سورج کا اغوا (افسانوی مجموعہ)/ سرور غزالی-   مبصر:   ڈاکٹر داؤد احمد

افسانہ  ہماری  زندگی کا عکس ہے جو کسی خاص پہلو یا واقعہ کی جانب نشاندہی کرتا ہے۔افسانہ ایک بہتے دریا کی طرح ہے جو کہیں پر نہیں رکا نہ تھما بلکہ خس و خاشاک کو بہاتا ہوا ہمیشہ رواں دواں رہا۔ اردو افسانے میں اظہار و ابلاغ کی زبردست قوت ہے اور یہ انسانی تجربوں اور تلخ حقیقتوں کو جس ڈھنگ سے پیش کرسکتا ہے،کوئی دوسری صنف کے لئے یہ ممکن نہیں ہے۔ سرور غزالی بیک وقت کئی حیثیتوں کے مالک ہیں۔  وہ  نہ صرف ایک افسانہ نگار بلکہ ایک کامیاب مصور اور شاعر بھی ہیں۔ ’’ سورج کا اغوا‘‘  جناب سرور غزالی صاحب کے افسانوں کا  تیسرا مجموعہ ہے جسے رہبر پبلی کیشنز  برلن جرمنی نے شائع کیا ہے۔ اس کتاب سے قبل مصنف کے دو افسانوی مجموعے ’’بکھرے پتے‘‘ اور’’بھیگے پل‘‘  منظر عام پر آچکے ہیں۔ افسانوں کے علاوہ ایک ناول’’دوسری ہجرت‘‘  اور ایک مجموعہ مضامین’’ میرے مضامین‘‘  زیور طباعت سے آراستہ ہوچکا ہے۔

سرور غزالی کا مشاہدہ کافی وسیع ہے۔ وہ مشرق و مغرب دونوں جہانوں کے سیاح ہیں۔ ان کا خمیر گاؤں کی مٹی سے اٹھا ہے ۔ان کا خاندان ہندوستان میں صوبۂ بہار کے شہر’’گیا‘‘  سے ہجرت کرکے پہلے مشرقی پاکستان ( موجودہ بنگلہ دیش) آیا اور پھر وہاں سے کراچی منتقل ہوگیا۔ کراچی سے ہجرت ان کو جرمنی لے گئی۔ بڑے شہروں میں ان کی پرورش اور تعلیم ہوئی، اس لیے ان کی تحریروں میں بالغ نظری دکھائی پڑتی ہے۔ وہ ایسے مناظر کو پیش کرتے ہیں جو لوگوں نے برابر دیکھے ہیںلیکن ان کے پس پردہ جو محرکات ہیں ان کا محاسبہ نہیں کیا۔وہ اپنے قاری کو چونکا دیتے ہیں اور اسے اپنے مشاہدہ میں شریک ہونے کی دعوت دیتے ہیں۔مختصر افسانہ سرور غزالی کا خاصہ ہے۔ انھوں نے اپنے افسانوں کے ذریعے ادب کے قارئین میں اپنی ایک منفرد شناخت قائم کر لی ہے۔

زیر تبصرہ کتاب ’’ سورج کا اغوا‘‘ سرور غزالی کے مختصر افسانوں اور افسانچوں کا مجموعہ ہے جس میں کل 43  افسانے شامل ہیں۔ابتدا میں ’ حرف اول‘ کے تحت افسانہ نگاری کی صداقت پر گفتگو کرتے ہوئے لکھتے ہیں ’’  میری پہلی کہانی  ۱۹۸۱میں ’جنگ‘  اخبار کے ہفتہ وار ایڈیشن ’ جنگ ڈائجسٹ‘  میں چھپی۔شفیع عقیل مرحوم نے  میرے ہاتھوں سے کاغذ کا پلندہ لیا اور کہنے لگے کہ اچھی ہوئی تو ضرور چھپے گی۔ان کی بات سچ ہوئی۔کہانی اچھی تھی سو چھپ گئی۔ میری کہانیاں آج بھی اسی صاقت کی داعی ہیں۔‘‘ ( صفحہ۔ 7 )  افسانہ نگار کا خود  اپنے افسانوں پر اظہار خیال کرنا اور غیر جانبداری سے کرنا ہمت کی بات ہے ۔کتاب کے ابتدائی صفحات میں پروفیسر ڈاکٹر محفوظ الحسن  اور ڈاکٹر محمد ز ا ہدصاحب کی رائے اس اعتبار سے اہم اور معلوماتی ہے کہ اس میں بہت ہی جامعیت اور اختصار سے سرور غزالی کی افسانوی جہات پر روشنی ڈالی گئی ہے۔

کتاب میں شامل افسانوں اور افسانچوں کی قرأت سے اندازہ ہوتا ہے کہ سرور غزالی نے اپنے افسانوں کے موضوعات سماجی اور معاشرتی زندگی سے اخذ کئے ہیں جس میں انسانی زندگی اپنی تلخیوں ،پیچیدگیوں اور محرومیوں کے ساتھ رقصاں ہے۔ ایک حساس فنکار کی طرح  سرور غزالی کی نظر ہمیشہ معاشرتی مسائل  اور سماجی احوال و کوائف کے گرد طواف کرتی نظر آتی ہے ۔ وہ جب بھی کسی حادثہ ،سانحہ یا واقعہ سے متاثر ہوتے ہیں اسے اپنے افسانوں کے قالب میں ڈھال دیتے ہیں۔ ان کے افسانے مختلف نوعیت کے حامل ہیں جس میں یکسانیت کے بجائے نیرنگی کا احساس نمایاں ہے۔کہیں شہر کی ہوس کاریوں کا ذکر ہے تو کہیں دیہی زندگی میں پنپنے والی حقیقی محبت کا بیان ہے،کہیں مرد  عورت کے تعلقات کی عکاسی ہے تو کہیں ازدواجی زندگی کے مسائل۔ غرض انھوں نے اپنے افسانوں میں سماج میں رونما ہونے والے نت نئے موضوعات ،مسائل و آلام اور حالات و واقعات کو افسانے کے کینوس میں اتارنے کی کامیاب کوشش کی ہے۔ ان کے تمام افسانے عام فہم اور سہل انداز میں ہیں۔ ان کے زیادہ تر افسانے معاشرتی اور رومانی قسم کے ہیں جن میں روزمرہ کے مسائل ، دہشت گردی،دھوکہ،بے وفائی،امیر لوگوں کی ہوس،انسان کی منفی سوچ ،ماں باپ کی بے حرمتی،دم توڑتی ہوئی انسانیت  اور صبر و شکر کی تلقین وغیرہ جیسے موضوعات کا احاطہ کیا گیا ہے۔ بیشتر کہانیاں ایک عام انسان کی زندگی ،اس کے روزمرہ کے مسائل ،مشکلات،دکھ درد،نفرت، دوستی اور خود غرضی کو ظاہر کرتی ہیں۔ ان کی کہانیوں میں ایک عام انسان کی زندگی کی جیتی جاگتی حقیقی تصویر صاف دکھائی دیتی ہیںجن میں قارئین اپنے دکھ درد کو بھی محسوس کرسکتے ہیں۔معمولی سے معمولی واقعات بھی ان کی نظروں سے پوشیدہ نہیں ہیں جو ان کے افسانوں میں بخوبی نظر آتے ہیں۔

کٹک ، اڑیسہ سے تعلق رکھنے والے اردو ادب کے مشہور شاعر سعید رحمانیؔ  کا یہ قطعہ سرور غزالی کی افسانوی کائنات کی بھرپور ترجمانی کرتا ہے ۔ ملاحظہ فرمائیں:

واقعہ کوئی جو دیکھا ، اک  انوکھے رنگ میں

اس  پہ لکھنے کی تمنا آپ  نے  فی الفور کی

اپنے  افسانوں کو  دیکر حسن تعمیر حیات

ترجمانی آپ کرتے ہیں ہمارے دور کی

افسانہ ’’سورج کا اغوا‘‘ ترتیب کے لحاظ سے تیئسواں افسانہ ہے جو پورے مجموعے کا عنوان بھی ہے،جہالت کی تاریکی کو مسلط کرنے کی کوشش پر علامتی افسانہ ہے۔ اس مجموعے میں چوبیس افسانچے اور انیس مختصر افسانے شامل ہیں۔افسانوں میں بیانیہ لب و لہجہ ہے جو بہت کچھ کہہ جانے کا ہنر رکھتا ہے۔ افسانچے گرچہ تاثراتی ہیں مگر گہری فکر میں مبتلا کر دیتی ہیں اور معاشرے کے مسائل کی طرف ہمیں کھینچ کر لے جاتی ہے۔ افسانہ’’ مفاد کا ٹکراؤ‘‘  میں انسان  اپنے فائدے کے لئے سماج کی پاسداری کو بھول جاتا ہے۔افسانہ’’حلال گوشت‘‘  ایک معاشرتی افسانہ ہے،اس افسانے میں مسلم قوم  کی بے راہ روی اور صفلہ پن حرکات پر کرارہ طنز ہے۔ ’’ حنوط شدہ بادشاہت‘‘  میں عصر حاضر کے سماجی نظام کی دھوکہ دھڑی اور غیر جانبدارانہ رویہ،  افسانہ ’’ جرائم کی دنیا‘‘  میں سیاسی ذہنیت پر کراری چوٹ ہے۔’’شب خون‘‘ میں  ایک فیکٹری میں ہونے والے فائرنگ کا اندوہناک  حادثہ دل کو دہلا دینے والاالمیہ ہے۔ معاشرے میں خواتین کی حیثیت اور تہذیب و ثقافت کی پاسداری افسانہ’’روشن خیالی‘‘  میں مکالماتی انداز میں پیش کی گئی ہے۔اسی طرح  سرور غزالی کے دوسرے افسانچوں اور مختصر افسانوں کو دیکھا جائے تو یہ معلوم ہوگا کہ وہ ظالمانہ رسم و رواج  کے خلاف آواز اٹھاتے ہیں اور حالات حاضرہ کے مسائل کو لفظوں میں سمیٹنے کی کوشش کرتے ہیں۔ وہ اپنے افسانوں میں افسانہ نگار سے زیادہ مبلغ نظر آتے ہیں کیوں کہ ہر ایک تحریر میں واضح مقصدکار فرما نظر آتا ہے۔

سرور غزالی خداداد صلاحیت کے مالک ہیںاور اس صلاحیت کا پوری طرح احترام کرنا جانتے  ہیں۔سماج کی اصلاح کے اپنے فرائض کو پہچانتے ہیں۔ جرمنی جیسے ملک میں رہ کر بھی وہ اپنی جڑوں اور مٹی کی خوشبو سے جڑے ہوئے ہیں جس کی بھر پور خوشبو ان کی تحریروں میں صاف طور پر محسوس کی جاسکتی ہے۔مثال کے طور پر ملاحظہ ہو  :

’’ کیا کمبخت ہر وقت ٹرٹراتے رہتے ہیں ۔ ان کے شور سے تو میں تنگ آچکا ہوں۔رات سوتے میں بھی مجھے ان کی آوازیں تنگ کرتی ہیں‘‘۔  ( افسانچہ  برساتی مینڈک)

مختصر نویسی میں کہانی کو اس کے مزاج کے مطابق ڈھالنا آسان کام نہیںمگر مختصر نویسی سرور غزالی کا خاصہ ہے۔ ان کا افسانچہ ’’ضمیر کی صفائی‘‘  تین سطری طنزیہ افسانچہ کس قدر مختصر ترین جملوں میں ادا کیا گیا ہے :

’’  تم نے یقیناً اتنے زیادہ گناہ کئے ہیں جبھی تمھیں اتنی زیادہ عبادت پر تمھارے ضمیر کی ملامت اکساتی ہے ۔ورنہ ایک عام آدمی کو تو اتنی ہی عبادت کافی ہوتی ہے انسان بننے کے لئے جتنی عبادت اس پر فرض کی گئی ہے‘‘۔  (صفحہ۔15)

سرور غزالی کی ایک خوبی یہ بھی ہے کہ وہ اپنے افسانوں میں بیانیہ لب و لہجہ تو اپناتے ہیں لیکن بہت کم الفاظ میں بہت کچھ کہہ جانے کا  ہنر رکھتے ہیں۔ ان کے مختصر افسانے اور افسانچے اس بات کا بین ثبوت ہیں۔ اختصار نویسی میں انھوں نے کمال کیا ہے کہ ہر افسانچے کو بڑی خوبی سے طویل افسانے کا ہم پلہ بنا دیا ہے۔ ان کے افسانوں کی فضا سماج کی کڑوی ،کسیلی مگر حقیقت نگاری کی اساس پر ٹکی ہوئی ہے جہاں بے شمار سماجی اور معاشرتی مسائل درپیش ہیں۔انھوں نے انسانی فطرت میں موجود داخلی احساسات و کرب کو اپنے افسانوی  قالب میں ڈھال کر نئے معنی و مطالب عطا کئے۔ ان کے یہاں گہرا معاشرتی اور نفسیاتی شعور ہے جس کی بنا پر انھوں نے عصری حالات و کوائف سے قاری کو روشناس کرایا۔ یہ افسانے موجودہ معاشرے کی حقیقی تصویر بیان کرتے ہیں۔سرور غزالی انسانی نفسیات کے بھی نبض شناس ہیں۔انھوں نے اپنے افسانوں میں مرد عورت کے تعلقات کو مختلف رنگوں اور مختلف نوعیتوں سے دیکھنے کی کوشش کی ہے۔ ان کے زیادہ تر افسانے رومانی نوعیت کے ہیں جس میں’’ جنریشن گیپ‘‘ ’’بھڑکتی آگ‘‘ ’’ موبی‘‘ ’’حاجی حجام صاحب‘‘’’ پاس ورڈ‘‘’’مترجم‘‘’’آزادی‘‘ ’’ملاپ‘‘’’نا محرم خواتین‘‘  اور ’’ کپا دھوکیہ کی راجکماری‘‘ وغیرہ شامل ہیں۔

مجموعے میں کچھ افسانے ایسے بھی ہیں جن میں انسانی سماج کے منافقانہ رویوں اور فرد کی ذات کے کھوکھلے پن کو نمایاں کیا گیا ہے۔ ایسا معاشرہ جہاں خود فریبی اور ہوس پرستی کا ماحول ہے ،جہاں مغربیت اس حد تک سرایت کر چکی ہے کہ انسان کے رہن سہن، طور طریقے اور لباس کے ساتھ ساتھ ان کے فکر و خیالات میں بھی مغربیت داخل ہوچکی ہے۔ افسانہ ’’جنسی ہوس‘‘  اور ’’جنسی ہراسگی‘‘  اس کی عمدہ مثالیں ہیں، جس میں بدلتے ہوئے سماج کی کریہہ تصویریں دکھائی گئی ہیں۔

افسانہ ’’مترجم‘‘  میںعامر کے غیر قانونی بزنس اور تارکین  وطن کی اسمگلنگ  کے کارنامے پر روشنی ڈالی گئی ہے۔’’ خداوند خدا‘‘  مکالماتی انداز میں لکھی ہوئی ایک علامتی کہانی ہے جس میں عزرائیل اور ابلیس کے کردار میں باہمی خیالی گفتگو کو  بڑے دلکش  پیرائے میں بیان کیا گیا ہے۔’’سکندر اعظم‘‘ کے تحت عقل وسوجھ بوجھ اور دعنائی سے کئے گئے کام کا ذکر ہے۔افسانہ ’’جھولا‘‘  زندگی میں آنے والے مسائل سے سمجھوتا کرنے کی تعلیم دیتا ہے اور کار خیر کے لئے آمادہ کرتا ہے۔’’ حنوط شدہ  بادشاہت‘‘ میں دور حاضر کے سماجی خلفسار کو موضوع بنایا گیاہے۔’’سگنل کی لال بتی‘‘ میںٹرافک رولس اور اس کی غیر جانبداری سے ہونے والے حادثات پر روشنی ڈالی گئی ہے۔دیہی زندگی پر مبنی افسانہ’’ بوتو اور لنگڑا چرواہا‘‘ گاؤں میں رونما ہونے والے واردات کا سچا عکس ہے۔ افسانہ ’’متصادم قانون‘‘ سماجی مسائل اور کرداروں کی نفسیاتی الجھنوں کو بخوبی پیش کرتا ہے ۔ایک یوروپین لڑکی الز بتھ کا دو مردوں سے معاشقے کے درمیان  پیدا شدہ نوزائیدہ بچے کے اصل باپ کو عدلیہ کے فیصلے کے تحت متعارف کرایا گیا ہے۔ ’’جرائم کی دنیا‘‘  میں انسانی اسمگلنگ کے کاروبار میں سرکاری سرپرستی اور سیاسی دباؤ کا سیدھے عمل دخل کو  بروئے کار لایا گیا ہے۔

مجموعے میں شامل دیگر افسانے ’’اوور ٹیک ٹریک‘‘ ’’مانگو‘‘ ’’ داخلے کی پابندی‘‘ ’’چھوڑدیا‘‘ ’’ نصاب‘‘ ’’استاد شاگرد‘‘ ’’ فارم ہاؤس‘‘ ’’قندیل جنت میں‘‘ ’’رعمسس دوم‘‘’’کرامت‘‘ ’’بیہوددہ کتا‘‘ ’’ہارا ہوا ملاح‘‘ ’’غیرت مند بے غیرت‘‘ ’’ واٹس ایپ‘‘ ’’املا کی غلطی‘‘  وغیرہ افسانے اپنی انفرادیت کے سبب نمایاں میں۔

موصوف کے افسانوں کے بارے میں مناظر عاشق ہرگانوی کی یہ رائے ’’ سچ تو یہ ہے کہ سرور غزالی کا افسانوی ادب اکیسویں صدی کے تناظر میں اور آج کے مسائل کے پیش نظر پروان چڑھتا ہے۔اسی لیے ان کی راہیں متوازن ہیں ، ان کا زندگی آمیز اور زندگی آموز ، انداز بیان تیز دھوپ کی حیثیت رکھتا ہے‘‘۔

امید ہے کہ علمی و ادبی حلقے میں سرور غزالی کی دیگر نگارشات کی طرح  متذکرہ مجموعے کی بھی خاطرخواہ  پذیرائی کی جائے گی۔

ڈاکٹر داؤد احمد،

فلیٹ نمبر A-1/22 سلبھ آواس،کرسی روڈ،جانکی پورم،لکھنؤ ۔226026

       ای میل    :   daudahmad786.gdc@gmail.com