جدید ٹکنالوجی کے توسط سے مدارس نے تعلیم کو عام کرکے ایک بڑے چیلنج کو قبول کیا ہے ۔ڈاکٹر شاہ محمد فائز
مدنی انٹرکالج چکپہانی ،بہرائچ۔۶مارچ ۲۰۲۲۔ مدارس ہندوستان میں تعلیمی نظام کا ایک اہم جز ہیں۔مالیاتی چیلینجز کے باوجود لاک ڈاون میں تعلیمی سلسلہ برقرار رکھنا اور جدید ٹکنالوجی سے تعلیم کے لئے استفادہ کرنا مدارس کا قابلِ فخر کارنامہ ہے۔ان خیالات کا اظہار ڈاکٹر شاہ محمد فائز نے مدنی انٹر کالج چکپہانی قیصر گنج بہرائچ کے زیر اہتمام ’مدارس میں آن لائن اردو درس وتدریس کے مسائل اور امکانات‘ کے موضوع پر قومی کونسل برائے فروغ اردو زبان کے اشتراک سے منعقد قومی سمینار میں افتتاحی اجلاس کے دوران کلیدی خطبہ میں کیا ۔کالج کے احاطے میں منعقد سمیناکے افتتاحی اجلاس کی صدارت مولانا حاجی رئیس قاسمی نے فرمائی۔مولانا صلاح الدین مظاہری بطور مہمان خصوصی شریک ہوئے ۔مولانا نور الدین قاسمی نے قرآن پاک کی تلاوت کی۔ڈاکٹر عمیر منظرنے نظامت کا فریضہ انجام دیا ۔اس سے قبل سیمنار کے کنوینر محمد ارشد رئیس نے مہمانوں کا خیر مقدم کیا۔
سلسلہ کلام جاری رکھتے ہوئے ڈاکٹر شاہ محمد فائز نے کہا کہ روایتی تعلیمی نظام کو آن لائن تدریس میں تبدیل کرنا اساتذہ کے لئے ایک چیلینج تھا مگر لاج ڈاون کی صورتحال نے ایک نئے متبادل کو ہیش کیا۔ہر ایک نے اپنی سہولیت اور صلاحیت سے آن لائن تدریس کے موقع کا فائدہ اٹھایا۔
اس موقع پرانہوں نے ای لرننگ کے مسائل و مشکلات پر روشنی ڈالی،ڈاکٹر فائز کا خیال ہے کہ یہ طریقہء تدریس طلباء کی مجموعی شخصیت کی نشونما کو متاثر کرتا ہے۔نیز والدین تکنیکی امور سے بہرہ مند نہیں ہوتے۔اسی لئے وہ کسی بھی مسئلہ کی صورت میں بچوں کی مدد نہیں کرسکتے۔اس موقع پر اساتذہ کے چیلیج کا ذکر کرتے ہوئے کہا کہ تکنیکی طور پر خود کو اپڈیٹ رکھنا بہت بڑا چیلیج ہے۔
ڈاکٹر شاہ محمد فائز نے میڈیا کے سروے کے حوالے سے گفتگو کرتے ہوئے کہا کہ چونکہ مدارس کے طلبہ کی اکثریت معاشی طور پر خود کفیل نہیں ہوتی اس لئے اس ذریعہء تعلیم کا بار اٹھانا ان کے لئے بہت مشکل ہے۔
مہمان خصو صی نے کہا کہ یہ موقع بہر حال غور و فکر کا ہے کہ کس طرح اچھے انداز سے ہم نئے تعلیمی وسائل سے فائدہ اٹھا سکیں ۔صدارتی خطاب میں حاجی رئیس احمد قاسمی نے کہا کہ آج کا یہ پروگرام کئی لحاظ سے ہم کو غور وفکر کی دعوت دیتا ہے ۔اور نئے تکنیکی وسائل سے بھر پور فائدہ اٹھانے کی طرف راغب کرتا ہے ۔
ریاض ملک نے شکریہ کے کلمات ادا کیے ۔
افتتاحی ااجلاس کے بعد دو تکینکی سیشن ہوئے جس میں ڈاکٹر شاہ محمد فائز اور ڈاکٹر عبید الرحمن ندوی نے صدارت کا فریضہ انجام دیا ۔جبکہ احمد رضا نے نظامت فرمائی ۔اس موقع پر ڈاکٹر عمیر منظر ،ڈاکٹر تسنیم فاطمہ زیدی ،ڈاکٹر عبید الرحمن ،ڈاکٹر ناصر الدین ،ڈاکٹر محمد خبیب صدیقی ،جناب عبدالرحمن،محمد سعید اختر ڈاکٹر محفوظ الرحمن،ڈاکٹر محمد حنیف خاں ڈاکٹر عمران احمد ڈ اکٹر محمد ریاض الحق ڈاکٹر غیاث الاسلام صدیقی ،جناب تیمور احمد خاں اور جناب نصراللہ نے مقالے پڑھے ۔
عمیر منظر نے آن لائن ایپ کا تعارف کرایااور بتایا کہ اس دوران عام طور پر تدریس کے جن ایپ کو استعمال کیا جاتا رہا ہے اور کیا جارہا ہے ان سے کس طرح فائدہ اٹھایا جائے اور تدریس کے معیار کو بلند کیا جائے ۔
ڈاکٹر عبید الرحمن ندوی نے مقالہ پڑھتے ہوئے کہا کہ آن لائن آف لائن تعلیم کا بدل نہیں ہوسکتی کیونکہ تعلیم تربیت کا نام ہے ۔جو آن لائن کے توسط سے ممکن نہیں ۔انھوں نے کہا کہ اس کے توسط سے ہم بہت سے دیگر باصلاحیت افراد سے فائدہ اٹھاسکتے ہیں۔
مدارس میں آن لائن اردو درس وتدریس کے مسائل اور حل کے موضوع پر محمد سعید اختر نے مقالہ پڑھتے ہوئے کہا کہ آن لائن اردودرس وتدریس میں طلبہ کے لئے وسائل کی کمی محسوس کی جاتی ہے۔ آن لائن علم کے حصول کے لیے ملٹی میڈیا موبائل، لائٹ اور ہائی اسپیڈ انٹرنیٹ کی اشد ضرورت ہوتی ہے ۔سعید اختر نے کہا کہ لاک ڈاؤن نے سب سے زیادہ پسماندہ طبقات کے افراد کو متاثر کیا ہے۔اور اسی لیے ان کے یہاں تعلیمی کا تسلسل برقرار نہ رہ سکا ۔ضرورت ہے کہ نئی ضرورتوں کے پیش نظر اس ٹکنالوجی کو بہ سہولت سب تک فراہم کی جائے۔
تیمور احمد خاں نے تدریسِ زبان اور مدارس میں آن لائن اردو درس و تدریس کے موضوع پر مقالہ پڑھتے ہوئے کہا کہ آن لائن درس و تدریس کے مختلف مسائل پر غور کرنے کے بعد یہ بات واضح ہوجاتی ہے کہ ای لرننگ محض ایک متبادل طریقہ تدریس ہے۔یہ کبھی بھی روایتی طریقہٗ تعلیم کا مقابلہ نہیں کر سکتا۔انھوں نے کہا کہ وبائی صورتحال کے پیشِ نظر وقت کی اہم ضرورت ہے کہ آن لائن درس و تدریس کے مسائل کا سائنسی بنیادوں پر حل تلاش کئے جائیں۔مدارس میں اردو درس تدریس کے لئے اساتذہ کا ٹکنالوجی سے واقف کار ہونے کے علاوہ تمام ممکنات کو اپنانا لازمی امر ہے۔ڈاکٹر محمد حنیف نے کہا کہ اس موضوع کے تئیں ہمیں حساس ہوکر فائدہ اٹھا نا چاہیے کیونکہ نئی دنیا میں اب یہی طریقہ تعلیم کے رائج رہنے کا امکان ہے ۔بعض کمیوں کے باوجود اس کے فائدہ بہت ہیں ۔
اس موقع پر ڈاکٹر عبدالحنان قاسمی ،پرنسپل وسیم خاں ،مولانا محمد حبیب خاں قاسمی،پرنسپل اقرار احمد ،مولانا فخرالدین قاسمی ،پرنسپل سنجے سنگھ،مشیر احمد ،ابصار احمد انصاری ،ونے سنگھ ،پرنسپل لالتا وشوکرما،ونود یادو،انیس فاطمہ ،سفیان احمد خاں،مولانا محمد ذاکر خاں،ماسٹر عتیق احمد ،سلمان خٓں ،آفاق الرحمن بیگ ،مہندر سوریا،جے پی سنگھ اور قرب و جوار کے بہت سے شائقین علم وادب موجودتھے ۔
(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)
| ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔ |
Home Page
