الہ آباد کے چند بستہ بند شہیدان آزادی - پروفیسر صالحہ رشید

گزشتہ سال ۱۲؍ مارچ ۲۰۲۱وطن عزیز میں آزادی کا امرت مہوتسو منایا جا رہا ہے جس کا مقصد ہے آزادی کے ۷۵؍ برس مکمل ہونے تک یعنی ۱۵؍ اگست ۲۰۲۲ تک اور اس کے آگے بھی ہم ہندوستانی انگریزوں سے اپنے ملک کو آزاد کرانے والے جاں بازوں کی قربانیوں کو یاد کریں اور ہر ممکن طریقے سے انھیں خراج عقیدت پیش کریں۔جدوجہد آزادی میں شریک جاں بازوں کی تعداد کا حساب رکھنا کسی کے بس کی بات نہیں۔ملک کا ہر ہر گوشہ اور بوڑھے بچے خواتین جوان سب حصول آزادی کے خواہاں تھے اور سر پر کفن باندھے انگریزوں کی توپوں کا مقابلہ کر رہے تھے۔ان توپوں نے کتنوں کو لقمہ اجل بنایا ، کسی کو نہیں معلوم۔کتنے لوگوں کو درخت پر لٹکا کر پھانسی دے دی گئی ، ان کے بھی اعداد و شمار کا حساب نہیں۔اس سمت اسٹیٹ آرکائیوز ، پریاگراج نے کوشش کی ۔ اس کے خزانے میں متعدد فائلیں موجود ہیں جو اس سمت ہماری مدد کرتی ہیں۔آرکائیوز کے عملے نے بڑی جانفشانی سے چند دستاویز کو پڑھا اور دیو ناگری خط میں ان کی فہرست تیار کی ہے۔ اس فائل سے الہ آباد کے چند شہیدوں کے نام کی بھی شناخت ہوتی ہے۔اس پر Allahabad Mutiny Bastaدرج ہے ۔اس فہرست میں شہیدوں کا نام ، الزام کی قسم اور سزا اس طرح درج ہے ؎

علی بخش ۔ آپ الہ آباد کے ہی رہنے والے تھے۔۱۸۵۷ئ؁ میں انگریزوں کے خلاف بغاوت میں شامل رہے۔کئی مورچوں پر انگریز فوجوں کا مقابلہ کیا۔آپ نے انگریزی خزانے کو ضبط کرنے میں مقامی لوگوں کا ساتھ دیا۔آخر کار انگریزوں نے انھیں گرفتار کر لیا اور انگریزوں کے خلاف بغاوت کرنے کے الزام میں آپ کی پوری جائیداد ضبط کر موت کی سزا کا اعلان کر دیا۔۱۸۶۰ میں آپ کو درخت سے لٹکا کر پھانسی دے دی گئی۔

علی شیر ۔ آپ الہ آباد کے باشندے تھے۔۱۸۵۷کے انگریزوں کے خلاف محاذ میں آپ نے انقلابیوں سے ہاتھ ملایا۔آپ نے انگریزی خزانے کو ضبط کرنے اور انقلابیوں کے لئے مالی امداد جمع کرنے میں مدد کی۔مارچ کے مہینے میں آپ گرفتار کر لئے گئے۔انگریزی حکومت کے خلاف لوٹ اور بغاوت کے الزام میں آپ کو ۱۸۵۷ میں ایک درخت سے لٹکا کر پھانسی کی سزا دی گئی۔

بدھو شیروانی ۔ آپ الہ آباد کے شمال مغربی علاقے سے تعلق رکھتے تھے۔آپ نے ۱۸۵۷ئ؁ کی جد وجہد آزادی میں الہ آباد اور فتحپور کے کئی مورچوں میں حصہ لیا۔مقامی لوگوں کو انگریزوں کے مظالم کے خلاف اکسایا۔انگریز فوجوں کے خلاف لڑتے ہوئے وہ گرفتار کر لئے گئے۔ان پر انقلابیوں کو اکسانے اور انگریزی سرکار پر حملہ کرنے کا الزام لگا کر جولائی ۱۸۵۷ئ؁ میں سزائے موت سنائی گئی اور پھانسی دے دی گئی۔

بدلو ۔ آپ کا تعلق الہ آاد کے شمال مغربی علاقے سے تھا۔آپ انگریزی سرکار کے ملازم تھے مگر ۱۸۵۷ئ؁ میں آپ نے ملازمت ترک کی اور انقلابیوں کے ساتھ ہو لئے۔انھوں نے اسلحے خریدنے کے لئے انقلابیوں کی مدد کی اور انگریزی خزانے کی لوٹ میں بھی شامل رہے۔انگریزوں سے مورچہ لیتے ہوئے گرفتار ہوئے اور جون ۱۸۵۷میں آپ کو پھانسی کی سزا دے دی گئی۔

بھوانی دین ۔ آپ ۱۸۵۷ کی جدو جہد آزادی میں شامل تھے۔آپ نے دوسرے لوگوں کو بھی انگریزوں کے خلاف اکسایا۔آپ پر انگریز فوجیوں پر حملہ کرنے، چوری اور قتل کا الزام لگا اور آپ کی کل جائیداد ضبط کر ۱۸۵۷میں پھانسی کی سزا دے دی گئی۔

دیوی چند ۔ آپ الہ آباد کٹرہ کے رہنے والے تھے۔۱۸۵۷ کی جدوجہد آزادی میں فعال رہے۔انگریزی خزانہ لوٹ کر اس سے اسلحے خریدنے میں آپ شامل رہے۔ انگریزوں کے خلاف ایک ریلی کرتے ہوئے انھیں گرفتار کیا گیااور ۱۸۵۷ میں بغاوت کے الزام میں درخت سے لٹکا کر پھانسی دے دی گئی۔

دیوی ۔ آپ الہ آباد کے ہی رہنے والے تھے اور ایک انگریز افسر کے ڈرائیور تھے۔۱۸۵۷ میں آپ نے ملازمت کو خیر باد کہہ انقلابیوں کا دامن تھام لیا۔آپ نے انگریزوں کا خزانہ لوٹنے میں ان کی مدد کی ۔ انگریزوں سے معرکہ آرائی کے دوران آپ گرفتارہوگئے۔آپ پر انگریز سرکار سے بغاوت اور خزانہ لوٹنے کا الزام لگا اور ۱۸۵۷ میں آپ کی پوری جائیداد ضبط کر پھانسی دے دی گئی۔

دیا پرساد ۔ آپ کٹرہ الہ آباد کے باشندے تھے۔۱۸۵۷ کی جنگ آزادی میں آپ شامل رہے۔انگریزوں کا خزانہ لوٹنے اور اس سے اسلحے خریدنے میں بھی آپ کا نام آیا۔الہ آباد میں چھاپے کے دوران انگریز فوجیوں نے آپ کو گرفتار کر لیا۔ آپ پر انگریزوں سے بغاوت اور خزانہ لوٹنے کا الزام لگا کر درخت سے لٹکا کر پھانسی کی سزا دی گئی۔

دوارکا ۔آپ الہ آباد میں پیدا ہوئے اور ۱۸۵۷ کی جنگ آزادی میں مختلف جگہوں پر انگریزوں سے مورچہ لیا ۔آپ اپنے ساتھیوں کو بھی انگریزوں کے خلاف اکساتے رہے۔الہ آباد میں انقلابیوں کے خلاف چھاپے ماری کے دوران ۱۸۵۷ئ؁ میں آپ گرفتار ہو گئے۔ آپ پر انگریزوں کے قتل اور بغاوت کا الزام لگا اور آپ کی بھی پوری جائیداد ضبط کر سزائے موت دی گئی۔

انعام خان ۔ آپ کٹرہ الہ آباد کے رہنے والے تھے۔ ۱۸۵۷ کی جنگ آزادی کے دوران آپ نے انگریزوں کے خلاف مورچہ سنبھالا۔انگریزی خزانے کو لوٹ کر انقلابیوں کی ضرورت پر اسے خرچ کیا۔الہ آباد میں برٹش چھاپے ماری کے دوران آپ گرفتار ہوئے ۔لوٹ اور بغاوت کے الزام میں آپ کو پھانسی دے دی گئی۔

عماد علی ۔ آپ الہ آباد کے رہنے والے تھے اور انگریز سرکار کے کسی محکمے میں ملازم تھے۔ آپ ترک ملازمت کر انقلابیوں کے ساتھ ہو لئے اور مختلف جگہوں پر انگریزی فوجوں سے مقابلہ کیا۔پھر آپ لکھنؤ چلے گئے اور وہاں بھی آپ کی انقلابی کار گذاریاں بدستور جاری رہیں۔آخر کار گرفتار ہوئے اور جون ۱۸۵۷ میں آپ کو مچھی بھون لکھنؤ میں پھانسی دے دی گئی۔

غلام شیخ ۔ آپ الہ آباد کے شمال مغربی علاقے کے رہنے والے تھے۔جنگ آزادی میں آپ نے اپنے علاقے کے لوگوں کا ساتھ دیا۔انگریزی خزانہ لوٹنے اور اس سے اسلحہ خریدنے میں بھی شامل رہے۔برٹش فوج نے جب الہ آباد مارچ کیا تو آپ گرفتار ہو گئے۔لوٹ اور بغاوت کے الزام میں آپ کو درخت سے لٹکا کر پھانسی دے دی گئی۔

اس زمرے میں ایک لمبی فہرست شامل ہے جن میں الہ آباد کے رہنے والے لوگوں کی انقلابی کار کردگی ، انگریزی فوجوں کے ذریعے گرفتاری اور اس کے بعد ان کی جائیداد کی ضبطی اور پھانسی کا ذکر ہے ۔ ان کے نام اس طرح ہیں ؎

غضنفر علی، ہنگون مسلمان، ہلاس، حسین خان، حیدر، جگو، جھنو، ججو، کاسیگیر گوسائیں، خدا بخش، خوشحال خان، کریم بخش، لال چند، لعل خان، لودی، لعل چند، مدارا، ماتا دین، مولا بخش، محمد علی، محسن خان ، منگو، منو خان، منور، موتیا پاسی ہنڈیا، نور الدین، نبی بخش میواتی، رام لال، رام پرساد، رامدین، رگھوبھر، رقیم بخش، سدین، سیف اللہ ، سلامت علی منصف، سلامت علی کوتوالی، شیخ نور ، شیر خان اور سیوال وغیرہ۔

یہ ایک بستے میں بند تقریباً پچاس لوگوں کی روداد ہے جنھیں تختہ دار پر چڑھا دیا گیا۔یہ وہ لوگ ہیں جن کے بارے میں ہمیں تحریری

دستاویز حاصل ہیں۔ ایسی لاتعداد فائلیں الہ آباد اسٹیٹ آرکائیوز میں محفوظ ہیں جو اپنے پڑھے جانے کی منتظر ہیں۔یہ نستعلیق میں لکھی گئی ہیں جو اس وقت عدالت کی زبان ہوا کرتی تھی۔حکومت ہند نے آزادی کے متوالوں کو یاد کرنے کا ایک سرکاری موقعہ ہمین فراہم کیا ۔۷۵؍ ہفتے کی مدت میں ہم نے اس موقعے کی مناسبت سے کتنا کام کیا؟نستعلیق سے واقفیت رکھنے والوں کی ذمہ داری کیا ہونی چاہئے ؟جنگ آزادی کے اسباب و علل کیا تھے ؟ایک صدی پر محیط اس جنگ کے مثبت اور منفی پہلوکیا ہیں؟ حصول آزادی کے بعد ہم کہاں ہیں ؟ان سوالوں کا جواب پانے کے لئے ہمیں ان بستہ بند فائلوں کو کھولنا پڑے گا۔شاید یہی ان جاں بازان آزادی کو سچا خراج عقیدت بھی ہوگا۔

پروفیسر صالحہ رشید

صدر شعبہ عربی و فارسی

الہ آباد یونیورسٹی

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)

ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔

الہ آباد کے چند بستہ بند شہیدان آزادی – پروفیسر صالحہ رشید

یوم عاشورہ کی فضیلت – ابوشحمہ انصاری

سہسرام کا پہلا صاحبِ دیوان فارسی زبان کا شاعر : موزوںؔ – شمیم قاسمی

یہ بھی پڑھیں