نواب فصیح الملک بہادر مرزا دا غ دہلوی کی شہرت دوام اور ادبی مقام ان کی غزلیہ شاعری کی رہین منت ہے۔ جو کہ دہلوی رنگ کی شاعری کے اختصاص سے متصف ہے۔ گرچہ داغ دبستان دہلی سے وابستہ نمائندہ شاعرہیں تاہم داغ دہلوی اپنے آپ میں ایک دبستان کی حیثیت رکھتے ہیں ۔ داغ کے شاگردوںکی ایک کثیر تعداد اس دبستان کی نمائندہ ہے۔ داغ دہلوی کا جو شعری سرمایہ ہے وہ چار دیوان گلزار داغ، آفتاب داغ، مہتاب داغ اور گلزار داغ کے علاوہ مثنوی فریاد داغ ہے۔ مزید برآں داغ دہلوی نے چند قصائد ، چند قطعات اور رباعی کے علاوہ دلی کی تباہی پر ایک شہر آشوب بھی لکھا ہے۔
داغ نے قلعہ معلی دہلی میں تعلیم و تربیت حاصل کی اور ذوق کے شاگرد ہوئے۔ ۱۸۵۷ میں غدر کے بعد داغ دہلوی رام پور آگئے اور یہیں زندگی کے تقریباً تیس سال رام پور میں آرام سے گذارے۔ قیام رام پور کے دوران ان کے دو دیوان گلزار داغ اور آفتاب داغ منظر پر عام پر آئے اور ان کی شاعری کی شہرت پورے ہندوستان میں ہونے لگی۔ داغ دہلوی کی شاعری کے بارے میں ڈاکٹر سیدعبداللہ لکھتے ہیں:
’’یوں تو داغ کے خصائص شعری میں وہ زبان خاص بھی ہے جو قلعہ معلی دہلی سے ذوق و ظفر کی صحبتوں سے حاصل کرکے لائے تھے۔ اور وہ جلی کٹی، طعن و تشنیع، فقرے بازی اور طنز و تعریض بھی ، جس کی مثال اردو شاعری میں شاذ و نادر ہی ملے گی، مگر ان کے کلام کو پڑھ کر یہ نقش ضرور ذہن نشین ہوتا ہے کہ یہ کوئی ایسا شاعر ہے جس کی آواز اردو کے دوسرے شاعروں کے برعکس دل کو غمگین و حزین بنانی کی بجائے قدرے خوشی، تازگی اور فرحت کا اثر پیدا کرتی ہے۔ ۔۔۔۔۔۔۔۔۔۔ داغ کے اشعار پڑھ کر ان دونوں ]انشاء اور جرأت[کے بالکل برعکس یہ اثر پیدا ہوتا ہے کہ اس شاعر کا بیان زندگی کے مسلسل اور پیہم تجربات نشاط کی ترجمانی کر رہا ہے اوریہ وہ کبھی کبھی والی بات نہیں بلکہ اس کا مسقتل مشرب ہے۔ یعنی نشاط اور زندہ دلی اس کی زندگی کا ایک تجربہ بھی ہے اور مشن بھی جس کی صحیح تشریح اس کا یہ شعر کررہا ہے۔ (یہ بھی پڑھیں کرشن چندر کی رپورتاژنگاری – ڈاکٹر سلمان فیصل )
دن گزارے عمر کے انسان ہنستے بولتے
جان بھی نکلے تو میری جان ہنستے بولتے‘‘
(ولی سے اقبال تک ، ڈاکٹر سید عبداللہ، بک کارپوریشن دہلی،۲۰۰۷، ص: ۲۵۰)
داغ دہلوی کی شاعری کے تعلق سے ڈاکٹر نورالحسن ہاشمی کا ایک اقتباس اور ملاحظہ کیجیے۔
’’معاملہ بندی کے واقعات جس شوخی، چلبلے پن، صفائی اور رومانی کے ساتھ داغ باندھتے ہیں وہ کسی ایک کے حصے میں نہ آئے اور یہی داغ کا اپنا انفرادی اور انوکھا رنگ ہے۔ ہمیشہ تازہ ، ہمیشہ شگفتہ اور طباع میں گدگدی اور لطف پیدا کرنے والا۔ معاملہ بندی کے مضامین جرأت نے بھی باندھے تھے لیکن داغ کی جلی کٹی، طعن و تشنیع، رشک و بدگمانی چھیڑ چھاڑ لاگ ڈانٹ، چھین جھپٹ والے مضامین وہاں کہاں۔ داغ کی شاعری کا عاشق بھی چلبلا اور معشوق بھی چلبلا ہے ۔ دونوں طرح دار، طبیعت دار اور طرار ہیں۔‘‘ (دلی کا دبستان شاعری، نورالحسن ہاشمی، اتر پردیش اردو اکادمی، ۲۰۰۹، ص: ۳۵۷۔۳۵۸)
نورالحسن ہاشمی نے آگے لکھا ہے کہ
آخر عمر میں البتہ جوانی کے جوش سرد ہوجانے اور کسی اکھاڑے کے نہ ہونے کے باعث لکھنوی شعرا کی طرح محض الفاظ اور محاورے کی نشست دکھانے کی خاطر اشعار کہنے لگے تھے ورنہ ان کا رنگ وہی گرما گرمی چھین جھپٹ کا جو اُن کے ساتھ خاص ہے۔‘‘(دلی کا دبستان شاعری، نورالحسن ہاشمی، ص: ۳۵۸)
داغ دہلی کی شاعری کی ان خصوصیات کے ساتھ ان کی مثنوی فریاد داغ کا مطالعہ کرتے ہیں ۔ یہ مثنوی رام پور میں لکھی گئی جو ان کی جوانی اور جوش کے ایام تھے جس دور میں ان کی شاعری میں گرمی زیادہ تھی۔داغ دہلوی نے یہ مثنوی فریاد داغ ایک طوائف کے عشق میں گرفتار ہونے کے بعد کہی تھی ۔ وہ طوائف کلکتہ کی منی بائی حجاب تھی جو۱۸۸۱ میں رام پور میلہ بے نظیر گھومنے آئی تھی۔ داغ دہلوی اس طوائف سے رام پور کے میلہ بے نظیر میں آمنا سامنا ہونے کے سبب اس پر فریفتہ ہوگئے تھے اور اس کے فراق میں ۱۸۸۲ میں کلکتہ کا سفر بھی کر آئے تھے۔ ۱۸۸۳ میں یہ مثنوی شائع ہوئی۔ داغ نے اپنی خودنوشت جلوۂ داغ میں لکھوایا ہے کہ
’’ذود گوئی کا ادنی ثبوت یہ ہے کہ فریاد داغ جیسی بے مثل مثنوی صرف دو دن کی معمولی فکر کا نتیجہ ہے۔‘‘(جلوۂ داغ ، احسن مارہروی،مطبع شمسی حیدرآباددکن،۱۹۰۳ء ،ص:۱۱۴)
یہ بات تو اظہر من الشمس ہے کہ داغ دہلوی ذودگو شاعر تھے مگر حیرت یہ ہے کہ ۸۳۸ ؍اشعار مبنی یہ مثنوی محض دو دن میں لکھی گئی۔ داغ کے بارے میں مشہور ہے کہ وہ حیدرآبار کے قیام کے دوران باتوں باتوں میں دو دو چار چار غزلیں لکھوا دیا کرتے تھے۔ لہٰذا عشق کے جنون نے ان کی ذودگوئی کا فائدہ اٹھاتے ہوئے دو دن کے اندر ۸۳۸؍ اشعار پر مشتمل یہ مثنوی صفحہ قرطاس پر اتروا دی۔ (یہ بھی پڑھیں بچوں کے بیکل اتساہی – ڈاکٹر سلمان فیصل )
اس مثنوی میں داغ نے مختلف ذیلی عنوانات قائم کرکے مثنوی کے ارتقا کو جاری رکھا ہے۔ روایت کو برقرار رکھتے ہوئے ابتدا حمد و نعت سے کی ہے اور منقبت سے مثنوی کو آگے بڑھا یا ہے
حمد ہے عشق آفریں کے لیے
نعت ہے ختم مرسلیں کے لیے
السلام اے چہار یار کبار
السلام اے ائمہ طہار
اس کے بعد نواب کی مدح میں چند اشعار کہے ہیں۔ اس وقت رام پور کے نواب کلب علی خاں تھے جنھوں نے داغ کو اپنا مصاحب بنا لیا تھا اور داروغہ اصطبل مقرر کیا تھا۔ نواب کی مدح کے ساتھ ان کی اور شہر رام پور کے آباد و شاد رہنے کی دعا بھی کی ہے۔
مسند آرائے رام پور رہیں
تاقیات مرے حضور رہیں
ہے عجب شہر مصطفی آباد
اس کو رکھنا مرے خدا آباد
سب اسے رام پور کہتے ہیں
ہم تو آرام پور کہتے ہیں
خیر نواب کی مناتے ہیں
جس کا کھاتے ہیں اس کا گاتے ہیں
اس کے بعد عشق کی تعریف کے عنوان کے تحت 33اشعار قلمبند کیے ہیں جن میں متعدد اور مختلف زاویوں سے عشق کی تعریف کی ہے۔ عشق مجازی اور عشق حقیقی کا بیان ہے۔ عشق کی ضرورت کیوں ہے اور عشق کے فائدے کیا ہیں ان سب کے بارے میںداغ نے اپنے انداز میں بیان کیا ہے چند اشعارملاحظہ ہوں
عشق نعمت ہے آدمی کے لیے
عشق جنت ہے آدمی کے لیے
عشق کیا کیا بہار دیتا ہے
یہ دلوں کو ابھار دیتا ہے
بزدلوں کو دلیر کرتا ہے
یہ دلیروں کو شیر کرتا ہے
عشق سے آدمیت آتی ہے
آدمی کو مروت آتی ہے
داغ دہلوی نے عشق کی تعریف کے بعد ساقی نامہ لکھا ہے جو 22 اشعار پر مشتمل ہے بعد ازاں عشق کی ابتدا کے عنوان سے جو اشعار کہے گئے ہیں ان میں داغ نے عشق سے قبل کی پرسکون صورتوں اور حالتوں کو بیان کرتے ہوئے عشق کی ابتدا اور اس کے عوض ملنے والی بے چینی کا ذکر کیاہے اور پھر عشق سے توبہ کرنے کا بیان ہے لیکن
عشق مدت سے تھا جو ناپیدا
اس نے پھر ولولہ کیا پیدا
پھر ہوئیں دل میں حسرتیں آباد
نالے دینے لگے مبارکباد
صبر یاروں کا یار تھا نہ رہا
جبر پہ اختیار تھا نہ رہا
اب وہ دکھ دردروز بھر تا ہوں
اس زمانے کو یاد کرتا ہوں
داغ دہلوی نے مثنوی کو آگے بڑ ھا تے ہوئے محبوب سے پہلا آمنا سامنا کس طرح ہوا اس کا ذکر بہت دلگداز اور دل فریب انداز میں کیا ہے اور حجاب سے بے حجاب ہونے کے سبب داغ کے دل کی کیفیت میں جو تبدیلی پیدا ہوئی اور سکون غارت ہوا اس کا ذکر ہے
دل کو میں ڈھونڈتا رہا نہ ملا
آنکھ ملتے ہی پھر پتا نہ ملا
اور داغ کی اس حالت پر اس کے یار پریشان ہیں کہ آخر یہ کیا ماجرا ہوا آخر
کس قیامت نے پائمال کیا
سحر بنگالہ نے حلال کیا؟
اس بلا سے نکالنا اس کو
یاالہی سنبھالنا اس کو
جب داغ کو حجاب سے عشق ہوگیا اوراس کی موہنی صورت پر مر مٹے تو داغ کی طبیعت میں اچھال آیا ،اپنا آپا تو کھو بیٹھے مگر معشوق کا سراپا لکھ بیٹھے۔ معشوقہ کی تعریف میںکئی اشعار کہہ ڈالے اس کی تعریف میں داغ نے اپنی محبت کا اظہار بھی کیا۔
ہوش آیا تو میں نے کیا دیکھا
اک پری چہرہ خوش ادا دیکھا
رخ سے ظاہر تھا نور کا عالم
اور اس پر غرور کا عالم
سج دھج آفت، غضب تراش خراش
کسی اچھے کی، دل ہی دل میں تلاش
شوخیاں ہیں حجاب میں کیسی
لن ترانی ہے جواب میں کیسی
کہہ دیا ،دل کا حال باتوں میں
نہ رہا کچھ خیال باتوں میں
داغ دہلوی نے حجاب سے ملاقات کا ذکر اور دوران گفتگو ہونے والی قلبی واردات کا ذکر خوش اسلوبی سے کیا اور جب کہ عشق میں ہجر لازمی ہے ، معشوقہ کی روانگی داغ کے لیے ہجر کی گھڑی ہے۔’معشوقہ کی روانگی‘ کے عنوان سے داغ نے حجاب کے واپس کلکتے لوٹنے کا ذکر کیا ہے اور اپنے دل کی کیفیت کو دوستوں کو سامنے رکھا اور پھر جدائی کی گھڑیاں جس کرب اور پریشانی، بے چینی اور بے سکونی میں داغ نے گزاری ہے، ان کیفیات کو اشعار کے قالب میں ڈھال کر جدائی کے عنوان سے اپنے دل کے پھپھولے پھوڑے ہیں
ہجر باعث ہے خستہ جانی کا
ہجر دشمن ہے زندگانی کا
کسی کروٹ کل نہیں آتی
نہیں آتی اجل نہیں آتی
جی بہلتا نہیں کسی صورت
دم نکلتا نہیں کسی صورت
داغ دہلوی نے اس طویل مثنوی میں عاشق کی تصویر سے معشوق کی مخاطبت، معشوقہ کی میلے میں دوبارہ آمد، داغ سے ملاقات اور پھر واپسی ان تمام واردات کا داغ نے تفصیل سے ذکر کیا ہے معشوقہ کے واپس ہونے کے بعد کلکتہ میں داغ کو بلانا، مثنوی کی ارتقائی صورت حال ہے۔ معشوق سے خط و کتابت جاری رہنا اور کلکتہ بلائے جانے کی دعوت پر لبیک کہتے ہوئے داغ کا کلکتہ جانا مثنوی کا اختتامیہ ہے۔ "کلکتے کو جانا” کے عنوان سے داغ نے تقریبا دو سو اشعار کہے ہیں اس اختتامیے میں داغ نے دوران سفر کے حالات اور متعدد مقامات بالخصوص دلی، لکھنو، الہ آباد ، عظیم آباد وغیرہ کا ذکرکیا ہے اور وہاں لوگوں سے ہونے والی ملاقاتوں کا ذکر خاص طورسے شامل ہے
سوئے کلکتہ میں روانہ ہوا
دور تک ساتھ اک زمانہ ہوا
شوق بے اختیار لے ہی گیا
یہ دل بے قرار لے ہی گیا
آئی ایسی ہوائے کلکتہ
دل پکارا کہ ہائے کلکتہ
شہر میں دھوم تھی کہ داغ آیا
داغ آیا تو باغ باغ آیا
مثنوی کے اس آخری حصے میں داغ نے کلکتہ کا تفصیل سے ذکر کیا ہے وہاں کے مقامات کا بیان، وہاں کی رونقیں، وہاں کی شوخیاںاور سحر بنگالہ کا ذکر بہت تفصیل سے ہے۔ وصال یار کی قلبی واردات کا حسین مرقع اس میں نظر آتا ہے
بخت بیدار ویار ہے دمساز
اے شب وصل تری عمر دراز
صبح سے شام تک جمال کے لطف
شام سے صبح تک وصال کے لطف
غم کی راتیں، نہ تھے ملال کے دن
کیا پھرے تھے شب وصال کے دن
محفل عیش کا بندھا وہ سماں
دیکھے پھر پھر کے جس کو عمر رواں
محفل نشاط سے رخصتی اور رنج و غم کی کیفیت سے پر مضطرب دل کے ساتھ رام پور واپس آئے۔ واپسی کے بعد جو طبیعت پر گرانی تھی اس کا ذکر والہانہ انداز میں کیا گیا۔ داغ کی یہ مثنوی ایک عشقیہ داستان ہے جو خود داغ کی ہے۔ اس لیے اس کے اندر پیش کیے گئے واقعات اور حالات کا حقیقت سے قریب تر ہونا زیادہ واضح نظر آتا ہے۔ داغ نے اپنی شاعری کی جولانی طبع کا بہترین نمونہ پیش کیا ہے۔ اور اپنی شاعری کے جوہر کو اس میں نمایاں طور پر واکیا ہے۔٭٭٭٭
مضمون نگار کا مختصر تعارف ڈاکٹر سلمان فیصل
مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)
| ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔ |
