ماہِ رمضاں آگیا – علی شاہد ؔ دلکش

بروزن : فاعلاتن فاعلاتن فاعلاتن فاعلن

 

لیجئے  رحمت   لُٹانے   ماہِ   رمضاں  آ  گیا

کھل گئے رب کے خزانے  ماہِ  رمضاں  آ  گیا

 

دکھ  کے  بادل کو ہٹانے  ماہِ رمضاں  آ  گیا

سکھ کی بارش کو گرانے ماہِ رمضاں  آ گیا

 

‌  دل سے استقبال ہے اے نوری موسم اب ترا

روح  کو  فرحت  بنانے  ماہِ  رمضاں  آ  گیا

 

خلق پر رب کی عطا دن رات  ہو  گی  بالیقین

رب سے سب کچھ بخشوانے ماہ رمضاں آ گیا

 

اپنے رب کی بندگی سے ہو چکا تھا دور جو

رب سے  بندے کو  ملانے  ماہِ رمضاں  آ گیا

 

زور کم  ہو جائے گا اس ماہ میں شیطان کا

من  عبادت میں  لگانے  ماہِ  رمضاں  آ  گیا

 

امتی کے واسطے ہے   فضلِ ربی دیکھئے

کل گناہوں کو   مٹانے  ماہِ رمضاں آ  گیا

 

فقر و فاقہ تیس روزے کا صلہ ‌ دیتا ہے جو

رب کے  دامن کو  بڑھانے  ماہِ رمضاں  آ گیا

 

شکوہ، غیبت، فتنہ سازی کلمہ گو میں عام ہے

ہر  برائی   سے   بچانے   ماہِ   رمضاں   آ   گیا

 

روح کی تقدیس ہو گی نفس کی تطہیر سے

صائمو!   قدسی  بنانے  ماہِ  رمضاں   آ  گیا

 

‌نیک  کاموں  کا اجر  ستر  گنا ہو جائے  گا

کھل گئے  عرشی خزانے  ماہِ رمضاں  آ گیا

 

رات دن فضلِ خدا کی ہوگی بارش ہر طرف

ابرِ  رحمت  خود  لٹانے  ماہِ  رمضاں   آ  گیا

 

بجھ گئے تھے جن کے چہرے لغزشوں سے رات دن

نور   چہروں   پر   بڑھانے    ماہِ   رمضاں   آ   گیا

 

بھاگ جاگیں گے ہمارے یوں بھی دستر خوان کے

نعمتیں   ذیشاں   دلانے    ماہِ   رمضاں   آ  گیا

 

آخری عشرے میں جگنے کی فضیلت خوب ہے

پھوٹی  قسمت  کو جگانے  ماہِ  رمضاں  آ  گیا

 

دیکھئے فطرے میں بھی قدرت کی حکمت ہے غضب

پست   بندوں   کو   اٹھانے   ماہِ   رمضاں   آ   گیا

 

ہم  مناتے  کیا بھلا  شاہد ؔ   خدا  کا  ہے  کرم

رب کو ایسے میں  منانے  ماہِ  رمضاں  آ گیا

 

 

فکر : علی شاہد ؔ دلکش

رابطہ: 8820239345

 

 

 

(اگر زحمت نہ ہو تو ادبی میراث کے یوٹیوب چینل کو ضرور سبسکرائب کریں    https://www.youtube.com/@adbimiras710/videos