احکام عید ، پیغام عید اور ہماری عید – ڈاکٹر سمیہ ریاض فلاحی

ڈاکٹر سمیہ ریاض فلاحی

آراضی باغ،  اعظم گڑھ

 

عید عربی زبان کا لفظ ہے اور لفظ عود سے مشتق ہے جس کے معنی ہیں لوٹ آنا ۔ یوں تو عید فرحت و مسرت سے عبارت ہے اور ہر خوشی کچھ احساسات وجذبات کی عکاسی کی متقاضی ہوتی ہے جس کے نت نئے طریقے دنیا میں رائج ہیں مگر اس کی اصل روح کے مطابق عید کا مطلب انسان کا گناہوں سے پاکی اور برأت پر اظہار مسرت اور سجدہ شکر بجا لانا ہے۔ چونکہ انسانی زندگی ہمہ وقت رب کائنات کے احسانات کی مرہون منت ہے اور خصوصاً رمضان کے اختتام اور حج کے بعد انسان کو گناہوں سے مغفرت کا مژدہ سنایا جاتا ہے جس کا اظہار انسان بطور شکر عید کی شکل میں کرتا ہے۔

انسانی تاریخ کا مطالعہ یہ دریچے وا کرتا ہے کہ دنیا کی ہر قوم جب کسی کامیابی سے ہمکنار ہوتی ہے تو اس کی خوشی میں ایک خاص دن مقرر کرتی ہے جس میں وہ اپنی ثقافت کو مدنظر رکھتے ہوئے اپنی خوشی کا اظہار کرتی ہے چنانچہ قوم یہود یوم عاشورہ کو فرعون سے نجات کے نتیجے میں شکر خداوندی بجا لاتی ہے اور بطور عید مناتی ہے

عید فسح (عبرانی: פֶּסַח) یہودیوں کی ایک عید جو سات دنوں تک منائی جاتی ہے، اس عید کا آغاز یہودی تقویم کے مطابق 15 اپریل سے ہوتا ہے۔ اس کو بعض مسیحی فرقے مثلاً کاتھولک بھی مناتے ہیں۔ فسح کو عید فطیر اور "بے خمیری روٹی” کی عید بھی کہا جاتا ہے۔ یہ بنی اسرائیل کی فرعون سے رہائی اور خدا کے نجات بخش کام کے ذریعہ یہودیوں کو ایک قوم بنانے کی یاد میں منائی جاتی ہے۔ یہ عموماً بہار میں منایا جاتا ہےـ

(www.wikipedia.com)

اسی طرح قوم نصاری 25 دسمبر عیسی علیہ السلام کی پیدائش کے دن کو بطور عید جشن کا بھر پور اہتمام کرتی ہے۔

25 دسمبرکا دن دنیا بھر کی عیسائی اقوام میں حضرت عیسیٰ کا یومِ پیدائش ‘عید میلاد المسیح’ یعنی کرسمس کے نام سے انتہائی تزک و احتشام سے منایا جاتا ہے۔

علاوہ ازیں بر صغیر بالخصوص ملک ہندوستان میں ہندو قوم مختلف تہوار بڑی دھوم دھام سے مناتی ہے جن میں ہولی ، دیوالی ، دسہرہ اور رکشابندھن وغیرہ قابل ذکر ہیں۔ برادران وطن ان تہواروں کو رقص و سرود ، شراب و کباب اور پٹاخوں کے شور و غل میں مناتے ہیں کیونکہ یہ ان کی ثقافت کا حصہ ہے۔

مگر اسلام میں تہواروں کا جائزہ لیا جائے تو دو عید کا پتہ چلتا ہے ایک عید الفطر دوسری عید الأضحى جہاں کھیل کود کے بجائے تکبیرات و اعمال صالحہ کا خاص اہتمام کیا جاتا ہے۔

عن أنس قال : قدم رسول اللہ صلى الله عليه وسلم المدینة ولہم یومان یلعبون فیہا ۔فقال : قد أبدلکم اللہ بہما خیرا منہما : یوم الأضحی و یوم الفطر .

( سنن ابوداود : 1134، النسائی 1793  {بلوغ المرام 449)

ترجمة : حضرت أنس بن مالک رضی اللہ عنہ سے روایت ہے کہ اللہ کے رسول صلى الله عليه وسلم مدینہ تشریف لائے تو ان کے دو دن مقرر تھے جن میں وہ کھیل کود کرتے تھے . آپ صلى الله عليه وسلم نے ارشاد فرمایا : ان دونوں دنوں کو اللہ تعالی نے تمھارے دو بہتر دنوں سے بدل دیا ہے . عید الأضحی اور عید الفطر سے .

امت مسلمہ کو جو دو عیدیں بطور تحفہ عطا کی گئی ہیں وہ خوشی کے اظہار کے ساتھ کچھ قربانیوں کا پیغام بھی دیتی ہیں۔ نیز سنت رسول کو عملی جامہ پہنانے کا سنہرا موقع فراہم کرتی ہیں۔

احکام عید

عید الفطر شکر خداوندی میں کچھ اہم امور کی متقاضی ہے جو مندرجہ ذیل ہیں:

1۔ مسلمانوں کی دوعیدیں شریعت کی طرف سے متعین ہیں لہذا اپنی طرف سے کوئی عید ایجاد کرنا بدعت ہو گا.

2۔ عید کی نماز سے پہلے پہلے صدقہ فطر کی ادائیگی کرنا واجب ہے ۔

3۔عید کے دن نماز پہلے پڑھی جائے گی پھر خطبہ دیا جائے گا .

4۔ عید کے خطبے میں امام لوگوں کو نصیحت کرے اور ضروری أحکام بیان کرے .

5۔ سنت  یہ ہے کہ نمازی عید کیلئے پیدل چل کر جائے .

6۔ عید الفطر کی نماز کے لئے نکلنے سے پہلے کچھ کھا کر جانا سنت ہے البتہ عید الأضحی کے دن بغیر کچھ کھائے جانا چاہئے .

7۔ عید کے دن کا ایک ادب یہ بھی ہے کہ جمعہ کی طرح اس دن غسل کرے اور اپنی بساط کے مطابق عمدہ لباس زیب تن کرے اور خوشبو کا  استعمال کرے .

8۔ عید کے دن کا ایک ادب یہ بھی ہے کہ آنے اور جانے میں راستہ تبدیل کرے { بخاری : 986}.

9۔ عید کے دن کا ایک ادب یہ بھی ہے کہ عید گاہ جاتے وقت راستے میں تکبیر کہتا جائے۔ اس ضمن میں متعدد احادیث منقول ہیں جن سے مندرجہ بالا امور کی تائید ہوتی ہے۔

عن أبی سعید الخدری رضی اللہ عنہ قال : کان رسول اللہ صلى الله عليه وسلم یخرج یوم الفطر والأضحی الی المصلی وأول شیء یبدأ بہ الصلاة ثم ینصرف فیقوم مقابل الناس والناس علی صفوفہم فیعظہم ویأمرھم .

(صحیح البخاری :956 ، مسلم :889{بلوغ المرام: 494)

ترجمة: حضرت ابو سعید الخدری رضی اللہ عنہ سے مروی ہے کہ اللہ کے رسول صلى الله عليه وسلم عید الفطر اور عید الأضحی کوجب نماز کیلئے نکلتے تو سب سے پہلے نماز پڑھتے پھر لوگوں کی طرف منھ کرکے کھڑے ہوتے ، لوگ اپنی صفوں میں بیٹھے ہوتے آپ انھیں وعظ فرماتے اور حکم دیتے .

عن علی بن أبی طالب قال : من السنة أن تخرج الی العید ماشیا وأن تأکل شیئا قبل أن تخرج.

(سنن الترمذی :530 ، سنن ابن ماجہ : 1294 { بلوغ المرام : 500 }

ترجمة: حضرت علی رضی اللہ عنہ سے روایت ہے کہ انہوں نے فرمایا کہ مسنون یہ ہے کہ عید کے لئے پیدل چل کر جائے اور نکلنے سے قبل کچھ کھا کر نکلے.

پیغام عید

اب آئیے مقاصد عید پر غور کرتے ہوئے آگے بڑھتے ہیں۔

اللہ رب العزت کا بخشا ہوا انمول تحفہ وہ پہلی عید ہے جسے دنیا عید الفطر کے نام سے جانتی ہے۔ یہ عید ایک ماہ کے مسلسل روزے اور اس میں کئے گئے اعمال صالحہ کے نتیجے میں جب بندہ رب کی جانب سے بخشش کا پروانہ حاصل کرنے کی تگ و دو میں خود کو مصروف کرلیتا ہے اور ایاما معدودات کو ذہن نشین کرتے ہوئے خود کو تھکا کر چور کر لیتا ہے اور تقوی کے حصول کے لئے تقوی کی بھٹی میں خود کو تپاتے ہوئے تزکیہ نفس کے اعلی مناصب تک پہنچ جاتا ہے تو پھر قدرت اپنی انمول نعمت نچھاور کرتی ہے جسے بندہ لبیک کہتے ہوئے اپنے ہاتھوں میں سمونے کی انتھک کوشش کرتا ہے اور اپنی جبین سجدہ شکر کے لئے بچھا دیتا ہے۔

یہ ماہ مبارک جس میں تقوی و تزکیہ کو اولین حیثیت حاصل ہے۔ اس تقوی کی تکمیل کے لئے عید الفطر کے موقع پر جس خاص چیز کا حکم دیا گیا ہے وہ زکاة الفطر یا صدقہ فطر ہے جس کی فرضیت کا مقصد اس ماہ میں انجام دیئے گئے اعمال صالحہ یا روزہ میں کسی قسم کی کوتاہی ہوئی ہو تو اس کی تلافی ہوجائے ساتھ ہی اس کا مقصد مواسات و بھائی چارگی کا وہ اعلی نمونہ بن جائے جس کی بنا پر اس مہینے کو شہر مواسات کا درجہ حاصل ہے۔ اور عید کا دن بلا تفریق رنگ و نسل و امیر و غریب ہر ایک کے لئے خوشی کا تہوار ثابت ہو۔

دوسرا مقصد اس عید کا خود کو جذبہ شکر سے سرشار کرنا ہے جب بندہ ایک ماہ کی عبادت و ریاضت کے بعد ایک پر سکون فضا میں سانس لینے کے لائق ہوتا ہے تو بے اختیار یہ دن شکر میں سجدہ ریز ہونے کے لیے قلب کو مہمیز لگاتا ہے۔

تیسرا مقصد جو ماہ رمضان میں رب سے کئے ہوئے وعدہ کے مطابق دل کو کینہ و بغض اور کدورت سے پاک کرنے کے لئے انتھک سعی کرتا ہے تو اب وہ وقت آ جاتا ہے جب بندہ اسے عملی جامہ پہناتے ہوئے اپنے دل کو ان تمام آلائشوں سے پاک کرتے ہوئے اپنے بھائی کو گلے لگاتا ہے اور وہ تمام شکوے فراموش کردیتا ہے جو برسوں سے اس کے دل میں پنپ رہے تھے۔

چوتھا مقصد اس عید کا یہ ہوتا ہے کہ رب کا دیا ہوا تحفہ اس کے بتائے ہوئے طریقے کے مطابق استعمال کیا جائے چنانچہ اس میں کامیابی کے لیے بندہ کو تکبیر و تحمید کے اہتمام کا حکم دیا جاتا ہے نیز سنت رسول پر عملدرآمد کرتے ہوئے صبح کا آغاز شیرینی سے ہوتا ہے اور عیدگاہ کو جاتے ہوئے دو راستے کا انتخاب بھی سنت رسول کے مطابق کیا جاتا ہے۔

ماہ مبارک میں روزہ کو ڈھال بنا کر صبر کی صفت کو بطور خاص مرصع کرنے کی خصوصی ٹریننگ ہوتی ہے اس صبر کا اظہار یہاں بھی مقصود ہوتا ہے کہ بندہ اس روز پوری طرح سے آزاد ہونے کے باوجود صرف انہی چیزوں کو ہاتھ لگاتا ہے جو اللہ نے اس کے لئے مقدر کردی ہے لہذا غیر مسلم قوموں کی طرح رقص و سرود کی محفلوں اور فحاشی و عریانیت کے اڈوں سے خود کو دور رکھنے کا خاص اہتمام کرنے کا حکم ہے۔

یہ تو رہا پیغام عید۔

ہماری عید

مذکورہ بالا پیغام عید کے تناظر میں اگر اپنی عید کا جائزہ لیا جائے تو ہماری عید اس کے بالکل برعکس نظر آتی ہے۔

وہ مقدس مہینہ جو تقوی و اخلاص کا پیغام دیتا ہے مگر چونکہ ہمارے دل پورے مہینے کی ریاضت کے باوجود اخلاص کے اس مرتبے کو نہیں پہنچ پاتے جس کی شریعت اسلامیہ متقاضی ہے لہٰذا ہلال رمضان کے طلوع سے جہاں ہم خود کو کچھ حدود میں مقید کرتے ہیں ہلال عید کے طلوع ہونے کے ساتھ وہ داعیہ ہمارے دل سے خارج ہوجاتا ہے اور ہم کبھی گھریلو مصروفیات اور بے جا ذمہ داریوں کی ادائیگی کے چکر میں باہمی چپقلش کا شکار ہوجاتے ہیں یا پھر گھر کے دیگر افراد کے اندر ہزاروں کیڑے نکالنے کے اہم مشن میں مشغول ہوجاتے ہیں۔

وہ مقدس مہینہ جو ہمدردی و غمخواری کا درس دے کر ہم سے رخصت ہوتا ہے کہ اس کا منفی نتیجہ یہ دیکھنے کو ملتا ہے کہ ہمارے دل ایک دوسرے کی محبت سے خالی ہوتے ہیں یہاں تک کہ بعض دفعہ عید ملن میں مصافحہ اور معانقہ محض ایک ریت کی حد تک ہی ہوتا ہے ۔ اس کی وجہ یہ ہے کہ رمضان المبارک میں نت نئے پکوان کی تیاری میں ہم کبھی خود کو اتنا تھکا لیتے ہیں کہ دیگر امور کی انجام دہی کے لیے ہمارے پاس طاقت ہی نہیں بچتی یا پھر ذمہ داران یا سرپرست کی جیب تنگ دامنی کی شکایت پر مجبور ہوجاتی ہے اور پھر نتیجہ یہ نکلتا ہے کہ وہ بابرکت مہینہ ہی آپسی رنجش کا شکار ہوجاتا ہے اور ہماری عید بھی اسی رنجشوں کی نذر ہوجاتی ہے۔

وہ بابرکت مہینہ جو تزکیہ نفس کی خاص ٹریننگ پر آمادہ کرتا ہے مگر ہم بہت سے ایسے کام جو متنازع ہوتے ہیں انہیں یہ سوچ کر ٹال جاتے ہیں کہ اس سے عید کے بعد نمٹیں گے لہٰذا ہلال عید کے ظہور کے ساتھ ہی دبی ہوئی نفرت و کدورت پھر سے سر اٹھائے اپنی جاگیر پر قبضہ کرلیتی ہے اور دل نفرت و بغض کی آلائشوں سے پلید ہوتا ہے۔

وہ ماہ مبارک جو سخاوت و فیاضی کا درس دیتا ہے مگر اس دوران بھی ہم خود کو مادہ پرستی کے دلدل سے نکال نہیں پاتے لہٰذا ہماری عید غرباء و فقراء کے حقوق کی ادائیگی کے بجائے ہزاروں روپے کے جوڑوں اور بے جا اسراف و تبذیر کی نذر ہوجاتی ہے۔

خلاصہ کلام یہ ہے کہ وہ عید جو محض رب کائنات کی خوشنودی کے حصول کا محور ہے جس تک پہنچنے کے لئے بطور زینہ سنت رسول کو اپنانا ایک ناگزیر عمل ہے وہ آج ایک ثقافتی ریت کا حصہ بن چکی ہے لہذا ہم اخلاص کے مہینے سے گزر کر بھی اخلاص کے اس جوہر سے محروم ہیں جس کی شریعت اسلامیہ متقاضی ہے۔ تو آئیے عہد کریں کہ ہماری عید پیغام عید کی شناخت بن جائے اور ہم اقوام عالم کے سامنے اپنا سر فخر سے بلند کرتے ہوئے مواسات کے پیغام کو عام کرسکیں۔ اللہ رب العزت سے دعا ہے کہ وہ ہماری عید کو پیغام عید کا مصداق بنائے۔ آمین یارب العالمین۔

 

 

 

(اگر زحمت نہ ہو تو ادبی میراث کے یوٹیوب چینل کو ضرور سبسکرائب کریں    https://www.youtube.com/@adbimiras710/videos