جشنِ اردوصحافت اور”بہار“ – انوار الحسن وسطوی

اردوصحافت نے اپنی عمر کے دوسوسال مکمل کرلیے۔ یہ واقعی اردووالوں کے لیے بے پناہ مسرت کی بات ہے۔ اردواخبارات نے ملک کی غلامی سے لے کرحصول آزادی تک اورپھر تاحال ملک وقوم کی جوخدمت کی ہے وہ اظہرمن الشمس ہے۔اردوصحافت کے دوسوسال مکمل ہونے کے اس خوشی کے موقع پر پورے ملک بلکہ پوری اردودنیا کے مختلف مقامات پر اردوصحافت کا جشن منایاگیا۔ساتھ ہی اردوصحافت کے گذشتہ دوسوسال کا جائزہ اورمحاسبہ بھی ہوا۔جبکہ مستقبل کا لائحہ عمل تیارکرنے کا عمل ابھی باقی ہے جسے بھی ضرور پوراکیاجانا چاہیے۔

جشنِ اردوصحافت میں ریاست بہارکا حصہ غیرمعمولی رہا۔اس سے انکارنہیں کیاجاسکتا ہے۔بہارکے ہی ایک معروف صحافی ڈاکٹر ریحان غنی کی تحریک پر 31/جنوری 2021کو بہارکے اردوصحافیوں کی ایک اہم نشست خانقاہ منعمیہ میتن گھاٹ،پٹنہ سیٹی میں خانقاہ کے سجادہ نشیں ڈاکٹر سید شاہ شمیم الدین احمدمنعمی مدظلہٗ کی صدارت میں منعقدہوئی تھی جس میں بہارکے اردوصحافیوں کی ایک تنظیم قائم کرنے پراتفاق کیا گیا تھا۔جس کے نتیجے میں ”اردومیڈیا فورم،بہار“نام کی تنظیم عمل میں آئی۔ڈاکٹر سیدشاہ شمیم الدین احمد منعمی کو اس تنظیم کا سرپرست اعلیٰ اورروزنامہ قومی تنظیم کے مدیراعلیٰ جناب ایس۔ایم۔اشرف فرید کو بحیثیت سرپرست منتخب کیا گیا۔جبکہ بہارکے قدیم اخبار ہفت روزہ”نقیب“پھلواری شریف،پٹنہ کے مدیرمفتی محمد ثناء الہدیٰ قاسمی کو تنظیم کا صدراورمعروف وکہنہ مشق صحافی ڈاکٹر ریحان غنی کوجنرل سکریٹری بنایا گیا۔ڈاکٹر اظہاراحمد،ڈاکٹر شہباز عالم،ڈاکٹر خالد انور،احمد جاویداورڈاکٹر محمد گوہرنائبین صدرکے عہدے پر فائز کیے گئے۔سید مشتاق احمد(ایڈیٹر ”امن چین“)کو خازن اورڈاکٹرانوارالہدیٰ (ایڈیٹر”ہمارانعرہ“)کوخازن بنایا گیا۔ان کے علاوہ اسحاق اثر،ضیاء الحسن،انواراللہ،اقبال صبا،نیّرعلی وارثی،نواب عتیق الزماں،ساجد پرویز،مبین الہدیٰ اورخورشید عالم سمیت مختلف صحافی حضرات نے بھی اردومیڈیا فورم سے منسلک ہونے پر اپنی رضامندی دی۔اس تاریخی موقع پر اردومیڈیافورم کے بینر تلے اردوصحافت کی دوصدی(1822-2022)مکمل ہونے کے موقع پر پٹنہ میں دوروزہ ”جشنِ اردوصحافت“منانے کا فیصلہ کیا گیااورملک بھر کے اردوصحافیوں سے بھی یہ اپیل کی گئی کہ وہ اس تحریک کا حصہ بنیں اورملک کے مختلف مقاما ت پر 27/مارچ اوراس کے بعد بھی ”جشنِ اردوصحافت“منائیں اوراس موقع پر اردواخبارات کی خدمات اورکارناموں سے عوام الناس بالخصوص نئی نسل کو روشناس کرائیں۔بحمداللہ”اردومیڈیا فورم“ کی اس آواز پر ملک بھر کے صحافیوں اوردانشوروں نے لبیک کہا۔اردوصحافت کی دوسری صدی مکمل ہونے پر پٹنہ کے علاوہ کولکاتہ،دہلی،حیدرآباد،بنگلورو سمیت ملک کے کئی بڑے شہرو ں میں اردوصحافت کا دو صد سالہ جشن منایا گیا اور امید قوی ہے کہ رمضان شریف کا مہینہ ختم ہونے کے بعد جشن منانے کا یہ سلسلہ اوربھی دراز ہوگا۔یہ جشن پورے ایک سال یعنی 27/مارچ 2023 تک منایا جانا چاہیے۔

”اردومیڈیا فورم“بہار کے زیراہتمام 27/مارچ 2022 ء کو  فورم کے صدر  مفتی محمد ثناء الہدی  قاسمی کی صدارت میں بمقام  بہاراردواکادمی کے سمینار ہال  میں ”اردوصحافت کے دوسری صدی کا احتساب“کے موضوع پر شاندار سمینار منعقد ہوا،جو توقع سے کہیں زیادہ کامیاب رہا۔یہ سمینار صرف اس لیے کامیاب نہیں کہا جائے گاکہ اس میں بہار کابینہ کے دو سینئر وزراء وزیر تعلیم جناب وجئے کمار چودھری اور وزیر دیہی ترقیات جناب شرون کمارکے علاوہ راشٹریہ جنتادل کے بزرگ لیڈراورسابق ایم۔پی شیوانند تیواری شریک ہوئے اور اظہارخیال بھی کیا۔بلکہ اس سمینارکی کامیابی کی پختہ دلیل یہ ہے کہ اس موقع پر بہاراردواکادمی کا سمینار ہال سامعین سے کچھا کھچ بھرا ہواتھا۔یہ سارے سامعین اہل علم اوردانشور طبقے سے تعلق رکھنے والے تھے۔سمینارمیں شریک صوبائی وزراء نے یہ برملا اعتراف کیا کہ جدوجہد آزادی کے زمانہ میں اورپھر آزاد بھارت کی تعمیرنومیں اردواخبارات نے اہم کرداراداکیا ہے۔جناب شیوانندتیواری نے تو بڑی صاف گوئی سے یہ اعتراف بھی کیا کہ موہن داس کرم چند گاندھی کو”گاندھی جی“بنانے کا کام اردوصحافت نے کیا تھا۔اس موقع سے تنظیم ہذا کے سرپرست اعلیٰ ڈاکٹر سید شاہ شمیم الدین احمد منعمی بوجوہ شریک نہیں ہوسکے،لیکن ان کے پیغام کے ذریعہ ان کی موجودگی درج ہوگئی۔تنظیم کے سرپرست اورمعروف صحافی جناب ایس۔ایم۔اشرف فرید چیف ایڈیٹرروزنامہ ”قومی تنظیم“پٹنہ سمینارکے آغاز سے اختتام تک رونق ڈائس رہے اوربصیرت افروز تقریر بھی کی۔اردومیڈیا فورم کے جنرل سکریٹری ڈاکٹر ریحان غنی جو سیمنارکی نظامت کے فرائض انجام دے رہے تھے،بے حد مسرورنظرآرہے تھے اورپروگرام کو کامیابی سے ہمکناردیکھ کرنہایت پُرجوش بھی تھے۔ان کے چہرے سے ان کے جذبات جھلک رہے تھے،جسے اہلِ نظر بخوبی محسوس کررہے تھے۔اس موقع سے حکومت بہار سے یہ مطالبہ کیا گیا کہ ہرسال 27/مارچ کو حکومت بہار”یومِ اردوصحافت“منانے کا اعلان کرے۔اس سلسلے کی عرضداشت وزراء کابینہ جناب وجئے کمارچودھری اورجناب شرون کما رکو پیش بھی کی گئی۔ساتھ ہی تنظیم ہذا کی جانب سے تمام اردواخبارات اوران سے وابستہ حضرات سے بھی یہ اپیل کی گئی کہ وہ ہرسال 27/مارچ کو ”یومِ اردوصحافت“منائیں۔سامعین نے ہاتھ اٹھا کرا س تجویز کی تائید فرمائی۔

”جشن اردوصحافت“کے تعلق سے پٹنہ میں دوسراسمیناربعنوان ”اردصحافت کے عصری تقاضے“31/مارچ 2022 کو معروف ادبی،ثقافتی،فلاحی اوررفاہی تنظیم ”سلسلہ“کے زیراہتمام خانقاہ منعمیہ میتن گھاٹ،پٹنہ سیٹی کے کانفرنس ہال میں منعقدہوا جس کی صدارت ”سلسلہ“کے سرپرست اورخانقاہ ہذاکے سجادہ نشیں ڈاکٹرسید شاہ شمیم الدین احمد منعمی نے فرمائی۔معروف شاعر وادیب پروفیسراحمد بدر(جمشید پور)کی نظامت میں منعقدہ اس سمینارمیں بہار اوربیرون بہارکے تقریباً ایک درجن صحافیوں اوردانشوروں نے ”اردوصحافت کے عصری تقاضے“کے موضوع پر اظہارخیال فرمایا۔اس موقع پر سنٹرل وقف کونسل کے تین ممبران رئیس خاں پٹھان(گجرات)،منّوری بیگم(تمل ناڈو)اورایم۔نوشاد(کیرل)نے بہارسنی وقف بورڈکے چیرمین الحاج محمد ارشاد اللہ کے ساتھ نہ صرف شریک سمینارہوکر اپنے خیالات کا اظہارکیا بلکہ سرزمین بہار میں منعقدہوئے اس تاریخی سمینارکے عینی شاہد بھی بنے۔”سلسلہ“کے زیراہتمام منعقدہ یہ سمیناربھی بے حد کامیاب رہا اوراس کی کامیابی کا سہراجہاں ”سلسلہ“کے سرپرست ڈاکٹر سیدشاہ شمیم الدین احمدمنعمی اورا س کے فعال سکریٹری پروفیسرمسعودالرحمن (سابق پرنسپل،اورینٹل کالج،پٹنہ سیٹی)کے سرجاتاہے،وہیں سلسلہ سے منسلک دیگرارکان بھی سمینارکی اس کامیابی کے لیے کچھ کم مبارکباد کے مستحق نہیں ہیں جنھو ں نے مہمانان اورحاضرین کے استقبال سے لے کر ان کی ضیافت تک میں اپنی مستعدی،خلوص اورفراخ دلی کا مثالی کرداراداکیا۔

اردوصحافت کے دوسوسالہ جشن کے موقع پر بہارکی راجدھانی پٹنہ میں نہ صرف دوسمیناروں کا انعقاد ہوابلکہ بہار کے دونامورمحققین نے دوضخیم کتابیں بھی ترتیب دیں جن کا اجراان سمیناروں کے موقع سے ہوا۔”اردومیڈیا فورم“کے زیراہتمام منعقدہ سمینارکے موقع سے نامورمحقق ڈاکٹر ذاکرحسین (پٹنہ)کی مرتبہ کتاب بعنوان ”صحافت“(کتابیات)کا اجراہواجبکہ 31/مارچ کو ”سلسلہ“کے زیراہمتام منعقدہ سمینارکے موقع سے معروف ادیب،ناقد اورمحقق پروفیسرصفدرامام قادری(پٹنہ)کی کتاب ”صحافت:دوصدی کا احتساب“کا اجراعمل میں آیا۔اس کتاب کے شریک مرتبین میں جناب راج دیو کماراورجناب محمد مرشدکے نام بھی درج ہیں۔اس سے قبل اس کتا ب کا اجرابتاریخ 27/مارچ 2022 کو حیدرآبادمیں ایک پُروقارتقریب میں عمل پذیرہوا تھا۔

اردوصحافت کے دوسوسالہ جشن کے موقع پر ریاست بہار کا نام سرخیوں میں اس لیے بھی رہا کہ بہارکی راجدھانی پٹنہ سے شائع ہونے والے روزنامہ ”قومی تنظیم“کے مدیراعلیٰ جناب ایس۔ایم۔اشرف فرید کو 30/مارچ 2022 کو نئی دہلی کے انڈیا اسلامک کلچر سنٹرمیں منعقدہ ایک پُروقار تقریب میں سابق نائب صدرجمہوریہ ہندجناب محمدحامد انصاری کے ہاتھوں ان کی گراں قدرصحافتی خدمات کے ا عتراف میں ”کارنامہ حیات ایوارڈ“سے نوازاگیا۔یہ ایوارڈ”محمد مسلم ایوارڈ“سے موسوم ہے۔واضح ہوکہ جناب محمد مسلم شہرہئ آفاق اخبار”دعوت“دہلی کے مدیر تھے اورملک کے ایک معروف اورنامورصحافی تھے۔جناب اشرف فرید کی ایوارڈیافتگی کے موقع پر سابق مرکزی وزیرغلام نبی آزاد،سابق ایم۔پی م۔افضل،ندیم الحق(ایم۔پی)، پروفیسر اخترالواسع،معصوم مرادآبادی،عار ف عزیز،پروفیسرسیداعظم حسین اوررئیس مرزاسمیت کئی نامورشخصیتیں موجود تھیں۔ان سرکردہ شخصیتوں کی موجودگی میں سید اشرف فرید صاحب کو نوازا جانانہ صرف ان کے لیے بلکہ اہل بہار کے لیے اوربہا رکے جملہ اردوصحافیوں کے لیے فخروانبساط کی بات ہے۔واضح ہوکہ جناب اشرف فرید بہارکے پہلے ایسے صحافی ہیں جنھیں اتنے بڑے ایوارڈسے نوازاگیا ہے۔یہ ایوارڈان کی صحافتی اوراردوزبان کی بیش بہا خدمات کا کھلا اعتراف ہے۔چنانچہ جناب اشرف فرید کا”کارنامہ حیات ایوارڈ“سے سرفراز ہونایقینا ”حق بہ حقداررسید“کے مترادف ہے۔

مختصریہ کہ اردومیڈیا فورم،بہارنے اپنے قیام کے دن اردوصحافت کا دوروزہ جشن منانے کا جواعلان کیا تھا،وہ وعدہ وفا ہونا ابھی باقی ہے۔فورم نے گرچہ 27/مارچ کو یک روزہ سمیناراورمشاعرہ کا انعقاد کیا،لیکن یہ جشن نہیں،شادی کی ایک رسم ”منگنی“کے مترادف ہے۔اصل جشن منانا ابھی باقی ہے،جس سے مفرنہیں کیاجاناچاہیے۔اردومیڈیا فورم سے منسلک ذمہ داران کو اس بات کی ہمت ہونی چاہیے کہ اس تنظیم کے سرپرست اعلیٰ خانقاہ منعمیہ کے سجادہ نشیں ڈاکٹر سید شاہ شمیم الدین احمد منعمی اورسرپرست جناب اشرف فرید مدیراعلیٰ روزنامہ”قومی تنظیم“ہیں۔پھران دومضبوط سرپرستوں کی موجودگی میں فکرکس بات کی؟اس پر طرّہ یہ کہ تنظیم کے خازن سید مشتاق احمد (ایڈیٹر”امن چین“)ہیں،یہ بھی کچھ کم حوصلہ افزابات نہیں ہے۔ایسی تقریبات نہ صرف پٹنہ بلکہ بہارکے دیگرمقامات پر بھی منعقد کی جائیں،جن میں اردوکے مسائل اجاگرکیے جائیں،اردوکے تحفظ کی راہ تلاش کی جائے،اردوکے ساتھ ہورہی ناانصافی کے لیے متحدہ محاذ بناکراردوکے حق کی لڑائی لڑی جائے۔یہ لڑائی حکومت سے بھی لڑی جائے اوراپنو ں سے بھی۔اردوکی بقا اوراس کے فروغ کے لیے اردوکی تعلیم حاصل کرنے پر زوردیاجائے۔اردوگھرانو ں میں اردواخبارات خریدنے اورپڑھنے کی ترغیب دی جائے اورنئی نسل کو اردوکے رسم الخط کواختیارکرنے کی تاکید کی جائے اوراس کے لیے مواقع بھی فراہم کیے جائیں۔امید قوی ہے کہ ”اردومیڈیا فورم“کے ذمہ داران نے اردوصحافت کا جشن منانے کے تعلق سے اپنے جس عزم وحوصلہ کا اظہارکیاتھااسے ضرورپوراکیاجائے گا۔

انوارالحسن وسطوی

9430649112

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)

Home Page