دیہاتوں سے گم ہوتے کھیل – ڈاکٹر فاروق اعظم قاسمی

کھیل عموماً دو طرح کے ہوتے ہیں ۔ ایک بچوں کا دوسرا بڑوں کا ۔ بچوں کے کھیلوں کی بھی دو قسمیں کی جاسکتی ہیں ، ایک بالکل چھوٹے بچوں کے کھیل جن میں زیادہ تر دل بہلانے کا عنصر ہوتا ہے لیکن سات سے چودہ سال کی عمر کے بچوں کے کھیل تفریح و صحت دونوں پر مشتمل ہوتے ہیں ۔ بڑوں کے کھیلوں میں بھی صحت کا عنصر ہوتا ہے تاہم بیشتریہ خالص پیشہ ورانہ ہوتے ہیں۔
سرِ دست یہاں بچوں کے ان کھیلوں کا ذکر کیا جائے گا جن کا تعلق دیہاتوں سے ہے۔بطور ِ خاص یہاں ہم اپنے گاﺅں مشکی پور ضلع کھگڑیا (بہار ) کے کھیلوں کو بیان کریں گے۔ ہمارے بچپن کے زمانے میں بہت سے ایسے کھیل تھے جو پُرلطف ، دلچسپ اور صحت افزا تھے ۔ مثال کے طور پر کبڈی ،بڑھیا کبڈی ، چھُر ، گرم کچوری /سینکا سینکی ، گلی ڈنڈا ، ڈول پتہ ،پھٹو ،بیگن چور ، کِت کِت /چھو تیتی، لٹو بازی، گلی /گولی /کنچا ،جھُن جھُن کٹورا ، ڈیس کوس ، اٹھا گوٹی ، گڑیا گڑوا کا کھیل ، ہَل کُلیا ۔ مٹی کے مختلف کھلونوں کا بنانا ،غلیل بنانا اور چلانا، درختوں پر چڑھنا ، تیرنا ، اچھل کود کرنا ۔ ان میں سے کچھ کھیلوں کا تعلق لڑکوں سے ہے ، کچھ لڑکیوں سے اور کچھ مشترک ۔
یہ بات قابل ِ ذکر ہے کہ ان کھیلوں میں بچوں کی ذہنی اور جسمانی ارتقا کا بھرپور سامان موجود ہے۔ ان کھیلوں میں صحت کا راز بھی پوشیدہ ہے اور سماج میں جینے کا ایک تربیتی نظام بھی نظر آتا ہے ۔ ان میں صنعت و حرفت بھی ہے ، نشانہ بازی بھی ہے اور تیراکی بھی ۔ذیل میں چند کھیلوں کا ذکر کیا جاتا ہے:
کبڈی: ایشیا کا ایک قدیم اور معروف کھیل ہے ، عموماً یہ دو ٹیموں کے بیچ کھیلا جاتا ہے اور آج بھی اس کھیل کا سلسلہ ایک حد تک جاری ہے ۔
بُڑھیا کبڈی: یہ بھی ٹیم کھیل ہے ۔ پندرہ بیس قدم کے فاصلے پر دائرے کی شکل میں دو گھر بنائے جاتے ، ایک چھوٹا دوسرا بڑا ، ایک گھر سے دوسرے گھر میں جانا ہوتا ہے۔
چھُر :زمین میں نشان کھینچ کر دس خانے بنا یے جاتے ہیںاور دو فریقوں کی شکل میں اسے کھیلا جاتا ہے۔
گرم کچوری /سینکاسینکی :عموماً کپڑوں سے بنائے گئے دیسی گیند کے ذریعے بچے ایک دوسرے کو مارا کرتے ہیں ۔
گلی ڈنڈا : یہ بھی دنیا کا ایک قدیم ترین اور دلچسپ کھیل ہے ، دو لوگوں کے بیچ بھی کھیلا جا سکتا ہے اور دو ٹیموں کے بیچ بھی ۔ الگ الگ علاقوں میں الگ الگ ناموں سے اس کھیل کو جانا جاتا ہے ۔
ڈول پتہ : اس کھیل میں پیڑوں پر چڑھنے اور اترنے کا عمل انجام دیا جاتا ہے ، اس کے لیے عموماً چھوٹے اور مضبوط درختوں کا انتخاب کیا جاتا ہے ، اس کھیل کے لیے لیچی کے چھوٹے پیڑ بہت ہی موزوں ہوتے ہیں ۔
پھِٹّو : اس میں پانچ سات ٹھیکرے کو اوپر نیچے کرکے رکھا جاتا ہے اور کچھ فاصلے سے ٹاسک جیتنے والا شخص یا ٹیم کا کوئی کھلاڑی اس جمع کیے ہوئے ٹھیکرے کو گیند سے نشانہ لگا کر بکھیرتا ہے اور مخالف ٹیم اسے ڈوڑاتی ہے اور گیند سے مارتی ہے اور کھلاڑی کی کوشش ہوتی ہے کہ اسے چکما دے کر دوبارہ ٹھیکرے کو یکجا کردے ، اب جو اپنے مشن میں کامیاب ہوا وہی فتحیاب قرار پای۔
بیگن چور : اس میں ایک لڑکا نیچے زمین پر بیٹھ کر اپنے ایک ﺅں پر دوسرا پاﺅں رکھتا ہے، اس کے اوپر اپنا ایک ہاتھ پھر دوسرا ہاتھ رکھتا ہے ۔ اب اس کے اوپر سے کئی لڑکوں کو جمپ کرنا ہوتاہے بغیر کسی ٹچ کے ورنہ وہ چور بن جائے گا اوروہ بھی وہی عمل زمین پر بیٹھ کر کرے گا اور دوسرے لڑکے اس کے اوپر سے پھاند یں گے۔
کِت کِت /چھو تی تی: یہ لڑکیوں کا خاص کھیل ہے ۔ زمین پر نشان لگا کر خانے بنائے جاتے ہیں اور صرف ایک ٹانگ کے ذریعے کت کت کی آواز نکالتے ہوئے مٹی کے ایک گول سے ٹھیکرے کو سارے خانوں سے گزارنا ہوتا ہے ۔
لٹو بازی: یہ کھیل بھی دو طرح سے کھیلا جاتا ہے ۔ ایک تو زمین پر گول دائرہ کھینچ کر اور دوسرے بنا گھر کے۔ ٹاسک ہارنے والا اپنا لٹو گھر کے اندر رکھے گا اور دوسرا شخص اپنے لٹو کی نوک سے اس پر وار کرے گا ۔ دوسری صورت میں ایک فاصلہ طے ہوتا ہے اور ٹاسک ہارنے والا ابتدائی پوئنٹ پر اپنا لٹو رکھے گا اور دوسرا شخص اپنے لٹو کے ذریعے کبھی نوک سے ضرب مارکر اور کبھی نچتے ہوئے لٹو کو اپنی ہتھیلی پر رکھ کر دھکے مار کر طے شدہ آخری پوئنٹ تک پہنچائے گا اور فتحیاب ہوگا۔
گلّی،گولی ، کنچا: یہ کانچ کی بنی گولیوں کے ذریعے انگلیوں سے کھیلا جاتا ہے ۔
جھُن جھُن کٹورا :یہ کھیل بھی ٹیم کے ساتھ کھیلا جاتا ہے ۔دونوں ٹیم دو طرف بیٹھ جاتی ہیں ، ایک فریق کے کسی ایک شخص کی آنکھ پہ پٹی باندھ دی جاتی ہے اور دوسری ٹیم کا ایک فرد اٹھتا ہے اور پٹی بندھے آدمی کے سر کو چھو کر اپنی جگہ بیٹھ جاتا ہے۔ اب پٹی بندھے آنکھ کھول کر اس شخص کی نشاندہی کرنا ہوتی ہے جس نے اس کا سر چھوا تھا ۔ اسی جستجو کے دوران میں سارے بچے تالی بجاتے ہوئے جھن جھن کٹورابولتے ہیں ۔
ڈیس کوس : اس کھیل میں پانچ مفروضہ کردار ہوتے ہیں ۔ڈیس ، کوس سنگل ، بلبل اور ماسٹر۔ اب سارے بچے باہم ایک دوسرے کی ہتھیلیوں یکجا کرکے ایک ساتھ زمین پر پھیلا دیتے تھے ، اختیار تھا کہ پانچوں انگلیوں کے ساتھ ہتھیلی پھیلائیں یا ایک ہی انگلی کے ساتھ اور باقی کو سمیٹ لیں ۔ اس کے بعد ان میں کا ایک فرد کسی کی بھی انگلی سے بالترتیب اپنی انگلی کے ذریعے یہ کہہ کر ڈیس ، کوس ،سنگل ، بلبل ، ماسٹر ،کہے گا اور آخری میں جس نام پہ انگلی ختم ہوگی وہ ٹاسک جیتے گا ، اسی طرح سلسلہ چلتا رہے گا اب جو پھسڈی ہوگا وہ چور کہلائے گا اور اسے باقی کے چار کھلاڑی تھپڑ سے ماریں گے ۔ طریقہ یوں ہوگا کہ عین ناک کے سامنے اس کی ہتھیلی کرکے اس پر تھپڑ لگائے جائیں گے ۔ اب جو مارنے والا اگر ہُک (چور ہاتھ نیچے کرلے اور مارنے والے کی تھپڑ ہوا میں لہر کر رہ جائے ) گیا تو وہ چور بنا ۔
اٹھا گوٹی کھیلنا : یہ لڑکیوں کا خاص کھیل ہے۔پتھر کی آٹھ یا پانچ گوٹیوں (کانچ کی گولی کے سائز کا پتھر)کے ذریعے کھیلا جاتا ہے۔ مٹھی میں گوٹیاں رکھ کر زمین پر ڈالی جاتی ہیں ، پھر ہر ایک کو انگلیوںکے ذریعے اچھال کر مٹھی میں جمع کرنا ہوتا ہے ، زمین پر پڑی کسی گوٹی کو ٹچ کیے بغیراور اور مٹھی سے گرے بغیر۔
گڑیا گڑوا کھیلنا: چھوٹی بچیوں کا ایک انتہائی دلچسپ کھیل ۔ دیہاتوں میں مائیں خود کپڑے کے گڑے اور گڑیا بنایا کرتی تھیں اور بچیاں اپنی سہیلیوں کے ساتھ ان کی شادی بیاہ کا کھیل کھیلاکرتی تھیں۔
ہَل کُلیا کھیلنا : یہ کھیل بھی زیادہ تر لڑکیاں ہی کھیلتی ہیں لیکن ثانوی درجے میں لڑکوں کی بھی شرکت رہتی ہے۔ اس کھیل میں کھلونا والے برتنوں میں کھانا بنایا جاتا ہے اور کبھی کبھار چھوٹے برتنوں میں بچیاں سچ مچ کا کھانا بھی بنا لیتی ہیں ۔
دیہاتی بچوں کے کچھ خاص مشغلے :
مٹی کے مختلف کھلونوں کا بنانا ،کیلے کے تنوں سے کشتی بنانا ، گُل کے ڈبوں سے ٹیلی فون بنانا ، غلیل بنانا اور چلانا،آنگن میں چڑیوں کو پھنسانا ،درختوں سے چڑیوں کے گھونسلوں کو گھر اٹھا لانا ، تاڑ کے پتوں کی پھرکی اور گھڑی، تاڑ کی شاخوں سے بلّا بنانا ، کُوا (کچے تاڑ کا مغزہ )نکال لینے کے بعدتاڑ کو چکے کی جگہ استعمال کرکے گاڑی بنانا ،کھجور کی پلاﺅنچی (شاخ ) سے پتے ہٹا کر سخت مدور حصے کی خیالی موٹر سائیکل بنانا جو ہوتی تو بے پہیے کی لیکن زمین پر گھسٹنے سے پھٹر پھٹر کی آواز دیتی تھی، اس زمانے میں بائیک کو پھٹپھٹیا بھی کہتے تھے ، سکچا گاڑی ، ٹائر گاڑی (سائیکل /بائیک کا پرانا پہیا ، بس ایک پہیا ہوتا ، بچے اپنے ہاتھوں سے پہیے کو مارے جاتے ، وہ گھومتا رہتا ، بچے اس کے پیچھے بھاگتے رہتے اور مزے لیتے رہتے )پرانے موزوں سے گیند تیار کرنا ، غلق کا شوق ، محرم کے مہینے میں امام باڑے پہ دکان کرنا ،گھر کے بکرے اور بکریوں کے بیچ دیے جانے کے بعد اس کی دم پکڑ لینا تاکہ بوچڑوں سے کچھ پیسے مل جائیں ، بھٹوں کے بالوں سے ڈاڑھی مونچھ بنانا ،آم کے دنوں میں آم لوٹنا اور چند لونڈے مل کر ایک چھری ،مخصوص قسم کا نمک اور ایک لوٹے میں پانی لے کر باغوں میں بھٹکنا ، آم کی گٹھلیوں کا باجا بنانا، دُبّھی (ایک قسم کی گھاس)کی انگوٹھی بنانا،لیچی کے پتوں اور شیشم کی چھال کا پان تیارکرنا، درختوں پر چڑھنا ، تیرنا ، اچھل کود کرنا وغیرہ وغیرہ۔
یہ صرف ضلع کھگڑیا کے ایک گاﺅں کے کھیلوں کی تفصیل ہے بلکہ اس کے علاوہ بھی کھیل ہوں گے ۔ ضلعے کے دیگر مواضعات ، دوسرے اضلاع اور ریاستوں میں بھی یہ اور ان جیسے بلکہ ان کے علاوہ بھی بہت سے کھیلوں کا چلن ہوگا یا رہا ہوگا۔ قابل ِ غور بات یہ ہے کہ آج کے اس گلوبل عہد میں کیا یہ کھیل زندہ ہیں ؟ آج ان کھیلوں کی ضرورت ہے ؟حفظان ِصحت اور دیہات کلچر کو زندہ رکھنے کے لیے ان کھیلوں کی کتنی ضرورت و اہمیت ہے ؟ واقعتا اگر انسانی سماج میں ان کھیلوں کی اہمیت ہے تو ہم نے ان کی بقا کے لیے کیا اقدامات کیے ؟؟ یہ اور اس طرح سوالات پر ٹھنڈے دل سے غور فکر کرنے کی ضرورت ہے ۔جہاں اپنی تہذیب کو بچانا ضروری ہے وہیں ہمیں اپنے اور اپنے بچوں کے دماغی اور جسمانی صحت کا خیال رکھنا انتہائی اہم اور ضروری ہے ۔
٭٭٭

ڈاکٹر فاروق اعظم قاسمی
اسسٹنٹ پروفیسر (گیسٹ فیکلٹی)

رام لکھن سنگھ یادو کالج ، بتیا (مغربی چمپارن)

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)