یاس یگانہ چنگیزی (مونو گراف)/ حسن مثنیٰ – ڈاکٹر نوشاد منظر
غالب شکن کے نام سے مشہور یاس یگانہ چنگیزی کا شمار اردو کے اہم شاعروں میں ہوتا ہے۔یاس چنگیزی کا اصل نام مرزا واجد حسین تھا، انہوں نے کم عمری میں ہی اپنی شاعری کا لوہا منوالیا، ابتدا میں انہوں نے یاسؔ تخلص اختیار کیا مگر عظیم آباد سے علاج کے سلسلے میں جب لکھنو آئے اور یہی سکونت اختیار کرلی تب سے انہوں نے یاس کے ساتھ یگانہ بھی بطور تخلص اختیار کرلیا۔
میرے پیش نظر یاس یگانہ چنگیزی پر ڈاکٹر حسن مثنیٰ کا تحریر کردہ مونو گراف ہے۔مونو گراف کی اپنی ایک اہمیت بھی ہے اور مجبوری بھی۔اہمیت یہ کہ ایک مختصر کتاب کے مطالعے سے ہم کسی شاعر اور ادیب کے متعلق بہت سی اہم باتیں جان لیتے ہیں اور مجبوری یہ کہ مصنف کے سامنے صفحات کی قید ہوتی ہے جس میں اسے اپنی بات مکمل کرنی ہوتی ہے، جس وجہ سے تفصیلات کی کمی اور تشنگی محسوس ہوتی ہے۔ جہاں تک یاس یاگنہ چنگیزیپر لکھے گئے اس مونو گراف کا تعلق ہے تو حسن مثنیٰ نے اپنی کتاب کو چار حصوں میں تقسیم کیا ہے۔ کتاب کا پہلا حصہ ”سوانح اور شخصیت“ ہے۔ ڈاکٹر حسن مثنیٰ نے نہایت عمدگی کے ساتھ یاس یگانہ چنگیزی کی زندگی اور اس کے مراحل کا ذکر کیا ہے۔حسن مثنیٰ نے یگانہ کی زندگی، ان کے مصائب، پریشانی اور روز گار کے مسئلے کے ساتھ معاصرین کے ساتھ ان کے تعلقات پر بھی روشنی ڈالی ہے۔ مصنف کا خیال ہے کہ جن دنوں روزگار کے سلسلے میں لاہور میں قیام پذیر تھے، ان دنوں علامہ اقبال کے ساتھ ان کے خوشگوار رشتے تھے، یہی نہیں جگر مراد آبادی، اصغر گونڈوی اور سیماب اکبر آبادی سے بھی اقبال کے دولت کدے پر ملاقاتیں رہیں۔یہ وہی دور ہے جب لاہور کے معروف اشاعتی ادارے میسرز عطر چند کپور اینڈ سنسزمیں یگانہ کو ملازمت ملی تھی۔اس ادارے نے ”اردو مرکز“ کے نام سے ایک ادارہ قائم کیا تھا، جس کا مقصد اردو کے تمام اصناف کے انتخابات کو شائع کرنا تھا۔ یاس یگانہ کی ملازمت تاجور نجیب آبادی کے معاونین کے طور پر ہوئی۔بہر حال یاس یگانہ چنگیزی کی پوری زندگی نشیب و فراز سے بھری ہے، ان کی زندگی کا مطالعہ کرتے ہوئے ایک بات کا احساس ہوتا ہے کہ اس شخص نے حق تلفی یا ناحق پرستی کو پسند نہیں کیا۔ یگانہ کا ایک شعر ملاحظہ کیجیے، جو ان کی قبر کے کتبے پر درج ہے۔
خود پرستی کیجیے، یا حق پرستی کیجیے
آہ کس دن کے لئے ناحق پرستی کیجیے
زیر نظر کتاب کا دوسرا حصہ”ادبی و تخلیقی سفر“ ہے۔یاس یگانہ چنگیزی نے اپنی خود نوشت ”خود نوشت یاس“ میں لکھا ہے کہ وہ میرتقی میر، خواجہ حیدر علی آتش کے انداز تغزل کو اپنا نصب العین سمجھتے تھے۔گویا ہم یہ کہہ سکتے ہیں کہ انہوں نے میر اور آتش کے رنگ سخن کو اختیار کیا۔یاس یگانہ چنگیزی نے اپنے ادبی سفر کا آغاز عظیم آباد سے کیا، مگر بعض مجبوریوں بلکہ بقول مصنف مزاج کے لا ابالی پن نے انہیں عظیم آباد سے لکھنؤ ہجرت کرنے پر مجبور کیا۔یاس یگانہ چنگیزی کی زندگی میں ایسے کئی واقعات پیش آئے جس سے ان کی شخصیت متاثر ہوئی بلکہ چند ایک واقعہ نے انہیں متنازع بنا دیا۔ایسے ہی ایک واقعہ کو حسن مثنیٰ نے اپنی کتاب میں بیان کیا ہے۔ جن لوگوں نے یگانہ کو پڑھا ہے وہ جانتے ہیں کہ یگانہ خود کو غالب شکن کہتے تھے، مگر شاید کم لوگ اس کی وجہ سے واقف ہوں۔ حسن مثنیٰ نے لکھا ہے کہ ”ترانہ“ میں شامل رباعیات جن میں یگانہ نے غالب سے متعلق طنزیہ و مزاحیہ بلکہ تمسخرانہ انداز اختیار کیاتھا اسے دیکھ مسعود حسن رضوی ادیب نے یگانہ کی سرزنش کی، چونکہ ادیب اور یگانہ دوست تھے، یگانہ نے ان کی بات کو منفی انداز میں نہیں لیا، مگر جب دوسرے ادیبوں کی جانب سے بھی اعتراضات بلند ہوئے تو یگانہ نے اسے انا کا مسئلہ بنا لیا اور غالب کے خلاف چوبیس رباعیات کہہ ڈالے جو ان کی کتاب غالب شکن(1932) میں شامل ہے۔حالانکہ ترانہ میں اس سے کم رباعیاں تھیں۔بہر حال حسن مثنی نے یاس یگانہ کی کتابوں پر مختصر تبصرہ بھی کیا ہے۔اس مونوگراف میں جن کتابوں کا ذکر ہے ان میں ’نشتر یاس‘،’چراغ سخن‘،’شہرت کا ذبہ المعروف خرافات عزیز‘،’غالب شکن‘،’ترانہ‘،’آیات وجدانی‘،’گنجینہ‘،’خود نوشت‘وغیرہ شامل ہے۔ جیسا کہ اوپر عرض کیا گیا کہ یاس یگانہ چنگیزی کی شخصیت میں لا ابالی پن تھا، اس کا نقصان یہ ہوا کہ ان کے ناقدین نے ان کی شاعری کے بجائے ان کی شخصیت پر زیادہ گفتگو کی، نتیجہ یہ ہوا کہ ان کی شاعری میں موجود تلخی و ترشی اور ان کے لب و لہجہ اور شاعری کے نئے اسلوب پر کسی نے کوئی خاص توجہ نہیں دی۔مصنف کا خیال ہے کہ اگر ناقدین نے یاس کے فن پر تفصیل کے ساتھ گفتگو کی ہوتی تو یقینا وہ یاس کے یہاں ایک نیا لب و لہجہ، اچھوتا انداز اور نیا رنگ و آہنگ ڈھونڈنے میں کامیاب ہوتے۔
مذکورہ مونوگراف کا تیسرا حصہ ”یگانہ فہمی: ایک تنقیدی محاکمہ“ ہے۔حسن مثنیٰ نے یاس یگانہ کے چند اہم ناقدین اور ان کی تحریر کا حوالہ اس باب میں پیش کیا ہے۔باقر مہدی نے لکھا تھا کہ یگانہ نے اپنے زمانے کے حکمراں ادبی حلقے سے بغاوت کی تھی۔اگر محض اس خیال پر غور کیا جائے تو اس کا ایک مفہوم تو یہی نکلتا ہے کہ یگانہ نے اپنے عہد کے مروجہ شعری اصولوں کے خلاف بلکہ مخالف ایک نیا شعری اسلوب اور لب و لہجہ قائم کرنے کی کوشش کی۔مگر اس وقت کا ادبی ماحول یگانہ کو قبول کرنے سے قاصر رہا، حالانکہ یاس یگانہ چنگیزی کی شاعری میں انسانی زندگی کی قوت کا احساس اور حالات سے نبرد آزما ہونے کا حوصلہ ملتا ہے، آزادی، بانکپن اور پر زوری ان کے خیال کی خصوصیتیں ہیں۔ لہجے میں ایسی تمکنت اور وقار ہے جو آتش کی یاد دلاتا ہے۔یاس یگانہ کے یہاں انانیت بھی ہے اور محرومی اور ناکامی کا احساس بھی۔چند اشعار دیکھئے:
ہیں خاک برابر مگر اکسیر ہیں ہم
غالب کے پیر، ثانیِ میر ہیں ہم
دنیائے ادب تھی منتظر مدت سے
معلوم ہوا ہے کس خواب کی تعبیر ہیں ہم
امید و بیم نے مارا مجھے دو راہے پر
کہاں کے دیر و حرم گھر کا راستہ نہ ملا
دل طوفاں شکن تنہا جو تھا آگے سو اب بھی ہے
بہت طوفان ٹھنڈے پڑ گئے ٹکرا کے ساحل سے
اس طرح کے اور بھی اشعار ہیں جنہیں بطور مثال پیش کیا جاسکتا ہے، مگر تبصرہ کے طویل ہونے کا خدشہ ہے۔حسن مثنیٰ نے جامع انداز میں یگانہ کے ناقدین کی آرا کو نہ صرف پیش کیا ہے بلکہ اس کا تجزیہ بھی کیا ہے۔ حسن مثنیٰ کا خیال ہے کہ یگانہ کی شخصیت اور شاعری کا مرکز صداقت،اصول پسندی اور خود داری ہے۔اور انہیں خصوصیات نے ’یگانہ آرٹ‘ کو پروان چڑھایا ہے۔صنف غزل کے متعلق یگانہ کے خیالات ان کے معاصرین سے مختلف نظر آتے ہیں۔ غزل کے متعلق ان کا خیال تھا کہ غزل گوئی مرد و عورت کے جنسی تعلقات یا عاشقانہ زندگی کی ترجمانی کا نام نہیں بلکہ زندگی کے بڑے بڑے مسائل کو اختصار سے پیش کردینے کا بھی نام ہے۔ان کی غزلوں میں زندگی کے بڑے بڑے مسائل کا ذکر ملتا ہے۔ان کی شاعری کا بیشتر حصہ وجود خدا، دنیا کی بے ثباتی اور انسان کی مجبوری پر مبنی ہے۔ ان کی شاعری میں ایک شاعر کی انانیت بھی ہے، معاصرین سے شکایت بھی ہے،غم بھی ہے اور ناکامی کا احساس بھی۔اپنے جذبات کے اظہار کے لیے انہوں نے خود کلامی کا اسلوب اختیار کیا ہے۔
کتاب کا آخری حصہ یاس یگانہ چنگیزی کے شعری انتخاب پر مبنی ہے۔ مصنف نے یگانہ کی غزلوں اور رباعیوں کا خوبصورت انتخاب پیش کیا ہے۔ شاعری کا انتخاب بھی مصنف کے اعلیٰ ذوق کو پیش کرتا ہے۔
مجموعی طور یہ مونوگراف یگانہ فہمی میں ایک اہم اضافہ ہے۔ مصنف نے نہایت جامعیت کے ساتھ یگانہ کی شاعری پر گفتگو کی ہے۔ اس کتاب کو پڑھتے ہوئے یگانہ سے متعلق کئی غلط فہمیوں کا ازالہ بھی ہوتا ہے۔مصنف نے اعتدال کے ساتھ اپنی بات رکھی ہے۔
اخیر میں قومی کونسل برائے فروغ زبان اردو اور اس کی پوری ٹیم کو مبارک باد۔ کونسل نے مونوگراف لکھنے کے لئے ہمیشہ ایسے لوگوں کا انتخاب کیا ہے جو اس کام کو دل جمعی کے ساتھ پایہ تکمیل تک پہنچائے ، اوربیشتر مصنفین نے اپنے موضوع کے ساتھ انصاف بھی کیا ہے۔
کتاب کی طباعت خوبصورت اور دیدہ زیب ہے۔
کتاب حاصل کرنے کے کے لیے قومی کونسل برائے فروغ زبان اردو، دہلی سے رابطہ کریں۔
(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)
| ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔ |
