وارث علوی کی فکشن تنقید : جدید افسانہ اور اُس کے مسائل ‘‘کے حوالے سے – محمد شفیع گنائی

اُردو میں فکشن کی تنقیدکے حوالے سے ابھی زیادہ نہیں لکھا گیا ہے ۔ اگرچہ جدید ناقدین نے اس جانب توجہ ضرور کی ہے مگر یہاں ابھی بھی ایسے پہلو پِنہاں ہیں جن پر روشنی ڈالنا باقی ہے۔چند معروف جدید فکشن ناقدین میں شمس الرحمٰن فاروقی، سلیم احمد، گوپی چند نارنگ وغیرہ کے نام شامل ہیں۔ان ہی ناموں میں وارث علوی ایک اہم مقام رکھتے ہیں ۔وارث علوی بنیادی طور پر فکشن کے نقاد ہیں ۔انہوں نے جس گیرائی اور گہرائی سے فکشن پر اپنا قلم اٹھایا ہے اس کی نظیر کم ملتی ہے۔انھیں مشرقی فکشن تنقید کے علاوہ انگریزی، فرانیسی اورروسی ادب کی فکشن تنقید میں بھی کافی مہارت حاصل تھی۔وہ مغربی فکشن کے تنقیدی اصولوں کا بہت علم رکھتے تھے۔انہی اصولوں کی مدد سے انھوں نے مشرقی فکشن پر نظری اور عملی تنقید کی ہے۔ان کے مطالعے میں مشرق و مغرب کے اعلیٰ ترین ناقدین کا اہم رول رہا ہے ۔

وارث علوی نے فکشن کی تنقید میں ناول اور افسانے کی ساخت اور تکنیک کا بہت گہرا مطالعہ کیا تھا۔فکشن کی تنقید میں وارث علوی کی انفرادیت ان کے منفرد اسلوب اور یگانہ لب و لہجہ کے بر ملا اظہار میں ہے ۔فکشن تنقید کا میدان اگرچہ باقی دیگر اصناف کے مقابلے میں بہت کم آباد ہے لیکن وارث علوی جیسے نقاد نے اپنی کاوشوں سے بہت حد تک اس میدان کو نئی زندگی بخشی ہے ۔انہوں نے مختلف افسانہ نگاروں کے افسانوی فن پاروں پر بھی تنقیدی مضامین لکھے ہیںاوراردو ادب کے بہت سے افسانوں کے لا جواب تنقیدی جائزے بھی پیش کیے ہیں۔۔تنقید کے متعلق ان کا نظریہ بہت واضح ہے کہ وہ تنقید میں بے جا تعریف ،استہزا یا مشکل عبارت کے قائل نہیں ہیں۔وہ فن پارے کا پہلے اچھے سے دو تین مرتبہ مطالعہ کرتے ہیں ،پھر اس سے چیدہ چیدہ اقتباسات نوٹ کرتے ہیں تب جا کر اس کادیانت داری سے جائزہ لیتے ہیں ۔ بقول بیگ احساس :

’’ وارث علوی نے فکشن کا بہت ڈوب کر مطالعہ کیا ۔فکشن کی تنقید میں ان کی ہمسری بہت کم نقاد کرتے ہیں ۔اردو ناول اور افسانے پر ان کی گہری نظر ہے ۔‘‘  ۱؎

وارث علوی کے افسانوی تنقید کے حوالے سے اگر ہم بات کریں تو اس ضمن میں ان کی اہم اور مشہور کتابوں کا کافی ذخیرہ موجود ہیں جن میں ’’جدید افسانہ اور اس کے مسائل‘‘ اور’’فکشن کی تنقید کا المیہ ‘‘کافی اہمیت رکھتے ہیں ۔یہ ذخیرہ فکشن تنقید کا ایک انمول اور بے باک سرمایہ ہے ۔افسانہ کی تنقید پر ان کی سب سے اہم تصنیف ’’ جدید افسانہ اور اس کے مسائل ‘‘ ہیں جو پہلی مرتبہ ۱۹۹۰ میں مکتبہ جامعہ لمیٹڈ،جامعہ نگر،نئی دہلی سے شائع ہوئی۔یہ وہ دور تھا جب جدید افسانے کے موضوعات اور اسالیب پر بحث کا سلسلہ جاری تھا ۔روایتی اور فیشن پرستانہ اپنی عزت کھو چکی تھی اور اب جدیدیت اپنی آنکھیں کھول رہی تھی ۔نئے افسانہ میں پیچیدہ ،گنجلک،ابہام ،تجریدی اور علامتی استعاروں کی کثرت استعمال کے باعث قارئین اور ادب میں ایک طرح کی دوری بڑھ رہی تھی۔نقاد اپنی بات رکھنے اور منوانے میں مست تھے۔وارث علوی کی یہ کتاب اسی ماحول میں منظر ِ عام پر آئی ۔اس کتاب میں انہوں نے جدید افسانہ کے تمام پہلوئوں کا بغور تنقیدی جائزہ لیا ۔اسی لیے وہ لکھتے ہیں ۔

’’جدید افسانہ اس کھلنڈے پن اور طراری سے محروم ہے جو نوجوانوں کی بغاوت کو رنگ و آہنگ بخشتی ہے۔ہم سے نہ ’’بو‘‘ لکھا گیا ،نہ ’’لحاف ‘‘ ۔‘‘    ۲؎

وارث علوی نے اس کتاب میں جدید افسانہ اور اس کے مسائل پر جس گہرائی کے ساتھ تنقیدی بحث کی ہے اس کا اندازہ اس کتاب کے مطالعہ سے بخوبی لگایا جا سکتا ہے۔اس کتاب کے عنوانات کی فہرست یوں ہے:۔

۱۔ اجتہادات روایت کی روشنی میں

۲۔ جدید افسانہ کا اسلوب

۳۔ استعارہ اور نِرا لفظ

۴۔ افسانہ نگار اور قاری

وارث علوی اس کتاب میں شامل مضمون ’’جدید افسانہ کا اسلوب ‘‘ میں علامتی اور تجریدی افسانہ میں ’’ کہانی پن‘‘ کے متعلق بہت وضاحت سے پیش آتے ہیں ۔وہ جدید افسانہ میں نئے نئے اسلوبی تجربات کو اس لئے رد کرتے ہیں کہ اس سے نہ تو افسانہ میں ہیئت باقی رہتی ہے اور نہ تکنیک ۔جدید افسانہ نے داخلی اور خارجی دنیا سے اپنا ربط ختم کر دیا کیونکہ اس نے داستان اور حکایت کا جامہ پہن لیا۔جدید افسانے کا ہیرو خود افسانہ نگار ہے اور وہ تذبذب (confusion)کا شکار ہے ۔وارث علوی ایک جگہ لکھتے ہیں کہ:

’’لیکن ہم جانتے ہیں کہ ہر ناول اور افسانہ کی اپنی ایک منفرد دنیا ہے ۔جدید افسانہ اسی انفرادیت سے محروم ہے۔ وہ جدید تمدن ،جدید شہر اور جدید انسان کا افسانہ نہیں رہا۔ ایک داستانی شہر اور داستانی فضا کا افسانہ بن گیا ہے ۔‘‘  ۳؎ (یہ بھی پڑھیں منٹو وارث علوی کی نظر میں – امتیاز احمد

وارث علوی کو ترقی پسند افسانہ میں سماجی کمٹ منٹ اور جدید افسانہ میں تجریدیت سے شکایت ہے۔ تجریدیت نے افسانے میں حقیقت نگاری کا عنصر ہی ختم کیا ہے ۔ان کا کہنا ہے کہ جدید افسانہ میں زندگی کے بجائے شخصیت اور تکرار کی چھاپ نظر آتی ہے جو نثری پہنائیوں کے بجائے شاعرانہ اسلوب کو بہتر سمجھتا ہے ۔وارث علوی نے بڑی حد تک یہ کوشش کی ہے کہ روایتی افسانے کا بچاؤ کرے اور اسے جدید اور نئی طرز سے محفوظ رکھا جائے ۔وارث علوی کو علومتی افسانوں سے کوئی عداوت نہیں ہے لیکن انھیں جدید افسانہ نگاروں کے یہاں اچھے علامتی افسانے نظر نہیں آتے۔جب انھیں کہیں علامتی افسانہ نظر آتا ہے وہ اس کی بہت تعریف کرتے ہیں ۔اس کی مداح میں آسمان کے قلابے ملا دیتے ہیں۔خالدہ اصغر کے افسانہ ’’گاڑی ‘‘ اور غیاث احمد گدی کے افسانہ ’’ایک خون آشام صبح ‘‘ پر تبصرہ کرتے ہوئے لکھتے ہیں:

’’دونوں افسانے علامتی ہیں ۔لیکن دونوں کا طریقہ کار اوراسلوب حقیقت پسندانہ ہے ۔لیکن سامنے کی حقیقت اور روز مرہ کے واقعات آہستہ آہستہ گہرے اور تاریک رنگ اختیار کرتے جاتے ہیں اور بالآ خر سامنے کی حقیقت ایک پر اسرار اور ہولناک وقوعہ میں بدل جاتی ہے اور اسی تبدیلی کے دوران افسانہ حقیقت پسندی کی سطح سے بلند ہو کر علامت پسندی کی فضاؤں میں داخل ہوتا ہے ۔‘‘   ۴؎

وارث علوی بلراجؔ منیرا ،انور سجاد ،سریندر پر کاش اور احمد ہمیش کے علاوہ اور بھی کئی نام گنواتے ہیں جن میں وہ افسانوی زبان کے ساتھ ساتھ اسلوب اور تخیل بھی دیکھتے ہیں ۔وہ انھیں افسانہ میں ایک معتبر مقام دلاتے ہیں ۔کہیں کہیں ان کی خامیاں بھی نمایاں کردیتے ہیں ۔وہ ایک بے باک اور خود دار نقاد تھے ۔کسی سے بھی ادب کے بارے میں سمجھوتہ کرنا پسند نہیں کرتے تھے۔

کتاب کے تیسرے مضمون ’’استعارہ اور نِرا لفظ ‘‘ میں وارث علوی نے اس بات کی ترجمانی کی ہیں کہ جدید افسانہ نگاروں نے استعارے کو اتنی اہمیت دی ہے کہ نِرا لفظ بے معنی اور بے سود ہوگیا ہے ۔ وارث علوی جدید افسانہ میں کہانی اور کرداروں کے برعکس اسطوری ،علامتی ،تجریدی،داستانوں اور حکایتی روپ پر تنقید کرتے ہیں ۔اصل میں اسطور سازی کردار نگاری ہی ہے اور ہر اچھا کردار کسی انسانی رویے ،صورتحال ،اخلاقی اور سماجی برتاؤ کی علامت ہوتا ہے ۔وارث علوی جدید افسانہ کے خلاف کیوں ہے اس سلسلے میں فرماتے ہیں:

’’ میں علامتی ،تمثیلی اور تجریدی افسانہ کے خلاف نہیں تھا گو میں حقیقت پسند فکشن کا قاری تھا اور ہمیشہ کہتا رہا کہ حقیقت نگاری کے بغیر ناول اور افسانہ زندہ نہیںرہ سکتا۔‘‘۵؎

وارث علوی گوپی چند نارنگ کے لکھے گئے دلچسپ مضامین کی بھرپور حمایت کرتے ہیں جو انہوں نے راجندر سنگھ بیدیؔ پر لکھے ہیں ۔وہ بیدی کے افسانوں میں استعاراتی اور اسطوری فضا کی چھاپ دیکھتے ہیں ۔وہ بیدی ؔ کے شہکار افسانے ’’ ایک چارد میلی سی ‘‘ ،گرہن ‘‘ ،’’ہولی‘‘،اور ’’اپنے دکھ مجھے دے دو ‘‘ میں اسطوری اسلوب کا استعمال زیادہ گہرا اور بہت پھیلا ہوا پاتے ہے ۔وارث علوی بیدیؔ کو حقیقت پسند افسانہ نگار کہتے ہیںاور ساتھ میں ہی کہتے ہیںکہ وہ ہندو تہذیب اور ہندو اساطیر میں بہت ڈوبا ہوا ہے ۔وارث علوی نے یہ بھی بتایا ہے کہ افسانہ محض علامتی نہیں بلکہ اس میں کردار کا المناک (tragedy) بھی شامل ہوتا ہے ۔

وارث علوی اس کتاب کے آ خری مضمون’’ افسانہ نگار اور قاری‘‘ میں ایک گلہ کرتے ہوئے لکھتے ہیں کہ ادب میں ہرقاری کو مصنف بننے کی خواہش ہے ۔اگر دیکھا جائے تو ایک خراب مصنف سے ایک اچھا قاری بہتر ہوتا ہے ۔ادب سے محبت کرنے والا قاری خود کو مسرت فراہم کرنا چاہتا ہے۔اس لئے وہ ادب کا مطالعہ کرتا ہے اور اپنے انتخاب شدہ ادب پارے میں بالکل آزاد ہوتا ہے ۔وہ ادب کے اصولوں اور قائدوں سے بالکل آزاد ہوتا ہے ۔وہ فکشن کے قارئین میںدن بہ دن کم ہونے کی وجہ جدیدافسانہ میں اسلوب ،موضوع اور تکنیک کے تجربات کو ٹھہراتے ہے ۔وہ سمجھتے ہیں کہ جدید افسانے کا قاری اس دنیا میںاب نہیں رہتا ۔اس کا ذمہ دار وہ افسانہ نگاروں کو ٹھہراتے ہیں ۔ایک جگہ لکھتے ہیں کہ :

’’ اردو ادب کا یہ قاری آج آہستہ آہستہ معدوم ہورہا ہے اور اسے ختم کرنے میں سب سے بڑا ہاتھ جدید افسانے کا ہے ۔دنیا ئے افسانہ اس کے لئے اجنبی بن گئی ہے ۔افسانہ اس کی زندگی کا جزو نہیں رہا ۔‘‘   ۶؎ (یہ بھی پڑھیں آفتاب تنقید کی تخلیقی ضیا: وارث علوی – ڈاکٹرترنم ریاض )

وارث علوی نے ’’جدید افسانہ اور اس کے مسائل ‘‘ میں بالکل اختصارسے کام لیتے ہوئے جدید افسانے کی خامیوں،خوبیوں ،کمزوریوں، ضرورتوں،روایات،تقاضوںاور رویوں کا بھر پور احاطہ کیا ہے۔جدید افسانہ میں طرح طرح کے تجربات کئے گئے ۔چاہیے وہ موضوع کے اعتبار سے ہو ،اسلوب کے اعتبار سے ہو یا پھر فن و تکنیک کے اعتبار سے ہو ۔وارث علوی جدیدیت کے خلاف نہیں جاتے ہیں۔وہ جدیدافسانے کے نام پر شاعرانہ پن ،جذباتیت اور تکنیک کو نئے تجربات سے زیادہ افادیت نہیں دیتے ۔روایتی افسانہ اور ناول میں اگر چہ وہ تبدیلیوں کی حمایت کرتے ہیں لیکن افسانہ میں بنیادی چیز کہانی اور ترسیل ابلاغ سے انحراف نے افسانہ کے راستے محدود کر دئے ۔جدید افسانہ نگار تو یہاں تک کہتے تھے کہ نیا افسانہ جو کچھ ہے اسے قبول یا رد کرنا چائیے ۔وارث علوی کی جدید افسانے پر تنقید انہی میلان کی دین تھی۔ان کی نظریاتی مضامین میں جدیدیت کی طرف قبول اور رد دونوں طرح کا رویہ ملتا ہے ۔جدید افسانے میں نئے تجربات کو وہ کرتب بازی سے یاد کرتے ہیں۔ وارث علوی ہیئتی اور اسلوبیاتی تنقید کے خلاف نظر آتے ہیں ۔جدید افسانے کو انہوں نے مکمل رد کیا ہے اور اس سلسلے میں بہت سے مثبت دلائل پیش کیے ہیں ۔وہ کسی تحریک ،نظریہ اور کسی خاص تنقیدی مکتب کو قبول نہیں کرتے ۔وہ تنقید کو دلچسپ بنانے کی کوشش کرتے ہیں ۔ان کے خیال میں حقیقت نگاری اور علامت نگاری ایک ہی تخیل کے دو الگ الگ نام ہیں۔وہ جدید افسانے کی زبان کی شعریات پر بھی اعتراض کرتے ہیں۔انھوں نے جدید افسانے کے موضوع ،ہئیت ،بیانیہ اور زبان و بیان پر شدید اختلافات کیے ہیں۔انہوں نے اس کے حوالے سے منٹو اور بیدی کے افسانوں کا تجزیہ پیش کیا ہے ۔وارث علوی کو یہ شکایت ہے کہ ادب میں ہر قاری مصنف بننا چاہتا ہے جو ممکن تو نہیں ہے مگر وہ مشورہ دیتے ہیں کہ خراب مصنف بننے سے بہتر ہے کہ ایک ایسا اچھا قاری بنا جائے جس کا مطالعہ وسیع ہو اور عالمی ادب کے ان شاہکاروں سے سابقہ پڑا ہو جو علم میں اضافے کا سبب بنتے ہیں۔ وارث علوی کی تنقید نگاری کی ایک اہم بات یہ ہے کہ وہ اپنے تنقیدی مضامین میں بہت گہرائی اور وضاحت سے کام لیتے ہیں اور اکثر و بیشتر اصل موضوع وقتی طور پر حاشیے پر چلا جاتا ہے۔یہ بات ہمیں ان کی تصنیف ’’جدید افسانہ اور اس کے مسائل ‘‘ میں بھی نظر آتی ہے۔یہاں وارث علوی جدید افسانہ سے بجث کرتے ہوئے ناول کے میدان میں چلے جاتے ہیں اور پھر جسمیں جوئیں ، گبریلہار سیا ما رکیز اور ارنسٹ ہمین گو وغیرہ کی فکشن نگاری سے بھی تفصیلی بحث کرتے ہیں ۔   وارث علوی کا زیادہ تنقیدی کام فکشن اور فکشن نگاروں پر منحصر ہے جہاں پر وہ منٹو ؔ اور بیدیؔ کے شیدائی دکھائی دیتے ہیں ۔افسانوی تنقید کے حوالے سے ان کی کتابیں بہت اہمیت رکھتی ہیں ۔

فکشن کی تنقید میں وارث علوی کو جو نمایاں مقام حاصل ہے اس کی وجہ افسانہ اور ناول کے فارم،موضوع اور مواد پر ان کے تنقیدی خیالات اور مشاہدات کا بے باک ،بے لاگ اور غیر جانبدارانہ تجزیہ و محاکمہ ہے ۔انہوں نے ایسے وقت میں افسانہ کی حمایت کی جب شمس الرحمن فاروقی اسے شاعری کے مقابلے میں کمزور اور ثانوی حیثیت دے رہے تھے۔وارث علوی نے کلاسیکی افسانوی روایت کو برقرار رکھتے ہوئے ترقی پسند ،جدیدیت اورمابعد جدیدیت میں موجود کمزوریوں اور تبدیلیوں کو نہ صرف تنقید کا نشانہ بنایا بلکہ اس کی فلاح و اصلاح کے لئے مغربی مصنّفین کے شاہکاروں سے حوالے دے کر اپنے تنقیدی نظریات کو ایک مضبوط اور توانا بنیاد بھی فراہم کی ہے ۔انہوں نے افسانہ میں کہانی کو لازم و ملزوم بتایا ہے ۔وہ افسانہ میں پلاٹ ،کردار ،تمثیل ، علامات، تکنیک، تھیم، امیج، استعارہ،مرقع سازی ،منظر نگاری ،ماحول ،تہذیب و تمدن،لب و لہجہ ، اسلوب ،طنز وظرافت ،المیہ ،طربیہ ،بیانیہ اور نفسیاتی و فلسفانہ ڈائمنشن اور پھر ان کے موضوعات کے بے شمار ذیلی مباحث اور نکات کو افسانہ کے لیے ایک لسانی ساخت قرار دیتے ہے جس میں زبان و بیان کی نوعیت کے ساتھ ساتھ اجزائے ترکیبی کا بھی اپنا مقام و مرتبہ ہے ۔انہوں نے جدید افسانہ کی مخالفت اس وجہ سے کی ہے کہ اس نے سماج ،ماحول ،کردار ،کہانی، واقعہ اور حقیقت نگاری سے علیحدگی اختیار کر کے سب کچھ کھو دیا ہے ۔وارث علوی کے خیال میں جدید افسانہ میں حقیقت نگاری ،کہانی اور پلاٹ سے جو انحراف کیا گیا ہے اب ان میں صرف بیانیہ ہی کی بدولت دلچسپی برقرار رکھی جاسکتی ہے ۔ورنہ تجریدیت ،علامت اور اسطوار سے جدید افسانہ شعریت کی طرف زیادہ مائل نظر آتا ہے۔علامتی آرٹ ،آرٹ کے مقابلے میں پیچیدہ اور مشکل ہوتا ہے ۔وارث علوی کے مطابق افسانے کی پہلی چیز افسانویت ہے۔افسانہ پڑھنے کی چیز ہے اور کلاسیکی افسانوں کو پڑھنے میں قاری کی دلچسپی بھی ہے اور لگاؤ بھی ۔جدید افسانوں کی تجریدیت ، علامت اور اسطور سازی سے قارئین کا ادب سے ایک طرح کا جو رشتہ بنا تھا وہ ٹوٹ گیاہے،جس کی وجہ سے وارث علوی جدید افسانہ کی گردن کا ٹنے کا مشورہ دیتے ہیں تاکہ اردو فکشن کو اپنا کھویا ہوا قاری واپس ملے ۔وہ جدید افسانے کا پورا بحران حقیقت نگاری کی ذمہ داریوں سے پہلو نہی کرنے کو سمجھتے ہیں۔افسانے کا میڈیم زبان ہے اسلئے اس کی تنقید کے لئے زبان و بیان کی نوعیت سے آگاہی ضروری ہے ۔انہوں نے تعبیراتی ،تشریحی اور ساختیاتی طریقہ تنقید کی مخالفت کی ہے جس سے افسانہ کی مصنوعی گہرائی اور حسن آفرینی آشکارا نہیں ہوتی ۔وارث علوی افسانہ کے لیے ’ کہانی پن‘ کو ضروری قرار دیتے  ہیں ۔انھوں نے کہانی کو پلاٹ پر ترجیع دی ہے کیونکہ کہانیوں سے تخیل اور دلچسپی برقرار رکھی جاسکتی ہے ۔وہ جانتے ہیں کہ ہمارے دور میں کہانی پڑھنے کی چیز ہے اور اگر پڑھی جانے والی چیز سے آنکھیں روٹھ گئیں تو پھر غضب ہوجائے گا۔ جن مصنفین کے ہاں کہانیاں نہیں ملتی ان کے یہاں انشائیہ نگاری شاعرانہ پن ،جزباتیت اور پلاٹ کے داؤ پیچ ملتے ہیں ۔مجموعی طور پر وارث علوی کی فکشن تنقید کے حوالے سے اگر ہم بات کریں تو اس میدان میں ان کا گہرا مطالعہ ہے اور کافی سرمایہ بھی منظر عام پر آیا ہے ۔ان کی قابلیت اور صلاحیت کا یہ نتیجہ ہے کہ انہوں نے اردو فکشن کی تنقید کو جلا بخشی اور اس میں کافی سرمائے کا اضافہ بھی کیا ۔وارث علوی فکشن میں کلاسیکی روایات کے حامی تھے۔وہ فکشن میں کہانی ،پلاٹ ،کردار ، مکالمہ، بیانیہ اور منظر نگاری کو مقدم اور لازم رکھتے ہیں ۔یہی وجہ ہے کہ وہ پریم چند ،منٹو ،بیدی ،احمد عباس اور عصمت چغتائی کے افسانوں کو زیادہ فوقیت دیتے ہیں جنھوں نے افسانہ کے فنی لوازمات کا خیال رکھا ہے ۔وہ اپنی افسانوی تنقید میں بار بار ان قلم کاروں کو یاد کرتے ہیں اور ان کی جا بہ جا تعریف بھی کرتے ہیں۔وارث علوی نے’’ جدید افسانہ اور اس کے مسائل‘‘ میں فکشن ،موضوع ،مواد اور ہیئت پر تفصیلی تنقیدی بحث کی ہے ،جو ان کی قابلِ قبول خدمات ہیں۔ اردو فکشن میں یہ رہنما بہت دیر تک یاد رکھا جائے گا ۔ ( یہ بھی پڑھیں فکشن تنقید کا سپہ سالار: وارث علوی – ڈاکٹر آس محمد صدیقی )

بہرحال جدید افسانہ اور اس کے مسائل سے متعلق وارث علوی کی یہ ایک اہم تصنیف ہے جس میں انھوں نے جدید افسانہ کی تمام خامیوں اور خوبیوں کو بے کم و کاست بیان کر دیا ہے۔ اردو فکشن خصوصاً افسانہ کے فہم و ادراک کی غرض سے یہ ایک معاون کتب کی فہرست میں شمار کی جاسکتی ہے۔

 

 

حواشی:

۱؎      بیگ احساس                  اردوتنقید کا سقراط

۲؎       وارث علوی                جدید افسانہ اور اس کے مسائل

۳؎      وارث علوی                 جدید افسانہ اور اس کے مسائل

۴؎      وارث علوی                 جدید افسانہ اور اس کے مسائل

۵؎      وارث علوی                 لکھتے رقعہ ، لکھے گئے دفتر

۶؎        وارث علوی                جدید افسانہ اور اس کے مسائل

 

 

Mohd Shafi Ganai

Research Scholar

Dept. of Urdu and Persian

Gujrat University–Ahmadabad (Gujrat)

 

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)

 

 

 

ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com  پر بھیجنے کی زحمت کریں۔