کیکٹس کے پھول (تنقیدی مضامین کا مجموعہ)- ڈاکٹر نوشاد منظر

معاصر عہد میں شموئل احمد کا نام ایک اہم فکشن نگار کے طور پر لیا جاتا ہے۔ان کے افسانوں کے پانچ مجموعات کے ساتھ تین ناول اور ایک عمر گزشتہ کی کتاب ’اے دل آوارہ‘ کے عنوان سے شائع ہوچکی ہیں۔ اس کے علاوہ انہوں نے کچھ تراجم بھی کیے ہیں اور ’اردو کی نفسیاتی کہانیاں‘‘ کے عنوان سے افسانوں کا ایک انتخاب بھی کیا ہے۔

زیر نظر کتاب’’ کیکٹس کے پھول ‘‘ ان کی پہلی تنقیدی کتاب ہے۔ اس کتاب میں سترہ مضامین شامل ہیں۔ان مضامین میں بیشتر کا تعلق فکشن سے ہے۔مجموعے میں شامل پہلا مضمون’’عورت اور معاشرہ‘‘ ہے۔یہ ایک مختصر مضمون ہے جس میں مرد اساس سماج میں عورتوں کے ساتھ ہونے والی نا انصافیوں کا ذکر کیا گیا ہے، شموئل احمد کا خیال ہے کہ معاشرے میں مردوں کی بالا دستی ہے یہی وجہ ہے کہ مرد خود کو صنف بہتر تصور کرتا اور عورتوں کو دوئم درجے کا شہری سمجھتا ہے انہوں نے لکھا ہے کہ ادب عالیہ ہو کہ اساطیری قصے دونوں جگہ کم و بیش یہی صورت حال ہے کہ مرد نے ہر جگہ اپنی بالا دستی قائم کرنے کی کوشش کی ہے۔شموئل احمد نے چند ماہر ین نفسیات کی آرا کو پیش کرتے ہوئے نطشے کے اس قول کو درج کیا ہے جس میں اس نے کہا تھا’محبت عورت کے لیے جسم و روح کا مکمل عطیہ ہے جب کہ مرد کے لیے محبت فقط ایک جُز ہے۔‘شموئل احمد نے مذہبی کتابوں کے ذریعے بھی عورت کی حیثیت کو دکھانے کی کوشش کی ہے، حالانکہ یہاں ان کا انداز غیر مدلل ہے اور وہ بنا کسی ٹھوس حوالے کے واقعات پیش کرتے چلے جاتے ہیں، باوجود اس کے انہوں نے ایک سوال قائم کیا ہے جو اپنے آپ میں اہم ہے کہ ہندو ستانی سماج میں کسی لڑکی کا نام دروپدی اور شیعہ معاشرے میں کسی لڑکی کا نام عائشہ کیوں نہیں رکھا جاتا؟اس کی وجہ بھی انہوں نے لکھی ہے ان کا خیال ہے کہ’شاید یہ بات قابل قبول نہیں کہ عورت مردانہ سماج کو چیلینج کرے اور انتقام کا جذبہ رکھے۔‘شمئل احمد نے جو سوال قائم کیا وہ اہم تو ہے مگر اس کی ایک تفصیل ہے جس پر مدلل گفتگو کرنے کی ضرورت ہے۔ہاں اتنا ضرور ہے کہ سماج کا ایک بڑا طبقہ آج بھی عورتوں کی بالادستی کو قبول کرنے کا قائل نہیں ، یہاں تک کہ وہ مذہبی صحیفے کے ان ہی حصوں کو پیش کرتا ہے جس سے مردوں کی بالادستی ثابت ہوتی ہو، اور مرد پر جو ذمہ داری اور عورتوں کے حقوق بتائے گئے ہیں وہ اسے نظر انداز کردیتا،میں یہاں ایک چھوٹی سی مثال دینا چاہتا ہوں کہ مسلم سماج میں عورتوں کے پردے پر خوب گفتگو کی جاتی ہے مگر سورۃ النور کی اس آیت کو بہت کم پیش کیا جاتا ہے جس میں مردوں کو اپنی نظریں نیچی رکھنے اور زنا سے دور رہنے کی تلقین کی گئی ہے۔شموئل احمد نے تانیثی ادب کے حوالے سے بے حد اہم بات کہی ہیں ، انہوں نے لکھا ہے کہ پورا تانیثی ادب ان کی نظر میں ناقص ہے اور اس کی وجہ بیان کرتے ہوئے وہ لکھتے ہیں کہ اس تانیثی بحث میں بس ایک ہی طرح کی بات دہرائی جاتی ہے یعنی عورت کی بے بسی، اس کی آہیں ، اس کے آنسو اور مرد کی بالا دستی کا نوحہ۔مگر اس پورے صورت حال کو بدلنے کی کوئی خاص کوشش انہیں نظر نہیں آتی۔

زیر مطالعہ کتاب کا دوسرا مضمون’منٹو اور بیدی کے افسانوں کی عورتیں‘‘ ہے۔ سعادت حسن منٹو اور راجندر سنگھ بیدی دونوں ہی اردو کے اہم افسانہ نگار ہیں، اور اسے حسن اتفاق ہی سمجھا جائے گا کہ دونوں نے عورت اور ان کے مسائل کو موضوع بنایا۔مگر دونوں کا اسلوب ایک دوسرے سے مختلف اور جدا ہے۔منٹو نے ایک جگہ لکھا ہے کہ ’چکی پیسنے والی عورت جو دن بھر کام کرتی ہے اور رات کواطمینان سے سو جاتی ہے وہ میرے افسانوں کی ہیروئن نہیں ہوسکی‘منٹو نے اس بات کا کھل کر اعتراف کیا کہ ان کے افسانوں کی اصل ہیروئن چکلے کی عورتیں ہیں، یہی نہیں منٹو عورتوں کے یہاں موجود احتجاجی رویے کو پسند بھی کرتے تھے۔مگر جہاں تک بیدی کے کردار کا تعلق ہے تو بیدی کے یہاں جنس کا وہ اظہار نہیں ملتا جو منٹو کا خاصہ ہے، بلکہ بیدی عورتوں کو معاشرے کی چشمے سے دیکھتے ہیں، وہ عورت کے منفی پہلو یا مرد کے مثبت پہلو کو نہیں دکھاتے بلکہ بقول شموئل احمد’بیدی مرد اور عورت کی محبت کو پہلے غلیط مانتے ہیں پھر مقدس۔’یعنی معاشرہ کے مقرر کردہ اصول کے خلاف اگر محبت شادی سے قبل کی جاتی ہے تو غلیظ اور شادی کے بعد کی جائے تو مقدس۔شموئل احمد نے منٹو اور بیدی کے نسوانی کردار کے متعلق لکھا ہے ’وہ عورتیں جن کا گزر منٹو کے یہاں نہیں ہوسکا، بیدی کی کہانیوں میں مرکزی کردار بن کر ابھری ہیں۔اور خود بیدی نے جن سے دامن بچایا ہے وہ منٹو کے ہاں مرکز ومحور کی حیثیت رکھتی ہیں۔‘شموئل احمد نے اس مضمون میں منٹو اور بیدی کے کردار نگاری کا نہ صرف جائزہ پیش کیا ہے بلکہ ایک دوسرے کے کردار سے تقابل بھی کیا ہے، انہوں نے چند افسانوں کے اقتباس بھی پیش کیے ہیں۔

شموئل احمد کی کتاب میں شامل ایک مضمون’’اردو افسانے کی بے وفا عورتیں‘‘ ہے۔شموئل احمد نے نطشے کے ایک قول کو درج کیا ہے جس میں اس نے لکھا تھا کہ ’مرد اور عورت کی یہ جنگ ابدی ہے اور امن اسی وقت ہے جب ایک کی برتری دوسرا قبول کرلے۔‘گویا عورت اور مرد کا رشتہ مالک اور غلام کا ہو۔مرد اساس معاشرے میں عام طور پر عورت کو غلام سمجھا گیا اور مرد کی پریشانیوں کا سبب بھی عورتوں کو سمجھا گیا، مگر کیا واقعی ایسا ہے۔ جنت میں شجر ممنوعہ کھانے کے لیے آدم ؑ کو تیار کرنادراصل حضرت حواؑ کے تجسس کا نتیجہ تھا نہ کہ حضرت آدمؑ اور خود کو کسی مصیبت میں ڈالنے کا۔جہاں تک اردو افسانے میں عورت کے کردار کا ہے تو شموئل احمد کا خیال ہے کہ بیدی، منٹو اور کرشن چند تینوں کے یہاں عورتوں کی طرف داری نظر آتی ہے مگر بقول شموئل احمد’بیدی چپکے چپکے آنسو بہاتے ہیں۔ منٹو کی سوگندھی ریکٹ کرتی ہے اور کرشن کی پریتو خنجر بکف ہوجاتی ہے۔ ‘جہاں تک اردو افسانے میں بے وفا عورتوں کا تعلق ہے تو اس ضمن میں شموئل احمد نے پریم چند(نئی بیوی)، کرشن چند(پریتو)، غلام عباس(اس کی بیوی) اور ساجد رشید(ایک گمشدہ عورت) وغیرہ کے حوالے سے گفتگو کی ہے۔ شموئل احمد نے لکھا ہے کہ اردو میں بے وفا عورتوں کے متعلق کم لکھا گیا ہے اور جو لکھا بھی گیا ہے اس میں ادیب کا رویہ جارحانہ نہیں ہے۔شموئل احمد نے یہ سوال قائم کیا ہے کہ’ بے وفائی کا پیمانہ کیا ہے؟سماج مردوں کا ہے ، پیمانہ وہی خلق کرے گا، اور اس کے بنائے ہوئے پیمانے میں اپنی زندگی جیتی عورت ہمیشہ داغ دار نظر آئے گی۔عورت کی بے وفائی کے متعلق یہ خیال عام ہے کہ وہ جنسی نا آسودگی کی وجہ سے بے وفائی پر مجبور ہوجاتی ہیں مگر شموئل احمد اسے درست نہیں مانتے بلکہ ان کا خیال ہے کہ جنسی نا آسودگی سے زیادہ ذہنی اور روحانی نا آسودگی ایک عورت کو بے وفائی پر مجبور کرتی ہے۔

ایک مضمون بعنوان ’آزادی کے بعد ہندوستان میں اردو افسانہ‘‘ بھی اس کتاب میں شامل ہے۔آزادی کے بعد جو افسانے سامنے آئے ان میں بیشتر کا موضوع تقسیم اور اس کے بعد رونما ہوئے فسادسے تھا، حالانکہ چند افسانوں کو چھوڑ کر بیشتر افسانوں میں جذبات کے علاوہ کچھ بھی نہیں۔شموئل احمد نے لکھا ہے کہ ’ترقی پسندوں نے فساد کو فرقے کی نظر سے دیکھا اور منٹو نے انسانی المیے کے روپ میں۔ کرشن چندر کا مسئلہ ہے کہ سرحد پار کتنے ہندو کتنے مسلمان مرے منٹو کا مسئلہ ہے اتنے لوگ مرے۔‘شموئل احمد نے آزادی کے بعد لکھے گئے افسانوں کا ایک اجمالی جائزہ پیش کیا ہے۔اس ضمن میں جہاں وہ ترقی پسند نظریات کے حامل افسانہ نگاروں کا ذکر کرتے ہیں وہیں جدیدیت سے متاثرافسانہ نگاروں کے فن اور موضوع پر بھی اپنے خیالات پیش کرتے ہیں۔ ان کا خیال ہے کہ جدیدیت نے افسانے کی تفہیم میں قاری کو رد کیا اور ناقد کو گلے لگایا، جب کہ آج کا افسانہ قاری کو گلے لگاتا ہے اور ناقد کو رد کرتا ہے۔‘

شموئل احمد کا ایک مضمون’’اردو کی چند نفسیاتی کہانیاں‘‘ بھی ہے۔ اسی نام سے ان کی ایک مرتب کردہ کتاب بھی شائع ہوچکی ہے جس میں اردو کے چند مگر اہم نفسیاتی کہانیوں کو جمع کیا گیا ہے۔شموئل احمد کا خیال ہے کہ انسانی رشتوں پر مبنی ہر کہانی نفسیاتی کہی جاسکتی ہے۔اس مضمون میں بھی شموئل احمد نے چند افسانوں کو تجزیہ کرتے ہوئے اس کے نفسیاتی پہلوؤں پر گفتگو کی ہے۔

’’کیکٹس کے پھول‘‘ میں شامل مذکورہ مضامین کے علاوہ ’اردو ہندی افسانہ : ایک جائزہ‘،’ناول شکست کی آواز‘،’ ساجد رشید اپنے اداریے کی روشنی میں‘،’پرویز کے افسانے‘،’دیویندر اسّر کے افسانے‘،’لندن کی ایک رات‘ کے علاوہ نئے ناول کا بیانیہ، اس گھڑی کا انتظار‘ وغیرہ عنوانات سے مضامین شامل ہیں۔ فکشن بالخصوص افسانے کا شموئل احمد نے ایک دو مقامات کے علاوہ تفصیل سے جائزہ لیا ہے۔ ان کا تنقیدی اسلوب عمدہ اور زبان تخلیقی ہے۔یہ ایک اچھی کتاب ہے اس میں جہاں ایک تخلیق کار کے نظریہ ادب کی جانب اشارے ملتے ہیں وہیں دوسری جانب شموئل احمد کی تنقیدی نظر کا معترف بھی ہونا پڑتا ہے. مجھے امید ہے کہ شموئل احمد کی اس کتاب کو ادبی حلقوں میں پسند کی نگاہ سے دیکھا جائے گا۔