بج بج اردو ہائی اسکول میں بج بج اردو ٹائمز کا اجراء کی تقریب اور آل بنگال مشاعرہ 

مغربی بنگال، کولکاتہ-137 کے بج بج ہائی اسکول میں ایک منفرد پہل کو دیکھنے کو ملی۔ 3/ مارچ 2023ء بروز سنیچر  بعد نماز ظہر "بج بج اردو ٹائمز ”  کی رسم رونمائی کی تقریب منعقد ہوئی۔ تقریب رونمائی کی صدارت سابق پرنسپل عبدالودود انصاری صاحب نے کی جبکہ نظامت خواجہ احمد حسین نے کی۔ "بج بج اردو ٹائمز” کا اجراء بدست مہمانِ ذیشان جناب اشوک کمار دیب (ایم ایل اے، بج بج) ہوا۔ ساتھ میں مہمانان خصوصی محمد منصور عالم (وائس چیئرمین بج بج میونسپلٹی)، محمد شہزادہ(وارڈ کاؤنسلر) اور مہمانان اعزازی ڈاکٹر خورشید اقبال ، عظیم انصاری اور محمد علی صدیقی صاحبان موجود رہے۔ مہمانان نے اسکول کے ہیڈماسٹر ان چارج  ڈاکٹر وحید الحق علیگ کی منفرد کاوشوں کو سراہتے ہوئے  متذکرہ "بج بج اردو ٹائمز” اور تعلیم کی اہمیت پر گفتگو کیں اور مستقبل کے لیے نیک خواہشات کا اظہار کیے۔ بج بج میونسپلٹی کے وائس چیئرمین محمد منصور صاحب نے کہا کہ "بج بج اردو ٹائمز” کے آئندہ شمارے کی اشاعت میں مجھ سے جو کچھ بن پڑے گا میں کروں گا.اس لئے کہ یہ واقعی ایک تاریخی کارنامہ ہے۔ خیر مقدمی کلمات محترمہ مون بانو(استانی اسکول ہذا) نے ادا کی۔ کلیدی خطبہ ڈاکٹر خورشید اقبال نے دیا۔ ماسٹر محمد علی صدیقی، عالیہ بیگم (استانی اسکول ہذا) اور شمیم جہانگیری نے تجزیاتی تاثرات پیش کیے۔ تقریب کے دوسرے مرحلے میں آل بنگال مشاعرہ کی صدارت عظیم انصاری (معروف تنقید نگار، مترجم، شاعر و ادیب) نے کی جبکہ نقابت کے فرائض خواجہ احمد حسین اور علی شاہد دلکش (راقم) نے مشترکہ طور پر ادا کیے۔‌ مشاعرے کا آغاز  سید انظار البشر بارکپوری کی مترنم آواز میں حمد باری تعالیٰ سے ہوا۔ بعد ازیں مشاعرے کی ابتدا میں ہی درجہ دہم کی طالبہ آسیہ پروین نے اسکول ترانہ (ڈاکٹر وحید الحق کی تخلیق) دلکش انداز میں پیش کی۔ اس کے بعد اسکول کی ٹیچر مون بانو نے اپنی پُر سحر آواز میں ڈاکٹر وحیدالحق کی غزل کو پیش کرکے مشاعرے کے لطف کو دو بالا کیا۔ مشاعرے میں اپنی تخلیقات پیش کرنے والے دوسرے شعرا میں

 

خطاب عالم شاذ

تعلق سے سیرت کے، باتیں سند کی

حماقت ہے پاگل سند دیکھتے ہیں

 

، علی شاہد دلکش،

انداز اور لہجہ ہے بدلا ہوا سا کچھ

شاہد خبر ملی ہے سیاست میں جائے گا

 

سہیل خان سہیل،

نفرتوں  سے  گر  بھرا  ہو گا  ہِردئے  تِرا  مِرا

پھر کہاں ، ایشور سنے گا پرارتھنا کوئی دعا

 

خواجہ احمد حسین ،

تیر جس پر چلا رہے ہو تم

اس پرندے میں جان تھوڑی ہے

 

ڈاکٹر شاہد فروغی،

تدبیر  سے  انسان  بنا لیتا ہے قسمت

ہاتھوں کی لکیروں میں مقدر نہیں ہوتا

 

ڈاکٹر وحید الحق علیگ ،

لباسِ خاک ترا اب کہاں گزارا ہے

بڑی ادا سے تجھے روح نے اتارا ہے

 

بلند اقبال ،

تم نمازوں کی بات کرتے ہو

لوگ سنتے نہیں اذان تلک!

 

مہتاب سلم ،

جب کبھی بھی فقیر کے در پر

جھوٹ بولوں تو ہونٹ جلتے ہیں !

 

شرر راستی،

ماں کی بوڑھی آنکھ کو پھر روشنی مل جائے گی

شہر میں بیٹے کو جس دن نوکری مل جائے گی

 

ڈاکٹر خورشید اقبال،

صرف آنکھوں سے نظر آتے نہیں منظر تمام

دیکھنے کے واسطے کچھ روشنی بھی چاہیے

 

قمر الدین قمر

وہ کیا گیا کہ روٹھ گئی ساری کائنات

ان کی نظر کے ساتھ زمانہ بدل گیا

 

عظیم انصاری ،

ایسا  نہیں  ہے  کہ  کھیلتا  رہتا  ہے  ناخدا

موجیں بھی کھیلتی ہیں کبھی ناخدا کے ساتھ

 

صدر محفل کا صدارتی خطبہ اور جہاں آراء بیگم(استانی اسکول ہذا) کے تشکراتی کلمات کے ساتھ تقریب تکمیلیت کو پہنچی۔ اس تقریب کو کامیاب بنانے میں محمد سلیم، محمد مسلم، محمد وکیل احمد، بابر انصاری، شیخ سلیم، محمد ارمان انصاری، محمد امتیاز، صبا ناز خاتون، تبسم خاتون، شہناز خاتون، سیمی بانو، شبنم بیگم، رخسانہ خاتون، حسینہ بیگم، انوری خاتون، اور رابعہ بیگم وغیرہ نے  پورے خلوص کے ساتھ اپنی خدمات کو پیش کیں۔

 

رپورٹ: علی شاہد دلکش

 

 

(اگر زحمت نہ ہو تو ادبی میراث کے یوٹیوب چینل کو ضرور سبسکرائب کریں    https://www.youtube.com/@adbimiras710/videos