۱۲؍نومبر کو دو روزہ سے می نار کا افتتاح—-ملک کے نامور صحافی، نقاد اور ماہرین کی شرکت متوقع
پٹنہ۔۹؍نومبر۔ جامِ جہاں نما سے ۱۸۲۲ئ میں شہرِ کلکتہ سے اردو صحافت کا جو کارواں آگے بڑھا، وہ اب دو صدی کی مدت پار کرکے ایک ایسی منزل تک پہنچ چکا ہے جہاں گذشتہ اور موجودہ عہد کے درمیان اتنی انقلاب آفریں تبدیلیاں رونما ہو چکی ہیںجس کے نتیجے میں اس بات کی ماہرین کے درمیان ضرورت محسوس کی جارہی تھی کہ ان دو سو برسوں کی وراثت کا کچھ اس طرح سے احتساب کیا جائے کہ ہماری صحافت کے امتیازات روشن ہوجائیں۔ اردو میڈیا فورم، بہار ، پٹنہ نے اردو صحافت کے دو صد سالہ جشن کی جو باضابطہ طور پر داغ بیل رکھی اور جس کا مولوی محمد باقر کے یومِ شہادت ۱۶؍ستمبر سے تقریباتی آغاز کیا؛ اس کی ترغیب سے بزمِ صدف انٹرنیشنل نے دو روزہ سے می نار منعقد کرنے کا فیصلہ کیا جسے ’’اردو صحافت کے اہم موڑ: دو صدی کا احتساب‘‘ عنوان سے ۱۲اور ۱۳؍نومبر ۲۰۲۱ئ کو بہار اردو اکادمی کے حال میں منعقد کیا جارہا ہے۔
بزمِ صدف انٹرنیشنل کے ڈائرکٹر پروفیسر صفدر امام قادری نے پروگرام کے خدوخال میڈیا کے سامنے پیش کرتے ہوئے بتایا کہ اس سے می نار میں خاص طور سے ملک کے نامور صحافیوں اور صحافت کی تاریخ کے محققین کو زحمت دی گئی ہے۔ روزنامہ انقلاب، پٹنہ کے ریزیڈنٹ ایڈیٹر اور نامور صحافی جناب احمد جاوید سے می نار کا کلیدی خطبہ پیش کریںگے۔ سے می نار کا افتتاح امیرِ شریعت بہار ، اڑیسہ اور جھارکھنڈ حضرت مولانا احمد ولی فیصل رحمانی۱۲؍نومبر کو چار بجے شام کو فرمائیں گے۔ سے می نار کے افتتاحی جلسے کی صدارت بہار اردو اکادمی کے سکریٹری جناب عظیم اللہ انصاری کریں گے۔ بہار پبلک سروس کمیشن کے رکن جناب امتیاز احمد کریمی مہمانِ خصوصی کی حیثیت سے سے می نار میں خطاب فرمائیںگے۔ کالج آف کامرس ، آرٹس اینڈ سائنس کے پرنسپل پروفیسر تپن کمار شانڈلیہ اور ڈاکٹر ظفر کمالی مہمانِ اعزازی کے طور پر سے می نار میں شریک ہوںگے۔ جی۔ایس۔ٹی۔ کمشنر جناب اسلم حسن اور اردو ہندی میں صحافت کی تاریخ پر تحقیق کرنے والے ڈاکٹر سہیل وحید اور دوحہ قطر بزمِ صدف کے جنرل سکریٹری ڈاکٹر وصی الحق وصی مہمانِ ذی وقار کے طور پر افتتاحی جلسے میں شرکت کریںگے۔
۱۳؍نومبر ۲۰۲۱ئ کو ساڑھے دس بجے دن سے سے می نار کا اجلاسِ اول شروع ہوگا۔ جس کی مجلسِ صدارت میں دہلی یونی ورسٹی کی شعبۂ اردو کی صدر اور ڈین پروفیسر نجمہ رحمانی، ممتاز صحافی اور وائس آف امریکہ کے نمایندۂ ہند جناب سہیل انجم، ممتاز صحافی اور اردو میڈیا فورم کے جنرل سکریٹری ڈاکٹر ریحان غنی اور ممتاز شاعر اور نقاد، جامعہ ملیہ اسلامیہ، نئی دہلی کے استاد ڈاکٹر واحد نظیر شامل ہوںگے۔ نشستِ اول میں مفتی ثنائ الہدیٰ قاسمی، ڈاکٹر طارق فاطمی، ڈاکٹر زین شمسی، ڈاکٹر محمد ذاکر حسین، ڈاکٹر نظام الدین احمد، ڈاکٹر الفیہ نوری، ڈاکٹر تسلیم عارف، جناب محمد مرجان علی اور محترمہ شگفتہ ناز اپنے مقالات پیش کریں گے۔ ۱۳؍نومبر کو سے می نار کے دوسرے اجلاس کی مجلسِ صدارت میں ممتاز نقاد اور ابوالکلام آزاد شناس ڈاکٹر جمشید قمر (رانچی)، ڈاکٹر سہیل وحید(بریلی، یو پی)، اردو میڈیا فورم کے صدر نشیں مفتی ثنائ الہدیٰ قاسمی اور روزنامہ تاثیر کے چیف ایڈیٹر ڈاکٹر محمد گوہر شامل رہیںگے۔ جناب سہیل انجم (دہلی )، ڈاکٹر ریحان غنی، ڈاکٹر ظفر امام، جناب رہبر مصباحی، ڈاکٹر منی بھوشن کمار، ڈاکٹر افشاں بانو، جناب عارف اقبال، محترمہ نازیہ تبسم اور جناب پرویز عالم اپنے مقالات پیش کریں۔
بزمِ صدف انٹرنیشنل کے ڈائرکٹر صفدر امام قادری نے سے می نار کی تفصیلات پیش کرتے ہوئے اس بات کی وضاحت کی کہ اس سے می نار میں یہ کوشش کی جارہی ہے کہ اردو صحافت کے دو سو برسوں کی تاریخ کے خاص پڑاو اور امتیازی امور بہر طور زیرِ بحث آئیں۔ متعدد مقالے ریڈیو، ٹیلی ویژن اور دوسری زبانوں کی صحافت کو پیشِ نظر رکھتے ہوئے بھی سے می نار میں پیش کیے جائیں گے جن سے اردو صحافت کا اختصاص اور امتیاز روشن ہوسکے گا۔ جناب قادری نے بتایا کہ اس سے می نار میں اردو میڈیا فورم بہار، بہار اردو اکادمی(پٹنہ)، پاٹلی پترا ٹیچرس ٹریننگ کالج( پٹنہ)، الفاطمہ ایجوکیشنل سوسائٹی بی ایڈ کالج( پٹنہ) کی خصوصی معاونت حاصل رہی ہے۔ جناب قادری نے اردو ادب و صحافت کے شایقین سے بصد محبت و عقیدت اخبار کے اطلاع نامے کو دعوت نامہ تصور کرکے سے می نار میں تشریف فرماہونے کی گزارش کی ہے۔ جناب قادری نے اس بات کی توقع کی کہ اردو صحافت کی تاریخ کے سلسلے سے ایک سنجیدہ گفتگو کا یہاں سے آغاز ہوگا۔ بڑی تعداد میں محققین اور ماہرین اس موضوع کی طرف توجہ کریںگے اور اردو صحافت کے دو سو برسوں کی تاریخ ہمارے لیے خصوصی توجہ کا مرکز بنے گی۔
صفدر امام قادری
ڈائرکٹر بزمِ صدف انٹرنیشنل
| ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔ |
