’’دیوانِ ذوق‘‘ؔ مرتبہ آزادؔ ایک جائزہ - عمیر یاسر شاہین

جب نگاہ کلامِ ذوقؔ کی طرف اٹھتی ہے تو ذوقؔ کی زندگی میں کلامِ ذوقؔ کا کوئی مجموعہ کلام نہ پاکر کئی سوالات ذہن میں ابھرتے ہیں کہ آیا ذوقؔ نے اپنی زندگی میں اپنے کلام کوترتیب اور اشاعت کروانے کاکام سرانجام کیوں نہیں دیا ؟ کیا وجوہات تھیں جن کے پیش نظر ذوقؔ کویہ خیال نہ آیا کہ اپنے کلام کا کوئی مجموعہ اشاعت پذیر ہوسکے۔حالانکہ ہرکوئی عزت وشہرت کا پیاسا ہے اور اپنے کلام کی اشاعت کو اپنے لئے عزت وتوقیر کا باعث سمجھتا ہے،موجودہ دور کے شعراء کے حوالے سے طاہرہ مسعود اپنے ایک شعر میں کہتی ہیں۔

؎ آج کے دور کے سبھی شاعر

اپنی اپنی کتاب رکھتے ہیں (۱)

درج بالا سوالات کے جوابات بھی کلامِ ذوقؔ سے مل جاتے ہیں اس حوالے سے ذوقؔ مرحوم کایہ شعر کلامِ ذوقؔ مرتب نہ ہونے کی واضح توجہیہ ہے۔

؎ ذوقؔ کیوں کر ہو اپنا دیواں جمع

کہ نہیں خاطرِ پریشاں جمع (۲)

لہٰذا کلام ذوقؔ کا پہلا مجموعہ ذوقؔ کی وفات کے بعد حافظ ویران ؔنے محمد حسین خان تحسین ؔ کے کہنے پر مرتب کیا جو مطبع احمدی واقع شاہدرہ دہلی نے ۱۸۶۳ء میں شائع کیا اور اس کے بعد دوسرا اہم مجموعہِ کلام ’’دیوانِ ذوق‘‘ مرتبہ محمد حسین آزادؔ مطبع اسلامیہ لاہور سے ۱۸۸۹ء میں شائع ہوا جس کے بعد کلامِ ذوقؔ کی اشاعت وطباعت کا سلسلہ شروع ہوا جوتاحال جاری وساری ہے۔

”دیوانِ ذوقؔ‘‘ مرتبہ آزادؔپہلی بار مطبع اسلامیہ لاہور بااہتمام مولوی کرم بخش کے شائع ہوا مگر سالِ اشاعت درج نہیں ہے۔ سال اشاعت ’’دیوانِ ذوقؔ‘‘ مرتبہ آزادؔ پر تنقید کرنے والے محقق حافظ محمود شیرانی کو بھی معلوم نہیں اور وہ بھی لاعلمی کا اظہار ان الفاظ میں کرتے ہیں۔

’’دیوانِ ذوق” مولانا آزادؔ نے پہلی مرتبہ کس سن میں شائع کیا ؟مجھے معلوم نہیں،لیکن اس میں شک نہیں کہ مولانا نے اپنےایڈیشن کی تہذیب و آراستگی میں کوئی دقیقہ فروگزاشت نہیں کیا۔ جہاں تک ہوسکا اسے جاذبِ نظر اور دل فریب بنانے کی کوشش کی ہے۔‘‘ (۳)

اسی طرح ’’دیوانِ ذوق‘‘ مرتبہ آزادؔ پر تحقیق وتنقید کرنے والے دوسرے اہم محقق ڈاکٹر عابد پشاوری ہیں اور وہ بھی اپنی کتاب ’’ذوقؔ اور محمد حسین آزادؔ‘‘ میں ایڈیشنِ اول سے لاعلمی کااظہار کرتے ہوئے لکھتے ہیں۔

”’بہ قول اسلم فرخی:پہلے ایڈیشن میں صفحات کی تعداد پانسو سات تھی۔ ہرصفحے پر انیس سطریں تھیں۔ اور ہرسطر میں کم و بیش سترہاٹھارہ لفظ تھے۔ بعد کے ایڈیشن اسی ایڈیشن کی نقل ہیں۔چناچہ فی الوقت تیسراایڈیشن مطبوعہ ۱۸۸۷ء پیشِ نظر ہے۔‘‘ (۴)

’’دیوانِ ذوقؔ‘‘ مرتبہ آزادؔ کی اشاعتِ اول کے سن ِاشاعت کے حوالے سے یہی لاعلمی تمام ناقدین کے ہاں نظر آتی ہے۔ ڈاکٹر تنویر احمد علوی (جنہوں نے ذوقؔ پر ڈاکٹریٹ کی ڈگری حاصل کی)نے بھی اپنے مرتبہ ’’کلیاتِ ذوق‘‘ کے مقدمے میں اسی لاعلمی کا اظہار کیا ہے۔ حالاں کہ باقی تمام نسخوں کے سنینِ اشاعت اور ان کے محاسن و معائب پر ناقدانہ رائے دی ہے مگر نسخہ آزادؔ طبع اول کے محاسن ومعائب پر تو کافی مدلل گفتگو کرتے ہیں مگر سنِ اشاعت اور جس ادارے سے شائع ہوا اس کا ذکر ان کے ہاں بھی نظر نہیں آتا۔ نسخہ آزادؔ پر ان کے الفاظ میں بات شروع کرتے ہیں۔

’’ نسخہ ویران ؔ اور نگارستان سخن کی اشاعت کے بعد کلام ذوقؔ کا ایک نیا اور نسبتاََ زیادہ مکمل مجموعہ مولانامحمد حسین آزادؔ نے پیش کیا۔‘‘ (۵)

راقم کےپاس مطبوعہ مطبع اسلامیہ لاہور والا نسخہ بھی موجودہے جس کا پہلے ذکر کیا جاچکا ہے اور اسی کو طبع اول کہا جاسکتا ہے کیوں کہ ’’آب ِحیات ‘‘جوکہ ۱۸۸۰ء میں شائع ہوئی اس کے بعد آزاد ؔنےدیوان مرتب کیا تھا اور ان دنوں وہ لاہور میں قیام پذیر تھے، اس لئے قرین وقیاس ہےکہ یہ نسخہ جس پرسنِ اشاعت درج نہیں نسخہ آزادؔ طبع اول ہے۔ آزاد ؔکے مرتبہ دیوان کے حوالے سے پنڈت برج موہن دتاتریہ کیفیؔ اپنےمرتبہ انتخاب کےدیباچے میں آزادؔکےدیوان مرتب کرنے کے حوالے سے رقمطرازہیں۔

’’ جب آزاد ؔلاہور میں بیٹھ کر اور نیرنگ خیال اور آبِ حیات لکھ کر ادب میں اپنی جگہ بناچکے تو انھوں نےدیوان ِذوقؔ کاایک نسخہ شائع کیا۔‘‘ (۶)

اس اقتباس سے ایک بات واضح ہوتی ہے کہ جن دنوں آزادؔ نےدیوانِ ذوقؔ مرتب کیا ان دنوں وہ لاہور میں تھے لہٰذا جب لاہور میں تھے تو اشاعت بھی لاہور ہی سےہوئی ہوگی۔ مگراس بیان سے مکمل طور پر لاہورسےاشاعت واضح نہیں ہوتی لیکن راناخضرسلطان نےیہ مشکل بھی حل کردی۔ راناخضرسلطان اپنے مرتبہ کلیات ذوق کےدیباچے میں آزادؔکےمرتبہ دیوانِ ذوق کی طباعتِ اول کے حوالے سے رقمطراز ہیں۔

یہاں تک کہ گورنمنٹ کالج لاہور میں اسسٹنٹ پروفیسرہوگئے اور یہ وہی زمانہ ہے جب انھیں دیوانِ ذوقؔ کی ترتیب کاخیال آیا۔اس مسودےکو سینے سے لگائے انہیں تیس سال گزر چکےتھے۔‘‘ (۷)

کیوں کہ اس مجموعے کے اوپر بھی مولفہ شمس العلماء مولوی محمدحسین صاحب آزادؔ پروفیسر گورنمنٹ کالج لاہور درج ہے اس لیے یہی مجموعہ طبع اول ہےجوکہ آزادؔ کا مرتبہ ہے۔ آزادؔکامرتبہ دیوان۱۸۸۹ء میں طبع ہوا۔ کیوں کہ اس حوالے سے مخمورسعیدی نےآزادؔ کے حسن بلگرامی کولکھےگئے خط کے حوالے سے لکھا ہے جس میں مرتبہ دیوان کےبارے میں گفتگوکرتےہیں۔ مخمورسعیدی لکھتے ہیں۔

’’ یہ خط یکم ستمبر۱۸۸۸ءکالکھاہواہے۔ اورنیبرہ آزادآغامحمدباقرکےپاس محفوظ تھا۔ آزادؔ نےکلام ِذوق ؔکی تالیف وترتیب پردس مہینےصرف کئے۔‘‘ (۸)

علاوہ ازیں راقم کےپاس نسخہ آزادؔ مطبوعہ محبوب المطابع دہلی۱۹۳۳ء والا نسخہ بھی موجودہے۔ دونوں نسخوں میں سرورق پر ’’دیوانِ ذوق ؔ‘‘ کےبعد ’یعنی ملک الشعراء خاقانی ہند شیخ محمد ابراہیم ذوقؔ علیہالرحمہ کا کلام جس قدر بہم پہنچ سکا اور دیباچہ میں سوانح عمری‘‘ لکھا ہواہے۔ جس سے اندازہ ہوتاہے کہا ٓزادؔ نے دیوانِ مذکور میں جوکلام شامل کیاہے اس کو انھوں نے مکمل اورحرفِ آخر نہیں کہا بلکہ انھوں نے پہلے سےکہ دیاہے کہ جتنا میسر آسکاہے وہ شامل دیوان کردیاہے۔ اوردوسری اہم بات کہ دیباچے کی طرف بھی خود ہی اشارہ کردیاہے کہ دیباچے میں سوانح عمری لکھی گئی ہے۔ دونوں نسخوں میں دیباچےکےصفحات کی تعداد۴۸ہے۔ ’’دیوانِ ذوقؔ ‘‘مرتبہ آزادؔ کےدیباچےکاآغاز ان الفاظ سےہوتا ہے۔

’’ یہ علم ِمعنی کی روحیں ہیں جو الفاظ کی دنیا میں اتری تھیں۔ ذوق وشوق کے وعدےتھےکہ دلوں کو آگاہ کرینگے۔ استادمرحوم یہ حسرت ساتھ لےگئے۔ والد میرے شہیدِ آرزو ہوئے میں بڈھاہوا۔ اب خطریہ ہےکہ امانت رہے اورآزاد کومسافر خانہ سے کوچ کاحکم آجائے۔ ان کےکلام کی ترتیب آسان کامن ہیں۔ صدہاشعرہیں کہ لوگوں کےپاس کچھ لکھےتھے۔ دیوانِ مروجہ میں کچھ چھپے۔اوران کی زبان سےکبھی کچھ سنےکبھی کچھ سنے۔‘‘ (۹)

یہاں بھی آزادؔ کا داستانوی رنگ نمایاں ہےاوراسی داستانوی رنگ میں پورادیباچہ لکھا گیا ہے، ایسےلگتاہے آزادؔنےدیباچہ نہیں کوئی افسانہ لکھاہے جو اپنے ساحر سے نکلنےنہیں دیتا۔ اس اقتباس سےمعلوم ہوتاہےکہ ذوقؔ کی زندگی میں کوئی مجموعہ کلام شائع نہیں ہوا جس کا آزادؔ کو دکھ ہےاوردوسری اہم بات مرتبہ ویران ؔوالےنسخےپرشک کااظہاربھی نظرآتاہے،یعنی جب وہ لکھتے ہیں کہ ’’دیوانِ مروجہ میں کچھ چھپے ‘‘سےمرادہےکہ اشعارکےاندرردوبدل کیاگیاہے۔دیوان مرتب کرتے ہوئے جن مراحل سےآزادؔکوگزرناپڑااس کاذکر کرتےہوئےلکھتےہیں۔

”پھٹےپرانےمسودےلڑکپن سےبڑھاپےتک کی یادگارہیں۔ والد مرحوم کے ہاتھ کی بہت تحریریں ہیں۔ بہت کچھ میری قسمت کے نوشے ہیں کہ حاضر وغائب لکھتا اورجمع کرتاتھا۔ کٹے پھٹے اشعار کا پڑھنا، مٹے حرفوں کا اجالنا، اس زمانے کے خیالات کوسمیٹنا،حالتوں کاتصور باندھنا، بھولے بسرے الفاظ ومطالب کو سوچ سوچ کر نکالنا میرا کام نہ تھا۔ خداکی مدد اور پاک روحوں کی برکت شامل حال تھی۔ میں حاضراورخداناظرتھا۔ راتیں صبح ہوگئیں اوردن ان دھیرےہوگئے۔ جب یہ مہم سرانجام ہوئی۔‘‘ (۱۰)

اس کے علاوہ ایک اہم بات کی طرف انھوں نے خود دیباچے میں اقرار کیا ہے جس پرلوگ آج بھی شورکرتے ہیں کہ آزادؔ نےداستانیں اور افسانے گھڑے ہیں اور ذوقؔ سے منسوب کردئیے ہیں۔ اس بات کا آزادؔ کو اندازہ تھا کہ لوگ ان کی باتوں کوفضول سمجھیں گے۔آزاد ؔلکھتےہیں۔

’’تحریرِ حالات میں بعض باتوں کے لکھنے کولوگ فضول سمجھیں گے۔ مگر کیا کروں جی یہی چاہتاہے کہ کوئی حرف اس گراں بہا داستان کا نہ چھوڑوں۔ شاید اس سبب سے ہوکہ اپنے پیارے اورپیارکرنی والےبزرگ کی ہربات پیاری ہوتی ہے۔‘‘ (۱۱)

آزادؔمرحوم نے خود اقرارکیاہے کہ پیارے اور پیار کرنے والے کی ہربات قیمتی ہوتی ہے اس سے انکار ممکن بھی نہیں، آج بھی پیار اور نفرت کی وجہ سے ہزاروں تحریریں ہجویا تو مدحیات سےبھریپڑی ہیں۔ آزادؔکےاس اقرار کےباوجود آج تک آزادؔ کی تحریروں پر تنقید کا سلسلہ برابر جاری ہے مگر ڈاکٹر تنویر احمد علوی، آزادؔ کی تائید کرتے ہوئے لکھتےہیں۔

’’اس میں کوئی شک نہیں کہ اس حسن عقیدت اور ذہنی کاوش کے نتیجے میں ذوق ؔمرحوم کی شاعرانہ زندگی کےبہت سےاہم واقعات اورمعاملات سامنے آگئے۔‘‘ (۱۲)

اس میں کوئی شک نہیں کہ ذوقؔ کےبارے میں جتنی معلومات مولانا آزادؔ نےقلمبند کیں ہیں اتنی ذوقؔ سےمتعلق کسی اور ناقد کی تحریروں میں نظر نہیں آتیں اور ذوقؔ کے بارے میں آج تک جتنی معلومات مستعمل ہیں آزادؔ ہی کی بیان کردہ ہیں۔ سوانحی حالات وواقعات میں زیادہ تر ’’آب ِحیات‘‘ہی کاپرتاؤ نظرآتاہےاور ’’آبِ حیات ‘‘والی باتیں ہی دیوان کےدیباچے میں بھی قلمبند کیں ہیں مثال کےلئےمرتبہ دیوانِ آزادؔ اور ’آبِ حیات ‘سےایک ایک اقتباس پیش ِخدمت ہے۔

مرتبہ دیوان آزادؔ

سلسلےاصلاح جاری تھے۔ مشاعروں میں غزلیں پڑھی جاتی تھیں۔ لوگوں کی واہواطبعیتوں کو بلند پروازی کے پر لگاتی تھی کہ رشک جوتلامیذالرحمن کے آئینوں کاجوہرہےاستادشاگردوں کوچمکانےلگا۔۔۔۔۔۔۔۔۔۔ ان کی غزلوں میں توارد سے یاخدا جانے کس اتفاق سےوہی مضمون پائے گئے اس لئے انہیں زیادہ رنج ہوا۔‘‘ (۱۳)

آبِ حیات

سلسلے اصلاح کےجاری تھے۔مشاعروں میں غزلیں پڑھی جاتی تھیں۔ لوگوں کی واہوا طبیعیتوں کوبلندپروازیوں کے پرلگاتی تھی کہ رشک جوتلامیذالرحمن کے آئینوں کاجوہر ہے استاد شاگردوں کو چمکانےلگا۔۔۔۔۔۔۔۔۔ ان کی غزلوں میں توارد سے یا خدا جانے کسی اتفاق سےوہی مضمون پائےگئے۔ اس لئےزیادہ رنج ہوا۔‘‘ (۱۴)

لہٰذا سوانحی حالات سے بوجہ طوالت گریزکیاجارہاہے۔ کہیں ’’آبِ حیات ‘‘کا جائزہ لیتے ہوئےاس پرتفصیل سے بحث کریں گے۔ آزادؔ، ذوقؔ کےشاگرد تھے اور ہر وقت اس دورکےدستور کےمطابق استادکی خدمت میں رہتےتھے لہٰذا جو باتیں آزادؔ مرحوم کویاد تھیں اورجوکلام ِذوقؔ،آزادؔ کویاد تھا وہ کسی اور کوکیسےیادہوتا، اس حوالےسےخودلکھتےہیں۔

’’ مجھےبیس برس تک اس طرح حضوری خدمت رہی کہ ہروقت پاس بیٹھ کر ظاہر و باطن کےفوائد حاصل کرتاتھا۔ جوحال نہیں دیکھے وہ بھی اس طرح سےسنے ہیں گویا سامنےگزرےہیں۔‘‘ (۱۵)

علاوہ ازیں دیباچے میں بھی ’’آبِ حیات‘‘ والےضمنی عنوانات دئیےگئےہیں، جن میں’خاص حالات اورطبعی عادات، عموماََ اندازِ کلام اور اعتراض ‘یہی عنوانات دونوں جگہ درج ہیں اورزیادہ ترواقعات بھی وہی دہرائے گئےہیں۔دیباچےکےآخرمیں ’’اللھم لحھم بالخیر‘‘مرقوم ہے۔ مختصراََ ڈاکٹرضیاءالدین انصاری کےالفاظ میں اس کا اختتام کرتےہیں۔

’’ آزادؔ نے ذوق ؔکادیوان شائع کیا اس میں انھوں نے ایک طویل مقدمہ سپرد ِقلم کیا جس میں ذوقؔ کےسوانح حیات بیان کرکے ان کےکلام کےمحاسن پرروشنی ڈالی ہے۔اس میں جہاں تک تنقیدوتبصرہ کاتعلق ہے تو وہ آب حیات میں پیش کئے گئے خیالات کاہی اعادہ ہے،بلکہ اکثرمقامات پروہی الفاظ دہرادئیےگئےہیں۔‘‘ (۱۶)

}٭٭٭٭٭{

حوالہجات:

۱)۔ طاہرہ مسعود؛بادِصبا (لاہور : انہماک انٹرنیشنل پبلیکیشنز، طبع اول،اکتوبر۲۰۱۷ء)،ص۵۲۔

۲)۔ تنویراحمدعلوی،ڈاکٹر؛ (مرتب) ،کلیات ِ ذوق (لاہور : مجلس ترقی ادب،طباعتِ دوم،فروری۲۰۰۹ء)،ص۱۷۰۔

3)۔ شیرانی،حافظ محمود؛ مقالات ِحافظ محمودشیرانی،جلدسوم،مرتبہ،مظہرمحمودشیرانی (لاہور : مجلس ترقی ادب،طبع اول،جولائی۱۹۶۹ء)،ص۱۱۹۔

۴)۔ عابدپشاوری،ڈاکٹر؛ذوق ؔاورمحمدحسین آزادؔ (نئی دہلی : ادارہ فکرِجدید،۱۹۸۷ء)،ص۱۳۳۔

۵)۔ تنویراحمدعلوی،ڈاکٹر؛ (مرتب) ،کلیات ِ ذوق،محولابالا،ص۵۱۔

۶)۔ کیفی،پنڈت برج موہن دتاتریہ؛ مقدمہ،مشمولہ،انتخاب ِ ذوق ؔوظفرؔ،مرتبہ،مولوی عبدالحق (دہلی: انجمن ترقی اُردو (ہند)،۱۹۴۵ء)،ص۷۔

۷)۔ خضرسلطان،رانا؛ (مرتب)،کلیات ِذوق (لاہور : بکٹاک،۲۰۱۳ء)،ص۱۳۵۔

۸)۔ مخمورسعیدی؛مونوگرافشیخمحمدابراہیمذوقؔ (دہلی : اُردواکادمی،۲۰۰۸ء)،ص۲۵۔

۹)۔ دہلوی،مولوی محمدحسین آزادؔ؛ (مرتب)،دیوان ذوق (دہلی : محبوب المطابع دہلی،۱۹۳۳ء)،ص۱۔

۱0)۔ ایضاََ،ص۱۔

۱۱)۔ ایضاََ،ص۲۔

۱۲)۔ تنویراحمدعلوی،ڈاکٹر؛ (مرتب) ،کلیات ِ ذوق،محولابالا،ص۵۴۔

۱۳)۔ دہلوی،مولوی محمدحسین آزادؔ؛ (مرتب)،دیوان ذوق،محولابالا،ص۴۔

۱۴)۔ آزادؔ،محمدحسین؛آب حیات (لاہور : خزینہ علم وادب،۲۰۰۱ء)،ص۳۸۷۔

۱۵)۔ دہلوی،مولوی محمدحسین آزادؔ؛ (مرتب)،دیوان ذوق،محولابالا،ص۲۔

۱۶)۔ محمدضیاءالدین انصاری،ڈاکٹر؛مطالعاتِ ذوقؔ کاتنقیدی جائزہ،مشمولہ،ذوق ؔدہلوی ایک مطالعہ،مرتبہ،شاہدماہلی (نئی دہلی : غالب انسٹی ٹیوٹ، ۲۰۰۰ء)،ص۸۷۔

عمیرؔ یاسرشاہین

پی۔ایچ۔ڈی (اسکالر)

شعبہ اُردو،یونی ورسٹی آف سرگودھا،سرگودھا

0303.7090395

umairyasirshaheen@gmail.com

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)

ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔

’’دیوانِ ذوق‘‘ؔ مرتبہ آزادؔ ایک جائزہ – عمیر یاسر شاہین

ہندوستانی ادب کے معمار تھے پریم چند

مسلم یونی ورسٹی علی گڑھ کی سابق طالبات کی تقریب

یہ بھی پڑھیں