پروین شاکر کا شمار عہد ساز شاعرہ میں ہوتا ہے۔ان کی شاعری کی کائنات محبت کے محور پر گردش کرتی ہے۔محبت کی دنیا میں دو دل اور ایک دھڑکن ہوتی ہے۔ اس دنیامیں کھبی آہوں کا بسیرا ہوتا ہے تو کبھی خوشیوں کے پیغام بھی سنے جاتے ہیں لیکن پروین کے یہاں ذِکر ثانی کا موقع بہت کم ہاتھ آیا ہے۔یہی وجہ ہے کہ پروین شاکر نے اپنی زندگی کے بیشتر لمحوں میں غم کی بانسری کو غزل کے گلستان میںبجایا ہے جس سے درد کے نغمے پھوٹتے ہیں جہاں قنوطی ماحول میں دل کی کائنات میں افسردگی کا جوغباراٹھتاہے وہ آنسوئوں کی جھڑی سے دل کی زمین پر بیٹھ جاتا ہے ۔اس پرسوز فضا میں پروین کی شاعری کا شجر پروان چڑھا ہے جو غم کی مٹی میں اپنی جڑوں کو پھیلا کر پوری زندگی پانی کے سوتے تلاش کرتی رہی اس لیے اس شجر کی شاخوں پر سیمابیت کم اور قنوطیت کے برگ و بارز یادہ آئے جس میں میر ؔ کی درد مندی کا ذائقہ تو ہے لیکن لہجہ اور طرزِ اظہار میں بہت فرق ہے۔ قرطاس ادب پران کے تراشیدہ شعری پیکر کے خواب جلے ہیں ،چشمِ تمنا بجھے ہیں اس کے باوجود اس کے مزاج میں تلخی نہیں آئی کیونکہ محبوب کے دئیے زخم پروین کے یہاں متاعِ قلب و جگر بنتا ہے جس کے باعث زندگی کے میلے میں ان نسائی پیکروں کا دل اکیلا رہ گیا ہے۔ساجن کا جوتصوّر قدیم مائتھولوجی میں ہے اس کی بازیافت پروین کی شاعری میں ہوئی ہے جہاں بے درد زمانے کے ستم سے بچنے کے لیے ساجن سے ہزاروں مننتیں کی جاتی ہیں اور عہد ِ ستم میں بھی ساجن سے رسمِ وفاداری نبھائی جاتی ہے۔عشق کے کارِزار میں پروینؔ کے یہاں معشوقہ کا ظرف بہت اونچا دِکھائی دیتا ہے جہاںبے وفائی کی تند آندھی میں بھی دل کے حرم میں پاکیزہ محبت کا چراغ سبک روی کے ساتھ جلتا رہتا ہے۔پروین نے کچی عمر کی لڑکیوں کے جذبات کی ترجمانی جس نہج اور ہلکے پھلکے انداز میں کرکے جتنا گہراتاثر پیدا کیا اس کا عنصرموصوفہ کے ہمعصروں میں بہت کم رہا۔( ہہ بھی پڑھیں فاروقی کی افسانہ نگاری کے خلاف- رحمٰن عباس
پروین شاکرکی شاعری کا ایک مخصوص تیور ہے۔اس تیور کا اپنا ایک انفرادی گلابی رنگ ہے اس رنگ سے جو شعری آہنگ بلند ہوتا ہے اس میں ایک خفیف سا ٹھہرائو ہے جو احسا س ِشکستگی کی نشاندہی کرتا ہے ۔پروین شاکر کی شاعری کے ایک ایک لفظ میں کمسن، نیم پختہ دلوں کی دھڑکنیں سنی جاسکتی ہیں۔ان کے تراشیدہ شعری پیکر کے سہانے خواب وقت کے نیزے پر چڑھے ہیں اس کے باوجود زمستان کی شب میں دوشیزہ کے من کی شاخوں پر محبوب کے یادوں کی شبنم گرِتی رہتی ہے ۔اس کی نمی سے کونپلیں پھوٹتی ہیں جس پر کلیاں جب شگوفے بن جاتی ہیں تو من کی نگری میںاس کی خوشبو سے ایک ہلچل ہوتی ہے۔ ان کی شاعری کے کائنات میں بھی دو ہنسوں کا جوڑا کہیں نہ کہیں بچھڑ جاتا ہے ۔پروین شاکر نے اردو شاعری کے کینوس پر اپنے لطیف محسوسات کے ریشمی برس کو اپنے جذبات کی روشنائی میں ڈبو کر جس کائنات کا نقش ابھارا ہے اس کی فضائوں میں ٹوٹتے دل کی بازگشت زیادہ سنائی دیتی ہے۔اس بازگشت میں سہاگن کی ہتھیلوں سے مٹتی سرخی اور دور ہوتی بوئے حنا کی بے چین صدا دل کو جڑ سے ہلا دیتی ہے اور دل کے آتش دان میں ناکام حسرتوںکی میٹھی میٹھی آنچ سلگنے لگتی ہے۔ناکام حسرتوں کا جنازہ میرؔ کے یہاں بھی اٹھا لیکن ان دونوں میں ایک خطِ فاصل ہے۔ ان سب وجوحات کی بنا پر پروین شاکر کی شاعری پر زمانے نے یہ مہر لگائی کہ انہوں نے صرف ٹین ایزر کے جذبات کو پیش کیا لیکن زیر نظر مضمون ایک الگ منظر نامہ پیش کرتا ہے۔ایسا اس لیے کہ ایوان ِتحقیق کے در کبھی بند نہیں ہوتے۔ !اس کے دریچے سے ہمیشہ ترو تازہ ہوائیں اندر آتی رہتی ہیںاور تحقیق کا شجر سبز وشاداب رہتا ہے۔
ناقدین ادب پروین شناشی کے دوران موصوفہ کی شاعری پر اپنے دل کش تجزیات پیش کیے اورنسائی شاعری میں ان کا مقام متعین کیالیکن اس ضمن میں ایک اہم پہلوتشنہ لب رہاکہ پروین شاکر کی شاعری میں ہنودی تاریخ کے عناصر بھی موجود ہیں۔میں نے پہلی دفعہ اس پہلوکو زیر نظر مضمون میں بحث کا موضوع بنانے کی کوشش کی ہے جو اب تک ادب کے قاری کی نگاہوں سے اوجھل رہا ہے۔ اس لیے یہ کہنے میں کوئی تعمل نہیں کہ پروین شاکر نے اپنی شاعری کے کینوس پرٹین ایزرکے مسائل،شاعری میں سائنسی اصطلاحات کا استعمال اور صرف اسلامی تاریخ کو ہی نہیں پیش کیاہے بلگہ ہنودی تاریخ کے منظرنامے کوبھی پیش کیا ہے۔ایسا اس لیے کہ ان کے آبائو اجداد کا خمیر اس خطے سے اٹھا تھا جہاں صدیوں سے اس قوم کا بسیرا ہے۔جس کا اپنا ایک مائتھولوجی ہے۔جس میں پیار ومحبت کی سوغات کی تقسیم جب ہوتی ہے تو روح کا پور پور آسودگی محسوس کرتا ہے۔ موصوفہ کے والدشاکر حسین تقسیم ہند کی گھنگور گھٹا اٹھنے سے پہلے کراچی ہجرت کر گئے تھے جہاں پروین شاکرکی پیدائش ۲۴نومبر ۱۹۵۲ء کو کراچی میں ہوئی لیکن اجداد کا خمیرتوہند کی سرزمین حسین آباد،ضلع مونگیر،بہار سے اٹھاتھا ۔ لہذا اس مٹی کی خوشبو پرین شاکر میں منتقل ہوئی جو ان کی شاعری کے چمن کو بھی معطر کرتی ہے۔ایسا اس لیے کہ کبھی وہ خوبصورت ہندی لفظوں کا استعمال کرتی ہیں تو کبھی ہندی مائتھولوجی کے تاریخی کرداروں کی مد د سے اپنے خیال اور جذبات کا اظہار کرتی ہیں تو کبھی پاروتی اورموہن کا ذکر کرتی ہیںجو ہندومائتھولوجی میں طاقت کی علامت متصورر کیے جاتے ہیں تو کبھی ہندوستان کے سینے پر بہنے والی گنگا کا ذکر کرکے اپنے فن کو جلا بخشتی ہیں۔۲۵۰۶کیلو میٹر لمبا یہ دریا ہمالیہ کے گنگوتری سے نکلتا ہے اور کینیا کماری میں جاکر ضم ہوجاتا ہے۔اس دریا کے ساحل پر ماضی میں کئی تہذہیں آباد ہوئیں اورمٹیں۔ اس دریا کا ذکر وید،پوران،رامائین اور مہابھارت میں ملتا ہے۔ ان مذہبی کتابوں کے مطابق ماں گنگا سورگ میں بہتی تھی جس کو لانے کے لیے بھاگیرتھ نے بھگوان شیو سے پرارتھنا کی جس کے لیے بھگوان شیو تیار ہوگئے اور سورگ سے مہا گنگا کو پہلے اپنی جٹا میں بلایا پھر وہاں سے پوتر ماںگنگا دھرتی کے سینے پرآئی۔ہندی مائتھولوجی کے مطابق گنگاہمالیہ کی دوبیٹیوں میں سے ایک ہے۔ عقیدت مندوں کااس پر ایمان ہے کہ گنگا کے پانی سے نروان حاصل ہوتاہے اور اس میں ڈوبکی لگانے سے گناہ دُھلتا ہے۔ لہذا اپنے عزیزواقارب کی چتا کی راکھ کو گنگا میں بہا کر مرنے والوں کی آتما کو شانتی دیتے ہیں اور ہر شبھ کام کرنے سے پہلے اس کا چھڑکائو ضروری سمجھتے ہیں۔اس دریا سے مخاطب ہوکر پروین شاکر کہتی ہیں۔
پھولوں کا تھال لیے تیرے قدموں میں پھر آبیٹھی ہوں
اور تجھ سے اب بس ایک دیا کی طالب ہوں
یوں انت سمے تک تیری جوانی ہنستی رہے
پر یہ شاداب ہنسی
کبھی تیرے کناروں کے لب سے
اتنی نہ چھلک جائے
کہ میری بستیاں ڈوبنے لگ جائیں
گنگا پیاری۔۔! صدِبرگ’’گنگاسے‘‘
بھگوان کرشن بچپن میں بہت نٹ کھٹ تھے۔ان کی ماں یشودھاان سے بہت پیار کرتی تھیں۔ان کی ماںبچپن میں ان کوماکھن بہت زیادہ کھلاتی تھیںجس کے باعث بالک کرشن کو ایسی عادت پڑگئی تھی کہ ماں کی غیر موجودگی میں وہ ماکھن چرا کر کھاتے تھے اس لیے ان کو پیارسے ماکھن چور کہا جاتا تھا۔ جب ماں یشودھابازپرس کرتیں تو کہتے ۔میّا میری میں نہیں ماکھن کھایئو ۔۔۔!ہوش سنبھالنے کے بعد کرشن گائے چرانے جایا کرتے تھے ۔اس دوران ان کے ہاتھ میں بانسری ہوتی تھی گائے چرانے کے دوران جب مرلی کی تان چھیڑتے تو سیکڑوں گوپیاں ان کی طرف کھینچی چلی آتی تھیں۔ان گوپیوں میںرادھا بھی تھیں جس کو کرشن دس سال کی عمر سے جانتے تھے۔ان کی گوپیاں ان کو گوکل کے راجہ،شیام سندر،گردھر،کنہیا،گوپال،گھنشیام،شیام وغیرہ کے نام سے پگارتی تھیں۔گوکل اور وردابن کے گرد گھومتی رادھا اور کرشن کی پریم گاتھا پیارکے رس میں ڈوبی ایک ایسی علامتی کہانی ہے جو روحانیت سے لبریز ہے۔قدیم مائتھولوجی کے مطابق یہ محبت آتما اور پرماتما کی محبت کی ایک علامت ہے۔سلمٰی صدیقی رشید احمد صدیقی کی صاحب زادی تھیں۔انہوں نے مشہور افسانہ نگار کرشن چندر سے شادی کرکے سلمٰی کرشن بن گئیں۔لہذا پروین شاکر ہندی مائتھولوجی کی مدد سے دیکھئے کس طرح اپنے نیک جذبات کولفظوں کا لبادہ پہناتی ہیں۔
تو رادھا ہے اپنے کرشن کی
ترا کوئی بھی ہوتا نام
مرلی تیرے بھیتر باجتی
کسی بن کرتی بسرام
یا کوئی سنگاسن برجتی
تجھے کھوج ہی لیتے شیام
جس سنگ بھی پھیرے ڈالتی
سنجوگ میں تھے گھنشیام
’’ سلمیٰ کرشن‘‘
جب سپنوں میں گوکل کے راجہ سکھیوں کو بدھائی دینے آتے ہیں ایسے میںپریم جل سے گوپیوں کے گاگر بھر بھر جاتے ہیں۔پنگھٹ پر اپنے کنہیا سے ملنے کے لیے گوپییاں ضد کرتی ہیں۔گاگریں منتیںکرتی ہیں۔جب پنگھٹ پر گوپیوں اور کنہیا کا ملن ہوتا ہے اس وقت کنہیاگوپیوں کے گاگر سے اوک بھر بھر کر پریم جل پیتے ہیںاور اپنی پیاس بجھاتے ہیں،مایا لٹاتے ہیں۔ماتھے کی بندیاچراتے ہیں۔تو کبھی پوکھرمیں اسنان کرتی گوپیوں کے کپڑے شاخوں پر رکھ آتے ہیںاورخود درخت پر چڑھ کر مرلی کی تان چھیڑتے ہیں۔جب گوپیوں کی نظران پر پڑتی ہے۔تو پکار اٹھتی ہیں۔
اسی بالک سے نندیا ملے گی
جس نے ماتھے کی بندیا چرائی
گوپیوں سے بھی کھلیں کنہیا
اور ہم سے بھی میٹھی لڑائی
شام!میں توری گیّاں چراوئں
مول لے لے تو میری کمائی
کرشن گوپال رستہ ہی بھولے
رادھا پیاری تو سدھ بھول آئی
’’شام!میں توری گیاں چرائوں‘‘ صدبرگ
یہ ہوا کیسے اڑا لے گئی آنچل میرا
یوں ستانے کی عادت مرے گھنشیام کی تھی
’’ صد برگ‘‘
بحرحال کرشن اور رادھا کی الہامی محبت ،گوپیوں اورگاگروں کی کنہیاسے چاہت،دریائے گنگاکی اہمیت وغیرہ کا ذکر کرکے پروین شاکر نے اس حقیقت پر مہر ثبت کی ہیں کہ پروین شاکرگلستان ادب میں جس چیز کو بھی چھوتی ہیں وہ سونا بن جاتا ہے۔!
ہولڈنگ نمبر1-A،
بی ایل نمبر 23،کیلا بگان ،جگتدل ،نارتھ 24 پرگنہ
(مغربی بنگال)،پن کوڈ: ۷۴۳۱۲۵
mob:9339327323
HNO:1/A,BL.NO:23,KELA BAGAN,JAGATDAL,NORTH 24 PARGANAS,W.B,PIN:743125
(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)
| ادبی میراث پر آپ کا استقبال ہے۔ اس ویب سائٹ کو آپ کے علمی و ادبی تعاون کی ضرورت ہے۔ لہذا آپ اپنی تحریریں ہمیں adbimiras@gmail.com پر بھیجنے کی زحمت کریں۔ |
