جدید  افسانوں میں کہانی گم ہوگئی ہے لیکن گمشدہ دولت میں شامل  افسانوں کے  مطالعے سے قاری  کہانی کی دولت پالیتا ہے اور اس دنیا میں گم ہوجاتا ہے جس کو طارق شبنم نے لفظوں سے تخلیق کیا ہے۔یہ سچ ہے کہ چند دہائیوں سے کشمیر پر آشوب حالات سے گزر رہا ہے لیکن اس حقیقت سے بھی انکار نہیں کیا جا سکتا کہ یہ وادی اپنی خوبصورت اور دلفریب نظاروں کی بدولت پوری دنیا میں مشہور ہے۔یہاں کے پہاڑ، میدان ، ندیاں ،جھرنے، مقامات فرحت بخش ہیں۔کشمیر کا ادیب وادی کی خوبصورتی کا ذکر اپنے افسانوں میں ضرور کرتا ہے۔طارق شبنم نے بھی وادی کے خوبصورت اور حسین نظاروں کا ذکر اپنے افسانوں میں کیا ہے۔افسانہ ” اندھیرے اجالے ” کا یہ اقتباس دیکھیں_
” ارے واہ ۔۔کتنا حسین دل موہ لینے والا سماں ہے۔یہ باغ یہ گلستان کتنا خوبصورت ہے۔یہ رنگ برنگے پھول،یہ سر سبز پتوں والے درخت، یہ ننھی منی کونپلیں،یج سبز مخملی چادر جیسا بچھونا ،یہ نیلے پانی کا جھرنا،یہ فلک بوس دلکش پہاڑیاں۔واقعی یہ کوئی جنت کا کڑا ہے”۔
افسانہ ” اندھیرے اجالے” صحفہ 17

کوئی بھی افسانہ نگار سب سے پہلے  اپنے آس پڑوس  کا عکاس ہوتا ہے۔شعوری طور پر اس کی کہانیوں میں اردگرد کے حالات و واقعات کا ذکر آتا ہے۔طارق شبنم بھی اپنے معاشرے، حالات و واقعات اور اپنے لوگ کی بات افسانوں میں کرتا ہے۔ جو کچھ آنکھوں سے دیکھتا اور کانوں سے سنتا ہے  اس کو صحفہ قرطاس کے حوالے کرتا ہے ۔مجموعے میں شامل افسانہ ” دہشت کے سائے” میں خوف ،ڈر اور دہشت کے ماحول کو اچھے ڈھنگ سے موضوع بنایا گیا ہے۔بونہ گام کے لوگ روز مرہ کے کاموں میں مصروف تھے۔بزرگ دکانوں کے تھڑوں پر بیٹھ کر گپ شپ کر رہے تھے  اور حقے سے بھی لطف اندوز ہو رہے تھے۔عورتیں پانی بھر رہی تھیں، بازار میں گہما گہمی تھی۔فوج کی ٹکڑی  بازار سے گزری تو گولیاں چلنے کی آواز آئی۔رات کی تاریکی چھائی تو خوف اور ڈر نے گاؤں کے گرد ہالہ بنا لیا۔عادل مرزا کو باہر آوازیں آرہی تھیں،کتے  بھونک رہے ،مرغیوں کی تیز آواز گونج رہی تھی، گاؤ خانے میں بندھے جانور بھی شور مچا رہے تھے۔عادل مرزا باہر نکل کر دیکھنا چاہتا تھا لیکن بیوی نے منع کیا اور یاد دہانی کرائی کہ رجب چچا حاجت بشری کے لیے باہر نکلا تھا آج تک اس کا کوئی سراغ  نہ ملا۔اذان ہوئی تو عادل مرزا باہر نکلا اور دیکھ کر حیران ہوا کہ جنگلی درندوں نے درجنوں مویشیوں کی چیر پھاڑ کرنے کے علاوہ سینکڑوں مرغے مرغیوں کو غائب کر لیا۔ایک بزرگ سے پتا چلتا ہے کہ کل شام صاحب لوگ لائنس یافتہ بندوق لے کر شکار کھیلنے نکلے تھے۔ افسانے سے ایک  اقتباس ملاحظہ فرمائیں__
” صبح کی ہلکی روشنی نمودار ہوتے ہی جب پرندوں نے میٹھی میٹھی آوازوں میں چہکنا شروع کردیا اور کوئل اور بلبل کے سریلے نغمے چاروں اور بکھرنے لگے تو عادل مرزا نے ہمت جٹا کے دروازہ کھول دیا اور دبے پاؤں گاؤ خانے کی طرف بڑھا۔وہاں کی ہیبت ناک حالت دیکھ کر اس کا سر چکرانے لگا اور آنکھیں میں اندھیرا چھا گیا۔گاؤ خانہ خون میں نہلایا ہوا تھا۔وہاں موجود گائے ،بیل اور بکری کی چیر پھاڑ ہوئی تھی جبکہ مرغوں مرغیوں کا کہیں نام و نشان تک نہ تھا”۔
افسانہ ” دہشت کے سائے ” صحفہ 49
انسان بظاہر خوش حال ہے ،اس کے پاس دھن دولت ،نوکر چاکر ،گاڑی بنگلہ سب کچھ ہے مگر اس کے پاس سکون نہیں ہے۔اس نے مذہب سے دوری اختیار کی ہے، یہ اپنے خالق کو بھول گیا ہے، جن اصولوں کے تحت اسے زندگی بسر کرنی تھی یہ ان اصولوں کو بھول گیا ہے۔اس موضوع کو طارق شبنم نے مجموعے کی کلیدی کہانی” گمشدہ دولت” میں بیان کیا ہے۔گمشدہ دولت  میں مریخ کے مشہور ،قابل اور تجربے کار جاسوس کو اپنا بادشاہ دھرتی پر آباد آدم زاد کے مکمل حالات و واقعات معلوم کرنے کا مشن سونپ کر دھرتی پر بھیجتا ہے۔جنرل ٹام انسان کی ترقی کو دیکھ کر رشک کرتا ہے اور سمجھتا ہے کہ آدم زاد واقعی خوش قسمت ہے۔خوبصورت عمارتیں، بلند پرواز کرتے جہاز ، بڑی بڑی کاریں، سجے بازار ، امن و شانتی کو دیکھ کر سوچتا ہے کہ خدا نے واقعی انسان کو بے شمار نعمتوں سے نوازا ہے۔جنرل ٹام انسانی روپ دھارن کر لیتا ہے تاکہ انسان کی زندگی اور حرکات و سکنات کا جائزہ لے سکے۔جنرل ٹام نے اخذ کیا کہ آدم زاد پریشان ہے،کشمکش میں مبتلا ہے۔دن ڈھلتے ہی جنرل ٹام اپنا جون بدل کر ایک حسین و جمیل شریمتی کا روپ اختیار کر لیتا ہے اور ریسٹورنٹ میں جاتا ہے۔اخبار اٹھا کر یہ خبر پڑھتا ہے کہ کیمیاوی ہتھیاروں کے استعمال سے ہزاروں انسان ہلاک ہوئے۔یہ پڑھ کر وہ  چونک جاتا ہے۔
مسٹر ڈیسوزا کھلونوں کا کارخانہ بند کرنا چاہتا ہے اور ہتھیار اور بارود بنانے کا کارخانہ کھولنا چاہتا ہے کیونکہ اس میں منافع بہت ہے۔بہت سارے ممالک آپس میں برسر پیکار ہیں۔مسٹر ڈیسوزا، آفتاب خان اور شام لال تینوں دوست آپس میں مشورہ کرتے ہیں کہ یہ نیا بزنس شروع کریں گے۔ڈیسوزا گویا ہوتا ہے کہ رات بہت ہوچکی ہے گھر جاکر سونا چاہیے۔جواب ملتا ہے کہ نیند کی دولت سے ہم محروم ہیں اور فیصلہ ہوتا ہے کہ روز کی طرح نیند کی گولیاں لے کر سوجائیں گے۔
جنرل ٹام مختلف روپ دھارن کرکے مرد و زن ، امیر غریب، حاکم محکوم تمام لوگوں کے شب و روز میں جھانک کر ان کی زندگی کا مشاہدہ کرتا ہے۔اس پر یہ حقیقت عیاں ہوتی ہے کہ ترقی کی طرف تیزی سے رواں دواں انسان اضطراب اور پریشانی میں مبتلا ہے۔مادیت کا غلبہ ہے اور مادہ پرست انسان بظاہر چمکدار ہے لیکن اس کا اندرون تاریک ہے۔اس نے انسان کو گھمنڈی بھی پایا اور بے بس بھی،اس نے سائنسی ترقی بھی دیکھی اور اس کی بدولت انسانی جانوں کا زیاں بھی۔اس کے ذہن میں یہ سوال تھا کہ آخر کونسی  دولت ہے جس کو پانے کے لیے انسان جتن کر رہا ہے۔ اس نے اندازے لگائے لیکن مطمئن نہ ہوا۔جنرل ٹام کو پیغام ملتا ہے کہ وہ جلد اپنے وطن لوٹ آئے۔وہ آسمان والے  بادشاہ سے مدد مانگتا ہے اور ایک زیارت گاہ کے صحن میں بیٹھ جاتا ہے۔بے قراری میں اس کی نظر لائبری پر پڑتی ہے۔ہزاروں کتابیں دیکھ کر اس کی زبان سے واہ نکلتی ہے اور وہ کتابیں کھنگالتا ہے  اور اسے ” تلاش ” نامی کتاب مل جاتی ہے۔اس میں لکھا تھا کہ انسان نے ترقی کر لی ہے،اس کے پاس آرام و آسائش کی ساری چیزیں ہیں، یہ اپنے ڈھنگ سے زندگی بسر کر رہا ہے۔اس نے آفاقی اصولوں سے رو گردانی کی ہے اس لیے یہ ذہنی اور قلبی سکون سے محروم ہو گیا ہے۔جنرل ٹام کا مشن پورا ہوا۔افسانہ کا اقتباس دیکھیں_
” دھرتی پر آباد تمام فرقوں سے وابستہ انسان قدرتی آفاقی اصولوں سے روگردانی کرکے اپنے ہی وضع کردہ خود غرضانہ اور فرسودہ اصولوں کے تابع زندگی گزارنے کی احمقانہ غلطی کے بسبب ذہنی و دلی سکون کی انمول نعمت کو کھو بیھٹے ہیں جسے واپس حاصل کرنے کے لیے اگرچہ یہ سخت جتن کر رہے ہیں لیکن اپنی روش بدلنے کے لیے ہرگز تیار نہیں ہیں”
افسانہ ” گمشدہ دولت ” صحفہ 104
مجموعے میں متنوع موضوعات پر افسانے دیکھنے کو ملتے ہیں جن میں علاقائی مسائل سے لے کر عالمی سطح کے مسائل کو اجاگر کیا گیا ہے۔انسانی دکھ درد کی عکاسی بھی ہے اور خوبصورت وادی کی خوبصورتی کا ذکر بھی،انسان کی بے بسی،لالچ ،خود غرضی کا بیان بھی ہوا ہے اور دہشت ،خوف ،ڈر اور ابتر حالات کو بھی فن کا لبادہ اوڑھ کر بیان کیا گیا ہے۔غرض مجموعے کے افسانوں میں رنگا رنگی ہے جو اس کو دلکش بناتا ہے اور ادب کے شوقین لوگوں کو انبساط کا ذریعہ فراہم کرتا ہے۔مجموعے میں شامل افسانوں میں املا کی غلطیاں نظر آتی ہیں ۔ایک مثال میں پیش کرتا ہوں جیسے لفظ ” مضبوط” کو مظبوط لکھا گیا ہے ۔ امید ہے اگلے ایڈیشن میں اس کی طرف توجہ دی جائے گی۔