی ہے۔ مصطفی علی خاں شیفتہ نے ’’گلشن بے خار‘‘ میں خاردار انداز اختیار کرتے ہوئے لکھا ہے کہ ’’نظیراکبرآبادی کی شاعری بازاری ہے، اس لیے انھیں شاعروں میں شمار نہیں کیا جانا چاہئے۔‘‘ حالانکہ ایک مغربی مفکر فیلن نے اپنی ہندوستانی ڈکشنری میں نظیر کی تعریف کرتے ہوئے نظیرکو واحد ایسا شاعر بتایا ہے جس کے اشعار نے عام لوگوں کے دلو ںمیں جگہ بنائی ہے۔جب کہ مجنوں گورکھپوری نے نظیر اکبر آبادی کو اردو کا اول نظم نگار ثابت کرتے ہوئے لکھا ہے:

’’سب سے پہلی بات جو پہلی ہی نظر میں معلوم ہو جاتی ہے وہ یہ ہے کہ اگر قصائد و مثنویات کو نظم میں شمار نہ کیا جائے اور نظم کی اصطلاح کو جدید معنوں میں استعمال کیا جائے تو نظیر اکبر آبادی اردو کے پہلے نظم نگار ہیں۔ لکھنے کے لیے انھوں نے غزلیں بھی لکھی ہیں، اس لیے کہ غزل کا ہر طرف زور تھا اور کوئی شاعر اس وقت تک تسلیم نہیں کیا جاتا تھا جب تک کہ وہ اپنے کو غزل کا مردِ میدان ثابت نہ کردے لیکن اول تو غزل نظیر اکبرآبادی کا کارنامہ نہیں ہے۔ وہ اپنی نظموں کے بل پر زندہ رہے اور زندہ رہیں گے۔‘‘

اس تضاد بیانی کی وجہ جو بھی رہی ہو مگر ہم یہ کہہ سکتے ہیں کہ نظیر اکبرآبادی اپنی شعری دنیا خود بناتے ہیں، وہ کسی کی تقلید نہیں کرتے بلکہ اختلافات کے باوجود نظیر کے اثرات کو بعد کی نسل نے اختیار بھی کیا۔نظیر کے ناقدین نے جہاں ان کی شاعری کو بازاری اور عامیانہ کہا وہیں بعض ناقدین نے ان کی شاعرانہ خوبیوں کا اعتراف بھی کیا ہے۔ سید محمد عبدالغفور شہباز نے ’’زندگانی بے نظیر‘‘ کے نام سے اردو میں پہلی کتاب لکھی جس میں نظیر اکبر آبادی کی سوانح اور ان کی شاعرانہ خوبیوں کا تنقیدی جائزہ لیاگیاہے۔ نیاز فتح پوری نے رسالہ ’’نگار‘‘ کا نظیر اکبرآبادی نمبر شائع کیا۔ نگار کا یہ نمبر 1940 میں شائع ہوا تھا۔ اس کے بعد پروفیسر شمس الحق عثمانی نے ’’نظیر نامہ‘‘ کے نام سے ایک کتاب ترتیب دی، اس کتاب میں شامل چند مضامین تو نگار سے لیے گئے ہیں مگر بعض مضامین ایسے بھی ہیں جو اس وقت کے ناقدین نے شمس الحق عثمانی کے درخواست اور اصرار پر تحریر کی تھیں، یہی نہیں نئی نسل نظیر اکبرآبادی کے متعلق کیا سوچتی ہے، اس کا بھی خیال شمس الحق عثمانی نے رکھا اور اپنی مذکورہ کتاب میں نوجوان ناقدین کی تحریروں کو بھی جگہ دی۔

نظیر فہمی اور نظیراکبرآبادی کا اعتراف کرتے ہوئے غالب انسٹی ٹیوٹ نے دسمبر 2008 میں ایک بین الاقوامی سمینار کا انعقاد کیا تھا جس میں اردو کے اہم ناقدین نے شرکت کی تھی۔ ان مضامین کو ’’غالب نامہ‘‘ جنوری 2010 کے شمارے میں شائع کیا۔ ’’غالب نامہ‘‘ کا یہ خاص نمبر نظیر فہمی میں نہ صرف معاون ہے بلکہ نظیر کے کلام کی تفہیم میں یہ ہماری رہنمائی بھی کرتا ہے۔ میں نے ’’غالب نامہ‘‘ کے اس خاص نمبر میں شامل مضامین کو سمجھنے کی ایک کوشش کی ہے۔ ’’غالب نامہ‘‘ کے اس خصوصی نمبر میں بائیس مضامین شامل ہیں۔ ان مضامین میں سب سے پہلا مضمون پروفیسر شمیم حنفی کا بعنوان ’’نظیر کا آدمی نامہ (1735 تا 1830) ‘‘ ہے۔ نظیراکبرآبادی کی شاعری پر اعتراض کرنے والوں کے سلسلے میں شمیم حنفی نے نہایت اہم اشارے کیے ہیں۔ وہ لکھتے ہیں کہ ہمیں نظیراکبرآبادی اور اس عہد کے زمانی فاصلے کا خیال رکھنا چاہئے ، انھو ںنے خفگی کا اظہار کرتے ہوئے لکھا ہے :

’’پتا نہیں ایسا کیوں ہوتا ہے لیکن ہوتا یہی آیا ہے کہ ہم دو سو برس پہلے کے آدمی کی دنیا میں داخل ہونے کے بجائے اسے اپنی دنیا میں کھینچ بلانے پر اصرار کرتے ہیں اور افکار یا شعری اظہار کی سطح پر اس سے انھی تقاضوں کو پورا کرنے کی توقع رکھتے ہیں جو ہماری اپنی شخصیت کی ترکیب میں شامل ہیں۔‘‘(صفحہ:10)

شمیم حنفی کے مذکورہ خیالات کو پوری شاعری پر اطلاق کیا جاسکتا ہے۔ہمیں کسی بھی فن پارے کی قرأت کرتے ہوئے اس کے عہد اشاعت یا زمانہ کو پیش نظر رکھنا چاہئے، جہاں تک نظیراکبر آبادی کا تعلق ہے تو ان کی پوری شاعری کا محور ایک ایسا سماج اور معاشرہ ہے جہاں طرح طرح کے لوگ آباد ہیں۔ ان کی زندگی اور ان کے مسائل کو نظیر نے پیش کیا ہے ساتھ ہی چرند، پرند، کیڑے مکوڑے وغیرہ کے ساتھ مختلف تہواروں اور رسوم وعقائد کو بھی اپنی نظموں میں جگہ دی۔ انسان اور انسانی اقدار کا جو اظہار نظیر کے یہاں نظر آتا ہے اس کا رشتہ شمیم حنفی نے کبیر سے قائم کرنے کی کوشش کی ہے۔ ان کا خیال ہے کہ نظیر اور کبیر دونوں کے یہاں انسانی خیال اور عمل پر حدیں قائم کرنے سے صریح انکار اور ادراک، مشاہدے اور شعر حسیت کو آزاد رکھنے پر اصرار ملتا ہے۔ وہ لکھتے ہیں:

’’معلوم نہیں نظیر نے کبھی کبیر کا نام اور کلام سنا تھا یا نہیں لیکن دونوں کے یہاں انسانی خیال اور عمل پر حدیں قائم کرنے سے صریح انکار اور ادراک، مشاہدے اور شعری حسیت کو ہر حال میں آزاد رکھنے پر جو اصرار ملتا ہے، وہ دونوں میں ایک باطنی تعلق بھی استوار کرتا ہے۔ فرق یہ ہے کہ کبیر کو اپنی قلندری اور آزادہ روی کے باوجود ارضی اور مابعد الطبیعاتی حقیقتوں کے بعض مظاہر پر ناگواری اور برہمی کا احساس بھی ہوتا تھا اور کبھی کبھی مدھم لَے میں اپنی بات کہتے کہتے وہ اچانک پھٹ پڑتے تھے اور زندگی کے بے تکے پن پر اپنے غم وغصے کے اظہار میں بے قابو بھی ہو جاتے تھے۔ اس کے برعکس نظیر ہرصورت حال میں، وہ چاہے جتنی سخت، شدید، ناپسندیدہ اور بے جواز ہو، اپنے آپ کو سنبھالے رکھتے تھے۔ سنجیدہ بات کہتے کہتے اچانک مسکرانے لگتے تھے۔ اپنی افسردگی اور کوفت کو چھپالے جاتے تھے اور زندگی کی طرح موت کے یا معقولیت کی طرح مہملیت کے مانوس تماشوں کو ایک سی سہجتا کے ساتھ قبول کرتے جاتے تھے۔ بپتا کی ہر گھڑی میں وہ اپنے آپ کو دلاسہ دینے کا ہنر جانتے تھے اور اس ضمن میں کسی بیرونی سہارے کی توقع یا تلاش ان کی طبیعت سے مناسبت نہیں رکھتی تھی۔‘‘

شمیم حنفی کا خیال ہے کہ اپنی باطنی کیفیت اور تجربے کی تشکیل کے لیے نظیر جو تلازمات ڈھونڈ کر نکالتے ہیں اس معاملے میں ان کا کوئی ثانی نہیں ہے۔ نظیر کی شاعری میں معشوق کے کردار کے حوالے سے وہ لکھتے ہیں کہ چونکہ نظیر اکبرآبادی آس پاس کی زبانوں سے نہ صرف استفادہ کرتے تھے بلکہ اس کی بولی روایات کا بھی خیال رکھتے تھے، اس وجہ سے ان کی غزلوں میں محبوب کے لیے مؤنث کا صیغہ استعمال ہوا ہے، یعنی ان کا محبوب عورت ہے اور ظاہر ہے یہ غزل کی روایت سے مختلف ہے۔

قمررئیس کا مضمون ’’میاں نظیر اور ہولی کا گلال وعبیر‘‘ بھی اس شمارے میں شامل ہے۔ نظیر اکبرآبادی کی شاعری مشترکہ تہذیبی وراثت کا حصہ ہے، ان کی نظموں میں ہندوستان کی تہذیب کی روح بسی ہوئی ہے۔ ان کے یہاں ایسی نظموں کی تعداد بہت ہے جس میں مختلف تہواروں کا ذکر ملتا ہے۔ کہیں کہیں ان کا اندازناصحانہ ضرور ہو جاتا ہے مگر وہ ایسا دنیا کی بے ثباتی کو ثابت کرنے کے لیے کرتے ہیں۔ قمر رئیس نے لکھا ہے:

’’کلیات نظیر میں ہولی کے حوالے سے ایک ایسی نظم بھی ہے جس میں ایک نازک مسئلہ کو کمال ہنر سے استعاراتی رنگ میں پیش کیا گیا ہے اس کا عنوان ہے ’’ہولی سفید وزرد کی لڑائی‘‘ نظیر خوب جانتے تھے کہ ان کے عہد میں مسلمانوں کا ایک طبقہ ہولی کی رنگ افشانی سے دور رہتا ہے اور اگر اس کے سفید لباس پر عبیر وگلال کا چھینٹا بھی پڑ جائے تو اسے گناہ سمجھتا تھا۔ نظیر کے نزدیک بسنت اور پھاگن کے ایام کی مستی اور بہار ایسی فطری نعمت ہے کہ اس سے ہر فرد کو شاد کام ہونا چاہئے۔‘‘

سبھوں کے عیش کو پھاگن کا یہ مہینہ ہے

سفید و زرد میں لیکن کمال کینا ہے

طلا کار زرد کیے سر بسر خزینہ ہے

سفید پاس فقط سیم کا دفینا ہے

ہر ایک دل میں ہے رستم وزال ہولی میں

یہ ایک دلچسپ بات ہے کہ مشترکہ تہذیب کا عام طور پر جو تصور ہمارے ذہنو ںمیں یہ ہے کہ ایک مسلم شاعر جب کسی ہندو مذہب سے متعلق شاعری کرے گا اور ایک ہندو جب مسلم تہواروں اور رسوم و عقائد پر شعر کہے گا تبھی وہ مشترکہ تہذیب کا امین کہلائے گا میرا خیال ہے کہ اس تصور میں تھوڑی تبدیلی کی جانی چاہئے چونکہ ہندوستان ایک کثیرالمذاہب ملک ہے، اس لیے ایسی تمام تخلیقات جس میں اتحاد، امن اور بھائی چارگی پر زور ملتا ہے اسے ہم مشترکہ تہذیب کا حصہ کہہ سکتے ہیں، خواہ نظیر نے دیوالی پر نظم کہی ہو یا عید پر۔

خلیق انجم نے اپنے مضمون ’’نظیراکبرآبادی: تذکرہ نگاروں اور نقادوں کی نظر میں‘‘ میں مختلف تذکرہ نگاروں اور نقادوں کے اقتباس پیش کیے ہیں اور جیساکہ ابتدا میں، میں نے عرض کیا کہ نظیر کے ناقدین کے یہاں اختلاف رائے کی ایک کھائی ہے، ایک طرف جہاں انھیں اردو نظم کا بڑا شاعرکہا جاتا ہے وہیں ایسے ناقدین بھی ہیں جنھوں نے ان کی زبان اور موضوعات کو عامیانہ بتایا ہے۔ خلیق انجم نے ان اقتباس کو پیش کرکے اپنی رائے بھی دی ہے۔ ان کا خیال ہے کہ نظیر کی شاعری کو عامیانہ کہنا ان کے ساتھ ناانصافی ہوگی۔

مضمون ’’نظیراکبرآبادی بحیثیت نظم نگار‘‘ محمد ولی الحق انصاری کی ایک طویل تحریر ہے۔تقریباً 43صفحات پر مشتمل یہ مضمون نظیر اکبر آبادی کی نظموں کا بھرپور احاطہ کرتی ہے۔ ان کا خیال ہے کہ نظیر کو دانستہ طور پر نظر انداز کیا گیا ان کے معاصرین کے علاوہ دوسرے ناقدین نے بھی ان کی شاعری پرکوئی خاص توجہ نہیں دی۔ نیچرل شاعری پر زور دینے والے محمد حسین آزاد کے یہاں بھی نظیراکبرآبادی کو لے کر عدم توجہی پائی جاتی ہے ۔ نظیر کی شاعری پر گفتگو کرتے ہوئے ولی الحق لکھتے ہیں:

’’زندگی کی ناپائیداری کا احساس دو قسم کے فلسفوں کو جنم دیتا ہے۔ Stoicism Epicureanism (فلسفۂ خوش گواری) اور Stoicism۔ نظیر کے کلام میں ان دونوں کی جھلک نمایاں ہے۔ زندگی کی حقیقت سمجھ لینے کے بعد دو ہی راستے ہیں یا تو دنیا سے مکمل بے نیازی حاصل کرلی جائے اور خود کو حالات پر چھوڑ دیا جائے یا پھر جتنا بھی اس دنیا میں وقت مل سکے اسے ہنس ہنسا کر گزار دیا جائے اس لیے کہ پھر دنیا میں نہیں آنا ہے۔ تنبیہ الغافلین میں نظیر، خیام کا ہمنوا معلوم ہوتا ہے۔ وہ بار بار احساس دلاتا ہے کہ جلد ہی وقت آنے والا ہے جب نہ تم ہوگے نہ ہم ہوںگے۔ اس لیے جتنا وقت بھی دنیا میں ملے اسے ہنسی خوشی سے بسر کرلینا چاہئے۔‘‘

چمن میں چل کر بیٹھو اور صراحی جام منگائو

پیو بھر بھر کے ساغر تم بھی اور ہم کو بھی پلوائو

گلے لپٹو ہمارے اور ہمیں ہنس ہنس کے بوسہ دو

اجل کافر کھڑی ہے سر پہ اے دلدار سنتے ہو

نہ یہ چہلیں نہ یہ دھوئیں نہ یہ چرچے بہم ہوں گے

میاں اکدن وہ آوے گا نہ تم ہوگے نہ ہم ہوں گے

دراصل نظیر کی شاعری حقیقت پسندی پر مبنی ہے جس میں انسانیت کی بقا اور تحفظ پر زور دیا گیا ہے۔ وہ اس بات پر زور دیتے ہیں کہ تمام انسانوں کو زندگی کے لیے یکساں وسائل ملنا چاہئے۔ اس ضمن میں ان کی نظم ’’مفلسی‘‘ کو پیش کیا جاسکتا ہے۔ اس نظم میں سماج کو جس تناظر میں پیش کیا گیا ہے وہ قابل مطالعہ ہے۔ اس نظم میں تشبیہ و استعارے تو ہیں ہی تلمیح اور محاوروں کا بھی خوبصورت استعمال کیا گیا ہے۔

نظیر کی نظم ’’بنجارہ نامہ‘‘ ایک ایسی نظم ہے جس میں دنیا اور اس کی حقیقت کو واضح کرنے کی کوشش کی گئی ہے۔

ٹُک حرص و ہوس چھوڑ میاں مت دیس بدیس پھرے مارا

قزاق اجل کا لوٹے گا دن رات بجاکر نقارا

کیا بدھیا، بھنیا، پیتل، شُتر، کیا گونی، پلا، سربھارا

کیا گیہوں، چاول، موٹھ مٹر، کیا آگ دھواں کیا انگارا

سب ٹھاٹھ پڑا رہ جائے گا جب لاد چلے گا بنجارہ

نظیرکبھی دنیا اور زندگی کی حقیقت سے ہمیں روبرو کراتے ہیں تو کبھی اس کی بے ثباتی کی جانب توجہ مبذول کراتے ہیں۔ ولی الحق انصاری نے نظیر کی متعدد نظموں کا جائزہ لیتے ہوئے انھیں ایک قلندر صفت شاعر بتایا ہے، ایک ایسا شاعر جس نے تنقید کی فکر کیے بغیر عوام اور عوامی زبان کے لیے خود کو وقف کردیا۔

پروفیسر ابوالکلام قاسمی کا مضمون ’’نظیر کی شاعری کے تعین قدر کا مسئلہ‘‘ بھی غالب نامہ کے اس خصوصی شمارے میں شامل ہے۔ ابوالکلام قاسمی کایہ مضمون نظیر کی شاعری کے قدر کو متعین کرنے میں مدد کرتاہے۔ نظیر کے معترضین نے نظیر کی شاعری پر گفتگو کرتے ہوئے لکھا ہے کہ وہ جذبات واحساسات کے بجائے مشاہدے اور تجربات پر انحصار کرتے ہیں۔ اس ضمن میں پروفیسر ابوالکلام کہتے ہیں:

’’اتفاق سے اس نوع کے سارے اعتراضات جزوی طور پر برحق معلوم ہوتے ہیں۔ تاہم جہاں تک نظیر کی شاعری میں جذبات واحساسات سے زیادہ مشاہدے پر انحصار کا سوال ہے تو اس سلسلے میں اس بات کا اعتراف کیے بغیر کوئی چارہ نہیں کہ ان کے شعری اظہار میں جذبے کی شدت تو یقینا کم ملتی ہے مگر حسی طور پر نظیر کے حواس خمسہ جس قدر بیدار اور متحرک دکھائی دیتے ہیں اس کا بدل کم شاعروں کے یہاں تلاش کیا جاسکتا ہے۔ یوں اردو شاعری میں حسِ بصارت کے استعمال کے غالب رجحان کے برخلاف نظیر کے یہاں باصرہ کے ساتھ ساتھ سامعہ، لامسہ، ذائقہ اور شامہ جیسے احساسات اس حد تک فعال اور کارفرما ہیں کہ ان کی شاعری کو حواس خمسہ کا نگار خانہ قرار دیا جاسکتا ہے۔ اگر مکتبی انداز میں اس نکتے کی وضاحت کی جائے تو ایسے ان گنت پیکروں کی نشان دہی کی جاسکتی ہے جن میں کسی مخصوص حسی پیکر کے ساتھ ساتھ محتلف حواس پر مبنی امتزاجی اور مشترک پیکروں کی بہتات ملتی ہے۔ البتہ یہ ضرور ہے کہ وہ مغرب میں امیجری کی تحریک کے زیر اثر، پیکر تراشی کے ساتھ استعارہ سازی نے ہم آمیز ہو کر امیجری اور پیکر تراشی کو جس نقطہ عروج پر پہنچایا اور اس کا معیار قائم کیا تھا، اس کی مثالیں نظیر کی شاعری میں ڈھونڈھے سے بھی نہیں ملتیں۔‘‘

نظیر کی شاعری کا مرکز ہی زندگی اور اس سے متعلق مختلف واقعات ہیں، وہ اپنی قوت متخیلہ کو بروئے کار لاتے ہوئے جس طرح مختلف رسوم ورواج اور موسم کا ذکر کرتے ہیں وہ قابل تقلید ہے۔ برسات کی بہاریں ہوں یا برسات سے پیڑپودے میں آنے والی ہریالی کا ذکر ہو سب نظیر کی نظموں میں موجود ہے۔ یہی خوبیاں ان کی غزلوں میں بھی موجود ہے۔ ظاہر ہے نظموں کی طرح غزل میں کسی خیال کو مربوط انداز میں پیش نہیں کیا جاسکتا مگر نظیر کے سادہ اسلوب کی جھلک یہاں بھی مل جاتی ہے۔

کھول دی چاہ، دیدئہ تر نے

یاں نہ لازم پلک بھگونا تھا

سب کتابوں کے کھل گئے معنی

جب سے دیکھی نظیر دل کی کتاب

’’نظیر اکبر آبادی کا فارسی کلام: ایک مطالعہ‘‘ شریف حسین قاسمی کا مضمون ہے۔ نظیراکبرآبادی نہ صرف فارسی زبان وادب سے واقف تھے بلکہ انھوںنے فارسی میں اشعار بھی کہے۔ شریف حسین قاسمی نے لکھا ہے کہ ’’نظیراکبرآبادی نے ایک دیوان مرتب کیا تھا جو اب دستیاب نہیں ہے۔‘‘ ظاہر ہے جب دیوان ہی دستیاب نہیں تو پھر فارسی شعر گوئی میں نظیر کی انفرادیت کیسے طے کی جاسکتی ہے۔ البتہ کلیات نظیر (اردو) میں فارسی کے چند اشعارموجود ہیں جن سے ہم نظیر کی فارسی شاعری کاعمومی جائزہ لے سکتے ہیں۔ نظیر کے فارسی کلام کا جائزہ لیتے ہوئے شریف حسین قاسمی نے لکھا ہے کہ ’’نظیر نے اپنے فارسی کلام میں بلاتکلف ہندی الفاظ استعمال کیے ہیں۔‘‘ ان کا خیال ہے کہ فارسی کلام میں نظیر کی بلند خیالی بھی نظر آتی ہے اور اردو شعری روایت کو اختیار کرتے ہوئے موضوع عشق، محبوب اور اس کی ادا، وصل وغیرہ کو پیش کیا گیا ہے۔

لطف الرحمن کا مضمون ’’نظیر تنہارنگ کا تنہا شاعر‘‘ کے عنوان سے رسالے کی زینت ہے۔ انھو ںنے اپنے مضمون کا آغاز ان جملوں سے کیا ہے کہ ’’میرا نظریہ یہ ہے کہ اردو میں نظیراکبرآبادی قلندرانہ روایت کا تنہا شاعر ہے۔‘‘ اختراورینوی نے لکھا تھا کہ ’نظیر کی نظمیں من موجی،بے خبری کا عالم اور ہر حال میں خوش رکھنے کی ترغیب دیتا ہے۔‘ اختراورینوی کی تائید ان اشعار سے ہوتی ہے۔

زر کی جو محبت تجھے پڑجاوے گی بابا

دکھ اس میں تری روح بہت پاوے گی بابا

برکھا نے کو ہر پینے کو ترساوے گی بابا

دولت جو تری یاں ہے نہ کام آوے گی بابا

پھر کیا تجھے اﷲ سے ملوادے گی بابا

زردار ہے تو ہرگز مت مار اپنے من کو

تن زیب تن سکھوں سے ترسانہ اپنے تن کو

جو نر چلن چلیں ہیں چل تو بھی اس چلن کو

مرشد کا ہے یہ نکتہ رکھ یاد اس سخن کو

دل کی خوشی کی خاطر چکھ ڈال مالِ دھن کو

گر مرد ہے تو عاشق کوڑی نہ رکھ کفن کو

شمیم حنفی نے جہاں نظیر اور کبیر کے کلام میں ممثالت کی طرف اشارہ کیا ہے مگر اختر اورینوی کا خیال ہے کہ نظیر دراصل بھگتی تحریک کے شعرا اور کبیر سے آگے ہیں۔ لطف الرحمن نظیر کی شاعری پر گفتگو کرتے ہوئے لکھتے ہیں:

’’یہ رائے حقیقت پسندی کی مظہر ہے۔ نظیر کی قلندرانہ شخصیت مذہب ومسلک کے امتیاز سے آزاد تھی۔ غیرمسلموں سے ان کی زیادہ قربت بھی رہی تھی۔ راجا بلاس رائے کے فرزندوں کے اتالیق تھے۔ آگرہ کے بازاروں کی رونق تھے۔ زوال پذیر معاشرے کے نمائندہ۔ وہ اخلاقی اور تہذیبی اور معاشرتی اور سماجی انحطاط کے جمالیاتی شاہد تھے۔ فرسودگی اور یکسانیت اس عہد کی تخصیص تھی۔ اشرافیہ طبقہ اپنی تہذیب اور زبان کے تحفظ کو وقار کا مسئلہ سمجھتا تھا۔ ان کے لیے نظیر قابل قبول ہوہی نہیں سکتے تھے۔‘‘ (صفحہ:136)

نظیر ایک ہندوستانی شاعر تھے، ہندوستانی سے میری مراد یہ ہے کہ نظیر کی شاعری میں ہندوستانی تہذیب، یہاں کی زندگی، عوام کے مسائل، مختلف رسوم ورواج یہاں تک کہ میلوں ٹھیلوں کا ذکر ترجیحی طور پر ملتا ہے۔ ہولی، شب برأت، دیوالی، بسنت، راکھی، عرس وغیرہ پر نظیر نے باضابطہ نظمیں کہی ہیں۔ انھوں نے جن تشبیہات و استعارات کو پیش کیا ہے وہ بھی خالصتاً ہندوستانی ہیں۔ معاشرے کے ہر پہلو پر شاعری اور انہی خوبیوں کی وجہ سے انھیں عوامی شاعر بھی کہا جاتا ہے۔

قاضی افضال حسین نے اپنے مضمون ’’نظیر کی برہنہ گفتاری: نظیر تنقید کا مسئلہ (چند اشارے)‘‘ میں نظیر کی شاعری اور ان کے ناقدین پر تبصرہ کیا ہے۔ انھوں نے نظیر کی شاعری میں استعمال ہوئے عوامی اور بول چال کی زبان کو عامیانہ بتایا ہے۔ شیفتہ نے نظیر کو اس لیے شاعر ماننے سے انکار کردیا تھا کیونکہ ان کے کلام کو عوامی مقبولیت (جسے انھوںنے سوقیوں کی زبان کا حاوی ہونا بتایا ہے ) حاصل تھی۔ حالانکہ شبلی نے نظیر کی سادگی اور صفائی کو میرانیس اور میرتقی میر کے برابر کا بتایا ہے۔ قاضی افضال لکھتے ہیں:

’’جہاں اردو کی معروجہ شعری روایت کے لیے اجنبی الفاظ، شعری اظہار کے بنیادی تقاضوں سے بے نیاز ہو کر بڑی بے تکلفی سے استعمال کیے گئے ہیں۔ جہاں کہیں یہ عامیانہ لفظ اپنی تنظیم کی نئی دلالت روشن کرنے میں کامیاب ہو جاتا ہے، تو شعر تخلیقی اظہار کی بنیادی شرط پوری کرتا معلوم ہوتا ہے اور جب نظیر لفظ کو اس کی لغوی سطح یا روایتی سیاق سے بلند کرنے میں ناکام ہوتے ہیں تو ان کی برہنہ گفتاری، نامانوس اور سطحی خوش فیلیوں سے زیادہ نہیں رہ جاتی۔ ‘‘ (ص: ۱۴۸)

سامنے اس صفِ مژگاں کے میں کل جاونگا

چھد تو جاونگا پر آگے سے نہ ٹل جاونگا

آخر اس بہانے سے ملا یار سے نظیر

کپڑے بلا سے پھٹ گئے سودا تو پٹ گیا

اس کے بالا ہے اب وہ کان کے بیچ

جس کی کھیتی ہے چھوک جان کے بیچ

قاضی افضال حسین نے لکھا ہے کہ نظیر اکبر آبادی کی شاعری میں خیر و شر کی تفریق نہیں ہے، ان کا خیال ہے کہ نظیر کسی واقعے کو نظم کرتے ہوئے اس کے اقداری صفات کا استعمال کم سے کم کرتے ہیں۔اس لیے نظیر کے کلام کو وہ تنقید کے لیے ایک مشکل سوال مانتے ہیں۔

محمد زماں آزردہ کا مضمون’’ نظیر اکبر آبادی کی شاعری میں مقامی رنگ‘‘بھی شامل رسالہ ہے۔ نظیر کی شاعری کلی طور پر گل و بلبل کے استعارے سے عاری تو نہیں ہے مگر اتنی بات ضرور ہے کہ ان کے یہاں گل و بلبل جیسے استعارے بہت کم استعمال ہوئے ہیں۔ان کے یہاں عشق کا تصور بھی عام تصور سے الگ تھا وہ عوام اور عوامی تقریبات میں خودکو ضم کردینا ہی اپنی کامیابی تصور کرتے ہیں۔ نظیر کو دربار کی نوکری بھی ملی تھی مگر آزاد اور قلندرانہ صفت کا حامل ہونے کی وجہ سے انہوں نے درباری نوکری اور منصب کو قبول نہیں کیا۔جہاں تک نظیر کے کلام میں مقامی رنگ کا تعلق ہے تو نظم ’’ عید الفطر‘‘ سے چند مصرعے ملاحظہ کریں۔

بیٹھے ہیں پھول پھول کے مہمانوں میں کلال

اور بھنگ خانوں میں بھی سر سبزیاں کمال

چھنتی ہیں بھینگیں اڑتے ہیں چرسوں کے دم نڈھال

دیکھو جدھر کو سیر مزا عیش قیل و قال

ایسی نہ شب برأت نہ بقرید (بقر عید)کی خوشی

جیسی ہر ایک دل میں ہے اس عید کی خوشی

محمد زماں آزردہ نے لکھا ہے کہ نظیر نے عید کو مقامی روایت، رنگ اور ماحول کی روشنی میں دیکھنے کی کوشش کی ہے۔ نظیر کی شاعری میں عوامی زندگی کے ہر رنگ کو اپنی شاعری میں پیش کیا ہے۔محمد زماں آزردہ لکھتے ہیں:

’’انصاف سے دیکھا جائے تو نظیر اپنے عہد کا ایک باغی شاعر تھا جس نے ایک طرف یہ بھی ثابت کردیا کہ وہ اپنے معاصرین سے کسی طرح کم نہیں اور ان کے میدان میں وہ بہ آسانی قدم رکھ سکتا ہے مگر اس میدان میں انھوں نے اپنے لیے توسیع کا ایسا سامان پیدا کیا کہ دوسروں کا ان وسعتوں میں قدم رکھنا اس زمانے کے مزاج اور وضع کے منافی تھا۔‘‘

چونکہ انسانیت کا حسن ہی عوام سے ہے اس لیے نظیر کی شاعری ان معنوں میں اہم کہ ان کی شاعری میں یہ حسن جگہ بہ جگہ نظر آتا ہے۔

پروفیسر شارب ردولوی کا مضمون’’ نظیر کی زبان اور اس کے تہذیبی رشتے‘‘ کے عنوان سے رسالے میں شامل ہے۔انھوں نے مضمون کے آغاز میں ہی نظیر کو زبان اور موضوع کے لحاظ سے روایت شکن شاعر بتایا ہے۔نظیر کی زبان کو سوقیانہ کہنے والے ناقدین کے حوالے سے پروفیسر شارب ردولوی لکھتے ہیں کہ نظیر کی خوبی یہ ہے کہ وہ ادبی اسلوب میں عوامی زبان اور لہجے یا روز مرہ کو استعمال کرنے میں تکلف نہیں کرتے۔نظیر کی زبان کا جازئہ لیتے ہوئے پروفیسر شارب ردولوی لکھتے ہیں۔

’’شاعری جذبات اور مشاہدات کا بے ساختہ اور بلا تکلف اظہار اور اپنے عہد کے معتقدات، توہمات اور زندگی کے اقدار کا اظہار بھی ہے۔ کسی بھی عہد کی شاعری اس عہد کی تہذیبی و ثقافتی تاریخ بھی ہوتی ہے۔ پر تکلف اور آراستہ شاعری خوبصورت اور مسرت انگیز ہوتی ہے، لیکن بے تکلف اور بے ساختہ شاعری پر اثر اور دل میں اتر جانے والی ہوتی ہے۔ وہ اشعار جو یاد رہ جانے والے ہوتے ہیں عام طور پر بے تکلف زبان اور بے تکلف اظہار کا نمونہ ہوتے ہیں اور روز مرّہ کی بھی یہی صفت ہے کہ اس میں اس عہد کی زندگی کا عکس دکھائی دیتا ہے۔یہ کارنامہ ایک حد تک اس عہد میں میر نے بھی انجام دیا لیکن نظیر کی شاعری زبان و بیان کی بے ساختگی کا ایک ایسا نمونہ بن گئی جس نے ان کی شاعری کو اس عہد کی تہذیبی و ثقافتی تاریخ بنادیا۔‘‘ (ص:۱۷۸)

نظیر اکبر آبادی کے بارے میں یہ خیال کیا جاتا ہے کہ جہاں وہ مختلف زبانوں سے واقف تھے وہیں انہوں نے اپنی شاعری میں سب سے زیادہ الفاظ کا استعمال کیا ہے۔ ان میں فارسی اور ہندی کے علاوہ ٹھیٹ زبان کا استعمال کیا ہے۔پروفیسر شارب ردولوی نے نظیر اکبر آبادی کو اپنے عہد کا مؤرخ بتایا ہے۔ان کا خیال ہے کہ نظیر کی شاعری اپنے عہد کی تہذیبی تاریخ ہے۔وہ لکھتے ہیں۔

’’نظیر کا احاطۂ فکر اور مشاہدہ اس قدر وسیع ہے کہ اس میں اُس عہد عہد کے معتقدات، توہمات، پسند و نا پاپسند، رسم و رواج، موسم و تہوار سب اپنی پوری آن بان کے ساتھ نظر آتے ہیں۔‘‘ (ص: ۱۸۲)

نظیر کی شاعری کا بغور مطالعہ کیا جائے تو ہم آسانی سے اس عہد کے رسم و رواج کے ساتھ اس عہد کی تہذیب و ثقافت ، میلے ٹھیلے یہاں تک کی زبان کا اندازہ لگا سکتے ہیں۔

آذرمی دخت صفوی کا مضمون’’نظیر بے نظیر ‘‘ ہے۔ انھوں نے اپنے مضمون میں نظیرکی روایت شکنی کو مدّ نظر رکھتے ہوئے نظیر کو انوکھا، آزاد، بیباک اور سرکش شاعر بتایا ہے۔نظیر کی شاعری میں موجود منظر کشی کی جانب اشارہ کرتے ہوئے اسے حقیقی منظر سے تعبیر کیا ہے۔وہ لکھتی ہیں کہ نظیر کے الفاظ پر زور اور پر شور ہوتے ہیں۔آذرمی دخت صفوی نے اٹھارہویں صدی کی شاعری کا ذکر کیا ہے جو فارسی زبان بلکہ ایرانی کلچر سے پوری طرح متاثر نظر آتاہے۔گل و بلبل کا استعارہ ہو یا پھر شیریں ،فرہاداور لیلیٰ مجنوں کے واقعات ہوںیہ سب فارسی زبان و تہذیب سے متاثر تھے مگر نظیر اکبر آبادی نے فارسی پر عبور ہونے کے باوجود اپنا محور و مرکز کو خالص ہندوستانی روایت سے جوڑ کر رکھا۔

آذرمی دخت صفوی نے اپنے مضمون میں نظیر اور امیر خسرو کے درمیان ایک رشتہ قائم کرنے کی کوشش کی ہے، ان کا خیال ہے کہ صدیوں کے فاصلے کے باوجود فکروفن اور شخصیت کی بعض سطحوں پر حیرت انگیز حد تک مماثلت پائی جاتی ہے۔دراصل مضمون نگار کے نزدیک ان دو بڑے شعرے کے موضوعات میں یکسانیت اہم ہے۔ ان کا خیال ہے کہ ان دونوں شعرا کے یہاں ہندوستان اور ہندوستانی کلچر سے ایک وابستگی بلکہ عشق ملتا ہے۔ انھو ںنے یہ بھی لکھا ہے کہ خسرو جہاں لوگوں کی فرمائش پر نظمیں کہہ دیتے تھے، وہیں نظیر بھی راہ چلتے لوگوں کی فرمائش پر نظمیں کہہ دیا کرتے تھے۔

شمس الحق عثمانی کا مضمون ’’منظر سام…نظیر‘‘ ہے۔ انھو ںنے اپنے مضمون کی ابتدا نظیر اکبرآبادی کے اس شعر سے کیا ہے۔

دیکھ لے اس چمن دہر کو دل بھر کے نظیر

پھر ترا کا ہے کو اس باغ میں آنا ہوگا

شمس الحق عثمانی نے نظیر اکبر آبادی کی عوامی شاعری کو نظرانداز تو نہیں کیا ہاں اپنے قارئین سے یہ سوال ضرور قائم کیا ہے کہ چونکہ ہرناقد نظیر کے بارے میں یہی کہتا ہے کہ وہ عوامی لب ولہجہ اور عوامی زبان کا شاعر ہے اس لیے ہمارا ذہن نظیر کے بارے میں اکہرے پن کا شکار ہوگیا ہے اور ہم نظیر کے کلام میں موجود تہہ داری اور بلیغ اشاروں کو نہیں سمجھ پاتے۔ انھوںنے نظیر کے کلام سے کچھ نمونے پیش کیے ہیں جن کی سنجیدہ قرأت ہمیں معنی و تفہیم کی ایک نئی دنیا میں لے جاتی ہے۔

گھنگرو کی پڑی آن کے پھر کان میں جھنکار

سارنگی ہوئی بِین، طنبوروں کی مددگار

طبلوں کے ٹھُکے طبل، یہ سازوں کے بجے تار

راگوں کے کہیں غل، کہیں ناچوں کے بندھے تار

ڈھولک کہیں جھنکارے ہے مردنگ زمیں پر

ہولی نے مچایا ہے عجب رنگ زمیں پر

جو وصول میں ہیں ان کے جوڑے مہک رہے ہیں

جھولوں میں جھولتی ہیں گہنے جھمک رہے ہیں

جو دکھ میں ہیں سو ان کے سینے پھڑک رہے ہیں

آہیں نکل رہی ہیں آنسو ٹپک رہے ہیں

کیا کیا مچی ہیں یارو برسات کی بہاریں

نظیر کی شاعری کا جائزہ لیتے ہوئے شمس الحق عثمانی لکھتے ہیں:

’’مظاہرِ کائنات کو اپنے حواس سے اور اپنے حواس کو مظاہرِ کائنات سے آزمانے کے لیے نظیر جس قدر بے تاب و وارفتہ رہے، وہ کسی ایک فلسفے، کسی ایک دبستانِ فکر یا کسی ایک مشروط و محدود نقطۂ نظر کی اصطلاحوں میں یا کسی ایک تھیوری میں مقید ہونے والی شے نہیں__ یعنی نظیر کا ذہنی سفر، افقی اور عمودی دونوں سمتوں میں ہے اور ایک سمت میں دوسری سمت کا ادراک شامل ہے۔‘‘

علی احمد فاطمی نے ’’نظیر اکبر آبادی کی شاعری میں ہندو و ہندوستانی تہذیب‘‘ کے عنوان سے نظیر کی شاعری کا جائزہ لیا ہے ۔ نظیر اول تو مذہبی حد بندی کے قائل نہیں تھے، یہی وجہ ہے کہ شیعہ مکتب فکر سے تعلق رکھنے کے باوجود نظیر نے کوئی مرثیہ نہیں کہا، دوم ہندوئوں کے ساتھ ان کے تعلقات زیادہ تھے لہٰذا ان کی شاعری میں ہندو بلکہ خالص ہندوستانی رسوم وعقائد کی پیش کش کا بہترین اظہار ملتا ہے۔ عید، شب برأت وغیرہ پر جہاں ان کی ایک ایک نظم ملتی ہے وہیں دیوالی، ہولی وغیرہ پر کئی نظمیں ملتی ہیں۔

نظیر کی نظم ’’کنہیاجی‘‘کا ایک بند یکھئے جس میں شادی بیاہ کے رسوم کے ساتھ ہندو سماج کی کتنی اچھی تصویر پیش کی گئی ہے۔ شیو اور پاربتی کی شادی کے موقع پر بھوجن کی منظرکشی ملاحظہ ہو:

جب راجا نے یہ حکم دیا تیاری ہو اب بھوجن کی

منگوائے میوے لاکھوں من اور میوے مصری شکر گھی

حلوائی ہزاروں آ بیٹھے کر گرم کڑھائو رکھ تھالی

کر کھووے ستھرے دودھ منگا اور ڈالی چینی شکر تری

پھر ڈالا ’وب گلاب اس میں ڈالی اور ڈلیا مصری کی

انبار لگائے پیڑوں کے اور ڈھیر گلابی اور برفی

پھر لڈو بھی تیار کیے دے قند بہت بادام گری

براق مگمذر اور خرمے بھی خوب امرتی بیر بھی

وہ خوب جلیبی اور کھجلے وہ گھیو بالوساہی بھی

دراصل نظیر کا عہد موجودہ عہد سے بالکل مختلف تھا۔ ہندی کے ناقد داموداس نے نظیر پر گفتگو کرتے ہوئے لکھا ہے:

’’نظیر کے عہد میں ہندو عوام کے بیچ جو دھرم چل رہا تھا جسے ہندو ویدوں، برہم، گرنتھوں، اپنشدوں، رامائن، مہابھارت وغیرہ گرنتھوں سے نکلا ہوا مانتے تھے۔ اس کال میں ویدک دیوی دیوتائوں کے مقام پر اور انیک دیوی دیوتائوں کی مان دان زیادہ ہوگئی تھی۔ کرشن کی پوجا زیادہ تھی۔ نظیر نے کرشن کے متعلق زیادہ شاعری کی ہے۔‘‘ (صفحہ:232)

داموداس وشسٹھ کے مذکورہ قول سے بھی اس جانب اشارہ ملتا ہے کہ نظیر جہاں ایک طرف کرشن سے متاثر تھے وہیں اس پسند اور عقیدت میں اس عہد کے سماجی ریتی رواج کا بھ اہم رول تھا۔

قاضی جمال حسین کا مضمون ’’نظیر کے تنقیدی محاکمے کا خاکہ‘‘ دراصل نظیر پر لکھی گئی تنقید کا جائزہ پیش کرتا ہے۔ نظیر کے ناقدین کے یہاں جو تشدد اور نظریاتی اختلاف پایا جاتا ہے، اس جانب اس مضمون میں کئی حوالے دیے جاچکے ہیں۔ یہاں قاضی جمال حسین کا ایک اقتباس پیش کرنا چاہتا ہوں جس سے اس مضمون کا مرکزی خیال کا اندازہ لگایا جاسکتا ہے۔

’’واقعہ یہ ہے کہ بے ثباتی، دنیا، آخرت کی ترغیب یا دیگر اخلاقی موضوعات پر جس بے تکلفی سے نظیر نے نظمیں کہی ہیں اسی آزادی اور کشادہ دلی سے انھوں نے جنسی موضوعات پر بھی شعر کہے ہیں۔ بے ساختہ اور بے محابا اظہار، ان کے اسلوب کی بنیادی صفت ہے۔ موضوع خواہ کچھ بھی ہو۔ وہ جنسی جذبے کو بھی جملہ تفصیلات کے ساتھ اسی انہماک سے بیان کرتے ہیں۔ جس دلچسپی سے اخلاقی مضامین کو۔ بے ثباتیٔ دنیا کا احساس انھیں دنیا بیزاری پر آمادہ نہیں کرتا بلکہ کم فرصتیٔ زیست میں وہ دنیا کو ہررنگ میں جی بھر کے دیکھ لینا چاہتے ہیں۔ پھر یہ کہ ان کے مخاطب بھی اہل حرفہ، نیم خواندہ عوام اور جمہور کا انبوہ کثیر ہے جن کے نزدیک محبت کا کوئی تصور، جنسی جذبے کی آمیزش سے آزاد نہیں ہوتا۔ نظیر کے محاکمے میں اس حقیقت کو نظر انداز کرکے پیشتر غلط نتائج نکالے گئے ہیں۔‘‘

رات ہوئے تھے واہ واہ کیا ہی نشے رسا رسا

پیتے تھے مے بسا بسا پھولوں میں ہم بسا بسا

شوخ بغل میں چاند سا دیتا تھا بوسے ہنس ہنسا

زلفوں میں اس کے دل پھنسا آن و ادائیں جی بسا

جامہ بدن میں چس چسپا پھول ہوا تھا بس بسا

نیندوں میں بار رِسما لے تھا جمائی کسمکسا

اس میں رقیب کرکسا کرکے سحر کا وسوسا

لاکے نقارہ یا دہل دھوں دھوں بجا یا کس کسا

صبح کے ڈر سے ہڑا بڑا یا رنے گھر کی راہ لی

ہم بھی دغا میں آگئے مفت بہار لٹ گئی

کمر نازک مٹکتی چال آنکھیں شوخ تن گورا

نظر چنچل ادا اچیل یہ ہے پہچان سمدھن کی

سنہری تاش کا لہنگا روپہلی گوٹ کی انگیا

چمکتا حسن جوبن کا جھمکتی آن سمدھن کی

ملائی سا شکم سینہ مصفا خوش نما ساقیں

صفا زانو کا آئینہ ملائم ران سمدھن کی

ان مضامین کے علاوہ ریحانہ خاتون (نظیر کے عہد کا آگرہ، ایک گزارش)، اقبال مرزا (نظیر اکبر آبادی کا پہلا عشق)، کاظم علی خان (غالب اور نظیراکبرآبادی)، شیما رضوی (نظیر اکبر آبادی اردو کا پہلا عوامی شاعر)، قدوس جاوید (عاشق تو قلندر ہے)، کشمیری لال ذاکر (نظیر اکبرآبادی اردو کا پہلا شاعر) اور نور فاطمہ (نظیراکبرآبادی کی شاعری میں جزئیات نگاری) کے مضامین شامل ہیں۔

ان مضامین کے مطالعے سے نظیر فہمی کا ایک روشن باب وا ہوتا ہے۔نظیراکبرآبادی کی شاعری کا مطالعہ کرتے ہوئے ہمیں ان کے عہد اور اس دور کے سماج کو بھی دیکھنا ہوگا۔ نظیر ایک شاعر ہیں اور انھیں شاعر کی کی نگاہ سے ہی دیکھنا چاہئے۔ دوسرے شعرا کی طرح نظیر کے یہاں بھی موضوعات کا تنوع ہے، ان کے یہاں اخلاقی پہلو پر نظمیں ملتی ہیں تو شراب وشباب کا ذکر بھی ان کے یہاں موجود ہے، قدرتی مناظر کے ساتھ ساتھ ان کی شاعری اپنے دور کی تہذیب وثقافت کو بھی پیش کرتی ہے،میلوں ٹھیلوں کا بھی ذکر ہے اور مختلف مذہبی عقائد پر مبنی نظمیں بھی موجود ہیں۔دنیا کی بے ثباتی کا بھی ذکر ہے اور دنیا کی رنگینی پر بھی اظہار خیال ملتا ہے۔ ایک ایسا شاعر جس کے کلام میں ایک پورا عہد جیتا جاگتا نظر آتا ہے ،ایسے میں اسے نظرانداز کرنا نظیر کے ساتھ بے انصافی کے مترادف ہوگا۔میرا خیال ہے کہ نظیر کی پوری شاعری کا ایک مرکزی خیال اور وہ ’انسان دوستی‘ ہے۔ یہاں انسانی اقدار اور تحفظ کا ایک جذبہ ہے۔ میں اپنی بات نظیر کے ان مصرعوں پر ختم کرنا چاہتا ہوں ؎

ہے دنیا جس کا نانویاں یہ اور طرح کی بستی ہے

جو مہنگوں کو تو مہنگی ہے اور سستوں کو سستی ہے

یاں ہر دم جھگڑے اٹھتے ہیں ہر آن عدالت بستی ہے

گر مست کرے تو مستی ہے اور پست کرے تو پستی ہے

کچھ دیر نہیں اندھیر نہیں انصاف اور عدل پرستی ہے

اس ہاتھ کرو اس ہاتھ ملے یا سودا دست بدستی ہے

جو اور کسی کا مان رکھے تو اس کو بھی ارمان ملے

جو پان کھلاوے پان ملے جو روٹی دے تو نان ملے

نقصان کرے نقصان ملے احسان کرے احسان ملے

جو جیسا جس کے ساتھ کرے پھر ویسا اس کو آن ملے

کچھ دیر نہیں اندھیرنہیں انصاف اور عدل پرستی ہے

اس ہاتھ کرو اس ہاتھ ملے یاں سودا دست بدستی ہے

جو پار اتار دے اوروں کو اس کی بھی نائو اترتی ہے

جو غرق کرے پھر اس کی بھی یاں ڈبکوں ڈبکوں کرتی ہے

شمشیر تبر بندوق سناں اور نشتر تیر نہرتی ہے

یاں جیسی جیسی کرتی ہے پھر ویسی ویسی بھرتی ہے

کچھ دیر نہیں اندھیر نہیں انصاف اور عدل پرستی ہے

اس ہاتھ کرو اس ہاتھ ملے یاں سودا دست بدستی ہے

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)

ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔

اردو کا پہلا عوامی اور ترقی پسند شاعر نظیر اکبر آبادی(غالب نامہ کے حوالے سے) – ڈاکٹر نوشاد منظر

غضنفر : ایک مختلف رنگ و آہنگ کا ناول نگار – اقبال حسن آزاد

ہندوستان اور ہندوستان سے باہر اردو کے فروغ کے لیے ایسے سیمینار کی اشد ضرورت ہے: عارف نقوی

یہ بھی پڑھیں