اکیسویں صدی میں اردو کی کہانی – ڈاکٹر درخشاں

اکیسویں صدی جدیدسائنس اور ٹیکنا لوجی کا زمانہ ہے ۔اس عہدمیں شعبہ زندگی میں نئے نئے انکشافات نے انسان کو بہت سی چیزوں سے روشناس کرایا ہے جس کے ذریعے انسان کہاں سے کہاں پہنچ گیا۔ان تمام چیزوں کو متعارف کرانے کے لیے کسی وسیلے کی ضرورت پڑتی ہے وہ ذریعہ یا تر سیل زبان کہلاتی ہے۔ زبان دراصل خیا لات کا ذریعہ اظہار ہے۔ اس کا کام لفظوں اور فقروں کے ذریعے انسانوں کے خیا لات کی ترجمانی کرنا ہے۔زبان اور انسانی خیالات کا تعلق چو لی دامن کا سمجھا جاتا ہے۔کیونکہ زبان ایک ایسا آئینہ ہے جس میں کسی قوم یا ملک کے افکار وخیا لات ،تہذیب ومعاشرت اور عقائدو نظریات کے عکس اجاگر ہو تے ہیں۔ یہی وجہ ہے کہ انسان کی زندگی میں ہرزبان کی اپنی انفر دیت ہے زبان چو نکہ ہمیں اپنے ماضی سے روشناس کراتی ہے اس کے وسیلے سے ہم اپنے مستقبل کو بھی تا بناک بنا سکتے ہیں۔اس لیے ہمیں اپنی شیریں زبان اردو کو اہمیت دینی چاہیے کیو نکہ یہ اکیسویں صدی کا تقاضا اور ضرورت ہے۔

اردو سماجی تقاضوں اور عوام کی ضرورتوں کے تحت وجود میں آئی یہ مختلف تاریخی حالات سے اثراندازہوتی ہو ئی ارتقا کی طرف بڑھتی رہی۔کبھی اسے ہندوی یا ہندی کہاگیا۔کبھی دہلوی یا ریختہ کے نام سے پکاری گئی توکبھی اردوئے معلی کی حیثیت سے امرا ء و ادبامیں متعا رف ہو ئی۔ بہت سی دشواریوں سے گزرتے ہو ئے اردو نام سے مشہورومقبول ہو ئی۔اس کے زبان و ادب کا دائرہ ابتدامیں تومحدود رہا مگر جیسے جیسے آگے بڑھتی گئی مقبول عام و خاص ہو تی چلی گئی۔

اردو زبان ہندوستان میں پلی بڑھی اس و جہ سے اس پر بہت سی تہذیب و ثقافت کا اثر پڑا زبان کی تہذیب و ثقافت کی بات جب ہم کر تے ہیں تو یہ جاننا ضروری ہوجا تاہے کہ اس کا تعلق زبان سے زیادہ اس کے بولنے والوں، ما حول ، روز مرہ کی زند گی ، مذہب وعقائداوررسم و رواج سے ہوتا ہے ان تمام چیزوں سے مل کر ہی زبان کی اپنی تہذیب وجود میں آتی ہے۔اردو پر زیادہ تر اسلامی اورہندوستانی تہذیب کے اثرات دیکھے جا سکتے ہیں۔ہندوستانی تہذیب سے مراد وہ تہذیب ہے جس میں تمام مذاہب کی مشترکہ تہذیبیں شامل ہوں۔پاکستان جب وجودمیں آیاتواردونے وہاں اپنامسکن بنایا۔اورنئے اندازمیں وہاں روشناس ہوئی اور اس میں پنجابی، سندھی، گجراتی ،سر حدی اوربنگالی زبانوں کے بولنے والوں کی تہذیب بھی شامل ہوتی گئی۔اور جب ہندو پا ک سے نکل کر اردو مغربی ممالک میں داخل ہوئی تو ان ممالک کا کلچر بھی اس میں آتا گیا۔اس لیے اردو کو محض مسلمانوں کی زبان کہہ دینادرست نہیں ہے۔کیونکہ اس میں دنیا کے ہر کلچر کو اپنے اندر سمو لینے کی وسعت پا ئی جاتی ہے۔اسی وجہ سے تر کی کے ڈاکٹر خلیل طوقار نے اردو زبان کو’ بین الاقوامی،بین  التہذیبی،بین اللسانی اوربین المذہبی‘ کہا ہے۔

اردو کونو صوبوں میں دوسری سر کاری زبان کا درجہ حاصل ہے مگراس کے با وجود اس کو وہ اہمیت نہ مل سکی جس کی یہ مستحق ہے ۔حالانکہ ہندوپاک کے سنیما سے لیکر عام بول چال تک بظاہر اردو زبان کا ہی راج نظر آتا ہے ۔مگر افسوس اس بات کا ہے کہ اس کو حاشیے پر دھکیل دیا گیا ہے۔ آج جس ہندی کو ہم جانتے اور پڑھتے ہیں وہ بھی دراصل اردو کے بطن سے ہی وجود میں آئی ہے۔پچھلی دو تین دہائیوں سے اردو دانشوروں کے درمیان مسلسل یہ بحث جاری وساری ہے کہ ’زبان اردو اپنا وجود کھو تی جا رہی ہے۔‘یہ بات کا فی حد تک سچ بھی ہے کیو نکہ زبانیں اس وقت تک زندہ رہ سکتی ہیںجب اس میں روزگار کے مواقع بھی فرا ہم کیے جائیں۔پا لی ،سنسکرت اورفارسی کا وجود ختم ہونے کے پیچھے بھی یہی وجو ہات کا ر فرماں رہیں۔لیکن اردو زبان کو ایک بڑا خمیازہ ہندوستان کی آزادی کی صورت میں بھی بھگتنا پڑا۔کیونکہ ملک کے بٹوارے کے بعد اردو کو مسلمانوں کی زبان کہہ کر محدود کر دیا گیا۔تقسم ہند ایک ایسا سانحہ ہے جس میں اردو داں اور ہندوستانی مسلمانوں کو دوہرے نقصان سے دو چار ہو نا پڑا ایک طرف اردو کو تقسم ہند اور پا کستان سے وابستہ کر دیا گیا تو دوسری طرف ہندوستان کے اسکول کے نظامِ تعلیم میں اردو کے لیے مواقع مسدود کر دیے گئے اور اس زبان و ادب پرپے در پے ایسے حملے کیے گئے جس سے اس کا وجود خطرے میں پڑ گیا۔ میر و غالب کی شیریں و دلکش زبان کے دیوانے بہت تھے مگر اس کی بقا کے لیے چند لو گوں کو چھوڑ کر باقی تماشائی بنے رہے۔ اردو سے بے اعتنائی کا یہ عالم رہا کہ حکومت نے اردو کی ترقی وترویج کی طرف سے نظریں پھیر لی ۔اتر پردیش کے مسلمانوں نے اردو زبان کے تحفظ اور اپنی مذہبی تعلیم کے فروغ کے لیے دینی مدارس قائم کیے ۔ان مدارس کے ذریعے مسلمانوں نے اس وقت اردو کو فروغ دینے کا ارادہ کیا جب انھیں یہ احساس ہو گیا کہ حکو مت اردو کے لیے کو ئی قدم نہیں اٹھا ئے گی۔مگر ان مدارس کی تعلیم بھی اردو کی بقا کے لیے تسلی بحش نہیں سمجھی جاسکتی کیونکہ مدارس میں جس اردو کا استعمال ہو تا ہے وہ مذہبی اردو ہو تی ہے۔جوعربی وفارسی کی اصطلاحات اور عربی مخارج سے گراں بارہوتی ہے۔اس اردو کو ذریعہ تعلیم بنانا دراصل مدارس کی مجبوری ہے۔کیونکہ عربی و فارسی زبان میں تعلیم دینے والے اساتذہ اب نایاب نہیں تو کمیاب ضرور ہو گئے ہیں ۔

اردوکے لیے سب سے افسوس ناک پہلو یہ ہے کہ ان ریاستوں میں جہاں اردو دوسری سر کا ری زبان ہے وہاں اردو کے ابتدائی اسکول اردو ذریعہ تعلیم کے تحت  نہیں ہیں۔حد تو یہ ہے کہ ان ریا ستوں میں مقابلہ جا تی امتحانات کا ذریعہ یا تو ہندی ہو تا ہے یا انگریزی اس و جہ سے اردو کے طلبا کو بہت سی دشوایوں کا سامنا کر ناپڑتا ہے ۔ بہرکیف دیگر ریاستوں کے مقابلے دہلی میں بہت سے اردو کے ادارے اس کی تر قی و ترویج میں لگے ہوئے ہیں۔مگر اس کے باوجود وہ پوری طرح کامیاب نہیں ہوئے ہیں کیو نکہ اردو پڑھنے والوں کی تعداد دن بدن گھٹتی جا رہی ہے۔آج یہ صورت حال ہے کہ اردو داں بھی اردو کے اخباروسائل خریدنے میں دلچسپی نہیں رکھتے ۔اردو سے بے اعتنائی کا یہ عالم ہے کہ سڑکوں اوردکانوں کے بینرز پر اردو رسم الخط تک نظر نہیں آتے۔کچھ بڑے شہروں کو چھوڑ کر اردو اور اس کی تہذیبی شناخت معدوم ہو تی جارہی ہے۔ایک خوش کن بات یہ ہے کہ برصغیرسے با ہرکے ممالک  میں کچھ لوگ اردو کی بقا کے لیے فکرمندہیں۔وہ مختلف انجمنیں اور مشاعروں کے ذریعے اپنے کام میں لگے ہو ئے ہیں۔مگر ہم محض ان پر سر تکیہ نہیں کر سکتے کیونکہ وہ اردو کا رسم الخط تبدیل کر نے کی بات کر رہے ہیں۔وہ اردو کو رومن میں اس لیے تبدیل کر نا چاہتے ہیں تا کہ نئی نسل اس میں دلچسی لے سکے پروفیسر سید محمود الحسن اپنے ایک مضمون میں لکھتے ہیں:

’’بر طانیہ میں بر صغیر سے جانے والوں کی بڑی تعدادنے یہ تحریک چلائی کہ اردو کا رسم الخط تبدیل کر کے اسے رومن کے ذریعہ اظہار خیال کا ذریعہ بنا دیا جا ئے اس پر برابربحث جاری ہے۔بر طانیہ کے اردو رسائل اور اخبارات میں لوگوں کے اپنے خیا لات کا اظہار ،اس کی موافقت اور مخالفت میں کیا۔ہندوستان کے ادیبوں نے بھی اس بحث میں حصہ لیا۔ خود راقم الحروف کا خیال ہے کہ یہ نظریہ مفید نہیں ہو سکتا۔دوسرے بعض حروف ،س،ص،ز،ذ،ض کے استعمال سے معنوں میں جو فرق پیدا ہو جا تا ہے اس کی وضاحت ممکن نہ ہو گی۔‘‘(اکیسویںصدی میں اردو فروغ اور امکان،ص۱۷)

ظا ہر ہے ہر زبان کے اپنے تقاضے ہو تے ہیں جس کے تحت تمام حروف وجود میں آتے ہیں اگر ان حروف کی صوتیات کو دوسری زبان میں ادا کرنے کی کو شش کی جا ئے گی تو بہت سی دشواریاں آڑے آئیں گی۔مگر یہ لوگ اردو کی بقا اور نوجوان نسل کی سہولت اور انگریزیت پسندی کے باعث اردو کو رومن رسم الخط میں تبدیل کر نے کی بات کر نے پر مجبور ہیں۔ میر ے خیال سے یہ اردو کے ساتھ ناانصافی ہے اس طرح اس کا وجود ختم ہو جا ئے گا ۔

آج انسانوں کے روزگار کے تمام مسائل اور وسائل انگریزی زبان سے وابستہ ہو گئے ہیں بین الاقوامی تجا رت اور تعلیم زیادہ تر اسی زبان میں ہو تی ہے اور دنیا کا ہر ملک خواہ و ہ فرانس،روس اور چین ہی کیوں نہ ہو اس زبان کو سیکھنے پر مجبور ہے۔انگریزی کو علمی اور ادبی سطح پر اب وہ حیثیت حاصل ہے جو قرون وسطی میں عربی کو حاصل تھی یا اس سے پہلے یونانی کو حا صل تھی۔اب ایسے حالات میں کو ئی کیوں اردو سیکھنا یا پڑھنا چاہے گا جبکہ اس میں روزگار کے راستے بھی محدود ہوں آج ہم روز مرہ کی زندگی میں زیادہ سے زیادہ انگریزی کو قبول کر تے چلے جا رہے ہیں پچھلے پچاس بر سوں میں جو تبدیلیاں ہمارے معا شرے میں آئی ہیں۔اس نے سب کچھ بدل کر رکھ دیا ہے۔ اگر ہم اپنا احتساب کریں توہمیں اندازہ ہوگا کہ ہم پو رے نہیں تو آدھے انگریز ضرور بن چکے ہیں۔بے شمار سہولتیں ایسی ہیں جن کے بغیر ہم ایک لمحہ بھی نہیں گزار سکتے جس کا تعلق سائنس اور ٹیکنالوجی سے ہے اور ان تمام چیزوں کی تعلیم اردو زبان میں بہر حال نہیں دی جا رہی ہے بلکہ انگریزی زبان میں دی جاتی ہے ان مسائل کے لیے حکومت کے علاوہ خود اردو والے بھی ذمہ د ار ہیں ۔اب یہ احساس عام ہو رہا ہے کہ اردو پڑھنے سے کو ئی فا ئدہ نہیں ہے۔اسکولوں میں اردو کی تعلیم کی طرف توجہ نہیں دی جاتی اردو اساتذہ بھی اپنی ذمہ داریوں سے نظر چراتے نظر آتے ہیں۔ایسے حالات میں بھلا ہم اردو کی ترقی و ترویج کی امیدیں کیسے لگا سکتے ہیں۔مگر زیادہ ما یوس ہونے کی ضرورت نہیں ہے ۔ یہ اکیسویں صدی ہے جس کی سب سے بڑی ضرورت کمپیو ٹرہے اوراردو والوں کے لیے بھی اس میں بہت سے مواقع فراہم کیے گئے ہیں اس میں اردواداروں کے بے شمار ویب سائٹس ہیں جن پر ان اداروں کے مقاصداور کاروائیوں کے متعلق معلومات کا ذخیرہ بھرا پڑا ہواہے ۔ اردوکے پاس ایسے گیجٹس ہیں جس سے ہرکوئی با آسانی انٹر نیٹ پر سیر کر سکتا ہے۔بہت سے سرچ انجنس بھی ہیں اس کے علاوہ یونی کوڈ سسٹم بھی موجودہے جو مختلف زبان والوں کے لیے ایک قیمتی تحفہ ہے۔گو گل ان پٹ ٹولزاوراردو فونٹس بھی کا فی بہتر شکل میں دستیاب ہیں۔اس کے علاوہ نیٹ پر آن لائن اردو کتب خانے بھی بے شمار ملتے ہیں جو اردو کی خدمت کے لیے کھو لے گئے ہیں۔آن لا ئن ڈیجٹل کتب خانے بھی مہیا کیے گئے ہیں۔کئی موضوعات پر مواد بھرا پڑا ہواہے جو لوگوں کی تو جہ کا طا لب ہے مگر لاعلمی کے باعث عام طور پر لوگوں کی توجہ اس طرف  نہیں جاتی۔انٹرنیٹ پر ابھی ہائپر لنک،اور اسپیچ انٹر فیس کی کمی دیکھی جا سکتی ہے اس کے متعلق محمدآصف زہری اپنے ایک مضمون میں رقمطراز ہیں:

’’آن لا ئن،سیال صورت میں ہائپرلنک اور اسپیچ انٹر فیس کے ساتھ ہمارا ادبی سرمایہ تقریباصفر ہے۔ کل ملا کر ایک آدھ آدھی ادھوری لغت مذکورہ صورت میں موجود ہے۔اس کے علاوہ کہنے کو تو بے شمار کتا بیں آن لائن دستیاب ہیں لیکن یا تو پی ڈی ایف فارمیٹ (PDF Format)میں ہیں یا پھر ان کا عکس لے کر Scanned) (ویب سا ئٹ((Web siteپر ڈال دیا گیا ہے۔ادھر گزشتہ چندبرسوں میں شائع ہونے والی کتابوں سے آن لائن استفادہ کیا جا سکتا ہے۔لیکن قدیم اور کلاسیکل کتا بیں یا تو سرے سے موجود ہی نہیں ہیں یا پھر بقول حالی’’ ہونے سے ان کا نہ ہو نا ہے بہتر‘‘ کے مصداق ،ان کو پڑھنا اور سمجھنا ایک دشوار گزارعمل ہے۔‘‘ (اکیسویں صدی میں اردو فروغ اور امکان،ص۶۲)

اردو کے فروغ کے لیے اردوداں کو سنجیدگی سے توجہ کر نے کی ضرورت ہے۔کیونکہ جدید دور کے مطا بق اردو زبان و ادب کو ڈھا لنا اشد ضروری ہے۔جب ہی اردو کا مستقبل تابناک بنا یا جاسکتا ہے۔

کتا بیں

٭      اردو میں لسانی تحقیق،پروفیسر عبدالستار دلوی،قومی کو نسل برائے فروغ اردوزبان نئی دہلی،۲۰۱۵

٭      اکیسویں صدی میں اردو فروغ اور امکان،مرتب،پروفیسر خواجہ اکرام الدین، قومی کونسل برائے فروغ اردو زبان،نئی دہلی،۲۰۱۴

٭      زبان اور علم زبان،پروفیسرعبدالقادرسروری،مجلس تحقیقات اردو،حیدرآباد,دکن،۱۹۷۰