فرد اور معاشرہ فنونِ لطیفہ سے مربوط رشتہ رکھتے ہیں بلکہ فنونِ لطیفہ اور زندگی و معاشرتی نظام لازم و ملزوم ہیں۔ فنونِ لطیفہ بشمول شعر و ادب گاہے ان سے متحرک ہوتے ہیں، گاہے فرد و معاشرہ کی رہنمائی کرتے ہیں۔ دورِ جمہور جن میلانات و رجحانات کے ساتھ رواں دواں ہے اس تناظر میں کہا جاسکتا ہے کہ فنونِ لطیفہ اور دیگر تمام تخلیقات و معروضات عوامی خیالات و جذبات اور محسوسات کی ترجمانی سے نئی انگڑائیاں لے رہے ہیں۔ آج فنونِ لطیفہ کے حصار، خواص سے پھیلتے ہوئے عوام تک پہنچ گئے ہیں لہٰذا تخلیقات کے موضوعات اور تکنیک متنوع ہونے کے ساتھ انقلابی تبدیلیوں سے ہمکنار ہیں۔ یہ حقیقت ہے کہ جب نابغہ روزگار فنکار و قلم کار اور ناقدین نظریہ سازی کے عمل سے گزرتے ہیں تو ماحولیاتِ انسانی فلاح و بہبود پاتے ہیں اور معاشرتی نظام ترقی پسندانہ اقدام کے حامل بنتے ہیں جن کے دائمی اثرات فرد و معاشرے پر مرتب ہوتے ہیں۔ظاہر ہے ایسے ذہین اور شائستہ و ارفع دماغ افراد معدودے چند ہوتے ہیں جن کے تصورات و افکار خواص و عوام سے بالاتر ہوتے ہیں اور ان ہی کی کاوشوں سے پوری انسانی برادری اور سماج (چاہے وہ جس میدان میں کارنامہ انجام دیں) مستفیض ہوتے ہیں۔ نتیجتاً جب بھی معاشرتی نظام ایک نئی کروٹ لیتے ہیں تو نیا منظر نامہ اُبھرکر سامنے آتا ہے۔ یہ بھی حقیقت ہے کہ ایک آزاد معاشرتی نظام میں ہی جذبات و خیالات اور تصورات کو نشو ونما پانے اور اس پر عمل درآمد کے بہترین مواقع میسر آتے ہیں۔یہی وجہ ہے کہ جیسے جیسے نئے نئے تصورات کی توسیع ہوئی، عوام میں نئی بصیرت کا ظہور ہوا اور دھیرے دھیرے نظامِ شاہی اپنا بستر لپیٹنے لگا جو شخصیت پرستی، خودغرضی اور استحصال پر مبنی تھا اور جمہوری نظام کا سورج نصف النہار پر جلوہ فگن ہوا۔ پھر نابغہئ روزگار ہستیوں کے افکار و تصورات کے جوہر کھل کر سامنے آگئے۔ نئے نئے ایجادات، افکار و نظریات نے پوری دنیا کو نئی تہذیب کا چولا پہنایا اور ایک ہی صف میں محمود و ایاز آراستہ نظر آنے لگے۔ (یہ بھی پڑھیں غضنفر کا افسانہ’سرسوتی اسنان‘ کا تجزیاتی مطالعہ – پروفیسر (ڈاکٹر) عبدُ البرکات )
معاشرتی نظام، جغرافیائی حالات اور معاشی و سیاسی صورتِ حال کے اثرات؛ نہ صرف انسان کے جسمانی ساخت، حالات و معاملات پر پڑتے ہیں جس سے طرزِ زندگی کا تعیّن ہوتا ہے بلکہ انسانی خصائل بھی متاثر ہوتے ہیں اور آدمی کے اشکال، لسان اور لباس و اطوار میں نمایاں تفریق رونماہوتا ہے۔تاہم انسانی اقدار اور انسانیت آمیز امور میں کوئی تغیر و تبدل نہیں ہوتا۔کیوں کہ انسانیت بھی روح کی طرح لطیف و شفاف ہوتی ہے جس پر خارجی دباؤ کے اثرات بہت کم ہوتے ہیں اور اس کی بنیادی قدروں میں بھی یکسانیت پائی جاتی ہے۔ طرزِ فکر، اندازِ احساس و جذبات، دکھ، غم، خوشی یکساں اور بھوک و پیاس کی شدت میں مماثلت بنیادی انسانی اقدار ہیں۔ چاہے انسان زمین کے کسی بھی خطہ میں رہے اور کسی بھی حالت میں رہے، ہر علاقہ، نسل اور مذہب کے افراد میں یہ قدریں موجود ہوتی ہیں۔ ترحم، خوشی، غم، افسوس، مسرت وغیرہ لطیف جذبات و محسوسات ایک آدمی کو دوسرے آدمی سے جوڑتے ہیں۔ خواجہ میردردؔ کا کہنا ہے:
دردِ دل کے واسطے پیدا کیا انسان کو
ورنہ طاعت کے لیے کچھ کم نہ تھے کرّ و بیاں
اس تناظر میں علاقائی ادب اور عوامی ادب جمہوری دَور کا مقتضی ہے کیوں کہ ہر خطہ یا علاقہ اپنی بولی اور زبان کا متحمل ہوتا ہے جس میں ان کی تہذیب و ثقافت جلوہ گر ہوتی ہے اور اس علاقہ کے افراد کی سوچ، طرزِ زندگی اور اندازِ فکر کی بہتات ہوتی ہے جو اُن کی تحریروں میں نمایاں ہوتی ہے۔ غالباً اسی لیے مابعد جدیدیت نے علاقائیت کو اساس بنایا ہے اور فرد کی اہمیت و افادیت کو اپنی فکر کا محور گردانا ہے کہ انسان خواہ کسی خطہ، علاقہ اور قوم و نسل کا ہو، اس کی انفرادیت اور اہمیت کو نظرانداز نہیں کیا جاسکتا ہے اور یہ اس وقت ممکن ہے جب جمہوری نظام کا نفاذ مکمل طور پر ہو، کیوں کہ جمہوریت ختم ہونے کے بعد دہشت کا راج قائم ہوجاتا ہے لہٰذا انسانیت کی بقا کے لیے اس زمین پر جمہوری نظام ناگزیر ہے۔ اس صورتِ حال میں ہی انصاف ممکن ہے۔ (یہ بھی پڑھیں کلیم عاجزؔ کی شاعرانہ مقبولیت کے اسباب – پروفیسر عبدُ البرکات )
ادبِ عالیہ کی تخلیق اس وقت ممکن ہوتی ہے جب منجملہ انسان کی مسرت و انبساط، محبت و الفت، غم و الم، دکھ درد، کامیابی و ناکامی الغرض نیز سماج کے مجبور سے مجبور انسان کی بھی حوصلہ افزائی کی جائے تاکہ آدمیوں کے دمیان کی تفریق ختم کی جاسکے اور ان میں ایک دوسرے کے لیے احترام کا جذبہ پیدا ہو؛ کیوں کہ ادب کا دائرہ بہت وسیع ہوتا ہے اور اس کی ذمہ داریاں بھی عظیم ہیں۔ درحقیقت ادبِ عالیہ اعلیٰ ترین دماغ کی کاوش ہوتا ہے، غالباً اسی لیے 1950 کے نوبل انعام کی ایک تقریب میں ولیم فالکنر نے اپنی تقریر میں کہا تھا جس کا اردو ترجمہ محمد اسلم نے کیا ہے:
”یہ اعزاز شاعر و ادیب کا ہے کہ وہ انسان کے حوصلے بڑھاکر اُسے دکھ برداشت کرلینے میں مدد دے اور اس کے دِل میں جرأت اور احترام اور امید اور پندار اور احساس اور رحم اور ایثار کی یاد تازہ کرتا رہے۔ یہی تو وہ چیزیں ہیں جن کی بدولت اس کا ماضی اب بھی تابناک ہے۔ شاعر کی آواز کے لیے یہ چنداں ضروری نہیں کہ وہ انسان کی محض روداد ہو بلکہ یہ آواز تو انسان تحمل و برداشت کے علاوہ مشکلات پر غالب آنے پر بھی اُبھار سکتی ہے۔“(ترجمہ محمد اسلم)
(بحوالہ روزنامہ’انقلاب‘ 19اپریل 2020، سنڈے، ص6)
دراصل 1917 کے انقلابِ روس نے زارشاہی کا تختہ پلٹ کر سارے ایشیا کی محکوم قوموں میں عوامی جمہوریت کی نئی لہر دوڑا دی اور پوری دنیا کے لیے ایک جمہوری طرزِ حکومت کے دروازے کھول دیئے۔ رفتہ رفتہ دنیا کے تقریباً تمام ممالک میں بالواسطہ یا بلاواسطہ جمہوری طرزِ حکومت قائم ہوگئی جس کے تناظر میں ادب اور فنونِ لطیفہ کے مقاصد اور افادیت پر از سرِ نو غور و فکر کیا جانے لگا اور ترقی پسندانہ رجحان عام ہونے لگا۔ ادب میں بھی خرد افروزی اور معروضی طریقہئ کار فروغ پانے لگا۔ شعرا، ادبا؛ عوامی مسائل اور ان کی کشمکشِ حیات میں ’حسن کی معراج‘ دیکھنے لگے۔ معاشرتی زندگی میں آپسی ہم آہنگی پروان چڑھنے لگا۔ لہٰذا رابندر ناتھ ٹیگور نے قلم کاروں کو پیغام دیا کہ:
”ادیبوں کو انسانوں سے مل کر انھیں پہچاننا چاہیے۔میری طرح گوشہ نشیں رہ کر ان کا کام نہیں چل سکتا۔میں ایک مدت تک سماج سے الگ رہ کر اپنی ریاضت میں جو غلطی کی ہے اَب میں اسے سمجھ گیا ہوں۔ اور یہی وجہ ہے کہ آج یہ نصیحت کر رہا ہوں۔ میرے شعور کا تقاضہ ہے کہ انسانیت اور سماج سے محبت کرنا چاہیے۔ اگر ادب انسانیت سے ہم آہنگ نہ ہوا تو وہ ناکام و نامراد رہے گا۔ یہ حقیقت میرے دل میں چراغ کی طرح روشن ہے اور کوئی استدلال اسے بجھا نہیں سکتا۔“ (بحوالہ”ترقی پسند تحریک اور اردو کا ظریفانہ ادب“ڈاکٹر عبد البرکات، ص45، 2019ء) (یہ بھی پڑھیں نقشِ ماضی:شیخ الاسلام مفتی عبد الہادی خان صاحب کانَ اللہ لہ‘ – فرید سعیدی )
اس طرح ترقی پسند تحریک کے زیر اثر ادبا، شعرا اور قلمکاروں نے اپنی توجہ عوامی زندگی اور معاشرتی معاملات و مسائل کی طرف مبذول کی جس سے ادب کا کینوس وسیع ہوتا گیا۔ ترقی پسند تحریک کا سب سے بڑا کارنامہ یہ ہے کہ اس نے ادب کا رُخ خواص کے ساتھ عوام کی طرف بھی موڑ دیا جس کے طفیل فرد و معاشرے کے مسائل ضبطِ تحریر میں آنے لگے۔ اسی طرح مابعد جدیدیت نے ادب کو علاقائی معاملات و مسائل اور علاقائی زبان و تحریر کی طرف توجہ مبذول کرائی جس کی وجہ سے علاقائی زبانوں کے بہت سارے معتبر الفاظ اور ایسے محاورے و ضرب الامثال مرکزی ادب سے روبرو ہوئے جس سے انسان کے فکری میلان اور طرزِ زندگی کی صحیح عکاسی ہوتی ہے۔ نیز علاقائی تاریخ، تہذیب اور ثقافت؛ ادبی منظرنامہ پر اُبھرکر سامنے آنے لگے۔آج ہر علاقہ سے شاعر، ادیب اور قلم کار علاقائی زبان اور لب ولہجہ کے ساتھ ادبی افق پر نمودار ہورہے ہیں۔ ابتدائی ادب، رؤسا اور مخصوص افراد کے معاملات و مسائل اور طرزِ زندگی تک محدود تھا جس کو ترقی پسند تحریک نے خواص سے عوام تک وسیع کردیا جب کہ جمہوری ادب خواص سے عوام تک کے قلم کاروں اور فنکاروں کو اپنی حصہ داری کا متقاضی ہے جس سے مرکزی ادب کا دامن وسیع و متنوع ہوگا اور ادب کا دائرہ بھی وسیع سے وسیع تر ہوجائے گا لہٰذا سماج کے ترقی یافتہ افراد کے ساتھ عام عوام کے امور اور رموزِ معاملات جب ادب کے سانچے میں ڈھل جائیں تو میرے خیال سے ایسی تحریروں کو جمہوری ادب سے تعبیر کرسکتے ہیں۔ حقیقتاً کسی نظریہ کے تحت تخلیق ادب کی جستجو ممکن نہیں کیوں کہ انسانی دماغ سیمابی ہوتا ہے۔ بہت دنوں تک وہ ایک ہی حالت میں نہیں رہ سکتا۔ وہ نئے نئے شاخسانے نکالتا رہتا ہے جو فرد و معاشرے کے لیے تغیر و تبدل کا موجب بنتا ہے اور نظامِ زندگی کے ساتھ معاشرتی نظام پر بھی اثر انداز ہوتا ہے۔ ڈاکٹر انور سدید لکھتے ہیں:
”……انسان زیادہ لمبے عرصے تک یکسانیت اور یک رنگی کو قبول نہیں کرسکتا اور اس کے داخل میں تغیر کی آرزو خود بخود کلبلانے لگتی ہے۔ تغیر کی یہ خواہش بذاتِ خود اتنا بڑا محرک ہے کہ ارتقائے کائنات کے بیشتر زاویے اسی کے مرہونِ منت نظر آتے ہیں۔“(”اردو ادب کی تحریکیں: ڈاکٹر انور سدید۔ ص 27، اشاعت ہشتم 2013ء، انجمن ترقی اردو پاکستان)
اس تناظر میں ادبی نظریہ کا متاثر ہونا بھی لازمی ہے لیکن بہرصورت انسان اور انسانیت کی بقا سے قطعی انحراف نہیں کیا جاسکتا ہے کیوں کہ سنسار میں انسان ہی مرکزی حیثیت رکھتا ہے اور مرکز سے قطع تعلق کرکے کوئی بھی رجحان یا تحریک اپنا وجود برقرار نہیں رکھ سکتی، وہ کٹی پتنگ بن جائے گی جس کا زمیں بوس ہونا طے ہے۔ اسی اصول کے تحت بہت سارے رجحانات اور تحریکات مثلاً علی گڑھ تحریک، رومانی تحریک، ترقی پسند تحریک، ادب برائے ادب، ادب برائے زندگی، وجودیت، جدیدیت، تعمیریت، مابعد جدیدیت وغیرہ معرضِ وجود میں آتی رہی ہیں اور ان میں وہی تحریک مقبول و عزیز رہی ہے جس میں انسان اور اس کی بقا کو محور بنایا گیا ہے۔ (یہ بھی پڑھیں بیکل اُتساہی کی نعتیہ شاعری – امام الدین امامؔ )
اکیسویں صدی کے دوسرے عشرہ کی ابتدا میں ہی ایک عالمی مہلک وبامنظرِ عام پر آگئی اور دیکھتے ہی دیکھتے اس مہاماری نے تقریباً پوری دنیا پر اپنے سیاہ آنچل پھیلا دیئے۔ خواہ وہ ترقی یافتہ ممالک ہوں یا ترقی پذیر، ہر ملک سے اموات کی خبریں ٹیلی ویژن اور انٹرنیٹ کے توسط سے موصول ہونے لگیں۔خوف، ڈر، وحشت اور افسردگی کا ماحول پیدا ہوگیا۔ تمام ممالک کی حکومتوں نے اپنے ملک کے شہریوں اور اپنے یہاں مقیم افراد کے تحفظ کے پیشِ نظر گھروں سے باہر نکلنے پر پابندی عائد کردی کیوں کہ اس مہلک وبا جس کو ’کرونا وائرس‘ کے نام سے موسوم کیا گیا ہے، لاعلاج ثابت ہورہا ہے۔ اس سے بچنے کا واحد راستہ اس وبا سے متاثر افراد سے دوری اختیار کرنے کو قرار دیا گیا۔ لہٰذا سماجی فاصلہ (Social Distancing)پر عمل کرنے کا اعلان کرتے ہوئے دنیا کے تقریباً تمام ممالک نے تالہ بندی(Lockdown) اور ایمرجنسی نافذ کردیا۔ تمام سیاسی، سماجی، ادبی اور مذہبی سرگرمیوں پر مکمل پابندی لگادی گئی۔ بہرکیف! جب تمام عوام گھروں اور محفوظ مقام پر روپوش ہوگئے تو بڑی بڑی شاہراہیں، شہر، گلیاں، باغات اور پارک ویران و سنسان پڑگئے۔پھر سی سی ٹی وی کیمروں سے جنگلی جانوروں، حتیٰ کہ شیر، باگھ، ہرن اور ایسے جانور سڑکوں اور بازاروں میں گھومتے دیکھے جانے لگے جن کو کبھی چڑیاگھر میں بھی نہیں دیکھا گیا۔پورے عالم میں خوف اور بے چارگی کا ماحول پیدا ہوگیا اور انسانی زندگی تلف ہونے کا خطرہ لاحق ہوگیا، کیوں کہ جانور اس بیماری سے محفوظ تھے، آفت انسانوں پر رہی۔ پھر پوری دنیا نے اپنے اپنے ملک میں ایک ایک آدمی کو بچانے کی مہم شروع کردی۔ مذہب، ذات، جنس،نسل، علاقہ،غریب، امیر، مزدور، کسان، محنت کش یعنی ایک ایک فرد کی جان بلاتفریق بچانے کے لیے ہر ملک کی حکومتیں کوشاں ہوگئیں۔ پھر ”جان ہے تو جہان ہے“ کے نعرہ سے انسان جی اُٹھا، انسانیت کی بقا ہوئی اور آدمی کی اہمیت، افادیت، برتری، عظمت اور وقار عود کر آئی۔ یہ احساس عام ہوا کہ انسان سے بڑھ کر اس کرہئ ارض پر کوئی مخلوق یا اِزم نہیں ہے۔صدیوں پرانی سماجی بناوٹ چرمراگئی۔ نظامِ زندگی میں غیرمعمولی تغیر رونما ہوا، جس کی وجہ سے ایک نئی فضا تشکیل ہوئی اور ایک نیا سماجی منظرنامہ اُبھرکر سامنے آنے لگا جس کی واضح خط و خال ممکن ہے کچھ برسوں بعد اپنی شناخت قائم کرسکے۔اس وبا نے تقریباً پوری دنیا کو اپنی ترجیحات طے کرنے پر مجبور کردیا اس لیے ممتاز سیاستداں بھی علاقائیت، انفرادیت اور مقامیت پر ارتکاز کرنے کا اعلان کیا۔ ملک و قوم کی تعمیر میں سب کی حصہ داری پر زور دیا جانے لگا۔اس صورتِ حال میں جمہوری ادب کے تصور کا امکان مزید قوی ہوجاتا ہے۔ جمہوری ادب میں مندرجہ ذیل نکات کی جستجو کی جاسکتی ہے:۔
1) ایسی تخلیقات جن میں عوام کے جذبات، خیالات اور ان کی ترجیحات کو محور بنایا گیا ہو۔
(2) انسان اور انسانیت کو بہرحال مقدم رکھا گیا ہو۔
(3) دنیا کا سب سے بڑا عجوبہ انسان ہے کیوں کہ وہ دنیاوی عجائب کا خالق ہے اس لیے انسانی امکانات کو سائنٹفک نقطہ نظر سے دیکھا گیا ہو اور آدمی میں پوشیدہ قدرتی عطیات کو اُجاگر کرنے کی کوشش کی گئی ہو۔
(4) طبقاتی تفریق کے خاتمہ اور اعلیٰ سے ادنیٰ افراد تک کے معاملات، مسائل اور نفسیات کو ملحوظ رکھا گیا ہو۔
(5) مزدور، کسان اور محنت کش طبقہ تک ایسے افکار، خیالات اور مثالیں پہنچانے کی کوشش کی گئی ہو جس سے ان کی زندگی میں بھی خوشحالی آئے اور اس طبقہ کے ذہین افراد قومی دھارے سے جڑجائیں اور ان کی بستی اور سماج میں ترقی کی کرن پہنچ جائے۔
(6) علاقائی ادب اور عام عوام کی تاریخ، تہذیب اور ثقافت کو مرکزی ادب سے ہم آہنگ کرنے کی سعی ہو جس سے ادب کے دائرہئ کار میں اضافہ ہوگا، نیز نئے افکار و خیال سے ادب وقیع ہوگا۔
(7) مزدور، کسان اور محنت کش طبقے کی بول چال کی زبان، الفاظ اور محاورے کو ادبی انداز میں سلیقے سے برتا گیا ہو جس سے لسانی سطح پر ان طبقات کی اصلاح ہوسکے اور وہ تخلیقات سے محظوظ بھی ہوں۔ان کے یہاں بعض ایسے الفاظ ہیں جن کا بدل نہیں ہے مثلاً’اوٹ‘ کسی سواری یا ڈھلکتی ہوئی کسی چیز میں کوئی ٹکڑا لگاکر روک دینا۔
فنکار و قلم کار معاشرے کے حساس ترین افراد ہوتے ہیں، اس لیے تمام انسانوں سے ان کی وابستگی لازمی ہے۔ لوگوں کے چہرے اور معاشرتی نظام پر اُبھرنے والی لکیریں پڑھنا انھیں آتا ہے اس لیے ہر کس و ناکس کے جذبات و کیفیات کو وہ محسوس کرلیتے ہیں اور اپنی تخلیقات کا محور بناتے ہیں لہٰذا وارث علوی رقم طراز ہیں:۔
”سوائے انسانوں اور انسانی معاشرے کے فنکار کی وابستگی اور وفاداری کسی کے ساتھ نہیں ہوسکتی۔ انسانیت کی بنیادی قدریں، انسانوں کے بنیادی تقاضے اور عام زندگی کی سماجی اور سیاسی کشمکش سے لگاؤ پیدا کرکے ہی فنکار سیاسی اور آدرشی وابستگیوں کے ان گڑھوں سے محفوظ رہ سکتا ہے جن کے دلدل میں پھنس کر اس کا فن تو فن اس کی انسانیت تک غارت ہوجاتی ہے۔ بحیثیت انسان کے اس کا سروکار عام انسانوں کی زندگی سے ہے۔انسان، انسان کی فطرت، اس کی تمنائیں اور آرزوئیں، اس کی مایوسیاں اور محرومیاں، اس کے قہقہے اور اس کے آنسو، اس کے طربیے اور اس کے المیے، اس کے جبلتوں کے طوفان اور اس کی فطرت کی پُراسرار گپھائیں، اس کی نفسیاتی گتھیاں اور اس کے رومانی اور اخلاقی وسائل، اس کی تہذیبی اور معاشرتی روایتیں اور اس کی سیاسی و سماجی کشمش۔ یہ ہے فنکار کی جولانگاہ۔“
(بحوالہ روزنامہ”انقلاب“ 3/مئی 2020ء، ص5)
پروفیسر وارث علوی کے مذکورہ خیالات ادب کے حوالے سے جمہوری ادب کے تصور میں معاون و مددگار ہے۔ جمہور کا معنی عوام اور جمہوری ادب کا مطلب عوامی ادب، لیکن جمہوری ادب میں جو بلاغت اور معنویت مضمر ہے، وہ عوامی اور دلت ادب میں مفقود ہے۔لہٰذا اس سمت قلم کاروں و فنکاروں کو متوجہ ہونا چاہیے۔
٭٭٭
Prof. Abdul Barkat
H.O.D. Urdu
M.P. Sinha Science College,
Muzaffarpur (Bihar)
Mob.: 8210281400
(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)
| ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔ |
