نئی تعلیمی پالیسی کا نفاذ،اب طلبہ دہلی یونیورسٹی سے نہیں کرسکیں گے ایم فل

نئی دہلی:دہلی یونیورسٹی سے ایم فل کرنے کے خواہشمند طلباء کے لیے ایک بری خبر ہے۔ اب طلباء ڈی یو سے ایم فل نہیں کر سکیں گے۔ دہلی یونیورسٹی نے یہ اطلاع دی۔ دہلی یونیورسٹی نے ایک نوٹس جاری کرتے ہوئے کہا ہے کہ قومی تعلیمی پالیسی 2020 کے مطابق اگلے تعلیمی سیشن سے ایم فل کی کوئی پڑھائی نہیں ہوگی۔ یونیورسٹی نئی تعلیمی پالیسی 2022-23 سے نافذ کرے گی۔ ڈی یو کے اس فیصلے پر کافی تنقید ہو رہی ہے۔ اساتذہ کے ایک طبقے نے دہلی یونیورسٹی کے فیصلے کی تنقید کرتے ہوئے کہا کہ اس سے ان طلباء کو نقصان پہنچے گا جن کی مالی حالت اچھی نہیں ہے۔ اس کے علاوہ اس فیصلے کا اثر خواتین پر بھی پڑے گا۔دہلی یونیورسٹی کی طرف سے جاری نوٹس میں کہا گیا ہے کہ دہلی یونیورسٹی کے مختلف شعبہ جات میں چلنے والے ایم فل کورسز کو قومی تعلیمی پالیسی (این ای پی) 2020 کے مطابق 2022-23 سے بند کر دیا جائے گا۔ یونیورسٹی کے ایک اہلکار کے مطابق ایم فل کورسز میں نئے داخلے نہیں ہوں گے۔ پہلے سے داخل طلبا کے لیے ایم فل کورس کی پڑھائی جاری رہے گی۔دوسری جانب اکیڈمک کونسل کے رکن متھن راج دھوسیا نے کہا کہ ایم فل کورس کئی نسلوں سے جاری ہے۔ ایم فل کی ڈگری نے دہلی یونیورسٹی سمیت دیگر یونیورسٹیوں میں تحقیقی صلاحیت کو فروغ دینے میں اہم کردار ادا کیا ہے۔ ایم فل کی ڈگری اپنے آپ میں ایک اہم ڈگری ہے۔ یہ انتہائی بدقسمتی کی بات ہے کہ NEP-2020 نے ایم فل کی ڈگری بند کر دی ہے۔