نقدِ شعر اور بدر محمدی - حقانی القاسمی

شاعری کی تنقید پر مشتمل بدر محمدی کے مجموعہ مضامین ’ہم عصر شعری جہات‘ کا مطالعہ کرتے ہوئے ذہن میں کئی طرح کے سوالات اٹھے۔ان میں ایک سوال یہ بھی تھا کہ شاعری پر تنقید کا حق کسے ہے؟ کیا ایک شاعر ہی شعرکی پرکھ کر سکتا ہے یا وہ شخص جس کے اندر شعر فہمی کی ذرا بھی اہلیت ہے وہ بھی شاعری پر تنقیدکر سکتا ہے؟ اس تعلق سے ممتاز ماہر لسانیات شوکت سبزواری نے اپنے مضمون ’شعر اور اس کی تنقید‘ میں بہت نکتے کی بات لکھی ہے کہ’’ شعر کہنا اور بات ہے اور اس کو پرکھنا اور بات۔ یہ دو مختلف چیزیں ہیں جو دو مختلف صلاحیتیں چاہتی ہیں۔ یہ ضروری نہیں کہ ہر شاعر شعر کو پرکھ بھی سکے جس طرح یہ ضروری نہیں کہ شعر کی پرکھ رکھنے والے میں شعر کہنے کی صلاحیت بھی ہو۔ شعراور اس کی تنقید میں اگر لزوم نہیں تو تضاد بھی نہیں۔ نہ یہ ضروری ہے کہ ہر شاعر نقاد ہو اور نہ یہ ضروری ہے کہ کوئی شاعر بھی نقاد نہ ہو‘‘(معیار ادب، مکتبہ اسلوب ،کراچی،1961) ۔

میری نظر میں شاعری پر سچی تنقید صرف وہی لکھ سکتا ہے جو مختلف اصناف سخن کی ہئیتوں اور بحور و اوزان سے واقف ہو، خاص طور پر وہ شعری ہیئتیں جن کا ذکر شمیم احمد نے ’اصنافِ سخن اور شعری ہیئتیں‘ میں کیا ہے یا جو مولوی حکیم عبدالغنی نجمی رام پوری کی کتاب ’بحر الفصاحت‘ اور دیگر بیان و بدیع کی کتابوں میں ملتا ہے۔اس کے علاوہ شاعری پر تنقید لکھنے والوں کے لیے اقسام شعر کی آگہی کے ساتھ ساتھ ان شعری اصطلاحات سے واقفیت ضروری ہے جو شاعری میں بکثرت مستعمل ہیں۔ شاعری کی تفہیم کے لیے استعارہ، ایہام، اغراق، آہنگ ،ابہام، تشبیہ، رعایت لفظی ، مبالغہ ، معنی آفرینی، جدت ادا، توارد، تحریف کے علاوہ عیب تنافر، تعقید لفظی اور ان معائب سخن کی بھی معلومات ضروری ہے جن کا مبسوط ذکر مولانا حسرت موہانی کی کتاب ’’نکاتِ سخن ‘‘میں ملتا ہے یا محمد عبد العلی سندیلوی کی ’اصلاحِ سخن ‘ میں جو اشارے ملتے ہیں۔ شعری لفظیات اور اصطلاحات سے مکمل واقفیت کے بغیر شاعری کی تنقید صحیح طور پر نہیں لکھی جا سکتی۔ شاعری پر تنقید لکھنے کے لیے ان شرائط پر بھی نگاہ رکھنا ضروری ہے جن کی طرف حالی نے’ مقدمہ شعر و شاعری‘ اور شبلی نعمانی نے ’شعر العجم‘ میں یا بعد کے نقادوں نے مقصدیت، جمالیاتی اقدار اور جمالیاتی پہلوئوں کے علاوہ شعریت کے تعلق سے اشارہ کیا ہے۔ اس طرح دیکھا جائے تو شاعری کی تنقید شعر گوئی سے بھی زیادہ دشوار ہو جاتی ہے۔ اسی لیے کہا گیا ہے کہ’ شعر فہمیدن بہ از گفتن بود‘ کیوں کہ شعر کے رموز و علائم ،اشارات اور استعارات کو سمجھنا آسان عمل نہیں ہے شعر کثیر المعنیٰ ہوتا ہے۔ کسی ایک معنی کا تعین آسان نہیں ہوتا۔ اس کی امیجری ،تمثیل، صوتی کیفیت، موضوع اور موادکی تہہ تک پہنچنامشکل ہے۔ اسی لیے شاعری پر کثرت سے تنقیدی مضامین اور کتابوں کے باوجود کوئی اعلیٰ شعری تنقید کا نمونہ نہیں ملتا۔ زیادہ تر شاعری کے نقاد تخلیق کی قرأت کے بعد پیدا ہونے والے رد عمل کو ہی اپنے تاثرات کی شکل دیتے ہیں اور یہی تاثرات تنقید کی ایک ایسی صورت اختیار کر لیتے ہیں جسے تاثراتی تنقید کا نام دیا جاتا ہے۔ایسی تنقید میں شاعری کے لسانیاتی اور صوتیاتی تجزیے کی گنجائش بہت کم نکل پاتی ہے جب کہ صوت و شعر کا بہت گہرا رشتہ ہوتا ہے اور اب نقد شعر کے بہت سے نئے طریقِ کار بھی اردو میں آرہے ہیں خاص طور پر جدید لسانیات کی وجہ سے شعری تجزیہ کی بہت سی نئی صورتیں سامنے آئی ہیں۔ پروفیسر مغنی تبسم نے اصوات و اسلوبیات کے حوالے سے شاعری کے بہت عالمانہ تجزیے کئے ہیں لیکن یہ مشکل معرکہ ہے اور اس کے لئے صوتیات اور لسانیات سے مکمل آگہی ناگزیر ہے۔ اس لیے شاعری پر تنقید کرتے ہوئے بیش تر ناقدین پیچیدہ طریقہ کار سے گریز کرتے ہیں اور شاعری کے نفس مفہوم کی تعبیر و تشریح میں ہی محصور ہو کر رہ جاتے ہیں۔ بیشترشعری تنقید تجزیہ ،تعبیر اور تشریح تک ہی محدود ہو کر رہ گئی ہے۔شعری محاسن و معائب کا سائنٹفک تجزیہ ہمارے یہاں نہ کے برابر ہے۔

اتنی لمبی تمہید کا مقصد صرف اتنا ہے کہ نقد شعر کے واضح اصول و ضوابط کے باوجود شاعری تنقید کا اعلیٰ نمونہ پیش کرنے سے قاصر ہے۔ ایسے میں اگر کچھ لوگ شاعری کی تنقید کو اپنا شغل بناتے ہیں اور انبوہ شعر میں سے نئے موتی نکال لاتے ہیں تو خوشی ہوتی ہے۔بدر محمدی کی خاص بات یہ ہے کہ وہ شاعربھی ہیں ۔ان کے دو شعری مجموعے ’بنت فنون کا رشتہ‘ اور’ خوشبو کے حوالے‘ شائع ہوچکے ہیں۔شاعر ہونے کے ساتھ وہ بیان و بدیع سے بھی واقف ہیں ،عروضی مباحث سے بھی آگہی رکھتے ہیں۔ انھیں شعر کے حسن و قبح اورپست و بلند کا بھی پتہ ہے اور ندرتِ الفاظ، نزاکت جذبات سے بھی آشنا ہیں، مختلف شعری اسالیب کے بھی شناسائی ہے ،کلاسکی شاعری اور نئی شاعری کا بھی مطالعہ ہے۔ اسی لیے ان کی شعری تنقید میں وسعت بھی ہے اور تنوع بھی اور سب سے بڑی خوبی یہ ہے کہ ان کی تنقید عیب جوئی ،بے جا نکتہ چینی اور جانب داری سے پاک صاف ہے۔ وہ اپنے ہم عصر شاعروں سے نہ تو معاصرانہ چشمک رکھتے ہیں اور نہ ہی بے جاتعریف و تحسین کے عادی ہیں ۔وہ اپنے خوردوں کا بھی خاص خیال رکھتے ہیں ۔ مشفقانہ انداز میں اغلاط کی نشان دہی اس طرح کرتے ہیں کہ حوصلہ شکنی اور دل آزاری نہ ہو۔ ان کا رویہ شاعری کے ساتھ عاشقانہ ہے اور شاعروں کے ساتھ بھی دوستانہ ، ان کا جارح رویہ ان ناقدین کی طرح نہیں ہے جنھوں نے جان کیٹس پر جارحانہ تنقید کر کے اسے دق کا مریض بنا دیا اور پھر اسی مرض میں بے چارہ کیٹس مر گیا۔ اس طرح کی جارحانہ اورسفاکانہ تنقید سے شعر و ادب کا نقصان ہی ہوتا ہے ۔بدر محمدی نے شاعروں پر لکھتے ہوئے متوازن اور معتدل رویہ اختیار کیا اور ان کی خاص بات یہ ہے کہ ان شاعروں کو اپنی تنقید کا حوالہ بنایا ہے جن پر نہ تو کثرت سے مضامین لکھے گئے ہیں اور نہ ہی وہ معاصر تنقیدی حوالوں میں شامل ہیں۔ انھوںنے بیشتر ان شعرا پر اپنی تنقیدی توانائی کا بھر پور استعمال کیا ہے جن کی تخلیقی قوتوں اور شعری صلاحیتوں کا واقعی اعتراف کیا جانا چاہیے۔

ان کے اس تنقیدی مضامین کے مجموعہ میں بیشتر وہ شعرا شامل ہیں جنھیں بڑے ناقدین کی بہت کم سطریں نصیب ہوئی ہوں گی بلکہ بعض تو وہ ہیں جن سے بڑے ناقدین تو دور کی بات ہے، متوسط درجے کے ناقدین بھی واقف نہیں ہیں۔ اس خصوص میں دیکھا جائے تو بدر محمدی نے بہت سے ذروں کو آفتاب و مہتاب بنانے کی کوشش کی ہے اور اس میں کوئی شک نہیں کہ یہ شعرا اپنی تخلیقی قوتوں کی بنیاد پر عظمتوں ، شہرتوںکے حقدار بھی ہیں۔ بدر محمدی نے ان شعرا کی شعری تشکیلات اور تخلیقی تفاعلات سے ایک بڑے طبقہ کو رو برو یا روشناس کرانے کی عمدہ کوشش کی ہے۔آج کے عہد میں اس کینن کو بھی توڑنے کی ضرورت ہے جو بڑے ناقدین نے اپنے تعصبات، ترجیحات اور ترغیبات کے زیر اثر قائم کیا ہوا ہے ۔ یہ اس حصار کو توڑنے کا ایک عمل ہے جو بڑے تنقیدی ذہنوں نے بنایا ہوا ہے کہ ان کی اقلیم نقد میں یہ شعرا داخل ہونے تک کے مجاز نہیں ہیں۔ یہ بڑے ناقدین کی مملکت تنقید سے جلا وطن شعرا ہیں جو اپنی تمام تر تخلیقی قوتوں کے باوجودبے بس ، لاچار اور مجبور ہیں کہ ان نقادوں سے ان کا کوئی ربط یا رشتہ نہیں ہے جو سروں پر سخن وری کا تاج رکھتے ہیں۔

بدر محمدی کے اس مجموعہ میں تقریباًتیس شعرا کے مختلف شعری تجربات اور اسالیب کے حوالے سے تفہیم و تحسین شعر کی کوشش کی گئی ہے۔ان میں سے کچھ ہی شعرا ایسے ہیں جن پر دیگر ناقدین نے تنقیدی مکالمہ قائم کیا ہے ورنہ بیشتر فن کار ایسے ہیں جن کے شعری مجموعوں یا شاعری کی رسائی صرف ایک محدود یا مخصوص حلقے تک ہی ہو پائی ہو گی ۔یہ وہ نام میں جو تنقید کی اسکرین پر بھی بہت کم یا بالکل نہیں دکھائی دیتے ہیں۔اس تناظر میں دیکھا جائے تو بدر محمدی کی یہ کاوش قابل قدر قرار پاتی ہے کہ انھوں نے مشاہیر شعرا کے بجائے کم معروف فن کاروں کو ہی اپنے اس تنقیدی مخاطبہ میں جگہ دی ہے اور ہر فن کار کے حسب مقدور اور بقدر ظرف حوصلہ افزائی کی ہے اور اپنے تحسینی اور تاثراتی کلمات سے ان کی شخصیت اور شاعری کا رشتہ با شعور ذہنوں سے جوڑا ہے۔ سعید رحمانی ،فرحت حسین خوشدل، علیم صبا نویدی، طالب القادری، ناوک حمزہ پوری، حافظ کرناٹکی، ظفر انصاری ظفر، عطا عابدی، فردوس گیاوی، ظہیر صدیقی ، شگفتہ سہسرامی، کامران غنی صبا، حمید ویشالوی، احقر عزیزی، صبا نقوی، ضیا عظیم آبادی، نیر قریشی، علیم الدین علیم، اظہر نیر، نفیس دسنوی، ظفر صدیقی، اشرف یعقوبی، علی کاظم، علی احمد منظر، منظور عادل، مینو بخشی، شہناز شازی، شکیل سہسرامی، منصور خوشتر ، بشر رحیمی یہ وہ شعرا ہیں جن میں سے بیش تر تخلیقی سطح پر بہت متحرک اور فعال بھی ہیں اور ان کے یہاں بعض ایسے شعر بھی ہیں جو زندہ رہنے کی قوت رکھتے ہیں۔ ان شاعروں نے اپنے تجربات وحوادث اور اپنے مشاہدات کو شاعری کے قالب میں ڈھالا ہے اور جذبات و احساسات کے خوب صورت ترجمانی بھی کی ہے ۔ ان کے یہاں تخیل بھی ہے، مطالعہ کائنات بھی ہے، محاکات بھی ہے اور تفحص الفاظ بھی ہے، شعریت بھی ہے ،جمالیاتی اقدار بھی ہیں ،عوامی امنگوں کی ترجمانی بھی ہے ، مقصدیت بھی ہے اور دیگر لوازم بھی جو شاعری سے منسوب ہیں۔ بہتوں کے یہاں شوکت ِ الفاظ بھی ہے ، سادگی و سلاست بھی ہے، جوش اور جدت ادا بھی ہے، برجستگی اور بلند پروازی بھی ، شیرینی اور صفائی بھی ہے ، نازک خیالی اور روانی بھی غرض کہ شاعری کے تمام رنگ اور آہنگ ہیں اور کچھ کے یہاں انداز اور اسلوب کی سطح پر اچھوتا پن بھی ہے ،روح ِ عصر سے ہم آہنگ یہ وہ شاعری ہے جن میں سے بیش تر کا دبستانی جبریت اور نظریاتی ادعائیت سے کوئی تعلق نہیں ہے۔ بدر محمدی نے مختلف رنگوں کے ان شعرا کو اپنے آئینہ نقد میں قید کیا ہے اور ان کے شناختی نشانات کو اپنی تنقید کے ذریعہ واضح کرنے کی کوشش کی ہے ۔

بدر محمدی نے مختلف اصنافِ سخن میں طبع آزمائی کرنے والے شاعروں پر لکھا ہے جن میں حمد ،نعت، دوہا، قطعہ، رباعی، نظمیں ،غزلیں لکھنے والے وغیرہ شامل ہیں ۔ ان کی تنقید سے یہ اندازہ باآسانی لگایا جاسکتا ہے کہ ان اصناف سے بدر محمدی کی گہری شناسائی ہے اور ان شعری ہیئتوںسے مکمل واقفیت بھی رکھتے ہیں۔ انھوں نے سعید رحمانی کی حمد نگاری کی توصیف و تحسین کی ہے تو فرحت حسین خوشدل کی دعائیہ نظموں کے رنگ و آہنگ کو سراہا ہے۔ علیم صبا نویدی کی نثری نعتوں کو وقیع اور قابل قدر قرار دیا ہے تووہیں طالب القادری جیسے نعت گو شاعر کے شعری گلدستے میں فکر کی پاکیزگی اور فن کی پختگی تلاش کی ہے۔انھوں نے ناوک حمزہ پوری کی نظمیہ رباعیات میں شوکت الفاظ اور آواز کے زیر وبم کی جلوہ سامانیوں کی نشاندہی کی ہے اوران کی قدرت کلامی کا اعتراف کیا ہے۔ تو وہیں حافظ کرناٹکی کی قطعات نگاری میں ان کی تازگی اور تازہ کاری زبان کی سلاست و برجستگی کا ذکر کیا ہے ۔ظفر انصاری ظفر کے دوہے کے مجموعہ’روٹی جیسا چاند ‘ سے اس تازہ کار شاعر کی پہچان کرائی ہے جس کے دوہوں میں معنوی تہہ داری اور فن کارانہ ہنر مندی ہے،جس کے دوہوں میں سادگی، سلاست اور زبان کا رچائو ہے جو اپنے دوہوں میں ہندی اور سنسکرت کے کومل اور سندر الفاظ استعمال کرتا ہے۔

’’اپنے تن پہ ڈال کے ، چنری دھانی رنگ ؍چل دوں گی میں بھی سکھی ،کبھی پیا کے سنگ؍جب سے ساجن جا بسے، مجھ برہن سے دور؍دن سونا سونا ہوا، رات ہوئی بے نور‘‘

عطا عابدی کی نظمیہ شاعری ’زندگی ،زندگی اور زندگی‘ میں انھوں نے موضوعات کا تنوع ، احساس کا نیا پن، زاویہ نظر کی انفرادیت، گفتار کی نرمی،اظہارکی بے باکی اور تیور کی جدت کو نشان زد کیا ہے تو وہیں فردوس گیاوی کی نظمیہ شاعری میں تپش،حرکت و حرارت اور معاشرتی تبدیلوں کے منظر نامے کو پیش کیا ہے۔ ظہیر صدیقی کے شاعرانہ اختصاص کو ’روشن ورق ورق‘ کے حوالے سے واضح کیا ہے تو شعری مجموعوں ’یا صاحب الجمال‘،جستجو اور شانتی کے حوالے سے شگفتہ سہسرامی کی شعری شگفتگی اور تازہ کاری کو خراج تحسین پیش کیا ہے۔

بدر محمدی نے مختلف ماحول ،معاشرت ،عمراور الگ الگ ذہنی سطحوں کے حامل فن کاروں کو اپنی تنقید کا محور بنایا ہے، خاص طور پر ان حاشیائی بستیوں کے تخلیق کاروں کو جو ادبی نقشہ پر اپنی کوئی خاص پہچان یا نام و نشان نہیں رکھتے۔ وہ مسلسل تخلیقی عمل میں مصروف رہنے کے باوجود ناقدری کے شکار ہیں، ان کا مرتکز آمیز تنقیدی مطالعہ تو دور کی بات ہے، ان کی شاعری پر سر سری یا طائرانہ نظر بھی نہیں ڈالی گئی ہے۔ بدر محمدی نے ویشالی جیسے علاقہ کے تین ایسے شعرا کا ذکر کیا ہے جن سے ادبی طبقہ شاید ہی واقف ہو، حمید ویشالوی، احقر عزیزی ، منظور عادل۔ یہ وہ شعرا ہیں جن کا اس ویشالی سے تعلق ہے جو کسی زمانے میں شعر و ادب کی ایک زرخیز زمین کی حیثیت رکھتا تھا۔ جہاں سے عبداللطیف اوج،ریاض حسن خاں خیال، حکیم ہادی، حسن نایاب، احسان حسن خاں احسان جیسے شعرا کا تعلق ہے۔ بدر محمدی نے حمید ویشالوی کا ایک استاد شاعر کی حیثیت سے ذکرتے ہوئے لفظیات و موضوعات دونوں اعتبار سے موضوع کی ندرت اور استعارات و تشبیہات کی جدت کو ان کا کمال ہنر بتایا ہے ۔ان کے شعری مجموعے آفتاب زندگی، توشہ آخرت، مناقب اولیاء شائع ہو چکے ہیں۔ ان کے بارے میں بدر محمدی نے بہت افسوس ناک انکشاف بھی کیا ہے کہ بہت سے افراد کو ان کے شاعر ہونے کی خبر حیات میں بھی نہیں ہو پائی یہاں تک کہ اکثر لوگوں کو ان کی موت کی اطلاع بھی نہیں مل سکی۔احقر عزیزی کی شعری کائنات کی سیاحت کرتے ہوئے بدر محمدی نے ان کے شعری مجموعہ ’صریر‘کو اپنا مرکز بناتے ہوئے ان کی قدر سنجی کی ہے ۔انھیں کا ایک شعر ہے:

ہر رات انتظار میں آنکھیں بچھی رہیں

نہ جاگتے میں آئے نہ آئے وہ خواب میں

ویشالی ہی سے منظور عادل کا بھی تعلق ہے جن کا مجموعہ غزل کا عنوان ہے ’اجالے قسطوں میں،‘ ان کے تعلق سے بدر محمدی کی رائے ہے کہ ’’وہ کاغذ پر زندگی کا عرق انڈیلتے ہیں، اس لیے بہار و خزاں ،دار ورسن، جنون و زنداں اور دشت و صحرا جیسے الفاظ سے انھوں نے باغ سخن کو آراستہ کیا ہے ۔‘‘ انہی کا ایک عمدہ شعر ہے:

درد بازار میں نہیں بکتے

گھر کے آنگن میں خود اگ آتے ہیں

بدر محمدی نے جہاں بہار کے شاعروںکی تخلیقات کا تجزیہ کیا ہے، وہیں دیگر علاقوںکے فن کاروں کے مزاج و ماحول کے ساتھ موضوعات کے محرکات کا بھی جائزہ لیا ہے۔ علیم الدین علیم ،اشرف یعقوبی دونوںکا تعلق اس شہر کلکتہ سے ہے جس کا اپنا ایک انقلابی مزاج اور آہنگ ہے اور جس کا اپنا الگ طرز احساس بھی ہے۔ علیم الدین علیم کی غزلوں کے رنگ و آہنگ سے گفتگو کرتے ہوئے بدر محمدی نے بڑی اچھی بات لکھی ہے کہ ’’ان کی غزلوں میں چہرۂ شہر کا غازہ کم اور گائوں کی بھینی مٹی کی خوشبو زیادہ ہے‘‘ اسی لیے وہ اس طرح کے شعر کہتے ہیں۔

چھائوں پیپل کی میسر ہیں نہ شفاف ہوا

کیا ملا پوچھ اسے گائوں سے ہجرت کرکے

خون میں ڈوبا ہوا شہر کا منظر ہے میاں

ایسے ماحول سے تو گائوں ہی بہتر ہے میاں

اشرف یعقوبی کا شعری آہنگ بھی اسی رنگ میں ڈھلا ہوا ہے ۔’سرخ آبی پرندہ ‘اور ’پاگل ہوا پردے میں ہے‘ ان کے شعری مجموعے ہیں ۔ انھوں نے اپنی شاعری میں محاورات کو بڑی خوب صورتی سے برتا ہے۔ کلکتہ جیسے انقلابی اور مزاحمتی شہر کا رنگ بھی ان کے شعری آہنگ کا حصہ ہے ۔ بدر محمدی نے اپنی اس کتاب میں صبا نقوی ،ضیا عظیم آبادی، اظہر نیر، نفیس دسنوی، ظفر صدیقی، علی کاظم، نیر قریشی، شکیل سہسرامی کے فن پاروں کا بھی عمدہ تجزیہ کیا ہے اور مختلف نظریات اور مکاتب خیال سے تعلق رکھنے والے اس شعرا کے انداز بیان ، اسلوبیات اور معنیات کے حوالے سے اچھی گفتگو کی ہے اور اسی مطالعہ میں انھوں نے ادبی تخلیق کی خارجی اور داخلی کیفیات کا جائزہ بھی لیا ہے اور الگ الگ تخلیق کارروں کے انداز اور اسلوب کے حوالے سے گفتگو بھی کی ہے ۔ شاعری کے اسلوبیاتی خد و خال، ہیئتوں ، استعاروں اور علائم و رموز پر ان کی نظر ہے ،اسی لیے الگ الگ مزاج ،ذوق کے حامل ان شعرا کے تخلیقی باطن میں اتر کر ان کے اختصاصات کو پرکھنے کی کوشش کی ہے۔ صبا نقوی کی شعری جمالیات کو انھوں نے ’جمالِ فن‘ کی روشنی میں محسوس کیا ہے ۔ ان کی قادرالکلامی، تراکیب کی دل کشی ، الفاظ کی بندش کو سراہا ہے ۔ مریضِ شعر و سخن اورپیشے سے ڈاکٹر سید مظفر عالم ضیا عظیم آبادی کی شاعری کا ’رقص سیماب ‘کے آئینہ میں جائزہ لیتے ہوئے ان کی شاعری کے موضوعات پر روشنی ڈالی ہے۔ نیر قریشی گنگوہی جیسے معتبر شاعر کی غزلوں میں انھوں نے زندگی کی پیچیدگیوں ، ناہمواریوں اور عام انسانوں کے درد و کرب کو تلاش کیا ہے ۔ اظہر نیر بھی معتبر شاعر ہیں، جن کا مجموعہ ’ سایے ببول کے‘ ان کی تخلیقی قوت اور ندرتِ فکر کا غماز ہے ۔ ان کے یہاں بہت عمدہ قسم کے اشعار تلاش کیے جاسکتے ہیں ۔

سر پر نیر بہت ہی کڑی دھوپ ہے

اب ببولوں کا سایہ ذرا ڈھونڈیے

’لفظ لفظ آئینہ‘ کی روشنی میں انھوں نے کلام نفیس کا بہت عمدہ جائزہ لیا ہے ۔نفیس دسنوی اردو کے معتبر شاعروں میں سے ہیں جن کا کلام مقتدر رسائل میں شائع ہوتا رہا ہے ۔ ان کی شاعری میں عصری حسیت ہے اور آج کے سیاسی ،سماجی حالات کی تخلیقی صورت گری بھی ۔ ظفر صدیقی واقعی تیکھے لہجے کے شاعر ہیں۔ ان کا ہر شعر بولتا ہوا سا محسوس ہوتا ہے۔ ان کا لہجہ منفرد ہے اسی لیے ان کے مجموعہ غزل کا عنوان بھی ’لہجہ ہمارا‘ہے۔ ان کی شاعری کے موضوعات میں بڑی وسعت ہے اور لفظیات کے اعتبار سے یہ ایک نئی زبان کی شاعری معلوم ہوتی ہے ۔ وہ آج کے مسائل سے مکالمہ بھی کرتے ہیں۔ انہی کا شعر ہے :

فصیل اچھی نہیں لگتی کہ در اچھا نہیں لگتا

وہ دہشت ہے مرے گھر میں کہ گھر اچھا نہیں لگتا

میں نے تمام رات اندھیروں میں کاٹ دی

مجھ پر کسی چراغ کا احساں نہیں ہوا

کون ہوگا جو ایسی شاعری کی داد نہیں دے گا ۔اس طرح کے اور بہت سے اچھے شعر ظفر صدیقی کے یہاں ملتے ہیں۔ بدر محمدی نے ان کے لہجے کے جلال کو دیکھتے ہوئے اچھی رائے دی ہے کہ ’’ان کی غزلیں زندگی کی توانائیوں سے بھر پور ہیں، ان کے جذبوں میں آنچ اور حدت ہے۔‘‘ علی کاظم کے شعری مجموعہ’ فاصلوں کا سمندر ‘پر بھی انھوں نے اپنے تاثرات کا اظہار کیا ہے اور یہاں انھوں نے اپنی تنقیدی دیانتداری کا ثبوت دیتے ہوئے شعری سقم کی طرف بھی اشارے کیے ہیں۔ علی احمد منظر کا تغزل تابناک اور تابندہ ہے اور اس کے ساتھ وسیع بھی ۔ ان کا شعری مجموعہ ہے ’ لمحوں کی شاخ سے‘ ۔اس پر گفتگو کرتے ہوئے انھوں نے منظر کے یہاں فکری تمازت، فن کی سلاست، ندرت بیان کے ساتھ ، تازگی طرفگی کی بھی تلاش کی ہے ۔ شکیل سہسرامی کے شعری مجموعہ ’آوازجہ‘ پر انھوں نے مبسوط گفتگو کی ہے اور ان کے موضوعات کی معنویت اور وسعت کو سراہتے ہوئے انھوں نے یہ اچھی رائے دی ہے کہ’’ شکیل سہسرامی کی غزلوں میں نئے اظہاری نظام کی تشکیل بھی ہے اور پرانی تشبیہات و استعارات و تلمیحات، نیز پیکروں کے نئے معنی بھی ۔‘‘ بشر رحیمی کے شعری مجموعہ’ عکس ٹوٹے آئینہ‘ پر بھی اپنے تاثرات پیش کیے ہیں اور ان کی خامیوں اور کوتاہیوں کی نشان دہی کرتے ہوئے ان کے ذوق ادب کی ستائش بھی کی ہے ۔

بدر محمدی نے شاعری میں نسائی نفسیات اور مزاج کی تفہیم کی بھی عمدہ کوشش کی ہے ۔ انھوں نے مینو بخشی اور شہناز شازی کی شاعری کا مطالعہ کیا ہے اور ان کے مزاج، استعارے اور نئے تلازمے پر عمدہ گفتگو کی ہے۔ مینو بخشی کا مجموعہ ’تشنگی‘ کے عنوان سے شائع ہوا ہے۔ وہ نہایت حساس شاعرہ ہیں اور یہی حساسیت ان کے شعری پیکر میں ڈھل جاتی ہے تو ایک عجب سی کیفیت پیدا ہو جاتی ہے۔ ان کی پوری شاعری کیفیت سے معمور ہے ۔یہی وجہ ہے کہ ان کے بیشتر شعر دامنِ دل کو اپنی طرف کھینچتے ہیں۔ انہی کے اشعار ہیں:

اب بھی وہی ہے عشق کا دستور جانِ من

اس راہ میں تو جان کا نقصان اب بھی ہے

دامن خیال یار کا دست طلب میں ہے

غم میں بھی زندہ رہنے کی صورت نکل گئی

ان کے تعلق سے بدر محمدی کی یہ اچھی رائے ہے کہ’’ ان کے یہاں غم دوراں ، غم جاناں میں مدغم ہے۔ ‘‘

اداس رات ہے تاروں میں روشنی ہی نہیں

کہ تو نہیں تو کسی شے میںزندگی ہی نہیں

ہوا دل کا حال ابتر تجھے یاد کرتے کرتے

میری جاں نکل نہ جائے کہیں آہ بھرتے بھرتے

اسپینش زبان کی استاد مینو بخشی نے اپنی شاعری کے ذریعہ اردو زبان کو Enrich کیا ہے۔ اس کا اعتراف تو کرنا ہی پڑے گا ۔ شہناز شازی کی شاعری کا بھی انھوں نے بہت خوب صورت جائزہ لیا ہے۔ ان کا شعری مجموعہ ’کربِ نا رسائی‘ کے عنوان سے شائع ہوا ہے۔ شہناز شازی کی شاعری میں اتنی کشش ہے کہ بدر محمدی نے ان کی شاعری سے رشتہ جوڑتے ہوئے اپنی نثر کوبھی شاعرانہ رنگ میں ڈھال دیا۔ وہ لکھتے ہیں’’ شہناز کی شاعری محبت سے آواز دینے کا عمل ہے، اس لیے وہ برگ حنا پر درد دل کی بات لکھنے میں محو ہیں ۔ ان کے شعروں میں ان دیکھی چاہت کا جادو اس طرح سر چڑھ کر بولتا ہے جیسے غزل غزل کہہ رہی ہو ۔‘‘ اس کی تصدیق شہناز کے ان شعروں سے ہو سکتی ہے:

اپنے ہی آنسوئوں کے سمندر میں ڈوب کر

کتنے ہی خواب کرتے ہیں ہر روزخود کشی

اسی لیے میں کتابوں میں پھول رکھتی ہوں

شرارتوں سے ہوا کے بکھر نہ جائیں کہیں

چھپا رکھا ہے کوزے میں سمندر

نہ سمجھو دل میں کوئی غم نہیں ہے

بدر محمدی نے خورد و کلاں کی اس خلیج کو ختم کیا ہے جو پرانی اور نئی نسل کے نام سے اردو ادب میں عام ہو چکی ہے ۔ انھوں نے جہاں بزرگ اور متوسط درجہ کے شعراء پر اپنے رد عمل کا اظہار کیا ہے، وہیں نئی نسل کے شعرا کو بھی اپنی تنقیدی نگاہ میں شامل رکھا ہے ۔ کامران غنی صبااور منصور خوشتر نئی نسل سے تعلق رکھتے ہیں ۔بدر محمدی نے ان دونوں کے یہاں امکانات کی جستجو کی ہے اور ان کے شعری مجموعوں کے حوالوں سے حوصلہ افزا گفتگو کی ہے۔ ان دونوں کے یہاں بہت سے عمدہ اشعار ملتے ہیں ۔ ان کے تجربات اور مشاہدات کی دنیا تازہ بھی ہے اور اس میں تحرّک بھی ہے۔

بدر محمدی نے ’ہم عصر شعری جہات‘ کے ذریعہ اردو شاعری کے ان آفتاب و مہتاب سے رو برو کرانے کی کوشش کی ہے جو ہماری طرح اور بھی بہت سی آنکھوں سے اوجھل ہیں۔ انھوں نے تحسین شعر یا تفہیم شعر میں مثبت اور صحت مند رویہ اختیار کیا ہے ۔ اس سے ایک ایسا معاصر شعری منظر نامہ ترتیب پاتا ہے جو ہماری تنقید کو ایک نیا آئینہ دکھا تا ہے۔ بالخصوص وہ تنقید جو چند مشہور اور مخصوص ناموں کے ارد گرد طواف کرتی رہتی ہے اور حاشیے پر کھڑے ہوئے حرف کی حرمت بچانے والوں کو اکثر نظر انداز کرتی رہی ہے۔ ایک طرح سے یہ تنقید ان لوگوں کے لیے تازیانہ سے کم نہیں ۔ ناقدری کے اس عہد میں قدر شناسی کی یہ ایک اچھی کوشش ہے جس کی دل کھول کر تعریف کی جانی چاہیے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)

ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔

نقدِ شعر اور بدر محمدی – حقانی القاسمی

ہندوستان میں اُردو زبان کا مستقبل اور ہماری ذمہ داریاں کے عنوان سے سیمینار کا انعقاد

امام الہند مولانا ابوالکلام آزاد بحیثیت انشاپرداز – اسلم رحمانی

یہ بھی پڑھیں