متنوع پھولوں کا معطر گلدستہ: عشرہ ذوالحجہ – ڈاکٹر سمیہ ریاض فلاحی

یہ حقیقت ہے کہ ہر دن اپنے آپ میں اہم خصوصیات کا حامل ہے جس کا آغاز صبح کی کرنوں سے ہو کر شام کے دھندلکے سے گزرتے ہوئے رات کی تاریکی میں سما جاتا ہے ، جہاں چڑیوں کی چہچہاہٹ،  باد نسیم کی سرسراہٹ، سورج کی تمازت، چاند کی مسکراہٹ، ستاروں کا جھرمٹ ، ندیوں اور نالوں کی گنگناہٹ اپنی اپنی بے لوث قربانیاں دینے میں مصروف ہیں اور قدرت کے قانون کے مطابق بلا چوں چرا اپنے فرائض کی ادائیگی میں ہمہ تن مشغول ہیں مگر انہی میں سے کچھ ایام ایسے بھی ہوتے ہیں جو مندرجہ بالا خصوصیات کے ساتھ اپنے ساتھ  کچھ ایسی صفات بھی رکھتے ہیں جو انہیں دوسروں سے ممتاز رکھتی ہیں۔

اللہ سبحانہ وتعالیٰ اپنی صفت رحیم کی  بدولت مسلسل اپنے بندوں کو اپنی خوشنودی کے بیش بہا مواقع نصیب فرماتا ہے تاکہ بندے ان میں اللہ سبحانہ و تعالیٰ کے حضور اعمال صالح کو اپنا کر اپنے گناہوں کی بخشش کا پروانہ نیز اس کی رحمت و مودت اور بلندئ درجات کا انعام پا سکیں، اب بندوں کی وسعت عقل پر منحصر ہے  کہ وہ ان اوقات کو غنیمت جانتے ہوئے اپنے تعلق کو اللہ مالک الملک سے مضبوط کرتے ہیں  اور سعادت اور کامرانی کی حصول منزل تک پہنچتے ہیں یا ان سے غفلت برتتے ہوئے خود کو ابدی سعادت سے محروم کر لیتے ہیں۔

انہی ذی وقار و با سعادت  ایام میں سے محترم مہینہ ذوالحجہ کے ابتدائی دس ایام بھی ہیں جو فضائل و مناقب کے اعتبار سے دوسرے دنوں سے افضل ہیں  کیونکہ ذو الحجہ کے پہلے دس دنوں کی اللہ تعالی نے قرآن مجید میں قسم کھائی ہے، اور کسی بھی چیز کی قسم اٹھانا اسکی اہمیت، اور اسکے عظیم فوائد کی دلیل ہے، چنانچہ فرمانِ باری تعالی ہے:

{وَالْفَجْرِ (1) وَلَيَالٍ عَشْرٍ (2)} قسم ہے فجر کی[2] اور دس راتوں کی[الفجر : 1 – 2]

ان دس راتوں کے بارے میں ابن عباس، ابن زبیر، مجاہد اور انکے علاوہ متعدد علمائے سلف کا کہنا ہے کہ: اس سے عشرہ ذو الحجہ مراد ہے۔

اور ابن کثیر رحمہ اللہ کہتے ہیں کہ: "یہی تفسیر صحیح ہے” تفسير ابن كثير: (8/413)

امام ابن القیم رحمہ اللہ فرماتے ہیں:

’’وہو سبحانہ یقسم بأمور علی أمور وإنما یقسم بنفسہ الموصوفۃ بصفاتہ وآیاتہ المستلزمۃ لذاتہ وصفاتہ وإقسامہ ببعض المخلوقات دلیل علی أنہ من عظیم آیاتہ‘‘۔

اللہ سبحانہ وتعالیٰ بہت سے امور کے لیے دوسرے امور کی قسم کھاتا ہے اور کبھی وہ اپنی ذات مبارکہ کی قسم کھاتا ہے جو اس کی صفات عالیہ سے متصف ہے اور کبھی اپنی آیات کی جو اس کی ذات وصفات سے جڑی ہوئیں ہیں، اس کا اپنی بعض مخلوقات کی قسم کھانا اس بات کی واضح دلیل ہے کہ وہ مخلوق اس کی عظیم نشانیوں میں سے ہے۔ (التبیان في أقسام القرآن لابن القیم ص1)

اور اگر احادیث کا بغائر نظر مطالعہ کیا جائے تو یہ بات اظہر من الشمس ہے کہ ان ایام میں کئے جانے والے اعمال اللہ تعالی کو بہت زیادہ پسند ہیں، آپ صلی اللہ علیہ وسلم کا فرمان ہے: (کوئی نیک عمل کسی دن میں اللہ تعالیٰ کو اتنا پسند نہیں جتنا ان دس دنوں میں پسند ہے)

صحابہ کرام نے کہا: "اللہ کے رسول! جہاد فی سبیل اللہ بھی نہیں!؟”

آپ صلی اللہ علیہ وسلم نے فرمایا: (جہاد فی سبیل اللہ بھی نہیں، سوائے اس شخص کے جو اپنے مال و جان کےساتھ جہاد کیلئے نکلا اور ان دونوں میں سے کوئی بھی چیز واپس نہیں آئی) یعنی شہید ہوا۔

بخاری: (969)، الفاظ ترمذی (757)کے ہیں، اور البانی رحمہ اللہ نے اسے صحیح ترمذی: (605) میں صحیح کہا ہے۔

ان ایام کی عظمت کا سبب بیان کرتے ہوئے حافظ ابن حجر رحمہ اللہ فرماتے ہیں:

’’وَالَّذِی یَظْہَرُ أَنَّ السَّبَبَ فِی امْتِیَازِ عَشْرِ ذِی الْحِجَّۃِ لِمَکَانِ اجْتِمَاعِ أُمَّہَاتِ الْعِبَادَۃِ فِیہِ وَہِیَ الصَّلَاۃُ وَالصِّیَامُ وَالصَّدَقَۃُ وَالْحَجُّ وَلَا یَتَأَتَّی ذَلِکَ فِی غَیْرِہِ‘‘

عشرہ ذی الحجہ کے باقی ایام سے ممتاز ہونے کا ایک سبب یہ معلوم ہوتاہے کہ اس میں بڑی بڑی عبادات یکجا ہو جاتی ہیں جیسے نماز، روزہ، صدقہ اور حج، عبادات کا یہ اجتماع باقی ایام میں نہیں ہوتا۔ (فتح الباري 460/2)

اور ان ایام کے دوران عمل صالح میں تکبیرات، اور "لا الہ الا اللہ” کہنا بھی درج ذیل دلائل کی رو سے شامل ہے:

1- فرمان باری تعالی ہے: {لِيَشْهَدُوا مَنَافِعَ لَهُمْ وَيَذْكُرُوا اسْمَ اللَّهِ فِي أَيَّامٍ مَعْلُومَاتٍ}

ترجمہ: تا کہ وہ اپنے فائدے کی چیزوں کا مشاہد ہ کریں، اور مقررہ دنوں میں اللہ کے نام کا ذکر کریں[الحج : 28]

یہاں ” أَيَّامٍ مَعْلُومَاتٍ ” سے مراد عشرہ ذو الحجہ [ماہ ذوالحجہ کے پہلے دس دن] ہیں۔

2- اور فرمانِ الہی: {وَاذْكُرُوا اللَّهَ فِي أَيَّامٍ مَعْدُودَاتٍ}

ترجمہ: اور گنتی کے چند دنوں میں اللہ کا ذکر کرو [البقرة : 203]

اور ” أَيَّامٍ مَعْدُودَاتٍ "سے مراد ایام تشریق ہیں۔

3- اور نبی صلی اللہ علیہ وسلم کا فرمان ہے: (ایام تشریق کھانے پینے، اور ذکر الہی کے دن ہیں)مسلم: (1141)

” سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا:   ما اهل مهل قط إلا بشر، ولا كبر مكبر قط إلا بشر، قيل: بالجنة؟ قال: نعم”.

”نہیں ہے کوئی تلبیہ پڑھنے والا، جو تلبیہ پڑھے، مگر اس کو بشارت دی جاتی ہے اور نہیں ہے کوئی تکبیر کہنے والا، جو تکبیر کہے مگر اس کو بھی خوشخبری سنائی جاتی ہے کہا گیا، کیا جنت کی خوشخبری؟آپ صلی اللہ علیہ وسلم نے فرمایا: ”ہاں۔“

38730 – 994

سلسله احاديث صحيحه ترقیم البانی: 1621

ان ایام کی فضیلت مزید دو چند یوں ہوجاتی ہے کہ ان میں عید الاضحی کے دن سے پہلے نو  دن  روزوں کی بھی خاص ترغیب دی گئی ہے جس کا اجر کئی گنا بڑھا کر دیا جاتا ہے۔

عن أبي هريرة عن النبي صلى الله عليه و سلم قال: ما من أيام أحب إلى الله أن يتعبد له فيها من عشر ذي الحجة، يعدل صيام كل يوم منها بصيام سنة، وقيام كل ليلة منها بقيام ليلة القدر’۔

مندرجہ بالا حدیثِ مبارک میں  ان میں سے   ہردن کے روزے کو  اجر میں ایک سال کے روزوں کے برابر قرار دیا گیا ہے، نیز  خاص عرفہ (نو ذوالحجہ) کے روزے کے بارے میں آں حضرتﷺ نے ارشاد فرمایا کہ یہ گزشتہ ایک سال اور آئندہ ایک سال کے گناہوں کی معافی کا ذریعہ ہے۔ اور ذوالحجہ کے پہلے عشرے کی ہر رات عبادت کا ثواب لیلۃ القدر کی عبادت کے برابر ہے۔(سنن الترمذي – شاكر + ألباني (3/ 131)

ان ایام کی عظمت کا اندازہ اس بات سے بھی لگایا جاسکتا ہے کہ انہی دنوں میں ایک دن ایسا ہے جس دن سورہ المائدہ آیت 3 ” الیوم اکملت لکم دینکم و اتممت علیکم نعمتی و رضیت لکم الاسلام دینا” کا نزول کرکے رب کائنات نے یہ باور کرایا کہ اس کے بعد اب کسی دین کی ضرورت باقی نہیں رہی اور یہی وہ دن ہے جس کے ایک روزہ کے بدلہ میں گزشتہ ایک سال اور آئندہ ایک سال کے گنا ہوں کے مغفرت کی بشارت دی جاتی ہے اور یہی وہ دن ہے جس دن رحمت دوعالم صلی اللہ علیہ وسلم نے حج کا اہم رکن وقوف عرفہ ادا کیا ۔ یہی وہ دن ہے جسے دنیا 9 ذوالحجہ یوم عرفہ کے نام سے جانتی ہے۔

‘ عن أبي قتادة : أن النبي صلى الله عليه و سلم قال: صيام يوم عرفة إني أحتسب على الله أن يكفر السنة التي قبله والسنة التي بعده ‘۔( سنن الترمذي – شاكر + ألباني (3/

مندرجہ بالا حدیث میں رسول اکرم صلی اللہ علیہ وسلم نے فرمایا کہ عرفہ کے دن کا روزہ جس کے بارے میں اللہ سے میں یہ امید کرتا ہوں کہ گزشتہ ایک سال اور آئندہ ایک سال کے گناہ معاف کر دے گا۔

چنانچہ مندرجہ بالا آیات و احادیث اس بات کا تاثر دیتی ہیں کہ یہ وہ ایام ہیں جن میں تمام ارکان اسلام بشمول حج بدرجہ اتم صورت میں ادا کرنے کا وہ پر نور موقع میسر ہوتا ہے جو بندے کو تکبیرات کی ادائیگی میں جنت کی بشارت کا حقدار بناتا ہے تو صدقات و زکوۃ کی ادائیگی کی صورت میں بلندئ درجات کا مژدہ سناتا ہے۔ روزوں کے ذریعے گناہوں کے کفارے کے ساتھ صبر و تحمل کا درس دیتا ہے تو قربانی کے توسل سے ایک طرف قرب الہی کا احساس بیدار کرتا ہے تو دوسری طرف ایثار و قربانی کا انمول جذبہ پیدا کرتا ہے ۔ یہی نہیں بلکہ حج جیسی اہم عبادت کو اس کے ساتھ جمع کرکے ان ایام کے فضائل کو مزید اجاگر کرتا ہے۔

لہذا یہ کہا جاسکتا ہے کہ عشرہ ذوالحجہ کے ابتدائی دس ایام وہ عطر بیز گلدستہ ہیں جو عبادات کے متنوع پھولوں کی دبیزخوشبو سے انسانی روح کو معطر کرنے کا سامان فراہم کرتے ہیں۔ اللہ تعالٰی ہمیں ان ایام سے پوری طرح مستفید ہونے کی توفیق عطا فرمائے۔ آمین۔

ڈاکٹر سمیہ ریاض فلاحی

آراضی باغ،  اعظم گڑھ

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)

Home Page