صوفیہ شیریں کا افسانہ ’’کہیں پھر تو نہیں‘‘کا تجزیاتی مطالعہ – ڈاکٹر عظیم اللہ ہاشمی

افسانہ’’ کہیں پھر تو نہیں ‘‘راست بیانیہ اسلوب میں لکھا گیا ہے جس میں معاصر موضوع کو ترجیح دی گئی ہے۔بظاہرافسانہ راست بیانیہ اسلوب میں لکھا گیاہے لیکن اس کے باطن میں گہری معنویت ہے جو اپنے عصرکی شدت پسندی اورنئی نسل کے بدلتے رجحان کی تشہیرکرتی ہے۔اس افسانے میں ایک ماں اپنے بیٹے سے پوچھتی ہے کہ وہ اپنے مستقبل کے بارے میں کیا فیصلہ کیا ہے۔؟ بیٹااس وقت ٹی وی پر نیوز سن رہا ہوتا ہے۔ ٹی وی کی خبروں کو سن کربیٹے کو اپنے ملک کی بدلتی فرقہ وارانہ صورت حال اورکشیدگی میںتابناک مستقبل دھندلا نظر آرہا ہے۔لہذا وہ اپنی ماں سے کہتا ہے کہ وہ غیر ملک میں جاکر تعلیم حاصل کرے گااور تعلیم حاصل کرنے کے بعد اسی ملک کا شہری بن جائے گا۔ بیٹے کے اس فیصلے  سے ماں متعجب ہوکر سوال کرتی ہے۔

’’آخرکیوں ۔۔۔؟ایسا کیا ہوگیا میرے بچے کہ تم نے اس ملک سے رشتہ ہی توڑ لینے کا فیصلہ کرلیا۔یاد رکھومنزل تک پہنچنے کے لیے صحیح راستے کا انتخاب ضروری ہے۔ایک غلط فیصلہ پوری زندگی کا رخ بدل دیتا ہے ‘‘   آج کل،مارچ ،2021

مذکورہ اقتباس میں ماں کی ممتا کی جھلک ہے جس کو کشیدکرنے سے جوقیمتی بات سامنے آتی ہے وہ یہ کہ غلط فیصلہ زندگی کے بادباں کو بے ہوا کردیتا ہے۔ افسانے کے متن میں ملک کا کرب ہے جہاں فرقہ واریت کے ساتھ ساتھ اخلاقی بحران شباب پر ہے جہاں پانچ سال کی بچی کی آبروریزی اور قتل کیاجاتاہے،ڈائن کے شبہ میں بزرگ خاتون کو زدوکوب کیاجاتا ہے، اقلیتی طبقہ کے نوجوان کی پیڑ سے باندھ کر پٹائی کی جاتی ہے،جبراً جئے شری رام کہلوانے کی کوشش،ہجومی تشدد اور ایک شخص کو گوشت کھانے کے شبہ میں پیٹ پیٹ کر ہلاک کردیا جاتا ہے۔موب لنچنگ کے ایسے خوفناک ماحول میں ماں کی رگوں میں خون کا منجمدہونا اور بیٹے کی آنکھوں میں خون کا اتر نا غیرفطری اور حیرت انگیز بات نہیں لگتی ہے جس کے سبب ماں یہ سوچنے پر مجبور ہے کہ :

’’موسم کے سرد ہواؤں سے تو میں نے تمہیں بچا لیا پر زمانے کی ان گرم ہواؤں  سے کیسے بچاؤں؟‘‘    آج کل،مارچ ،2021

یہ متن افسانے کاپنچ لائن ہے جومذکورہ افسانے کے پہلے متن کی تردید کرتا ہے کیونکہ متن ثانی سے یہ کرن پھوٹ رہی ہے کہ افسانے کے اختتام تک آتے آتے ماں کو بھی ماحول کی سنگینی کا احساس ہوجاتاہے۔افسانے کا متن اقلیتی طبقے کے اندر پنپی ناامیدی،خوف،بے بسی اور تاریک ہوتی مستقبل کے الجھن نیز ملک میں بڑھتے تشدد کے پیش نظرنئی نسل کی طرف سے اپنی مٹی کو چھوڑ کر دوسرے ملک میں تعلیم حاصل کرنے اور وہیں پر مقیم ہوجانے کے فیصلے کے رجحان سے قاری کو آگاہ کرتا ہے۔ افسانے میں جہاں خوف کے ماحول میں نئی نسل کے چہرے پر غم اور غصہ دونوں کے ملے جلے تاثرات رقص کناں ہیں وہیں ان کے اندر تذبذب،شدید ذہنی کشمکش کی اجاگری بھی ہے۔ اپنے مستقبل سے متعلق ایک انجانا ساخوف اس نسل کے اندر جڑیں پھیلا رہا ہے کہ اب اس ملک میں تمہارے لیے سرکاری نوکری،معقول آمدنی ،رہائشی کوارٹر اور ساتھ ہی ساتھ معاشرے میں عزت و وقارحاصل کرنا دیوانے کے خواب کے مترادف ہے، تب ہی تو جب ماں اپنے بیٹے سے سرکاری نوکری کے بارے میں سوچنے کا مشورہ دیتی ہے تو وہ حیرت سے کہتا ہے۔ ( یہ بھی پڑھیں اکیسویں صدی کی دہلیز پر بنگال میں نِسائی ادب (شاعرات کے حوالے سے)  – ڈاکٹر عظیم اللہ ہاشمی )

’’سرکاری نوکری۔؟اس کے ماتھے پر کئی سلوٹیں ابھریں جیسے وہ یقین اور وہم کے درمیان کھڑا ہو‘‘        آج کل،مارچ ،2021

نئی نسل کا یقین اور وہم کے زیرو پوائنٹ پر کھڑا ہونا یقینا تشویشناک بات ہے۔ان کاشکوک کے پادان پر کھڑا ہوناملک اور قوم دونوں کے لیے نیک شگون نہیں ہے کیونکہ وطن کی مستقبل کا دار و مدار اسی نسل پر ہوتا ہے۔افسانے میں بیٹے کے فیصلے سے ماں کے دل پر جوسنگ گرتا ہے اس کا کرب اس کو ماضی کی طرف لے جاتا ہے جہاں وہ بڑی منتوں سے اس کوپائی ہے ۔اس کے لیے گھنٹوں دعائیں مانگی ہے۔۔گرم تیل کی مالش کی ہے ،گود میں لے کر رات رات بھر اونگھتی رہی ہے کہ بسترپر جاتے ہی اس کی نید نہ ٹوٹ جائے۔دروشریف پڑھ پڑھ کر اس پر دم کی ہے کہ زمانے کے سرد وگرم ہواؤں کے اثرات سے وہ محفوظ رہے ۔ظاہر ہے ایسے میں ممتا بیٹے کے اس یکطرفہ فیصلے پر یہ سوال پوچھنے پر حق بجانب ہے کہ۔

’’تم ہمیں یہاں  تنہا چھوڑ کر دوردیش میں اپنی دنیا بسالوگے اور یہ فیصلہ تم نے صرف سترہ سال میں ہی کرلیا۔‘‘      آج کل،مارچ ،2021

اگر غور سے دیکھا جائے تو سترہ برس کی عمرقانون کی نظر میں نابالغ کی عمر ہے لیکن بدلے ماحول میں اگر ایک نابالغ بچہ بالغ نظری کا مظاہرہ کرے تو قاری کو مایوس کن صورت حال کا احساس ہونا ناگزیرہوجاتا ہے ۔گھر کی بدتر مالی حالت میں بیٹے کی بہتر مستقبل کی فکر رخشندہ روحی مہدی کاافسانہ’’ وہ بڑا آدمی‘‘میں بھی ہے اور یہاں بھی لڑکا کینڈا میں جاکر بس جاتا ہے لیکن ۱۷برس گذرجانے کے بعد وہ اپنے وطن کی مٹی پر اس وقت پہنچتا ہے جب اس کی ماں مٹی میں دفنا دی گئی ہوتی ہے۔سلمٰی صنم کا افسانہ’’ پت جھڑ کے لوگ‘‘میں بھی اس کرب کا اظہارہوا ہے جہاں اولاد بڑھاپے میں ماں باپ کو چھوڑدیتے ہیں کا کرب ابھر کر سامنے آیا ہے اور یہ احساس قاری کے کانوں تک پہنچتا ہے کہ سیما ساری عمر سایہ دار شجر بن کر سب کو چھائوں دی لیکن اب دھوپ کی تمازت سہنا اس کا مقدرہے کہ بیٹے ،پوتے اور بہوسب کے سب حقارت بھری نگاہ سے دیکھتے ہوئے آنکھوں سے دور ہوگئے اور اس کے گھونسلے سے نکل کر زندگی کی شاخ پراپنا نیا آشیانہ بنالیئے۔ مذکورہ افسانوں کے تراشیدہ بیٹے کے کرداروں سے اگر اس افسانے کے بیٹے کے کردار کا تقابلی جائزہ لیا جائے تو اس نکتے پرآسانی سے پہنچا جاسکتا ہے کہ صوفیہ شیریں نے اپنے اس افسانے میں بیٹے کا جو کردار تراشا ہے وہ ناخلف اولاد کی نہیں ہے بلکہ اس کے اندر والدین کے مرتبے کا خیال جاگزیں ہے ۔وہ اپنی ماں سے وعدہ کرتا ہے کہ غریب الوطن میں P.Rملنے کے بعدوہ اپنے والدین کو وہاں بلا لے گا۔گویا  صوفیہ شیریں یہ کہنا چاہتی ہیں کہ ا بھی بھی اولاد کا ایک ایساطبقہ ہے جو والدین کی قدر وقیمت اور مرتبے کا انکاری نہیں ہے۔ہر افسانہ نگار اپنے فن پارے سے قاری تک کچھ نجی خیال کو پہنچانا چاہتاہے۔صوفیہ شیریں بھی نئی نسل کے دل ودماغ میں ایک بات منتقل کرنا چاہتی ہیں۔ (یہ بھی پڑھیں پروین شاکر کی شاعری میں ہنودی تاریخ کا منظرنامہ – ڈاکٹر عظیم اللہ ہاشمی )

’’ایسا کیا ہے غیر ملک میں جو اپنے ملک میں نہیں ؟تمہاری جنریشن کا یہ تو مسئلہ ہے کہ تم لوگ ٹی وی اور فلموں میں مغربی ممالک کی چکاچوند اور دلفریب دنیا دیکھ کر ہی فیصلہ کرلیتے ہو۔پر یادرکھو،دور کا ڈھول سہانا ہوتا ہے۔‘‘ آج کل،مارچ ،2021

اس درس کو سننے کے بعد بیٹے کے چہرے پر الجھن کی لکیر گہری ہوجاتی ہے۔ اس کے Bodylanguageسے ایسا محسوس ہوتا ہے جیسے وہ جو کچھ کرنا چاہتا ہے وہ اس کی فطری سوچ نہیں ہے بلکہ ایک انجانی قوت اس کو اس کی طرف ڈھکیلنے کی کوشش کررہی ہے اس لیے وہ ماں کے مشورے سے متفق نہیں ہے۔ مذکورہ متن سے جہاں کومل ذہن پر ٹی وی اور فلموںکے بد اثرات اور مغربی ممالک کی چکاچونددنیا کی دلفریبی کااشارہ ملتا ہے وہیں مادر وطن کی مٹی سے محبت کی خوشبو بھی آتی ہے۔ ( یہ بھی پڑھیں پروین شاکر کی شاعری میں سائنسی اصطلاحات – ڈاکٹر عظیم اللہ ہاشمی )

بہر حال افسانے کو سادہ زبان،چست اور درست مکالمے دلچسپ بناتے ہیںجس میں افسانے کی شعریات سے انحراف دیکھائی نہیں دیتا ہے ۔ افسانہ فرقہ واریت کے  بطن سے پنپے متعددمسائل کی نشاندہی کررہا ہے جس کی لپیٹ میں نئی نسل آگئی ہے جس کے پیش نظر ان کے سامنے ہجرت ایک بارپھر زیر غور ہے لیکن صوفیہ شریں کے افسانے کا یہ متن اس ہجر ت کو بڑھاوا دینے کی بجائے نئی نسل کو یہ سمجھانے کی کوشش کرتا ہے جس سے اپنی مٹی سے محبت کی خوشبو آتی ہے۔

’’ہم تو جہاں بھی جائیں گے یہ مٹی ہمارے جڑوں سے لپٹی رہے گی۔ہم چاہ کر بھی اس مٹی سے الگ نہیں ہوسکتے ۔کئی دہائیوں پہلے بھی کچھ لوگوں نے ایسی کوشش کی تھی۔نتیجہ تاریخ کی کتابوں سے کہیں زیادہ روندے ہوئے جسموں اور زخم خوردہ ـذہنوں پر درج ہیں اور پھر ہم کیوں جائیں گے؟ہمارے آبا و اجداد نے فیصلے کی گھڑی میں اسی مٹی کو چنا۔اسی مٹی کی حفاظت میں اپنی جانیں قربان کیں۔‘‘        آج کل،مارچ ،2021

یقینا آپ کو اس اقتباس میں اپنے اجداد کی مٹی کی بھینی بھینی خوشبو کا احساس ہوا ہوگا۔صوفیہ شیریں اپنے اس افسانے سے اسی خوشبو کو چارسو پھیلانا چاہتی ہیں تاکہ وطن کی شاخوں پر ہریالی قائم ودائم رہے نیزیہ برگ وبار سے بارآوررہیں۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ ادبی میراث کاان سےاتفاق ضروری نہیں)