شموئل احمد کا افسانہ ”بہرام کا گھر“ ان کے علم نجوم سے استفادے کی روشن دلیل ہے : غضنفر

شموئل کے افسانوں کی زبان ہمارے عہد کے ہر افسانہ نگار سے بالکل الگ ہے اور منفرد بھی: طارق چھتاری

بازگشت آن لائن ادبی فورم کے ہفتہ واری پروگرام میں شموئل احمد کے افسانے ”بہرام کا گھر“ کی تفہیم

لکھنؤ / حیدرآباد ( ۷ جنوری / شاہد حبیب) شموئل کی کہانی” بہرام کا گھر“ ان کی دوسری کہانیوں سے مختلف اس معنی میں ہے کہ اس کہانی میں کہیں بھی جنس کا پہلو نہیں ہے۔ عام طور پر ان کی جو مشہور کہانیاں ہیں ، ان میں جنس یا تو موضوع بنا ہے یا جنسی مسائل اس میں آئے ہیںیا کوئی نہ کوئی جنسی پہلو آیا ہے۔اور جنسی پہلو آنے کا یہ مطلب نہیں ہے کہ وہ منٹو کے مقلد ہو گئے ۔ حالانکہ جنس پر لکھنے پر منٹو کی اجادرہ داری نہیں تھی۔ ہر افسانہ نگار جنس پر سوچ سکتا ہے، لکھ سکتا ہےاور جنس پر لکھنا کوئی ٹیبو بھی نہیں ہےکہ جنس انسانی زندگی کا ایک بہت بڑا اور اہم حصہ ہے۔ ان خیالات کا اظہار کیا معروف فکشن نگار اوردانشور جناب غضنفر نے۔ غضنفر بازگشت آن لائن ادبی فورم کی ہفتہ واری تقریب میں شموئل کی کہانی ”بہرام کا گھر“ کے تفہیم و تجزیے کے حوالے سے منعقد پروگرام میں صدارتی خطاب کر رہے تھے۔ انھوں نے اپنی بات کو آگے بڑھاتے ہوئے کہا کہ اگر جنس کو آپ تلذز کے لیے پیش کر رہے ہیں ، اس سے جنسی ہیجان پیدا کرنا چاہتے ہیںتو وہ کہانی کا عیب بن جاتا ہے اور اگر وہ جنس انسانی زندگی کے کسی پہلو کو پیش کرتا ہے، کسی کمزوری کو پیش کرتا ہے یااس کی کسی نفسیاتی گتھی کو سلجھاتا ہے اور فن کارانہ طریقے سے پیش کیا گیا ہے توجنس سے مسئلہ نہیں ہونا چاہیے۔ شموئل کی کہانیوں کا متن ہمارے سامنے ہے، ہمیں دیکھنا چاہیے کہ ان کا متن کس پائے کا ہے، ان کی زبان کیسی ہے اور ان کا اسلوب کیسا ہے۔کہانی کے عنوان پر بات کرتے ہوئے انھوں نے کہا کہ شموئل نے اس کہانی کا نام بہرام کا گھر ہی کیوں رکھا کسی اور کا گھر کیوں نہیں ۔ تو مجھے لگتا ہے کہ انھوں نے اپنے علم نجوم کی معلومات سے استفادہ کیا اور اس کا عنوان طے کیا۔ پانچ جگہوں پر یہ بہرام کا لفظ آیا ہے اور پانچ حصوں میں انھوں نے کہانی بیان کی ہے۔ اس ذکر سے معلوم ہوتا ہے کہ بہرام کا گھر کافی محفوظ رہا ہوگا۔اگر ہم اس کا مطلب نکالنا چاہیں تو کہہ سکتے ہیں کہ ایک ایسی جائے پناہ جہاں جاکر اپنی زندگی بچائی جا سکتی تھی۔بہرام کا معنی ستارہ کے ہیں ، مریخ کےہیں ۔شموئل احمد نجومی تھے اور وہ ستاروں کی چال کو سمجھتے تھے۔ستاروں کی گردش سے دنیا میں بہت کچھ ہوتا ہے،وہ گردش سے بچاتے بھی ہیں اور گردش میں ڈالتے بھی ہیں توممکن ہے کہ شموئل احمد اس بہرام سے کوئی فائدہ اٹھانا چاہتے ہوں۔ اگر قاری غور کرے تووہ شاید یہاں تک پہنچ جائے۔ انھوں نے شموئل کی اس کہانی  میں فنی نقص کی وضاحت کرتے ہوئے اسے ایک اوسط درجےکی کہانی قرار دیا۔

تقریب کے اوپن سیشن میں حصہ لیتے ہوئے معروف ناقد اور افسانہ نویس جناب طارق چھتاری نے کہا کہ شموئل کے افسانوں کی زبان ہمارے عہد کے ہر افسانہ نگار سے بالکل الگ ہے اور منفرد ہے۔ اس میں کوئی تصنع نہیں ہوتی۔بہت ہی رواں اور بہت ہی نیچرل ہوتی ہے۔ ایپروپیرئیٹ اور مناسب زبان کا وہ استعمال کرتے ہیں۔کہیں تشبیہ، استعارہ اور علامت کا استعمال نہیں کرتے ،اس کے باوجود ان کی زبان بڑی پر اثر ہوتی ہے۔ اس مذاکرے میںڈاکٹر ریاض توحیدی نے بھی حصہ لیا اور شموئل کی زبان و بیان کو سراہا۔

شموئل احمد کا افسانہ ”بہرام کا گھر“ کا تجزیہ پیش کرتے ہوئے سید نور الامین (ایسوسی ایٹ پروفیسر، شعبۂ اردو، شاردا مہا ودیالیہ ،پربھنی مہاراشٹر) نے کہا کہ آپ اور ہم کیمرے کی آنکھ کے اس دور میں جی رہے ہیں جہاں منظر اہم نہیں رہے ہیں تب ان منظروں کی دید سے ہونے والے احساس اور ان احساس کی گہرائی اور گیرائی اہم ہو جاتی ہے۔ فساد میں جان و مال کے چلے جانے کی دقت اپنی جگہ لیکن اس کے دورانیہ میں ہونے والے انسانی برتاؤ کی روداد اپنی جگہ، ان ہی جذبات و احساسات کو شموئل احمد نے اپنے اس افسانے میں بڑی خوبصورتی کے ساتھ پیش کیا ہے۔ شموئل کے مشاہدات کی باریکی اس افسانے میں بھی محسوس کی جا سکتی ہے۔ افسانہ ”بہرام کا گھر“ کی قرات جناب ارمان حسین فرشوری (ویب انجینئر ، یونیورسٹی آف سویڈن) نے بہت ہی خوبصورت انداز میں کی ۔ جبکہ شموئل احمد کا تعارف شاہد حبیب فلاحی (ریسرچ اسکالر، مانو لکھنؤ کیمپس اور معاون مدیر سہ ماہی ادبی نشیمن لکھنؤ) نے اپنے مخصوص انداز میں کرایا۔ شاہد حبیب نے شموئل احمد کا تعارف پیش کرتے ہوئے کہا کہ شموئل احمدکے ادبی سفر پر نگاہ ڈالنے سے اندازہ ہوتا ہے کہ ان کے اندر کا تخلیقی فن کار کسی بھی صورت بوڑھا نہیں ہونا چاہ رہا تھا بلکہ وہ دن بہ دن تربیت و تقویت کے زیور سے آراستہ ہو کر جوانِ رعنا کی طرح ایک سبک رفتار سفر پر محوِ خرام تھا لیکن ناگہانی مرض کا شکار ہوکر ان کے اندر کا کہانی کار داستاں سناتے سناتے ہمیشہ کے لیے خاموش ہو گیا جو کہ ایک بڑا ادبی خسارہ ہے اور اردو فکشن کے ایک دور کا خاتمہ بھی۔ ان کے اندر کا کہانی کار بہت کم عمری میں انگڑائیاں لینے لگا تھا اوراناسی سالہ ایک لمبی عمر بھی پائی تھی ، اس کے باوجود ان کی تخلیقی و تنقیدی پونجی اس قدر مختصر کیوں ہے؟ اس کا جواب اس کے علاوہ اور کیا ہو سکتا ہے کہ شموئل بھی بہار کے لاکھوں نوجوانوں کی طرح اوسط فکر رکھنے والے والدین کی خواہشات کی تکمیل پر مجبور ہوکر انجینئرنگ کی طرف رخ کر بیٹھے تھے۔ان کی پیدائش بھاگلپور میں ۴ / مئی ۱۹۴۳ کو ہوئی تھی، ۱۹۵۸ میں میٹرک، ۱۹۶۰ میں انٹرمیڈیٹ اور ۱۹۶۸ میں جمشیدپور سے سول انجینئرنگ کا امتحان اعلیٰ نمبرات سے پاس کرنے والے شموئل احمد نے صدف اقبال کو دیئے ایک انٹرویو میںکہا ہے کہ ”میں طالب علم اوسط درجے کا تھا لیکن یادداشت ایسی رہی کہ کوئی بھی عبارت نظر سے گزر جاتی تو من و عن ذہن میں محفوظ ہو جاتی۔ “ ایسی یادداشت کا حامل شخص جب پورے طور سے فکشن کے لیے وقف ہوتا تو بعید نہیں کہ اردو فکشن ایک ایسی کہانی ان کے ذہن سے اخذ کر پاتا جو عالمی ادب میں ایک نمایاں مقام کی حامل ہو سکتی تھی۔ کیوںکہ انھوں نے یہ اعتراف بھی کیا ہے کہ”میرے اندر جوتخلیقیت ہے، اس کا صرف دس فیصد حصہ باہر آیا ہے“۔ ظاہر ہے ان کے تخلیقی سفر کی راہ میں ہوئے انجنیئرنگ اور علم نجوم کے ڈائیورژن نے ان کے اندر کے باقی نوے فیصدی کہانی کار کو نکالنے میں روڑا قائم کیا ہے۔ پروگرام کی نظامت ڈاکٹر گل رعنا (صدر شعبہ اردو، تلنگانہ یونیورسٹی نظام آباد) نے کامیاب طریقے سے انجام دی۔ شکریے کی رسم ڈاکٹر فیروز عالم( اسسٹنٹ پروفیسر شعبۂ اردو مانو، حیدرآباد) نے ادا کی۔ پروگرام میں کثیر تعداد میں شموئل کے مداحوں نے شرکت کی۔ ڈاکٹر اشتیاق احمد، ڈاکٹر مجاہد الاسلام، ڈاکٹر مشرف عالم، ڈاکٹر ریشماں پروین ، ڈاکٹر رمیشا قمر اور دیگر معززین کی پروقار شرکت نے پروگرام کی معنویت میں اضافہ کیا۔ شموئل کے لیے دعائے مغفرت کے ساتھ اگلے سنیچرتک کے لیے پروگرام کو ملتوی کیا گیا۔