نواسہ رسول حضرت سیّدنا امام حسین رضی اللہ عنہ کی پیدائش کے ساتھ ہی آپ کی شہادت کی بھی شہرت عام ہوگئی تھی حضرت علی، حضرت فاطمہ زہرا اور دیگر صحابہ کرام و اہلبیت کے جانثار رضی اللہ تعالیٰ عنہم سبھی لوگ آپ کے زمانہ شیر خوارگی ہی میں جان گئے کہ یہ فرزند ارجمند ظلم و ستم کے ہاتھوں شہید کیا جائیگا اور ان کا خون نہایت ہی بیدردی کے ساتھ سرزمین کربلا میں بہایا جائے گا-
حضرت ام الفضل بنت حارث یعنی حضرت عباس رضی اللہ تعالیٰ عنہ کی زوجہ فرماتی ہیں کہ میں نے ایک دن نبی اکرم صلی اللہ علیہ وسلم کی خدمت مبارکہ میں حاضر ہو کر امام حسین رضی اللہ تعالیٰ عنہ کو آپ کی گود میں دیا پھر میں کیا دیکھتی ہوں کہ حضور کی آنکھوں سے آنسو بہہ رہے ہیں میں نے عرض کیا یارسول اللہ میرے ماں باپ آپ پر قربان ہوں یہ کیا حال ہے اور کیوں ہے؟ فرمایا میرے پاس جبریل علیہ السلام آئے اور انہوں نے یہ خبر پہنچائی کہ میری امت میرے اس فرزند کو شہید کرے گی حضرت ام الفضل فرماتی ہیں کہ میں نے عرض کیا یارسول اللہ! کیا اس فرزند کو شہید کردیگی،، حضور نے فرمایا ہاں،، پھر جبریل میرے پاس اس کی شہادت گاہ کی سرخ مٹی بھی لائے- اور ابن سعد و طبرانی حضرت عائشہ صدیقہ رضی اللہ تعالیٰ عنہا سے روایت کرتے ہیں کہ انہوں نے کہا حضور صلی اللہ علیہ وسلم نے فرمایا کہ جبریل نے مجھے خبر دی ان ابنی الحسین یقتل بعدی بارض الطف – میرا بیٹا حسین میرے بعد ارض طف میں قتل کیا جائیگا اور جبریل میرے پاس وہاں کی یہ مٹی لائے اور مجھ سے کہا کہ یہ حسین کی خوابگاہ (مقتل)کی مٹی ہے طف،، قریب کوفہ اس مقام کا نام ہے جس کو کربلا کہتے ہیں- (یہ بھی پڑھیں غربت، سچائی، اور خوف خدا!! – جاوید اختر بھارتی )
حضرت انس رضی اللہ تعالیٰ عنہ سے روایت ہے کہ بارش کے فرشتہ نے نبی کریم صلی اللہ علیہ وسلم کی خدمت میں حاضری دینے کے لئے اللہ تعالیٰ سے اجازت طلب کی،، اجازت ملنے پر وہ فرشتہ جب بارگاہ نبوی میں حاضر ہوا تو اس وقت حضرت امام حسین رضی اللہ تعالیٰ عنہ آئے اور نبی کی گود میں بیٹھ گئے تو آپ امام حسین کو چومنے اور پیار کرنے لگے فرشتہ نے عرض کیا یارسول اللہ!کیا آپ حسین سے پیار کرتے ہیں؟ حضور نے فرمایا ہاں فرشتے نے کہا کہ آپ کی امت حسین کو قتل کردیگی اگر آپ چاہیں تو میں ان کے قتل گاہ کی مٹی آپ کو دیکھا دوں پھر وہ فرشتہ سرخ مٹی لایا جسے ام المومنین حضرت ام سلمہ رضی اللہ تعالیٰ عنہا نے اپنے کپڑے میں لے لیا اور ایک روایت میں ہے کہ نبی پاک نے فرمایا کہ اے ام سلمہ! جب یہ مٹی خون بن جائے تو سمجھ لینا کہ میرا بیٹا حسین شہید کردیا گیا حضرت ام سلمہ فرماتی ہیں کہ میں نے اس مٹی کو شیشی میں بند کرلیا جو حضرت امام حسین رضی اللہ تعالیٰ عنہ کی شہادت کے دن خون ہوگئی اور ابن سعد حضرت شعبی سے روایت کرتے ہیں کہ حضرت علی رضی اللہ تعالیٰ عنہ جنگ صفین کے موقع پر کربلا سے گذر رہے تھے کہ ٹھہر گئے اور اس زمین کا نام دریافت کیا لوگوں نے کہا کہ اس زمین کا نام کربلا ہے کربلا کا نام سنتے ہی آپ زاروقطار رونے لگے پھر فرماتے ہیں کہ میں نبی پاک صلی اللہ علیہ وسلم کی خدمت میں ایک روز حاضر ہوا تو دیکھا کہ آپ رورہے ہیں میں نے عرض کیا یارسول اللہ آپ کیوں رورہے ہیں؟ فرمایا ابھی میرے پاس جبریل ائے تھے اور انہوں نے خبر دی ہے کہ میرا بیٹا حسین دریائے فرات کے کنارے اس جگہ پر شہید کیا جائیگا جس جگہ کو کربلا کہا جاتا ہے،، اور حضرت علی رضی اللہ تعالیٰ عنہ کے ساتھ قافلہ گذر رہا ہے ،، حضرت علی رضی اللہ عنہ فرماتے ہیں کہ یہ شہیدوں کے اونٹ بیٹھانے کی جگہ ہے اور اس مقام پر ان کے کجاوے رکھے جائیں گے اور یہاں ان کے خون بہائے جائیں گے آل محمد صلی اللہ علیہ وسلم کے بہت سے جوان اس میدان میں شہید کئے جائیں گے اور زمین و آسمان روئیں گے ان تمام روایات سے یہ واضح طور پر معلوم ہوا کہ رسول اللہ صلی اللہ علیہ وسلم کو حضرت امام حسین رضی اللہ تعالیٰ عنہ کے شہید ہونے کی بار بار اطلاع دی گئی اور نبی نے بھی اس کا بار بار ذکر فرمایا اور یہ شہادت عہد طفلی میں ہی خوب مشہور ہو چکی تھی اور سب کو معلوم ہو گیا تھا کہ آپ کے شہید ہونے کی جگہ کربلا ہے،، اب سوال یہ پیدا ہوتا ہے کہ جب نبی کو معلوم تھا کہ میرا نواسہ شہید کردیا جائے گا تو اللہ سے دعا کیوں نہیں کی کہ اے اللہ میرے نواسے کو بچالے، حضرت علی و حضرت فاطمہ رضی اللہ تعالیٰ عنہما کو بھی بیٹے کی شہادت کی خبر پہلے سے ہی معلوم ہے اور یہ بھی معلوم ہے کہ نبی کریم صلی اللہ علیہ وسلم کی دعائیں رد نہیں ہونگی پھر ان لوگوں نے نبی سے دعا کرنے کے لئے کیوں نہیں کہا جس کا جواب یہی ہے کہ دین کو بچانے کے لئے صبر و استقامت کی ضرورت ہوتی ہے اور دین کو پھیلانے کے لئے کرامت کی ضرورت ہوتی ہے اور نانا کے دین کو بچانے کے لئے نواسے نے اپنا گھرانہ قربان کیا اور نبی کریم صلی اللہ علیہ وسلم کو یہ معلوم تھا کہ آگے چل کر میرے دین کو جھٹلانے کی کوشش کی جائے گی ، قرآن مجید کی بے حرمتی کی جائے گی دین اسلام کے اصول ضابطوں کو تبدیل کرنے کی کوشش کی جائے گی اس وقت میرے نواسے سے کہا جائے گا کہ تم بھی بیعت کرو اور اگر میرا نواسہ بیعت کرلے گا تو دین اسلام کی شبیہ بگڑ جائے گی پھر آنے والی نسلیں کہیں گی جب نبی کی شریعت کو بدلا جارہا تھا تو خود نبی کے نواسے نے مخالفت نہیں کی،، گویا ظالموں کے لئے وہ سند بن جائے گی اور پھر دین اسلام کی تصویر بگڑتی چلی جائے گی اس لیے نبی نے آنکھوں سے آنسو بہایا لیکن دعا کے لئے ہاتھ نہیں اٹھایا اور آج ہم ڈنکے کی چوٹ پر کہتے ہیں کہ ظلم و بر بریت، جاہلیت و دہشتگردی کے خلاف سب سے پہلے اور سب سے بڑی جنگ نانا محمد الرسول اللہ اور نواسہ امام حسین نے لڑی ہے – (مشکوٰۃ/ خصائص کبریٰ/ صواعق محرقہ)
رابطہ:8299579972
(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)
| ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔ |
