اردو داستانوں کی عصری معنویت – پروفیسر عبدُ البرکات

داستانیں زبان و ادب کا، قابلِ قدر اثاثہ ہیں۔کثیر علم و ہنر اور عمدہ زبان و بیان سے اردو داستانیں آراستہ ہیں۔علاوہ ازیں اردو داستانوں کی عصری معنویت سے گریز، زبان و ادب کے لیے مناسب بھی نہیں ہے۔اس لیے کلیم الدین احمد، اردو داستانوں کی طرف متوجہ ہوئے۔ وہ مغربی و مشرقی شعر و ادب کی روایت و رجحانات سے اچھی طرح واقف تھے اور کسی فن پارے کا جائزہ لیتے وقت وسیع تناظر خصوصاً مغرب کی ادبی معیار اور فکر و فن کے تناظر میں دیکھنا چاہتے تھے۔کلیم الدین احمد کا طریقۂ نقد تحلیل و تجزیہ پر مبنی ہے۔ نیز فکر و فن کی کسوٹی پر پرکھنے کے بعد انھوںنے اپنی رائے قائم کی ہے۔وہ کسی کی بے جا حمایت نہیں کرتے، نہ ہی کسی فن کار کی اور نہ ہی فن پارے کی۔انھوں نے اردو شاعری اور اُردو تذکرے و تنقید کا دو ٹوک، بے باک اور تفصیلی تجزیہ کے بعد کھرے کھوٹے کو نمایاں کیاہے۔اسی طرح داستانوں پر بھی کلیم الدین احمد کا تجزیاتی مطالعہ اور تفہیم قابلِ ستائش ہے۔ ان کی کتاب’’اردو زبان اور فن داستان گوئی‘‘فکشن کی تنقید میں بے نظیر ہے۔اس کتاب سے تحریک پاکر بڑے قلم کار بھی داستانوں کی طرف متوجہ ہوئے۔اس کتاب میں کلیم الدین احمد نے کچھ منتخب داستانوں کا تنقیدی جائزہ لینے سے قبل فنِ داستان گوئی اور اس کی تکنیک سے بحث کی ہے۔عام طور پر پلاٹ، مواد، کردار نگاری،مافوق الفطرت عناصر کو داستان نگاری کے لیے اہم عناصرِ ترکیبی قرار دیا جاتاہے۔حقیقت یہ ہے کہ داستانوں میں قصّہ گوئی ہوتی ہے، پلاٹ نہیں ہوتا جیسا کہ ناول اور افسانے میں ہوتاہے۔

داستان میں بالکل آزادی اور فراخ دِلی سے دلچسپ قصّے بیان کیے جاتے ہیں۔ایک قصّہ کے کئی کئی ضمنی قصّے ہوتے ہیں اور تخیل کا گھوڑا سرپت دوڑتا چلا جاتا ہے، کہیں رُکاوٹ نہیں ہوتی جس سے فن کا رکو اپنی فکری جولانیاں دِکھانے کا بھرپور موقع ملتا ہے۔اس کے جوہر کھل کر سامنے آجاتے ہیں اس لیے عظیم ترین انسانی کارناموں میں سے ایک؛داستان گوئی کو بھی شمار کیا جائے گا۔کیوںکہ اس میں مطالعہ، مشاہدہ اور تخیل کا سمندر ٹھاٹھیں مارتا ملتا ہے جو غیرمعمولی ذہانت کی رہین ہے۔اس لیے کلیم الدین احمد داستانوں کی حمایت کرتے نظر آتے ہیں۔ان کے مطابق:

’’اردو افسانوں اور ناولوں کے مقابلہ میں داستانوں کا زیادہ قیمتی سرمایہ ہے۔یہ ہماری ناسمجھی ہے اور لاعلمی ہے کہ ہم اس قیمتی سرمایہ کی قدر و قیمت سے بالکل واقف نہیں اور اس کی طرف کچھ توجہ نہیں کرتے اور کم قیمت افسانوں اور غزلوں کا ڈھنڈورا پیٹتے ہیں۔واقعہ تو یہ ہے کہ داستانوں کا جو سرمایہ اُردو میں موجود ہے(جس میں بہت کچھ ایسا بھی ہے جس سے ہمیں سنی سنائی واقفیت بھی نہیں)یہ سرمایہ کسی دوسری زبان کی داستانوں کے مقابلہ میں بلاتامل پیش کیا جاسکتا ہے اور یہ بھی بلا تامل کہا جاسکتاہے کہ یہ کسی دوسری زبان کے سرمایہ کے مقابلہ میں ہیچ نہیں لیکن یہ تو اردو دنیا کا شیوہ ہے کہ اچھی چیزوں سے واقفیت نہیں اور کم قیمت چیزوں کی تشہیر کی جاتی ہے۔‘‘( ’’اردو زبان اور فنِ داستان گوئی‘‘ از کلیم الدین احمد۔ص۲۰۴۔۲۰۳۔ناشر:ادارہ فروغِ اردو، امین آباد پارک، لکھنؤ۔اشاعت ۱۹۷۷)

کلیم الدین احمد کا داستانوںکی حمایت کرنے اور اہمیت دینے کا پہلا سبب میرے خیال میں یہ ہے کہ داستانیں علوم و فنون کا خزانہ ہیں۔ داستانوں میں بہت سی حکایات اور واقعات علم و دانش کے چراغ روشن کرتے ہیں اور حکمت و دانائی کی باتوں سے داستانیں بھری پڑی ہیں۔ان میں ایسے ایسے حکیم ہیں جن کے علاج و معالجے کے طریقے حیرت زدہ کردیتے ہیں۔وہ مریض کے کپڑوں کی بُو سے بھی کامیاب علاج کرتے ہیں۔بہت سارے فنون ان کے وسیلے سے رائج ہیں بلکہ فنِ سپہ گری اور فوجی طور و اطوار میں داستانیں معاون رہی ہیں کیوںکہ یہ فنون ان میں اپنے کمال پر نظر آتے ہیں۔ عیاروںکے کارنامے آج کے خفیہ محکمہ کے مماثل ہیں۔ کلیم الدین احمد لکھتے ہیں:

’’خفیہ محکمہ اور اس کی کارروائیاں کوئی خیالی چیز نہیں یہ بھی ایک حربۂ جنگ ہے۔نہایت اہم اور کامیاب’’طلسم ہوش رُبا‘‘ میں بھی یہ محکمہ کارفرما ہے اور اپنی اہمیت، اپنے سارے سازو سامان کے ساتھ ۔فرق صرف یہ ہے کہ اسے خفیہ محکمہ نہیں کہتے۔اس کا نام عیّاری ہے اور اس محکمہ کے ارکان کو عیّار کہتے ہیں۔اس محکمہ’’عیاری‘‘ کے بانی اور سردار خواجہ عمرو ہیں اور اس کے اہم ارکان چالاک، برق، مہتر قرآن، جانسوز بن قرآن اور ضرغام ہیں۔عموماً ان عیاروں کی عیاری پر ہم ہنستے ہیں اور انھیں خیالی باتوں جن و پری کے افسانوں سے زیادہ اہمیت نہیں دیتے لیکن فنّی نقائص سے قطعِ نظر یہ عیاری کا سلسلہ موجودہ اقوام کے خفیہ محکموں سے کس قدر مشابہ ہے۔‘‘ ( ’’اردو زبان اور فنِ داستان گوئی‘‘ از کلیم الدین احمد ص۶۵۳)

اردو داستانوں کی حمایت کرنے کی دوسری وجہ کلیم الدین احمد کے نزدیک اس کا فن ہے۔ جہاں داستانوں میں مواد کا بکھراؤ، پلاٹ کا ڈھیلاپن، کرداروںکی مثالیت، جن، دیوی، پری وغیرہ کی شمولیت اور نہایت بلیغ چمچماتی زبان و بیان کو ناقدین نے داستان کی کمزوری قرار دیا ہے اور قصّہ کی بنیاد واقعیت اور حقیقت کے بجائے تخیل و تعلّی کو بنانے پر سخت اعتراض کیا ہے بلکہ اس کے مطالعہ کو تضیع اوقات بتایا ہے۔وہیں کلیم الدین احمدنے داستان گوئی کو ایک بہترین فن قرار دیا ہے کیوںکہ وہاں کوئی بندش نہیں ہے۔ قلم کار کو اپنے افکار کی حد متعین نہیں کرنا ہے جس طرح ناول یا افسانے میں ہوتا ہے۔ پلاٹ کے دائرے میں سوچنے کی پابندی ختم ہوجاتی ہے۔داستانوں میں ایک زندگی نہیں ایک زمانہ سامنے پھیلا ہوتا ہے اور زمانے کے تمام نشیب و فراز اور تہذیب و ثقافت اور ایک ملک کے بجائے کئی ممالک کے معاملات و مسائل داستانوں میں ڈھل جاتے ہیں جس کی وجہ سے مواد میں بکھراؤ آنا لازمی ہے۔ظاہر ہے اس پھیلاؤ کو ایک ذہین ترین فنکار ہی سنبھال سکتا ہے اور اس پھیلاؤ کو سنبھالنے اور دلچسپ بنانے میں مافوق الفطرت عناصرمعاون ہوتے ہیں۔

داستانوں میں جن، دیو اور پریاں انسانوں کی طرح فکر و عمل کرتے نظر آتے ہیں اور کلیم الدین احمد نے جن، دیو، پری، جادوگر وغیرہ کو انسانوں سے زیادہ ترقی یافتہ گردانا ہے، کیوں؟اور کیسے؟حقیقتاً کوئی فن کار یاقلم کار نہ تو جن، دیو، پری سے ملا ہے اور نہ ہی آج کے سائنسی دور میں اس کی توقع کی جاسکتی ہے پھر بھی ان مافوق الفطرت ہستیوں کے توسط سے ایسے ایسے واقعات تحریر کردینا کہ وہ حقیقی معلوم ہوں؛انسان کی قوتِ متخیّلہ کی دین ہے جس کو قدرت نے آدمی کو عطا کیاہے اور اس حقیقت سے انکار بھی نہیں کیا جاسکتا ہے کہ کائنات(Sphere)میں جو کچھ موجود ہے، انسانی تصور اس کی حد نہیں پار کرسکتا۔ابھی انسان اس مقام پر نظر نہیں آتا کہ کہہ اُٹھے’’اب کہاں تصور کا دوسرا قدم یارب۔۔۔‘‘کیوںکہ ابھی اس Sphere   (عالم) کے اسرار و رموز انسانوں پر آشکار ہوتا ہوا نظر نہیں آتا۔لہٰذا انسان نے جو کچھ بھی تصور کیا ہے اور غور و فکر کے بعد وہ عمل گاہوں سے گزرا تو ایسی ایسی ایجادات منظرِ عام پر آئی ہیں اور آرہی ہیں کہ خود انسان دم بخود ہے۔ کچھ داستانوی واقعات کو کلیم الدین احمد نے عصری تناظر میں پیش کیاہے جس کا مطالعہ قابلِ غور ہے اور دلچسپی سے خالی نہیں ہے۔ ملاحظہ فرمائیں:

’’آپ جادو کو ماننے کے لیے تیار نہیں تو جادو کا حقیقت و واقعیت کی روشنی میں مطالعہ کیجیے۔ جادوگر جادو کرتے ہیں تو سفید و سرخ، سیاہ یا زرد رنگ کے ابر نمودارہوتے ہیں اور ان سے کبھی تیر و خنجر برستے ہیں تو کبھی آگ برستی ہے۔ ایسی بوندیں پڑتی ہیں جن سے ہوش گم ہوجاتے ہیں یا جان کے لالے پڑجاتے ہیں۔آج طرح طرح کے ہوائی جہاز آسمان پر بادل کی طرح چھا جاتے ہیں اور کبھی پھٹنے والے گولے برساتے ہیں تو کبھی آگ یا کسی زہریلی گیس کی بارش کرتے ہیں۔ نتیجہ واحد ہے۔ جادوگر اپنے جادو سے ایک ایسا عفریت طلسمی اژدھا بناتے ہیں جو لوگوںکو کھاجاتا ہے اور کوئی حربہ اس پر اثر نہیں کرتا۔آج ٹینک عفریت طلسمی یا اژدہے سے خونخواری دِکھاتے ہیں۔ جادوگر ایسا گولہ پھینک مارتے ہیں جو مخالف کے سینے کے پار ہوجاتا ہے۔آج دستی بم اس سے زیادہ پُرزور ثابت ہوتے ہیں۔جادوگر اپنے یا اپنی فوج کے گرد ایک حصار کھینچ دیتے ہیں کہ ان کے دشمن اس حصار کے اندر نہ آسکیں۔آج ہم ’’مترنیولائن‘‘ بناتے ہیں۔ جادوگر اپنے سحر سے ایک طائر بناتے ہیں اور یہ طائر سحر سینکڑوں میل ایک لمحہ میں طے کرکے ضروری خبریں پہنچاتا ہے آج وائرلیس سے یہ کام لیا جاتا ہے۔طوالت مانع آتی ہے ورنہ اس قسم کی سینکڑوں مثالیں پیش کی جاسکتی ہیں۔ظاہر ہے کہ وہ تعجب خیز و ناقابلِ یقین باتیں جنھیں ہم خواب و خیال سے زیادہ نہیں سمجھتے تھے حقیقت میں تعجب خیز و ناقابلِ یقین نہیں۔یہ حیرت میں ڈالنے والے شعبدے اب شعبدے نہیں رہے۔سائنس کی معمولی ایجادیں ہیں۔ یعنی جن خیالی چیزوں کو اگلے مصنفین نے زورِ تخیل سے پیدا کیا تھا اور جو ہمیں استعجاب میں ڈالتی تھیں، انھیں سائنس نے واقعیت کا جامہ پہنادیا ہے۔ گویا ایک خواب تھا جو حقیقت سے بدل گیا ہے۔‘‘ ( ’’اردو زبان اور فنِ داستان گوئی‘‘ از کلیم الدین احمد۔ص۷۷۔۷۶)

کلیم الدین احمد نے تخیل و تعلّی پر مبنی داستانیں ’’طلسم ہوش رُبا‘‘، ’’بوستانِ خیال‘‘، ’’باغ وبہار‘‘، ’’آرائشِ محفل‘‘ اور ’’فسانۂ عجائب‘‘ کے ساتھ دو منظوم داستانیں’’مثنوی سحر البیان‘‘ اور ’’گلزارِ نسیم‘‘ کا نہایت سنجیدگی سے مطالعہ اور تحلیل و تجزیہ کیا ہے۔ ان کی تفہیم واضح اور داستانوںکے حوالے سے رائے دو ٹوک ہے اور وہ ان کی حمایت کرتے نظر آتے ہیں۔حقیقتاً داستانوں میں ایک عہد نہیں ایک زمانہ کی سرگرمیاں موجود ہیں۔ ایک فرد یا چند افراد کے بجائے پورے سماج کے لوگ  اور ان کی کارگزاریاں دکھائی دیتی ہیں جس کی وجہ سے کرداروں کی کثرت ملتی ہے اور ہر نوعیت کے کردار نظر آتے ہیں۔ہر پیشہ اور ہر ہنر کے کردار اپنے اوصاف کے ساتھ بحسن و خوبی اپنی ذمہ داریوں کو نبھاتے نظر آتے ہیں پھر بھی ناقدین کے ہدف بنتے ہیں کہ داستانوں میں مثالی کردار نگاری ملتی ہے۔دراصل داستانوں کے مرکزی کردار عموماً بادشاہ، شہزادے اور شہزادیاں ہوتی ہیں جن کے ظاہری اور باطنی اوصاف پر داستان گو خصوصی توجہ دیتا ہے۔ان کی شخصیت میں انسان کے سارے اخلاقی محاسن موجود ہیں نیز وہ بہت ساری غیبی قوتوں کے حامل بھی ہوتے ہیں جس کی وجہ سے ان کو پے در پے کامیابی و کامرانی بھی نصیب ہوتی ہے۔ غالباً داستان گو ان کے توسط سے پیغام دینا چاہتا ہے کہ اچھائی اور انسانیت نواز افراد کی زندگی خدمتِ خلق کے لیے ہوتی ہے اس لیے ان کے معاونین بھی بہت ساری خوبیوں سے مملو ہیں۔ نہ ختم ہونے والی داستان’’امیر حمزہ‘‘ کی ایک کڑی ’’طلسم ہوش رُبا‘‘کا ایک مطالعہ و تجزیہ بڑ ی سنجیدگی سے کلیم الدین احمد نے کی ہے اور تخیلی واقعات و کردار کو تاریخی واقعات و کردار سے تقابل کرکے ایسی مثالیں دی ہیں جو قاری کو غور و فکر کی مزید دعوت دیتی ہے کہ کس طرح داستانوں کے بنیادی کردار اپنی اولو العزمی، جرأت و ہمت اور طاقت کا مظاہرہ کرتے ہیں اور خطروں سے آنکھیں چار کرکے نامور بنتے ہیں۔ اپنی شجاعت اور خوبیوں کی بدولت بلند مرتبہ حاصل کرتے ہیں اور نااہل اپنے ملک اور مال و دولت سے ہاتھ دھو بیٹھتے ہیں۔طلسمی فتوحات کا سلسلہ جاری رہتاہے اور عالی ہمتی کا راستہ محدود نہیں ہوتا۔

’’داستانِ امیرحمزہ‘‘ کو کلیم الدین احمد نے اردو داستان گوئی کی معراج قرار دیا ہے اورکہا ہے کہ اس ختم نہ ہونے والی داستان کو پڑھنے اور اس کا جائزہ لینے کے لیے کسی کے پاس اتنی فرصت نہیں ہے۔ انھوںنے خود اس کی ایک کڑی ’’طلسم ہوش رُبا‘‘ کا اجمالی جائزہ پیش کیا ہے اور اس کی اہمیت و افادیت کو دیکھتے ہوئے لکھا ہے کہ ’’طلسم ہوش رُبا‘‘ کی سات ضخیم جلدیں ہیں اور ان میں واقعات کی تکرار بھی ملتی ہے لہٰذا اس کو ایڈٹ کرکے تین چار جلدوں میں ایک اچھا انتخاب تیار کرنا چاہیے تاکہ قارئین اس سے لطف اندوز ہوسکیں اور قلم کار اس کے مطالعہ سے اپنے قوتِ متخیّلہ کو جِلا دیں۔ ان کی فکر میں وسعت آئے، بیان میں روانی اور زبان میں شگفتگی پیدا ہو، لیکن طوالت کی وجہ سے بہت سے قاری اس کا مطالعہ نہیں کرتے اور قلم کار بھی اس کا مطالعہ لاحاصل سمجھتے ہیں جب کہ کلیم الدین احمد کے مطابق:

’’داستان گوئی اب زندہ فن نہ سہی لیکن کامیاب داستانیں زندہ ہیں اور زندہ رہیں گی۔ انھیں ہم مردہ سمجھ کر دفن نہیں کرسکتے۔ خصوصاً اردو میں کامیاب ادب کا سرمایہ کچھ اتنا زیادہ نہیں کہ ہم ان داستانوں کو حقیر سمجھ کر انھیں ادب کے زمرے سے خالی کردیں۔‘‘ ( ’’اردو زبان اور فنِ داستان گوئی‘‘ از کلیم الدین احمد۔ ص۹۷۔۱۹۶)

ایک نقطۂ نظر سے داستان گوئی کو مردہ فن نہیں قرار دیا جاسکتا کیوںکہ داستان بھی معاشرتی زندگی سے وابستہ ہے اور کہانی کی ایک اہم قسم ہے۔ نیز انسانوں کی کہانی سے سماجی زندگی کے ابتدائی دنوں سے لگاؤ رہا ہے اس لیے جب تک انسانی زندگی اور اس کے متعلقات رہیں گے اس وقت تک داستانیں لکھی جاسکتی ہیں۔ اب سوال پیدا ہوتا ہے کہ داستانوں کے لیے مافوق الفطرت ہستیاں لازم ہیں اور آج کے سائنس و ٹیکنالوجی کے دور میں جن، دیو، پری، جادو ٹونا پر کون یقین کرے گا۔ غور فرمائیں تو سائنس و ٹیکنالوجی کے کرشمے سے آج کا انسان حیرت زدہ ہے۔ روبوٹ اور الیکٹرونک ڈِواسیز جس طرح پلک جھپکتے اپنے کام کو انجام دے رہے ہیں، بالکل اُسی طرح داستانوں میں جِن، پری، دیو، راکشش، اژدہا وغیرہ اپنے کارنامے انجام دیتے ہیں۔علاوہ ازیں سائنسی ایجادات کے لیے جو تجربہ گاہ تیار کیے جاتے ہیں، وہ عام عوام کے لیے طلسمی نگارخانہ کے مماثل ہیں جس کا مطالعہ دلچسپی کا باعث بھی ہے اور عام معلومات کے لیے عصری تقاضہ بھی۔ اس کی ایک جھلک ناول’’پانی‘‘ میں دیکھنے کو ملتا ہے جو تصور پر مبنی ہے۔ لہٰذا آج کی داستانیں تصور و تفکر کے ساتھ وسیع مطالعے کے متقاضی ہیں۔ اس کے لیے بہت سارے علوم و فنون سے واقفیت ضروری ہے لیکن یہ بھی ایک حقیقت ہے کہ ماضی میں جو داستانیں لکھی گئی ہیں، وہ بھی تخیلات و تصورات کے ساتھ اپنے عہد کے علوم و فنون سے آراستہ اور قاری کو متحیر کرتی ہیں اور ان کے کرشمائی علوم کو دیکھتے ہوئے ان پر رشک ہوتا ہے۔بلاشبہ سائنس اور ٹکنالوجی کے اس دور میں داستان تحریر کرنا قدرے مشکل ہے کیوں کہ ٹیلی ویژن اور انٹرنیٹ کے وسیلے سے پوری دنیا کے وہ خطے جن کو پُراسرار بناکر داستانوں میں استعجاب، سنسنی اور دلچسپی پیدا کی جاتی ہیں، جن کے مطالعے میں قاری محو ہوجاتے ہیں؛ عام طور پر آشکار ہوگئے ہیں۔ ہاں! سائنسی و تکنیکی مہام کو محور بناکر خواص و عوام کو متوجہ کیا جاسکتا ہے جس کے لیے وسیع علم و ہنر درکار ہیں۔یہ صرف تصور سے ممکن نہیں۔ بہرکیف! داستان گوئی نہ کل آسان تھی اور نہ آج ؛اس کے لیے نابغۂ روزگار ہوناشرط ہے۔

پروفیسر عبدالبرکات

Prof. Abdul Barkat

Muzaffarpur (Bihar)

Mob. : 8210281400

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)

Home Page